ပၢင်ၽိုၵ်းၾွၼ်ႉမေႃသွၼ် တႃႇသွၼ်လိၵ်ႈတႆးၼႂ်းႁူင်းႁဵၼ်းလူင်ပွင်ၸိုင်ႈ ဝဵင်းတၢင်ႉယၢၼ်း ၵေႃလိၵ်ႈ လၢႆးလႄႈၵူၼ်းၼုမ်ႇႁူမ်ႈၵၼ်ၸတ်းႁဵတ်း မီးၵူၼ်းမႃးၶိုၼ်ႈႁဵၼ်းၸမ် 200 ၵေႃႉ ပိူဝ်ႈႁႂ်ႈမေႃသွၼ်မီး ၼမ်ႉၵတ်ႉတဵမ်ထူၼ်ႈလႄႈလိၵ်ႈတႆးႁႂ်ႈလႆႈႁိူဝ်ႈႁိူင်းၼႆ ၵူၼ်းၼႂ်းပိုၼ်ႉတီႈလၢတ်ႈ ။

ဝၼ်းတီႈ 20/04/-19/05/2016 ၶၢဝ်းတၢင်း လိူၼ်ၼိုင်ႈ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတၢင်ႉယၢၼ်း ၸတ်းႁဵတ်းပၢင်ၽိုၵ်းၾွၼ်ႉမေႃသွၼ် တႃႇသွၼ်လိၵ်ႈတႆး ၼႂ်းႁူင်းႁဵၼ်းလူင် ပွင်ၸိုင်ႈ ။ ၵေႃလိၵ်ႈလၢႆး လႄႈၾိင်ႈငႄႈတႆး ဝဵင်းတူၼ်ႈတီး သူင်ႇ ၶူးပူင်သွၼ်မႃး 7 ၵေႃႉ ။ ပူင်သွၼ်ပၼ် ပိူင်ၵၢၼ်သွၼ် လိၵ်ႈ ၊ လၢႆးလၢတ်ႈၵႂၢမ်းဢိင်းၵလဵတ်ႈ ၊ ပိုၼ်ႉထၢၼ်ၵၢၼ် ၸႂ်ႉၶွမ်ႊၽိဝ်ႊၻိူဝ်ႊ ၊ လိၵ်ႈတႆး - ပႃးၸဵမ်လွင်ႈၾိင်ႈငႄႈ ၾိင်ႈထုင်းၸိူဝ်းၼႆႉ ၶၢဝ်းယၢမ်းသွၼ်ၼိုင်ႈ ဝၼ်းလႂ် 3 ပွၵ်ႈ - 08:00-12:00 ၊ ဝၢႆးဝၼ်း 01:00 – 04:00 လႄႈၵၢင်ၶမ်ႈ 07:00-08:00 မူင်း ။


လုင်းၸၢႆးၶမ်းလိုၼ်း ႁူဝ်ပဝ်ႈၵေႃလိၵ်ႈလၢႆႈ လၢတ်ႈဝႃႈ - “ ၵူၼ်းၼုမ်ႇၵူႈၵေႃႉထုၵ်ႇ လီမေႃဢိင်းၵလဵတ်ႈ ပေႃးႁဝ်းမေႃလိၵ်ႈဢိင်းၵလဵတ်ႈၸိုင် ႁဝ်းတေၸႂ်ႉၵၢၼ်လႆႈ မိူၼ်ၼင်ႇၸႂ်ႉၶွမ်ႊၽိဝ်ႊၻိူဝ်ႊ ၊ ၵႂႃႇတႃႈပႆတၢင်း ၊ လွင်ႈၵပ်းသိုပ်ႇၸိူဝ်းၼႆႉ ။ မိူၼ်ၼင်ႇတီႈမိူင်းသိင်ႇၶၿူဝ်ႊၼႆႉ ယွၼ်ႉၽူႈဢွၼ်ႁူဝ် ၶဝ်ဢွၼ်ႁဵၼ်း လိၵ်ႈဢိင်းၵလဵတ်ႈ လႄႈဝၢၼ်ႈမိူင်း ၊ ၶိူဝ်းၵူၼ်းၶဝ်ၵေႃႈၸင်ႇၶိုၼ်ႈယႂ်ႇ ။ ၵွပ်ႈၼၼ်လႄႈၶႂ်ႈ တိုၵ်းသူၼ်း ၵူၼ်း ၼုမ်ႇၵူႈတီႈၵူႈ ၸႄႈဝဵင်းႁႂ်ႈဢွၼ် ၵၼ်လဵပ်ႁဵၼ်းလိၵ်ႈ ဢိင်းၵလဵတ်ႈဝႃႈ ” ၼႆ ။


ၽူႈလဵပ်ႈႁဵၼ်းၵေႃႉၼိုင်ႈလၢတ်ႈဝႃႈ - “ ၵေႃလိၵ်ႈလၢႆးတီႈတၢင်ႉယၢၼ်းၼႆႉမီးသုၼ်ႇလႆႈၸတ်းႁဵတ်း ပၢင်ၽိုၵ်း ၾွၼ်ႉမေႃသွၼ်ၼႂ်းဢထၵ (1) လႄႈသွၼ်လိၵ်ႈတႆးၼႂ်းႁူင်းႁဵၼ်းလူင်ပွင်ၸိုင်ႈၵမ်းလဵဝ်ၸိူင်ႉၼႆၼႆႉပဵၼ်ဢၼ်ႁၢၼ်ႉၸႂ်ယိၼ်းၸူမ်းၸွမ်းတႄႉၶႃႈ ။ တၢင်ႇဝဵင်းၼႆႉဢမ်ႇပႆႇမီးသုၼ်ႇလႆႈၸိူင်ႉၼႆ ၵွပ်ႈၼၼ်လႄႈပေႃး ပဵၼ်လႆႈႁဝ်း လူဝ်ႇၶတ်းၸႂ်သုတ်ႉၸူးဢဝ်လိၵ်ႈတႆးၶဝ်ႈၼႂ်းႁူင်းႁဵၼ်းလူင်ပွင်ၸိုင်ႈ ၊ ႁႂ်ႈလိၵ်ႈတႆးသွၼ်လႆႈၼႂ်းႁူင်း ႁဵၼ်းလူင် ပွင်ၸိုင်ႈ ၵူႈဝဵင်း ၊ ပေႃးႁဝ်းၶတ်းၸႂ်တႄႉဝၼ်းၼိုင်ႈမႃး တေပဵၼ်မႃးယူႇ ” - ဝႃႈၼႆ ။


ၵဵဝ်ႇလူၺ်ႈပၢင်ၽိုၵ်းၾွၼ်ႉမေႃသွၼ်ၼႆႉမိူဝ်ႈပီၵၢႆ ပီး2015/05/17-20 သင်ၶၸဝ်ႈ ႁူဝ်ပဝ်ႈလႄႈ လုၵ်ႈၸုမ်းၵေႃ လိၵ်ႈလၢႆးလႄႈၾိင်ႈငႄႈတႆး တၢင်ႉယၢၼ်း ဢိၵ်ႇလူၺ်ႈ ၸုမ်းၵူၼ်းၼုမ်ႇ တၢင်ႉယၢၼ်း ဢွၼ်ႁူဝ်ၸတ်း ႁဵတ်းပၢင်ၽိုၵ်းၾွၼ်ႉမေႃသွၼ်လိၵ်ႈတႆး တႃႇသွၼ်ၼႂ်းႁူင်းႁဵၼ်းလူင်ပွင်ၸိုင်ႈ ၸတ်းႁဵတ်းတီႈ ဝတ်ႉဢူမုၼ် ထမ်းႁူမ်ႈသႃႇ ပွၵ်ႉ 4 ဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ ။ မေႃသွၼ်တင်းမူတ်း မီး 190 ၵေႃႉ ၊ ၼႂ်း 16 ဢိူင်ႇ ။


ၼႂ်းၸႄႈဝဵင်းတၢင်ႉယၢၼ်းၼႆႉႁူင်းႁဵၼ်းလူင် ပွင်ၸိုင်ႈဢၼ်ပိုတ်ႇဝႆႉ မီးၸၼ်ႉဢွၼ်ႇ ၸၼ်ႉၵၢင် လႄႈ ၸၼ်ႉသုင် ။ ၸၼ်ႉသုင် ဢထၵ သမ်ႉမီး 2 လင် ၊ ၸၼ်ႉၵၢင်မီး 1 လင် ၊ ၸၼ်ႉဢွၼ်ႇတႄႉမီး 117 လင် ။