ၽွင်းႁူဝ်လိူၼ်မေႊၼႆႉ ယွၼ်ႉၾူၼ်လူမ်းလူင်ႁႅင်း ပတ်ႉပဝ်ႇဢဝ်ႁေႃၵဝ်ႇၸဝ်ႈၾႃႉ မိူင်းပၢင်လွင်း ၊ ဢၼ်တေမႄးၵေႃႇၵုမ်းလုမ်းလႃးသၢင်ႈႁဵတ်းမႂ်ႇ လူႉၵွႆၵႂႃႇ ။


ပူၼ်ႉမႃးမိူဝ်ႈဝၼ်းတီႈ 01/05/2016 ၊ ႁူဝ်ၶမ်ႈယၢမ်း 6 မူင်းၶိုင်ႈ ၊  ၾူၼ်လူင်လူမ်းလူင်မႃးႁႅင်းလႄႈပတ်ႉထွင်းဢဝ်ႁေႃၵဝ်ႇၸဝ်ႈၾႃႉ မိူင်းပၢင်လွင်း ၊ ဢၼ်ပဵၼ်ႁေႃၵဝ်ႇသဝ်ႈဝဝ်းမွင်ဝႆႉ ၊ ဢၼ်မီးတီႈပွၵ်ႉဢွၵ်ႇ ၸႄႈဝဵင်းပၢင်လွင်း (ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း) ၵူၼ်ႇပင်းလူႉၵွႆၵႂႃႇ ။

ၵဵဝ်ႇၵပ်းလွင်ႈၼႆႉ ၺၢတ်ႈ (ၺႃတိ) သၢႆသိုပ်ႇၶိူဝ်းၸဝ်ႈၾႃႉပၢင်လွင်း ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ လၢတ်ႈဝႃႈ - လွင်ႈၼႆႉ ၵိူတ်ႇၶိုၼ်ႈမိူဝ်ႈဝၼ်းတီႈ 1 လိူၼ်မေႊၼႆႉ ။ မိူဝ်ႈႁူဝ်ၶမ်ႈၼၼ်ႉ ၵူၼ်ႇပင်းၼႃႈတၢင်းတူၵ်း ။ ၵူၺ်းၵႃႈ ၵၢင်ၶိုၼ်းမႃးၵေႃႈ ၾူၼ်တူၵ်းထႅင်ႈလႄႈ ၼႂ်ဝၼ်းတီႈ 2 မွၵ်ႈ 01:20 မိၼိတ်ႉၼၼ်ႉ ၼႃႈတၢင်းႁွင်ႇ သိုပ်ႇၵူၼ်ႇပင်းလူင်းထႅင်ႈ - ဝႃႈၼႆ ။


ဢၼ်ၵူၼ်ႇပင်းၼႆႉ ပဵၼ်ႁေႃလူင် ၊ ၵိုတ်းႁွင်ႈၶဵင်ႇၽြႃး လႄႈ ၼႃႈတၢင်းဢွၵ်ႇ ပႆႇၵူၼ်ႇပင်း ၊ ၵွပ်ႈဝႃႈသဝ်လၵ်းမၼ်း ယင်းတိုၵ်ႉလီယူႇ ၊ ၵူၺ်းၵႃႈ ပေႃးဝႃႈၽေးသၽႃဝၼမ်တႄႉ ဢမ်ႇၸၢင်ႈဝႃႈ ။ လွင်ႈၶူဝ်းၶွင်ၵဝ်ႇ ၶူဝ်းၶွင်မီးၵႃႈၶၼ်ၼႂ်းႁေႃၼႆႉ ဢမ်ႇလႆႈလူႉသုမ်းသင် ၊ ၵွပ်ႈဝႃႈ ၸဵမ်မိူဝ်ႈႁၼ်ႁၢင်ႈၾၢင် ႁေႃၵဝ်ႇပူၼ်ႉတီႈၼၼ်ႉ လႆႈဢဝ်ၶူဝ်းၶွင်ၶၢႆႉလူင်းမူတ်းယဝ်ႉ - ၺၢတ်ႈ(ၺႃတိ) သိုပ်ႇၶိူဝ်းၸဝ်ႈၾႃႉ သိုပ်ႇလၢတ်ႈ ။


ဢွၼ်ၼႃႈၼၼ်ႉ ၼႂ်းဝၢင်းႁေႃၼႆႉ တင်းမူတ်းမီးႁေႃ 3 လင် ။ 1. ႁေႃသွင်ႇၾႆး ။ 2. ႁေႃဢွၼ်ႇလင်ၼိုင်ႈ ။ 3. ႁေႃလူင်။ ဢွၼ်တၢင်းမီးႁေႃၼမ်ဝႆႉ ၊ ၵူၺ်းၵႃႈဝၢႆးမႃး ႁေႃၵမ်ႈၽွင်ႈလႄႈ တီႈလိၼ်ၵမ်ႈၽွင်ႈၼၼ်ႉ မႄႈထဝ်ႈၵေႃႉပဵၼ်မေးၸဝ်ႈၾႃႉ မိူင်းပၢင်လွင်း ဢဝ်ၸႅၵ်ႇၶၢႆပၼ်တၢင်ႇၵေႃႉ - ၼႆယဝ်ႉ ။


တေႃႇထိုင်မိူဝ်ႈလဵဝ် ၵေႃႉပဵၼ်မေးၼၢင်းၸဝ်ႈၾႃႉ မိူင်းပၢင်လွင်းၼႆႉ ယင်းတိုၵ်ႉမီးယူႇ ၊ ၸိုဝ်ႈဝႃႈ မႄႈပႃႈလႃႉၸဵၼ်ႇ ။ မၼ်းၸဝ်ႈယူႇသဝ်းဝႆႉတီႈ ႁေႃဢၼ်ပဵၼ်သွင်ႇၾႆးၼၼ်ႉ ။


တီႈႁေႃပၢင်လွင်းၼႆႉ မိူဝ်ႈလိူၼ်ၾႅပ်ႊၿိဝ်ႊရီႊ ပီ 2015 ၼၼ်ႉ ႁူဝ်ပဝ်ႈလူင် ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းယွတ်ႈသိုၵ်း ယၢမ်ႈၵႂႃႇႁွတ်ႈၽႅဝ်ယဵမ်ႈတူၺ်း ။ မၼ်းၸဝ်ႈၵေႃႈလၢတ်ႈဝႃႈ တေၸွႆႈမႄး ၵေႃႇၵုမ်းလုမ်းလႃး ၊ တေႁပ်ႉပဵၼ်ၸဝ်ႈတႃႇၼမႆႉပႅၼ်ႈ ။ လွင်ႈၵႃႈမေႃမိုဝ်းၶဝ်သမ်ႉ ပီႈၼွင်ႉၵူၼ်းမိူင်းပၢင်လွင်းတေႁူမ်ႈၵၼ်ဢွၵ်ႇ ။ မိူဝ်ႈလဵဝ် ၸုမ်းမေႃမိုဝ်းတႃႇမႄးၵေႃႇၵုမ်းမၼ်းမီးယဝ်ႉ ၊ ၵူၺ်းၵႃႈ တိုၵ်ႉမီးပၼ်ႁႃလွင်ႈငိုၼ်းတွင်း ငိုၼ်းၵွင်ၵၢင် - ၺၢတ်ႈ (ၺႃတိ) သိုပ်ႇၶိူဝ်းၸဝ်ႈၾႃႉပၢင်လွင်း သိုပ်ႇလၢတ်ႈထႅင်ႈ ၼင်ႇၼႆ ။