ၸုမ်းသင်ၶၸဝ်ႈ တင်း ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈမိူင်းၶၢင် ႁူမ်ႈၵၼ်ႁႃငိုၼ်းၵွင်ၵၢင် တႃႇၸွႆႈထႅမ်ပီႈၼွင်ႉပၢႆႈၽေးသိုၵ်း ဝၢၼ်ႈႁူဝ်ပၢင်ႇ မိူင်းဝီး ၸႄႈဝဵင်းၼမ်ႉၶမ်း


ဝၼ်းတီႈ 10/05/2016 ယၢမ်း ၵၢင်ၼႂ် ၸုမ်းသင်ၶၸဝ်ႈ ၊ ၵေႃလိၵ်ႈလၢႆးလႄႈ ၾိင်ႈငႄႈတႆး တင်းပီႈၼွင်ႉၵူၼ်းမိူင်း ထုင်ႉမိူင်းဝၼ်း ႁူမ်ႈၵၼ်ႁပ်ႉငိုၼ်းတွင်းၸွႆႈ တီႈဝတ်ႉၵုင်းသႃႇ ဢိူင်ႇလွႆၸႄႈ 8 ဝၢၼ်ႈ ၼႂ်းၸႄႈမိူင်းၶၢင် ပိူဝ်ႈၸွႆႈထႅမ် ပီႈၼွင်ႉၵူၼ်းပၢႆႈၽေးသိုၵ်း တီႈဝၢၼ်ႈႁူဝ်ပၢင်ႇ ဢိူင်ႇႁူဝ်ပၢင်ႇ မိူင်းဝီး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ - ၼႆယဝ်ႉ ။

သင်ၶၸဝ်ႈၽူႈႁပ်ႉပုၼ်ႈၽွၼ်းၸဝ်ႈၼိုင်ႈ လၢတ်ႈဝႃႈ - “ မိူဝ်ႈဝႃးဝၼ်းတီႈ 9 ယၢမ်းၵၢင်ၶမ်ႈၼၼ်ႉ ႁဝ်းၸုမ်းသင်ၶၸဝ်ႈ လႄႈ ၵေႃလိၵ်ႈလၢႆလႄႈ ၾိင်ႈငႄႈတႆး လႆႈဢုပ်ႇၵၼ်သေ လႆႈၸႂ်တူၵ်းလူင်းၵၼ်ဝႃႈ တေလူင်းႁပ်ႉငိုၼ်းတွင်း ပီႈၼွင်ႉၵူၼ်းမိူင်း တႃႇတေၵႂႃႇၸွႆႈပီႈၼွင်ႉထူပ်းၽေး ။ မၢင်ၸိူဝ်းၵေႃႈ လႆႈလူင်းၵဵပ်းႁပ်ႉၸွမ်း ဝတ်ႉလႂ်ဝတ်ႉၼၼ်ႉၵေႃႈမီး ၊ မၢင်ၸိူဝ်းသမ်ႉ ႁူမ်ႈၵၼ်တီႈလဵဝ်သေ ႁပ်ႉၵဵပ်းတီႈလဵဝ်ၵေႃႈမီး ”- ဝႃႈၼႆ ။


ဢၼ်လႆႈလူင်းႁပ်ႉငိုၼ်းတွင်းတႃႇၸွႆႈထႅမ်ၼႆႉ မိူၼ်ၼင်ႇ ဝတ်ႉၼွင်ႉပုင်ႇ ၊ ဝတ်ႉဝၢၼ်ႈၼႃး ၊ ဝတ်ႉၸၢမ်ႁွင်ႈ ဝတ်ႉၸႄႈႁၢႆး ဝတ်းၼႃႉဝၼ်း ၸိူဝ်းၼႆႉ။ လိူဝ်သေၼၼ်ႉ ၸုမ်းသင်ၶတင်းမူတ်းၵေႃႈ ဢမ်ႇၸႂ်ႈၼင်ႇၵဝ်ႇ ၊ ပီႈၼွင်ႉၵူၼ်းမိူင်း ၽူႈမီးၸေႇတၼႃႇၵေႃႈပႃး ဝႃႈၼႆ ။


ယူႇတီႈၽူႈမီးၼမ်ႉၸႂ်ၸေႇတၼႃၶဝ်ၸဝ်ႈသေ လႆႈၵမ်ႉၸွႆႈထႅမ်မႃး ငိုၼ်းၶႄႇ 3,000 ယွၼ် ၊ ငိုၼ်းမၢၼ်ႈ 144,500 ပျႃးလႄႈ ႁူမ်ႈပႃးလူၺ်ႈၶွင်ၵိၼ်ယႅမ်ႉ ၶူဝ်းၼုင်ႈတင်းဝႆထႅင်ႈတင်းၼမ် ။


လိူဝ်သေၼၼ်ႉ ပူၼ်ႉမႃး မိူဝ်ႈဝၼ်းတီႈ 07/05/2016 ယၢမ်း 11 မူင်း ၸုမ်းပႃႊတီႊႁူဝ်သိူဝ် လႄႈ ၸုမ်းပွင်ၵၢၼ်  ၶွမ်ႊမတီႊၸႄႈဝဵင်းမၢႆ 9 ထုင်ႉမၢဝ်း SSPP/SSA ၸႄႈဝဵင်းၼမ်ႉၶမ်း ႁူမ်ႈၵၼ်သေ လႆႈၸွႆႈထႅမ်ၵူၼ်းပၢႆႈၽေးသိုၵ်း ငိုၼ်းတင်းမူတ်း 50 သႅၼ်ပျႃး - ၽူႈတႅၼ်းပႃႊတီႊႁူဝ်သိူဝ် လၢတ်ႈ ။


ဝၼ်းတီႈ 8-10/05/2016 ၼႆႉ ၸုမ်းပွင်ၵၢၼ်ၸွႆႈထႅမ်ၵူၼ်းပၢႆႈၽေးသိုၵ်း ဝဵင်းၼမ်ႉၶမ်းသေ ၶတ်းၸႂ်ႁူမ်ႈႁႅင်းၵၼ် ယွၼ်းလူင်းတုင်းႁပ်ႉငိုၼ်းၸွႆႈထႅမ် တီႈပေႃႈမႄႈၵူၼ်းဝၢၼ်ႈၵူၼ်းမိူင်း ၸွမ်းဝဵင်းၼမ်ႉၶမ်း ၼႆယဝ်ႉ ။


ယွၼ်ႉ တပ်ႉသိုၵ်းၸိုင်ႈတႆး ၶွင်ႊသီႊဢဝ်ၶိုၼ်းၸိုင်ႈတႆး RCSS/SSA တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ပဵၼ်ပၢင်တိုၵ်းၵၼ်လႄႈၵူၼ်းမိူင်းၼပ်ႉႁူဝ်ပၢၵ်ႇ လႆႈပၢႆႈၽေးသိုၵ်း မႃးယူႇသဝ်းၸွမ်းဝတ်ႉဝႃးမုၼ်ၸဝ်ႈ ၸႄႈဝဵင်းၵျွၵ်ႉမႄး ၊ သီႇပေႃႉ ၸဵမ်ၸိူဝ်းၼႆႉ ။ ပူၼ်ႉမႃးမိူဝ်ႈဝၼ်းတီႈ 6/5/2016 ၼၼ်ႉ ဝၢၼ်ႈႁူဝ်ပၢင်ႇ ဢိူင်ႇႁူဝ်ပၢင်ႇ မိူင်းဝီး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ လင်ႁိူၼ်းၵူၼ်း 60 ပၢႆ ထုၵ်ႇၸုမ်းယိပ်းၵွင်ႈၵၢင်ႇၸုမ်းၼိုင်ႈ ဢဝ်ၾႆးပႅတ်ႈ ။