ဢိင်ၼိူဝ်ငဝ်းလၢႆးၸိုင်ႈတႆး ဢၼ်ပဵၼ်ယူႇယၢမ်းလဵဝ်ၼႆႉသေ ၾၢႆႇၼိုင်ႈၵေႃႈ ၸွမ်သိုၵ်းယွတ်ႈသိုၵ်း ၵႂႃႇတၢင်ႇထီး / ယွတ်ႈၵွင်းမူး ၾႃႉထၢတ်ႈတီႈၵၢတ်ႇၵူႇ။ ဝႆးလင်ၼၼ်ႉ မိူဝ်ႈဝၼ်းတီႈ 24/05/2016 မႃးႁူပ်ႉၸွမ်ၽွင်းလူင်ၸိုင်ႈတႆး ၻွၵ်ႊတိူဝ်ႊလိၼ်းထုတ်ႉ ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ ယိင်းတႆး လႆႈၵႂႃႇႁူပ်ႉထူပ်းတွင်ႈထၢမ် မၼ်းၸဝ်ႈဝႆႉၼင်ႇၼႆ ။

ထၢမ် - မိူဝ်ႈၼႂ်ၸဝ်ႉၼႆႉ (24/05/2016) လႆႈထူပ်းၵၼ်တင်း ၸွမ်ၽွင်းလူင်ၸိုင်ႈတႆး ၼႆၶႃႈႁႃႉ ၊ ႁူပ်ႉထူပ်းဢုပ်ႇဢူဝ်းၵၼ်လွင်ႈသင်ၽွင်ႈၶႃႈ ၶႅၼ်းတေႃႈလၢတ်ႈၼႄပၼ်ၽွင်ႈၶႃႈ ?။

ၸွမ်သိုၵ်းယွတ်ႈသိုၵ်း ႁူဝ်ပဝ်ႈ RCSS ႁူပ်ႉထူပ်း ၸွမ်ၽွင်းလူင်ၸိုင်ႈတႆး ၻွၵ်ႊတိူဝ်ႊလိၼ်းထုတ်ႉ

တွပ်ႇ - ၸွမ်ၽွင်းလူင်ၸိုင်ႈတႆးၼႆႉ မၼ်းပဵၼ်ၵေႃႉတိုၵ်ႉၶိုၼ်ႈမႃးမႂ်ႇမႂ်ႇၵူၺ်းလႄႈ ႁူပ်ႉထူပ်းတႃႇမိုတ်ႈၵိုဝ်း ၸမ်ၸႂ်ၵၼ်၊ တႃႇသၢင်ႈလွင်ႈၸမ်ၸႂ်ၵၼ်ၵူၺ်း။ ၾၢႆႇၼိုင်ႈၵေႃႈ ၶႂ်ႈလၢတ်ႈၼႄဝႃႈ ယူႇတီႈၶွင်ႊသီႊဢဝ်ၶိုၼ်း ၸိုင်ႈတႆး (RCSS/SSA) သေ တေသၢၼ်မိုဝ်းလူင်ပွင်ၸိုင်ႈ ႁဵတ်းသၢင်ႈလွင်ႈတႃႇမိူင်းၸိုင်ႈတႆး တေၶိုၼ်ႈသင်ႉ ၶိုၼ်ႈသုင် ၊ ၼႂ်းၵၢၼ်ၵေႃႇတင်ႈၸိုင်ႈတႆးၶိုၼ်ႈယႂ်ႇမႂ်ႇသုင်ၼၼ်ႉ တေႁူမ်ႈမိုဝ်းၵၼ်ႁဵတ်းလႆႈၸိူင်ႉႁိုဝ် ။ ပိူင်လူင်တႄႉ တႃႇတင်းသွင်ၾၢႆႇ ႁႂ်ႈပေႃးမိုတ်ႈၵိုဝ်းၸမ်ၸႂ်ၵၼ် ၊ ယုမ်ႇယမ်ၵၼ်ၼၼ်ႉယဝ်ႉ ။


ထၢမ် - ဢၼ်ၼၢင်းဢွင်ႇသၢၼ်းၸုၵျီႇ တေဢွၼ်ႁဵတ်းသၢင်ႈပၢင်ၵုမ်ပၢင်လူင် 21 ႁူဝ်ပၢၵ်ႇပီမိူင်း ၼႂ်းဢမ်ႇႁိုင် ၽႂ်းၽႂ်းၼႆႉၼႆၼၼ်ႉ လွင်ႈၼႆႉ ႁၼ်ထိုင်ၸိူင်ႉႁိုဝ်ၶႃႈ ?။


တွပ်ႇ - ဢၼ်ၼၢင်းဢွင်ႇသၢၼ်းၸုၵျီႇ တေဢွၼ်ႁဵတ်းသၢင်ႈပၢင်ၵုမ်ပၢင်လူင် 21 ႁူဝ်ပၢၵ်ႇပီမိူင်း ဢၼ်ဝႃႈၼႆႉတႄႉ တေႁဵတ်းၸိူင်ႉႁိုဝ် ပႆႇလႆႈႁူႉၸွမ်းတႅတ်ႈတေႃး ။ ၵူၺ်းၵႃႈ ဢၼ်ထုၵ်ႇလီလႆႈႁူႉၼႆႉ ပၢင်လူင်ၼႆႉ မီးၶေႃႈၵိၼ်ၵႅၼ်ႇ / ၶေႃႈလႆႈၸႂ်ပၢင်လူင် ၊ လိၵ်ႈႁူမ်ႈမၢႆပၢင်လူင် ၊ ၼမ်ႉၸႂ်ပၢင်လူင်ၼႆ မီးယူႇ 3 ယၢင်ႇ 3 ပိူင် ။ ၵွပ်ႈၼၼ်လႄႈ ၼိူဝ် 3 ပိူင်ၼႆႉ တေဢဝ်ဢၼ်လႂ် ၊ တေႁဵတ်းသၢင်ႈၸိူင်ႉႁိုဝ် ၊ ၵၢင်ၸႂ်မၼ်းၼၢင်း မီးၸိူင်ႉႁိုဝ်ၼႆၼၼ်ႉ ႁဝ်းၶႃႈပႆႇလႆႈႁူႉၸွမ်းသင် ။


ထၢမ် - ပေႃးၼႆ ၵဵဝ်ႇၵပ်းလွင်ႈဢၼ်တေႁဵတ်းသၢင်ႈပၢင်ၵုမ်ပၢင်လူင် 21 ႁူဝ်ပၢၵ်ႇပီမိူင်းၼႆႉသေ RCSS ၶႂ်ႈလၢတ်ႈ သင်ထႅင်ႈ ?။


တွပ်ႇ - ယူႇတီႈ RCSS တႄႉ ႁၼ်ထိုင်ဝႃႈ ၼၢင်းဢွင်ႇသၢၼ်းၸုၵျီႇၼႆႉ မၼ်းၼၢင်းတေႁဵတ်းသၢင်ႈ ပၢင်ၵုမ်လူင်ၵႂႃႇ ႁႂ်ႈပေႃးလီတီႈသုတ်း ၊ ႁဝ်းယုမ်ႇယမ်ၸိူင်ႉၼၼ် ။ ၵူၺ်းၵႃႈ ဢၼ်မႆႈၸႂ်လွင်ႈၼိုင်ႈၼႆႉ ၵူဝ်ႁဵတ်းၽိတ်းလွၵ်းလၢႆးမၼ်း ၊ ၽိတ်းပိူင်ဢၼ်ထုၵ်ႇလီႁဵတ်း ။ ပေႃးၽိတ်းၵႂႃႇတႄႉ မၼ်းတေတုမ်ႉတိူဝ်ႉ မိူဝ်းၼႃႈမိူင်းႁူမ်ႈတုမ် ။ မိူဝ်ႈပၢင်ၵုမ်လူင်ပၢင်လူင် ၵမ်းတီႈ 1 ၼၼ်ႉ ပၼ်ႁႃလူင် ဢၼ်တႄႇမႃးတီႈ ပၢင်လူင်ၼၼ်ႉ တေႃႇထိုင်မိူဝ်ႈလဵဝ်ၼႆႉ လႆႈပဵၼ်ပၢင်တိုၵ်းသိုၵ်းသိူဝ်ၵၼ်ယူႇ။ ၵွပ်ႈၼၼ်လႄႈ ဢၼ်ၼၢင်းဢွင်ႇသၢၼ်းၸုၵျီႇ တေဢွၼ်ႁူဝ်ႁဵတ်းပၢင်ၵုမ်လူင် 21 ႁူဝ်ပၢၵ်ႇပီမိူင်းဢၼ်ဝႃႈၼႆႉ ၵၢင်ၸႂ်မၼ်းၼၢင်းမီးၸိူင်ႉႁိုဝ် ၽႂ်ဢမ်ႇလႆႈႁူႉတႅတ်ႈတႅတ်ႈတေႃးတေႃး။ ဢၼ်ၶႃႈႁဝ်းၶႂ်ႈမွၵ်ႇလၢတ်ႈထိုင် ၾၢႆႇသိုဝ်ႇၶၢဝ်ႇၶဝ်တင်းသဵင်ႈတႄႉ ၵွၼ်ႇပႆႇၸတ်းႁဵတ်းပၢင်ၵုမ်လူင်ပၢင်လူင်ၼႆႉ ၵိုင်ႇလီႁူပ်ႉထူပ်း ဢုပ်ႇဢူဝ်းၵၼ်၊ ၶႂ်ႈႁဵတ်းသၢင်ႈၸိူင်ႉႁိုဝ် လီဢုပ်ႇဢူဝ်းၵၼ်ၸႅင်ႈၸႅင်ႈလႅင်းလႅင်း။ ပေႃးဢမ်ႇဢုပ်ႇဢူဝ်းၵၼ်ဝႆႉ ၸႅင်ႈၸႅင်ႈလႅင်းလႅင်း ၊ ဢမ်ႇၶပ်းၶိုင်ဝႆႉလီလီသေ မႃးႁဵတ်းပၢင်ၵုမ်တႄႉ ပေႃးဝႃႈၸိူဝ်းဢၼ်မႃးၶဝ်ႈႁူမ်ႈၵမ်ႈၽွင်ႈ ၼႄၵၢင်ၸႂ်သၢၼ်ၶတ်းသေ လုၵ်ႉဢွၵ်ႇပၢင်ၵုမ်ၵႂႃႇၸိူဝ်းၼႆႉ ပေႃးမီးမႃးၸိူင်ႉၼၼ် မၼ်းတေႁၢင်ႈၸႃႉၼႃႈႁၢင်ႈၸႃႉတႃ ။


ထၢမ် - ၶႂ်ႈထၢမ်ထႅင်ႈလွင်ႈၼိုင်ႈၶႃႈဢေႃႈ ။ လွင်ႈဢၼ် RCSS တီႉၵူၼ်းတၢင်းပွတ်းၼမ်ႉၸၢင် ဢၼ်ဝႃႈၼၼ်ႉ ၶႂ်ႈဝႃႈၸိူင်ႉႁိုဝ်ၶႃႈ ?။


တွပ်ႇ - ၶၢဝ်ႇဢၼ်ၼႆႉဢမ်ႇၸႂ်ႈ။ ယူႇတီႈတပ်ႉသိုၵ်းလူင်ပွင်ၸိုင်ႈသေ ဢၼ်ၸီႉၼႄးႁဝ်းဝႃႈ ႁဝ်းတဵၵ်းတီႉ ၵူၼ်းဝၢၼ်ႈ ဢၼ်ဝႃႈၼၼ်ႉ ၵိုင်ႇလီလူင်းပိုၼ်ႉတီႈသေ ႁူပ်ႉထူပ်းတွင်ႈထၢမ်တူဝ်ၵူၼ်းၸိူဝ်းၼၼ်ႉ ။ မိူဝ်ႈဝၼ်းတီႈ 21 ၼၼ်ႉ ပဵၼ်ဝၼ်းလုၵ်ႉၽိုၼ်ႉ ၊ ႁဝ်းႁဵတ်းပၢင်ပွႆးၶုၵ်းထူပ်းတီႈငဝ်ႈငုၼ်း လွႆတႆးလႅင်း ၊ ၶဝ်ၸိူဝ်းၼႆႉမႃးၶဝ်ႈႁူမ်ႈပၢင်ပွႆးတီႈၼၼ်ႈ ။ ၵဵဝ်ႇၵပ်းလွင်ႈသိုၵ်းမႂ်ႇသေ ပေႃးဝႃႈၵူၼ်းဝၢၼ်ႈၵူၼ်းမိူင်း ပႃးဝႃႇသၼႃႇ ၊ မီးၸေႇတၼႃႇၼိူဝ်ၸိူဝ်ႉၸၢတ်ႈဝၢၼ်ႈၼိူဝ်မိူင်းသေ ၶဝ်ႈမႃးႁၢပ်ႇၵိုတ်ႉၵၢၼ်သိုၵ်း ႁဝ်းၶႃႈၸင်ႇႁပ်ႉပဵၼ်ၵူၼ်းသိုၵ်း၊ ပေႃးဢမ်ႇပႃးၵၢင်ၸႂ်ၶဝ် ႁဝ်းၶႃႈဢမ်ႇႁပ်ႉ ။


ထၢမ် - ၵဵဝ်ႇၵပ်းလွင်ႈ NCA (ၵၢၼ်ၵိုတ်းယိုဝ်းတူဝ်ႈမိူင်း) သေ ပၢၼ်လူင်ပွင်ၸိုင်ႈမႂ်ႇၼႆႉ တေႁဵတ်းသၢင်ႈၵႂႃႇၸိူင်ႉႁိုဝ် ?။


တွပ်ႇ- NCA ဢၼ်ဝႃႈၼႆႉ မၼ်းပဵၼ်လူင်ပွင်ႈၸိုင်ႈၵဝ်ႇ ႁဵတ်းသၢင်ႈမႃးဝႃႈၼႆသေတႃႉ တေႃႈလဵဝ်ၼႆႉ မၼ်းထိုင်မႃးၼႂ်းမိုဝ်းလူင်ပွင်ၸိုင်ႈမႂ်ႇယဝ်ႉ၊ ၶဝ်တေသိုပ်ႇႁဵတ်းၸိူင်ႉႁိုဝ်ထႅင်ႈၼၼ်ႉ ႁဝ်းတႄႉပႂ်ႉတူၺ်းၶဝ်ၵူၺ်း ။


ထၢမ် - ပၼ်ႁႃဢၼ်ပဵၼ်ၼႂ်းဝူင်ႈၵၢင် RCSS တင်း TNLA (တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း) ၼႆႉၶႃႈလူး ၊ တေႁဵတ်းႁိုဝ်ၵႄႈလိတ်ႈ ?။


တွပ်ႇ - ပၼ်ႁႃဢၼ်ပဵၼ်ၼႂ်းဝူင်ႈၵၢင် TNLA တင်းႁဝ်းၶႃႈၼႆႉတႄႉ ပေႃးတေဢဝ်ၵွင်ႈၵၢင်ႇသေၵႄႈလိတ်ႈတႄႉ ပၼ်ႁႃတေဢမ်ႇယဝ်ႉဢမ်ႇတူဝ်ႈလႆႈယဝ်ႉ ၊ ဢၼ်လီတႄႉ ႁူပ်ႉထူပ်းဢုပ်ႇဢူဝ်းၵၼ်ၼႆႉ လီတီႈသုတ်းယဝ်ႉ ။ မိူဝ်ႈၽွင်းပွႆးသွၼ်းၼမ်ႉသၢင်းၵျၢၼ်ႇၼၼ်ႉ ဢိင်ၼိူဝ် UNFC (ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း) ၶဝ် ယူႇၼႂ်းဝူင်ႈၵၢင်ၶပ်းၶိုင်ပၼ်လႄႈ တႃႇတေႁူပ်ႉထူပ်းဢုပ်ႇဢူဝ်းၵၼ်ၼၼ်ႉ ႁဝ်းပေႃးၶွတ်ႇၽွတ်ႈဝႆႉ ၶွမ်ႊမတီႊမၼ်းယဝ်ႉ။ ၵူၺ်းၵႃႈ ၽိူဝ်ႇပွႆးသွၼ်းၼပ်ႉယဝ်ႉ TNLA သမ်ႉႁႅၼ်းသိုၵ်းလေႃႇတိုၵ်းႁဝ်း၊ TNLA ၶဝ်ၼႆႉ ၶိုင်သၢင်ႈႁႂ်ႈပဵၼ်ပၼ်ႁႃၼႂ်းဝူင်ႈၵၢင်လွႆလႄႈတင်းတႆး ၊ တင်ႈၸႂ်သေႁဵတ်းယဝ်ႉ။ ၼင်ႇႁိုဝ်တေ ဢမ်ႇပဵၼ်ပၼ်ႁႃလွင်ႈၼႆႉ ႁဝ်းၶႃႈၶတ်းၸႂ်ႁၵ်ႉသႃ ငိူင်ႉဝႄႈမႃး ၊ ႁဝ်းၶႃႈၼႆႉ လႆႈပဵၼ်ပၢင်တိုၵ်းၵၼ်တင်း TNLA မွၵ်ႈႁိမ်း 30 ပွၵ်ႈ ၊ ႁဝ်းၶႃႈလႆႈတူၵ်းသုမ်းၵူၼ်း 8 ၵေႃႉ ၊ ဝၢတ်ႇၸဵပ်း 30 ပၢႆ ။


ပေႃးပဵၼ်ပၢင်တိုၵ်းၼိုင်ႈၵမ်းၼႆႉ လွင်ႈလူႉလွင်ႈတၢႆမၼ်းဢမ်ႇလၢၵ်ႇလၢႆးသေတႃႉၵေႃႈ ဢၼ်တုမ်ႉတိူဝ်ႉ ၵူၼ်းဝၢၼ်ႈၵူၼ်းမိူင်းၼႆႉ ႁဝ်းၶႃႈပဵၼ်ၸႂ်ၶေႃးဢမ်ႇလီ ၊ ဢေးလူၵူၼ်းမိူင်းတႄႉတႄႉ ။ ဢၼ် TNLA ၶဝ်ၽဝ်ဝၢၼ်ႈႁိူၼ်းၽဝ်ဝၢၼ်ႈသေ လႅၼ်ႈပၢႆႈၸိူဝ်းၼႆႉၵေႃႈ ႁဵတ်းႁႂ်ႈၵူၼ်းမိူင်းလူႉသုမ်းယႂ်ႇၼမ် ၸဵပ်းၸႂ်တႄႉတႄႉ ။