ၵူၼ်းၼုမ်ႇတႆးၼႂ်းဝဵင်းၵဵင်းမႆႇၶွၼ်ႈႁႅင်းၵၼ် ၵဵပ်းငိုၼ်း တႃႇၸွႆႈထႅမ်ၵူၼ်းထူပ်းၽေးသိုၵ်း ၼႂ်းၸိုင်ႈတႆးပွတ်းႁွင်ႇ ၼႂ်းၶိုၼ်းလိူၼ်ႁူၵ်းလွင်ႈ 7 ၶမ်ႈ ဝၼ်းပႆၶိုၼ်ႈထၢတ်ႈလွႆၶမ်း  ။

ဝၼ်းတီႈ 27/05/2016 ၶၢဝ်းယၢမ်းၵၢင်ၶမ်ႈ တူၵ်းမႅၼ်ႈဝၼ်းလိူၼ်ႁူၵ်းလွင်ႈ 7 ၶမ်ႈ ဝၼ်းသုၵ်း ဢိင် ၼိူဝ် ပဵၼ်ၾိင်ႈငႄႈႁိတ်ႈႁွႆးပီႈၼွင်ႉၵူၼ်းမိူင်းၵဵင်းမႆႇ ပႆၶိုၼ်ႈထၢတ်ႈလွႆၶမ်း တႃႇႁဵတ်း တၢင်းလီ  ၼၼ်ႉသေ ပီႈၼွင်ႉတႆးၸိူဝ်းႁွတ်ႈ ၵဵင်းမႆႇ ၵေႃႈမႃးၶဝ်ႈႁူမ်ႈပႆၶိုၼ်ႈလွႆတင်းၼမ် ။


ၵူၼ်းၼုမ်ႇတႆး ႁွတ်ႇၵဵင်းမႆႇၵမ်ႈၽွင်ႈ ၸိူဝ်းႁူႉပုၼ်ႈၽွၼ်းၶွၼ်ႈတုမ်ၵၼ်ႁပ်ႉငိုၼ်းလူႇပိူဝ်ႈ တႃႇတေၸွႆႈထႅမ်မိူဝ်း တီႈပီႈၼွင်ႉၸိူဝ်းထူပ်းၽေးသိုၵ်း ၼႂ်းၸိုင်ႈတႆးပွတ်းႁွင်ႇ ။


ၼၢင်းသႅင်ယွၼ်း လၢတ်ႈဝႃႈ - “ ႁဝ်းၶႃႈမႃးယူႇတီႈၼႂ်းမိူင်းထႆးသေတႃႉ ႁဝ်းၶႃႈလႆႈႁၼ်ၶၢဝ်ႇပီႈၼွင်ႉ ၵူၼ်းမိူင်းတႆးထူပ်းၽေးသိုၵ်းၸိူင်ႉၼႆၵေႃႈပဵၼ်ဢၼ်ၸႂ်ဢမ်ႇလီတႄႉၶႃႈ ။ ၵွပ်ႈၼၼ်လႄႈႁဝ်းၶႃႈ လၢႆလၢႆၵေႃႉၸင်ႇဢုပ်ႇၵၼ်သေမႃးႁပ်ႉလူႇၶၢမ်ႇၶႃႈဢေႃႈ ယိၼ်းၸူမ်းၶွပ်ႈၸႂ်ထိုင်ပီႈၼွင်ႉၸိူဝ်းမႃးႁူမ်ႈလူႇ ႁူမ်ႈၸွႆႈ။ ႁဝ်းၶႃႈတေဢဝ်ငိုၼ်းၸိူဝ်းၼႆႉ ၸွႆႈသူင်ႇပၼ်ၼႂ်းမိုဝ်းၵူၼ်းထူပ်းၽေးသိုၵ်းၶႃႈဢေႃႈ။” - လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈၼင်ႇၼႆ ။


မိူဝ်ႈဝၼ်းတီႈ 19/05/2016 လိူၼ် 6 မႂ်ႇ14 ၶမ်ႈဝၼ်းၽိတ်ႈ ၼၼ်ႉၵေႃႈပဵၼ် ၾိင်ႈႁိတ်ႈႁွႆးပီႈ ၼွင်ႉဝဵင်းၵဵင်းမႆႇ ပႆၶိုၼ်ႈလွႆသူးထဵပ်ႈ ။ ပီႈၼွင်ႉတႆးၸိူဝ်း ႁွတ်ႈၵဵင်းမႆႇၵေႃႈ ပႆၶိုၼ်ႈတၢင်းၼမ် ။  မိူဝ်ႈၼၼ်ႉၵေႃႈ ၸုမ်းၵူၼ်းၼုမ်ႇၸုမ်းၼႆႉ လႆႈၸွႆႈၵဵပ်းငိုၼ်း တႃႇၵူၼ်းထူပ်းၽေးသိုၵ်းၸိုင်ႈတႆး ပွတ်းႁွင်ႇၵမ်းၼိုင်ႈယဝ်ႉ ။ မိူဝ်ႈၼၼ်ႉ ၵဵပ်းလႆႈငိုၼ်းၸွႆႈ 1670 ဝၢတ်ႇ ။


ယွၼ်ႉပၢင်တိုၵ်း တပ်ႉသိုၵ်းပူတ်းပွႆႇတဢၢင်း TNLA တင်းၶွင်ႊသီႊ ဢဝ်ၶိုၼ်းၸိုင်ႈတႆး RCSS/SSA လႆႈပဵၼ်ပၢင်တိုၵ်းၵၼ်ၶိုၼ်းႁၢဝ်ႈႁႅင်းမိူဝ်ႈႁူဝ်လိူၼ်မေႊ ၼၼ်ႉလႄႈသင် ၊ ပၢင်တိုၵ်းယွၼ်ႉသိုၵ်းမၢၼ်ႈႁႅၼ်းသိုၵ်း လေႃႇတိုၵ်း တပ်ႉသိုၵ်းၸိုင်ႈတႆး SSPP/SSA  ၊ သိုၵ်းၶၢင် KIA   လႄႈသိုၵ်းတဢၢင်း TNLA  မိူဝ်ႈၵၢင်လိူၼ် မေႊ ၼႆႉလႄႈသင် ၊ ႁဵတ်းႁႂ်ႈၵူၼ်းမိူင်းၼပ်ႉႁူဝ်ႁဵင် လႆႈပၢႆႈယၢၼ်ႁိူၼ်းယေးတီႈယူႇ ။ ယွၼ်ႉသိုၵ်းမၢၼ်ႈၶဝ်ႈၽဝ်ႁိူၼ်းၵူၼ်းဝၢၼ်ႈဝူဝ်းလူင် ၼႂ်းၸေႈဝဵင်းၵျွၵ်ႉမႄးလႄႈ ဝၢၼ်ႈပေႃးႁၢမ်း ၊ ၵူၼ်းဝၢၼ်ႈလႆႈသွၼ်ႈယူႇၸွမ်းဝတ်ႉၵျွင်းမုၼ်ၸဝ်ႈပၢင်ႇၵႅၼ်ႇမီးႁိမ်းၸမ် 1000 ႁၼ်ႉတေႃႇဝၼ်းမိူဝ်ႈၼႆႉ ။ ၼႂ်းၸိုင်ႈတႆးပွတ်းႁွင်ႇ ၸေႈဝဵင်းၼမ်ႉၶမ်း ၵေႃႈ သိုၵ်းတဢၢင်းၶဝ်ႈၽဝ်ဝၢၼ်ႈႁူဝ်ပၢင်ႇ ဢိူင်ႇမိူင်းဝုၺ်းလႄႈၵူၼ်းဝၢၼ်ႈ ႁိမ်းၸမ် 1000 ႁၢမ်းႁႅၵ်းတီႈယူႇဝႆႉႁၼ်ႉထိုင်ဝၼ်းမိူဝ်ႈၼႆႉ ။