တႃႇတေသၢင်ႈလွင်ႈၽွမ်ႉႁူမ်ႈပီႈၼွင်ႉတႆးၼႂ်းၵဵင်းမႆႇ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဝွၵ်ႇၸိူၼ်း ၵူႈမူႇၵူႈၸုမ်းၶဝ်ႈဢုပ်ႇဢူဝ်း ။

28/05/2016 ၼႆႉၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဝွၵ်ႇၸိူၼ်းၸုမ်းပီႈၼွင်ႉတႆးၼႂ်းၵဵင်းမႆႇ ၵူႈမူႇၵူႈၸုမ်း တင်းသူၼ်ႇၿုၵလ (သူၼ်ႇတူဝ်) ၵူႈၵေႃႉ ၶဝ်ႈႁူမ်ႈဢုပ်ႇၵိူဝ်းၵုမ် ၼႂ်းဝၼ်းတီႈ 29/05/2016 ၶၢဝ်းယၢမ်း 13.00 မူင်း တီႈႁွင်ႈၵၢၼ်ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၼႂ်းဝတ်ႉၵူႇတဝ်ႈ ဢိူင်ႇသီၽုမ်း ၸႄႈဝဵင်းၵဵင်းမႆႇ ၸိုင်ႈထႆး ။


“ ပၢင်ဢုပ်ႇၵိူဝ်းၵုမ်ၵၼ်ပၢင်ၼႆႉ ပဵၼ်ပိူဝ်ႈတႃႇသၢင်ႈတႅဝ်းႁူမ်ႈၵၢၼ်ၵၼ်ၵူၺ်း ဢမ်ႇပႆႇၸႂ်ႈတၢင်းၵၢၼ် ။ ဝၢႆးၼႆႉ ပေႃးၵူႈၾၢႆႇၾၢႆႇၽွမ်ႉလႆႈၸႂ်မိူၼ်ၵၼ်ယဝ်ႉၸင်ႇဝၢင်းၽႅၼ်ၶိုင်သၢင်ႈတႃႇပၢင်ၵုမ်လူင် ဢၼ်တေပႃး ၵူႈမူႇၵူႈၸုမ်းၶဝ်ႈႁူမ်ႈပဵၼ်တၢင်းၵၢၼ် ” ႁူဝ်ပဝ်ႈၵေႃလိၵ်ႈလၢႆးပိုတ်ႇလၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈၼင်ႇၼႆ ။


လွင်ႈလႆႈဢွၵ်ႇလိၵ်ႈၸိူၼ်းဝွၵ်ႇထိုင်ၵူႈမူႇၵူႈၸုမ်းၼႆႉ ဢိင်လူၺ်ႈငဝ်းလၢႆးယၢမ်းလဵဝ် ယွၼ်ႉပၼ်ႁႃၵူႈလွင်ႈလွင်ႈ ဢမ်ႇဝႃႈၼႂ်းမိူင်းတႆးၵေႃႈလီ ၼႂ်းမိူင်းထႆးၵေႃႈလီ ပီႈၼွင်ႉတႆးၸိူဝ်းထူပ်းတၢင်းတုၵ်ႉယၢၵ်ႈၵိၼ်းၸႂ် လၢႆလွင်ႈလၢႆပိူင်ၸိူဝ်းၼၼ်ႉ ႁႂ်ႈပေႃးၸၢင်ႈၸွႆႈထႅမ်ၵၼ်လႄႈၽွမ်ႉႁူမ်ႈႁႅင်းပႅင်းႁူမ်ႈၸႂ်ၵၼ် ပဵၼ်ၼမ်ႉၼိုင်ႈၸႂ်လဵဝ် ၵႂႃႇမိူဝ်းၼႃႈၼၼ်ႉၼႆလႄႈလႆႈဢွၵ်ႇလိၵ်ႈၸိူၼ်းဝွၵ်ႇမႃးၶဝ်ႈႁူမ်ႈပၼ်တၢင်းၶႆႈၸႂ် ပၢႆးဝူၼ်ႉ တၢင်းႁူႉတၢင်းႁၼ်ၵၼ် ၼင်ႇပႃႈတႂ်ႈၼႆႉ ၼႆယဝ်ႉ ။



                                                                                                                                   28 မေႊ 2016
ပၢင်ဢုပ်ႇၵိူဝ်းၵုမ်ၵၼ်ပိူဝ်ႈတႃႇသၢင်ႈလွင်ႈဢွမ်ႇလွမ်ႈၽွမ်ႉၵၼ်

ယွၼ်းဝွၵ်ႇၸိူၼ်း ၸုမ်းတႆးၼႂ်းၵဵင်းမႆႇၵူႈၸုမ်း

လွင်ႈတၢင်း ဢုပ်ႇၵိူဝ်းၵုမ်ပိူဝ်ႈတႃႇသၢင်ႈၵၢၼ်ဢွမ်ႇလွမ်ႈၽွမ်ႉၵၼ်

ဢိင်လူၺ်ႈတိုဝ်ႉတၢင်းမိူဝ်ႈလဵဝ် ၵဵဝ်ႇလူၺ်ႈပၼ်ႁႃလၢႆလွင်ႈဢၼ်ၵိူတ်ႇၶိုၼ်ႈယူႇၼႂ်းမိူင်းတႆးလႄႈသင် ပၼ်ႁႃၵၢၼ်ယူႇ ၵိၼ်သဝ်းၸိူဝ်းႁဝ်းႁဵတ်းၵၢၼ်ယူႇ ၼႂ်းမိူင်းထႆးလႄႈသင် ၵွပ်ႈဢဵၼ်ႁႅင်းႁဝ်းၶႃႈမူႇလႂ်ၸုမ်းၼၼ်ႉ လဵၵ်ႉၵေႇ ဢေႇမၢင် ပူၼ်ႉတီႈလႄႈ ဢမ်ႇၸၢင်ႈတေၵႄႈလိတ်ႈသင်လႆႈပၼ်တႃႇပီႈၼွင်ႉတႆးႁဝ်း ၸိူဝ်းတုၵ်ႉၶီလိူတ်ႇႁွၼ်ႉတူၵ်းမႆႈယူႇ ယၢမ်းလဵဝ်ၼၼ်ႉ ၼႆဢေႃႈ ….


ယွၼ်ႉၼႆ ပုၼ်ႈတႃႇၵူၼ်းတႆးႁဝ်းၶႃႈလႄႈသင် တႃႇၸိူဝ်ႉၸၢတ်ႈႁဝ်းလႄႈသင် ၶႂ်းယွၼ်းဢုပ်ႇၵိူဝ်းၵုမ်ၸုမ်းပီႈၼွင်ႉ တႆးႁဝ်း ၵူႈမူႇၵူႈၸုမ်း ႁူမ်ႈတင်း သူၼ်ႇၿုၵလ(သူၼ်ႇတူဝ်) ၽူႈမီးတၢင်းႁူႉႁၼ်ၵႂၢင်ႈၶဝ်ၵူႈၵေႃႉ မႃးၶဝ်ႈႁူမ်ႈပၢင် ဢုပ်ႇၵိူဝ်းၵုမ် ၸွႆႈဝူၼ်ႉသၢသင်ႈပၼ်ၼႆလႄႈ ၸင်ႇလႆႈဝွၵ်ႇၸိူၼ်း ၼင်ႇၼႆဢေႃႈ …

ဝၼ်းတီႈ 29/05/2016 (ဝၼ်းတိတ်ႉ)

ၶၢဝ်းယၢမ်း 13.00 မူင်း

ဢွင်ႈတီႈ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ


မၢႆတွင်း* ပႆႇၸႂ်ႈပၢင်ၵုမ်ဢၼ်ပဵၼ်တၢင်းၵၢၼ် တိုၵ်ႉပဵၼ်ၵၢၼ်မႃးဢုပ်ႇၵိူဝ်းၵုမ်ၵၼ် ပိူဝ်ႈတႃႇၵူႈၾၢႆႇၾၢႆႇ ၵူႈမူႇၵူႈၸုမ်း တေလႆႈၸႂ်ၶဝ်ႈႁူမ်ႈပႃးၸွမ်းလႄႈႁူမ်ႈၵၼ်ဝၢင်းၽႅၼ် ပိူဝ်ႈတႃႇတေပဵၼ်မႃးပၢင်ၵုမ်လူင် ဝၼ်းမိူဝ်းၼႃႈၼႆဢေႃႈ …