တႄႇမိူဝ်ႈလဵဝ်ၼႆႉၵႂႃႇ ၼႂ်းၸိုင်ႈမိူင်းႁူမ်ႈတုမ်ပတ်းပိုၼ်ႉၼႆႉ ထိုင်ၶၢဝ်းတေပိုတ်ႇႁူင်းႁဵၼ်း လူင်ပွင်ၸိုင်ႈ ၶိုၼ်းယဝ်ႉ။ ၵွပ်ႈၼၼ်  တပ်ႉသိုၵ်းမၢၼ်ႈ ထုၵ်ႇလီၵိုတ်း ဢၼ်ႁၢင်ႈႁႅၼ်းသိုၵ်းလေႃႇတိုၵ်း ၼႂ်းမိူင်းၶၢင် မိူင်းတႆးပွတ်းႁွင်ႇၸိူဝ်းၼႆႉ - ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း တူၵ်ႇလၢတ်ႈ ။

ၽွင်းတႅၼ်းသၽႃးၸိူဝ်ႉၶိူဝ်း ၸၢႆးဝၼ်းလႅင်းၶမ်း၊ ၸုမ်းၵူၼ်းၼုမ်ႇ TYN တင်းၵေႃလိၵ်ႈလၢႆးလႄႈ ၾိင်ႈငႄႈတႆး ၼမ်ႉလၼ်ႈ ၵႂႃႇၸွႆႈထႅမ်ၵူၼ်းပၢႆႈၽေး ဢၼ်လုၵ်ႉတီႈဝၢၼ်ႈသၢႆးလႅင် မႃးပိုင်ႈဢိင်ယူႇသဝ်း မီးယူႇတီႈဝၢၼ်ႈႁၢင်ၼႃး ဝတ်ႉမွၵ်ႇလွမ်ႉ ၸႄႈဝဵင်းလႃႈသဵဝ်ႈ (Photo: Sai Lern)

ၸၢႆးဝၼ်းလႅင်းၶမ်း လၢတ်ႈဝႃႈ- သိုၵ်းၵၢင်မိူင်း ဢၼ်ပဵၼ်ယူႇတေႃႈလဵဝ်ၼႆႉ မၼ်းပဵၼ်လွင်ႈဢၼ်ၶဵင်ႇတႃႉ ဢၼ်ၼိုင်ႈ ။ ယွၼ်ႉပိူဝ်ႈပၢင်တိုၵ်းသေ လုၵ်ႈဢွၼ်ႇလႆႈၵႆယၢၼ်ပၢႆးပၺ်ၺႃ ၊ ဢိုပ်းႁၢမ်ႈၶဝ်ႈၼမ်ႉတၢင်းၵိၼ် ။ ၾၢႆႇၼိုင်ႈၵေႃႈ ၼႂ်းပိုၼ်ႉတီႈၸၢဝ်းၶိူဝ်းၼႆႉ ၼွၵ်ႈၼိူဝ်သေပၢႆးပၺ်ၺႃတူၵ်းတႅမ်ႇယူႇယဝ်ႉ သမ်ႉမႃးႁႅၼ်းသိုၵ်း လေႃႇတိုၵ်းထႅင်ႈ ၊ ႁဵတ်းႁႂ်ႈ လုၵ်ႈဢွၼ်ႇၶၢတ်ႇႁၢမ်းၵၢၼ်ႁဵၼ်း ။ ၾၢႆႇၼိုင်ႈၵေႃႈ ၶၢဝ်းၼႆႉပဵၼ်ၶၢဝ်းၽုၵ်ႇသွမ်ႈ ၊ ၶၢဝ်းဢၼ်ထုၵ်ႇလႆႈႁဵတ်းၵိၼ်ၵၢၼ်လဵင်ႉတွင်ႉ ၊ ၶၢဝ်းဢၼ်ပေႃႈမႄႈၵူၼ်းမိူင်း ထုၵ်ႇလႆႈသူင်ႇလုၵ်ႈလၢင်း ၶဝ်ႈႁူင်းႁဵၼ်းလႄႈ ဢမ်ႇၵိုင်ႇလီမႃး ႁၢင်ႈႁႅၼ်းသိုၵ်းလေႃႇတိုၵ်းၸိူင်ႉၼႆ ။ ပိူင်လူင်မၼ်း ဢၼ်ၶႂ်ႈသင်ႇလၢတ်ႈတႄႉ ၾၢႆႇသိုၵ်းလူင်ပွင်ၸိုင်ႈ (တပ်ႉမတေႃႇ) ယဝ်ႉ ။ ၵိုတ်းၵၢၼ်ႁၢင်ႈႁႅၼ်းသိုၵ်း တိုၵ်းတေႃးၵၼ်ၼႆႉ သေၵမ်း - ဝႃႈၼႆ ။


ယွၼ်ႉပိူဝ်ႈပၢင်တိုၵ်းၼႂ်းမိူင်းသေ ၽႅၼ်ၵၢၼ်ဢၼ်ႁဵတ်းသၢင်ႈ ၼႂ်းၸႄႈမိူင်းၸၢဝ်းၶိူဝ်းၼႆႉ မၼ်းဢမ်ႇယဝ်ႉ ဢမ်ႇတူဝ်ႈလႆႈသေဢၼ် ။ ၶၢဝ်းယၢမ်းၵၢပ်ႈပၢၼ်ဝၢၼ်ႈမိူင်းၶိုၼ်ႈသင်ႉၶိုၼ်ႈသုင်ၼႆႉ ၵူၼ်းၼုမ်ႇၼႂ်း ၸၢဝ်းၶိူဝ်းၵေႃႈ ၵိုင်ႇလီၵိူတ်ႇဢွၵ်ႇပဵၼ်မႃးၽူႈၼမ်းလီတွၼ်ႈတႃႇမိူဝ်းၼႃႈ ။ ယွၼ်ႉပိူဝ်ႈၵုမ်ႇပဵၼ်ပၢင်တိုၵ်းသေ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ၼႂ်းၸိုင်ႈမိူင်းႁူမ်ႈတုမ်တုၵ်ႉၶၶၢၼ်ၸႂ် ယၢပ်ႇယဵၼ်းလွင်ႈယူႇလွင်ႈၵိၼ် ၊ လွင်ႈႁဵၼ်းႁူႉတၢင်းမေႃ လွင်ႈၵၢၼ်ပူၵ်းပွင်ပၢႆးပၺ်ၺႃၸိူဝ်းၼႆႉၵေႃႈ ႁဵတ်းႁႂ်ႈတူၵ်းလိုၼ်းၵႂႃႇၵူႈၸိူဝ်ႉၵူႈလွင်ႈ၊ ႁဵတ်းႁႂ်ႈလုၵ်ႈဢွၼ်ႇၶၢတ်ႇႁၢမ်း ၵၢၼ်ႁဵၼ်း - ၼႆယဝ်ႉ ။


မိူဝ်ႈဝၼ်းတီႈ 25/05/2016 ယူႇတီႈငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) ၊ ၸုမ်းၵူၼ်းၼုမ်ႇ (TYN) ပႃးၸဵမ်ၸုမ်း ၵေႃလိၵ်ႈလၢႆးလႄႈၾိင်ႈငႄႈတႆး ၼမ်ႉလၼ်ႈ ႁူမ်ႈၵၼ်သေၵႂႃႇၸွႆႈထႅမ်ၵူၼ်းပၢႆႈၽေး ဢၼ်မီးတီႈဝတ်ႉ / ၵျွင်းမုၼ်ၸဝ်ႈမွၵ်ႇလွမ်ႉ၊ တီႈဝၢၼ်ႈႁၢင်ၼႃး ဝဵင်းလႃႈသဵဝ်ႈ။ တီႈၼၼ်ႈၵူၼ်းပၢႆႈၽေးမီး 130 ပၢႆ ။ မိူဝ်ႈလဵဝ် ယၢပ်ႇၽိုတ်ႇၶဝ်ႈၼမ်ႉတၢင်းၵိၼ်လႄႈ လႆႈၵႂႃႇၸွႆႈထႅမ်ၶဝ်ႈသၢၼ် ဢႃႇလူး ၽၵ်းမီႇႁူဝ်လႅင် ငိုၼ်းတွင်း တႃႇၸႂ်ႉၸၢႆႇၸိူဝ်းၼႆႉ - ၼႆယဝ်ႉ ။


ပၢင်တိုၵ်းဢၼ်ပဵၼ်မႃး ၼႂ်းမိူင်းႁဝ်းၶႃႈၼႆႉ မီး 60 ပီပၢႆယဝ်ႉ ၊ ၵူၼ်းပၢႆႈၽေးၵေႃႈမီးမႃးဢမ်ႇထၢတ်ႇဢမ်ႇဝၢႆး သေပွၵ်ႈ ။ ပေႃးတေသိုပ်ႇပဵၼ်ယူႇၸိူင်ႉၼႆတႄႉ မိူဝ်ႈၼႃႈ တႃႇတေၶိုၼ်ႈသင်ႉၶိုၼ်ႈသုင်ၼႆႉ ႁဝ်းၶႃႈ ဢမ်ႇမုင်ႈႁၼ်တၢင်းမၼ်းလႆႈယဝ်ႉ ။ ၵွပ်ႈၼၼ် ၶႂ်ႈႁႂ်ႈတႄႇၶိုၼ်းလွင်ႈငမ်းယဵၼ်ၵၼ်ၽႂ်းၽႂ်း။ ၾၢႆႇၼိုင်ႈၵေႃႈ ၽွင်းလူင်ပွင်ၸိုင်ႈမႂ်ႇ တိုၵ်ႉၸိုၼ်ႇတူဝ်ၸုၵ်းယူႇၼႆႉ ဢမ်ႇၵိုင်ႇလီပဵၼ်ၸိူင်ႉၼႆ ။ ၵွပ်ႈၼၼ်လႄႈ ယူႇတီႈသိုၵ်းမၢၼ်ႈသေ ထိုင်ၶၢဝ်းယၢမ်ႇထုၵ်ႇလႆႈပိုၼ်ၽၢဝ်ႇဝႃႈ - ၵိုတ်းၵၢၼ်ၵိုတ်းတိုၵ်းပတ်းပိုၼ်ႉ တူဝ်ႈမိူင်းသေ ၵေႃႇသၢင်ႈလွင်ႈငမ်းယဵၼ်ယဝ်ႉ - ၸၢႆးဝၼ်းလႅင်းၶမ်း သိုပ်ႇလၢတ်ႈထႅင်ႈၼင်ႇၼႆ ။


ယွၼ်ႉ တပ်ႉသိုၵ်းၸိုင်ႈတႆး (SSPP/SSA) တင်းသိုၵ်းမၢၼ်ႈ (တပ်ႉမတေႃႇ) ပဵၼ်ပၢင်တိုၵ်းၵၼ် ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇသေ ၵူၼ်းဝၢၼ်ႈၵူၼ်းမိူင်း 1,500 ပၢႆ လႆႈပၢႆႈယၢၼ်ႁိူၼ်းယေး တီႈယူႇ ၊ ၵမ်ႈၽွင်ႈပၢႆႈၵႂႃႇယူႇလႃႈသဵဝ်ႈ၊ ၵမ်ႈၽွင်ႈၵႂႃႇပိုင်ႈႁူမ်ႈသေႃႉၽူၺ်း တၢင်းသီႇပေႃႉ ၊ ၵမ်ႈၽွင်ႈပၢႆႈမူၵ်းယွမ်ႇမူၵ်းယုမ်းၼႂ်းထိူၼ်ႇ ၸိူဝ်းၼႆႉ ။