ဝဵင်းတၢင်ႉယၢၼ်းၸတ်းပၢင်ပွႆးလိူၼ်ႁူၵ်းမူၼ်းလႄႈပွႆးလူင်းပၢင်သွၼ်ႁူင်းႁဵၼ်းထမ်မ မီးမေႃသွၼ် ၊ သင်ၶၸဝ်ႈ ၊ လုၵ်ႈႁဵၼ်းၶဝ်ႈႁူမ်ႈတင်းၼမ် ။

ဝၼ်းတီႈ21/05/2016 ဝၼ်းလိူၼ်ႁူၵ်းမူၼ်းၼႆႉသင်ၶလႄႈ ပေႃႈမႄႈပီႈၼွင်ႉၵူၼ်းမိူင်းတၢင်ႉယၢၼ်း ႁူမ်ႈၵၼ်ၸတ်းႁဵတ်းပၢင်ပွႆးဝၼ်းလိူၼ်ႁူၵ်းမူၼ်းလႄႈပွႆးလူင်းပၢင်သွၼ်ႁူင်းႁဵၼ်းထမ်မ မီးႁူင်းႁဵၼ်း ထမ်မတင်းမူတ်း 50 တီႈ လုၵ်ႈႁဵၼ်းဢၼ်ဢွင်ႇပူၼ်ႉၸၼ်ႉမီး 280 ပၢႆ မီးၽူႈယႂ်ႇၵူၼ်းလူင် ၊ ၾၢႆႇ ဢုပ်ႉပိူင်ႇ ၊ သင်ၶၸဝ်ႈ ၊ ၵူၼ်းမိူင်းၶဝ်ႈႁူမ်ႈတင်းၼမ် ၸတ်းႁဵတ်းၵႂႃႇတီႈဝတ်ႉ (ၵျွင်းၵၢင်ဝဵင်း ) ပွၵ်ႉ 4 ဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ ။


ၸဝ်ႈပၺ်ၺႃသႃႇမိ ႁူဝ်ပဝ်ႈလူင်ႁူင်းႁဵၼ်းထမ်မ လၢတ်ႈဝႃႈ - “ လုၵ်ႈဢွၼ်ႇဝၼ်းမိူဝ်ႈၼႆႉ တေပဵၼ် ၵူၼ်းလူင်းမိူဝ်းၼႃႈ ၊ ႁႂ်ႈလုၵ်ႈဢွၼ်ႇၵူၼ်းၼုမ်ႇမီးထမ်းယူႇၼႂ်းၸႂ် ယႂ်ႇမႃးႁႂ်ႈပဵၼ်ၵူၼ်း ၵတ်ႉလႄႈပဵၼ်ၵူၼ်းလီ ” ။


လုင်းထုၼ်းတဵင်း ၾၢႆႇဢုပ်ႉပိူင်ႇ ဝဵင်းတၢင်ႉယၢၼ်း လၢတ်ႈဝႃႈ - “ ႁဝ်းၵူႈၵေႃႉထုၵ်ႇလီၸွႆႈၵၼ်ႁၵ်ႉ သႃပႂ်ႉပႃးၾိင်ႈငႄႈႁိတ်ႈႁွႆးႁဝ်း ၼင်ႇႁိုဝ်ပေႃးတေဢမ်ႇႁၢႆ လိူဝ်ၼၼ်ႉႁႂ်ႈ တိုၵ်းသူၼ်းပေႃႈမႄႈ ပၼ်ႁႅင်းဢီးလုၵ်ႈဢွၼ်ႇႁႂ်ႈၶတ်းၸႂ်ႁဵတ်းဢဝ်လိၵ်ႈလၢႆးၸိူဝ်ႉၶိူဝ်းၸဝ်ႈၵဝ်ႇ ”။


ၵဵဝ်ႇလူၺ်ႈလွင်ႈပၢင်သွၼ်လိၵ်ႈတႆးၼႆႉသေပူၼ်ႉမႃးမိူဝ်ႈဝၼ်းတီႈ 20/04/-19/05/2016 ၵေႃလိၵ်ႈ လၢႆးလႄႈၾိင်ႈငႄႈတႆး ဝဵင်းတၢင်ႉယၢၼ်း ၸတ်းႁဵတ်းပၢင်ၾိုၵ်းၽွၼ်ႉမေႃသွၼ်တႃႇသွၼ် လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈ ။ ၵေႃလိၵ်ႈလၢႆး လႄႈၾိင်ႈငႄႈတႆး ဝဵင်းတူၼ်ႈတီးသူင်ႇၶူးပူင်သွၼ်မႃး 7 ၵေႃႉ ။ ပူင်သွၼ်ပၼ် ပိူင်ၵၢၼ်သွၼ်လိၵ်ႈ ၊ လၢႆးလၢတ်ႈၵႂၢမ်းဢိင်းၵလဵတ်ႈ ၊ ပိုၼ်ႉထၢၼ် ၵၢၼ် ၸႂ်ႉၶွမ်ႊၽိဝ်ႊၻိူဝ်ႊ ၊ လိၵ်ႈတႆး – ပႃးၸဵမ်လွင်ႈၾိင်ႈငႄႈ ဢၼ်ၵိုၵ်းၵပ်းၸၢဝ်းၶိူဝ်းမႃး ။