ၸုမ်းၶၢင် ႁွင်ႉမွၵ်ႇထိုင်ပီႈၼွင်ႉတႆး ၼႂ်းမိူင်းၶၢင် ၶဝ်ႈႁူမ်ႈပၢင်ႁူပ်ႉထူပ်းဢုပ်ႇၵုမ် တီႈမၢႆႇၸႃႇယၢင်ႇ မိူင်းၶၢင် ။ ႁႂ်ႈပီႈၼွင်ႉတႆးၼုင်ႈၶူဝ်းတႆး ပႃးၵွင်မွင်းၶဝ်ႈႁူမ်ႈ ၊ ၵူၺ်းၵႃႈ ၸုမ်းတႆးမၢင်ၸုမ်း ဢမ်ႇႁွင်ႉမွၵ်ႇပႃး ။ မီးၵူၼ်းထတ်းသၢင် လၢႆၸိူဝ်ႉလၢႆပိူင် ။


ပူၼ်ႉမႃးမိူဝ်ႈဝၼ်းတီႈ 29/04/2016 တင်ႈတႄႇၵၢင်ၼႂ်ယၢမ်း 08:30 မူင်း ၊ ၸုမ်းၶၢင် KIO/KIA ဢွၼ်ႁူဝ် ၸတ်းႁဵတ်းပၢင်ႁူပ်ႉထူပ်း / ဢုပ်ႇၵုမ် ပီႈၼွင်ႉတႆး တီႈမၢႆႇၸႃႇယၢင်ႇ ၼႂ်းမိူင်းၶၢင် ။ ပၢင်ၵုမ်ၼႆႉ ႁွင်ႉမွၵ်ႇထိုင်ပီႈၼွင်ႉတႆး ၼႂ်းမိူင်းၶၢင် လၢႆမူႇလၢႆၸုမ်းၶဝ်ႈႁူမ်ႈ ၊ ၵူၺ်းၵႃႈ ဢမ်ႇႁွင်ႉမွၵ်ႇပႃးၸုမ်းၸၢႆးထိၼ်ႇလိၼ်း ဢၼ်တူင်ႉၼိုင်ႁဵတ်းၵၢၼ်တႆး ယူႇၼႂ်းမိူင်းၶၢင် ။ လိူဝ်သေၼၼ်ႉ ႁူဝ်ၶေႃႈလိၵ်ႈႁွင်ႉမွၵ်ႇ (ၽိတ်ႈမွၵ်ႇ) လႄႈ ၶႅပ်းဝႂ်ႁွႆႈၶေႃးၵေႃႈ လွင်ႈတၢင်းမၼ်း တႅမ်ႈဢမ်ႇမိူၼ်ၵၼ် ၊ ပိူင်ႈၵၼ်ဝႆႉ ။

ဢွၼ်ၼႃႈၼၼ်ႉ ပၢင်ႁူပ်ႉထူပ်း / ပၢင်ၵုမ် ဢၢၼ်းႁဵတ်းမိူဝ်ႈဝၼ်းတီႈ27/04/2016 ၊ ၵူၺ်းၵႃႈဢမ်ႇပဵၼ်သေ လိူၼ်ႈၶၢႆႉဝၼ်းမႃးၸတ်းႁဵတ်းဝၼ်းတီႈ 29 ။  ပီႈၼွင်ႉတႆးၸိူဝ်းၵႂႃႇၶဝ်ႈႁူမ်ႈၼၼ်ႉ ႁႂ်ႈၼုင်ႈၶူဝ်းတႆး ၊ ႁႂ်ႈပႃးၵွင်မွင်းၵႂႃႇႁႆႇ ႁပ်ႉတွၼ်ႈ ။ ပီႈၼွင်ႉတႆးဝၢၼ်ႈဝဵင်းႁႆး ၊ ဝၢၼ်ႈဢုင်ႊလူင် ၊ ဝၢၼ်ႈၼိမ်ၸိူဝ်းၼႆႉ တူၵ်းပုၼ်ႈၽွၼ်း မိုဝ်ႉႁုင်ၶဝ်ႈၽၵ်း လဵင်ႉလူလုမ်းလႃးပီႈၼွင်ႉ ၽူႈၶဝ်ႈႁူမ်ႈ ။ ႁူဝ်ၵူၼ်းၸိူဝ်းၶိုၼ်ႈႁွတ်ႈၶဝ်ႈႁူမ်ႈ မီးမွၵ်ႈပၢၵ်ႇပၢႆ - ၵူၼ်းၼႂ်းပိုၼ်ႉတီႈ လႅၼ်လိၼ်တႆး - ၶၢင်ၵေႃႉၼိုင်ႈ လၢတ်ႈၼင်ႇၼႆ ။


ပိူဝ်ႈတႃႇၸတ်းပၢင်ၵုမ်ၼႆႉ ဢဝ်ၸိုဝ်ႈသဵင်ဝၢၼ်ႈတႆး ဢိူင်ႇလွႆၸေႈ 8 ဝၢၼ်ႈ ဢွၵ်ႇၸိုဝ်ႈသေ ႁွင်ႉမွၵ်ႇ ပီႈၼွင်ႉတႆး ၼႂ်းၸႄႈမိူင်းၶၢင် လၢႆမူႇလၢႆၸုမ်းၶဝ်ႈႁူမ်ႈ ။ မူႇၸုမ်းပီႈၼွင်ႉတႆး ၸိူဝ်းလႆႈႁပ်ႉႁွင်ႉမွၵ်ႇထိုင်ၼၼ်ႉ ပီႈၼွင်ႉတႆးလႅင် ၊ တႆးၶမ်းတီး ၊ သင်ၶၸဝ်ႈတႆးလႅင် ၸိူဝ်းၼႆႉ ။ ဝၢၼ်ႈတႆး ဢိူင်ႇလွႆၸေႈ 8 ဝၢၼ်ႈ ႁွင်ႉမွၵ်ႇႁႂ်ႈၵႂႃႇၶဝ်ႈႁူမ်ႈ 2 ၵေႃႉ ။ သင်ၶၸဝ်ႈဢိူင်ႇလွႆၸေႈ 8 ဝၢၼ်ႈၵေႃႈ လႆႈႁပ်ႉၼိမၼ်တၼ ၵႂႃႇၶဝ်ႈႁူမ်ႈပႃး ။


ၵဵဝ်ႇၵပ်းလူၺ်ႈလွင်ႈၼႆႉ ၵမ်ႈၽွင်ႈထတ်းသၢင်ဝႃႈ ၸၢင်ႈၵဵဝ်ႇၶွင်ႈ ပၢင်ပွႆးၶုၵ်းထူပ်း ဝၼ်းၵိူတ်ႇတပ်ႉသိုၵ်း ၸိုင်ႈတႆး (SSPP/SSA) ၶွပ်ႈတဵမ် 52 ပီ ၊ တီႈငဝ်ႈငုၼ်းဝၢၼ်ႈႁႆး။ ယွၼ်ႉဝႃႈႁွင်ႉမွၵ်ႇထိုင် ပီႈၼွင်ႉတႆးၼႂ်းမိူင်းၶၢင် မႃးၶဝ်ႈပၢင်ပွႆးသေ တွင်ႈထၢမ်ၵၢင်ၸႂ် ၊ လွင်ႈဢၼ်သိုၵ်းၶၢင် လူလၢႆပေႉၵိၼ်ပီႈၼွင်ႉတႆးၼႂ်းမိူင်းၶၢင် ဢၼ်ဢွၵ်ႇၶၢဝ်ႇၼႂ်းဝႅပ်ႉသၢႆႊ ယူႇၵူႈဝၼ်းၼၼ်ႉ ၸွင်ႇၸႂ်ႈတႄႉ ဢမ်ႇၸႂ်ႈတႄႉ ၸိူဝ်းၼႆႉ ။ ၵွပ်ႈၼၼ် သိုၵ်းၶၢင်ၶဝ်ၵေႃႈ ၸင်ႇမွၵ်ႇႁွင်ႉ ပီႈၼွင်ႉတႆးၼႂ်းမိူင်းၶၢင်ၸိူဝ်းၼႆႉ မႃးၸူးၶဝ်သေႁူပ်ႉထူပ်းဢုပ်ႇဢူဝ်း ၊ တေၼႄၼႃႈတိူဝ်ႈဝႃႈ ပီႈၼွင်ႉတႆးလႄႈသိုၵ်းၶၢင် တိုၼ်းၶဝ်ႈၵၼ်ယူႇ ၊ ၵူၼ်းမိူင်းႁၼ်လီၵမ်ႉထႅမ် သိုၵ်းၶၢင်ၶဝ်ယူႇ - ဝႃႈၼႆ ။


ၾၢႆႇၼိုင်ႈၵေႃႈ မိူဝ်ႈဝၼ်းတီႈ 28/04/2016 ၶၢဝ်းယၢမ်းႁူဝ်ၶမ်ႈၼၼ်ႉ ၵူၼ်းဝၢၼ်ႈၼႂ်းပိုၼ်ႉတီႈ ၵႂႃႇႁဵတ်းၵၢၼ်သေပွၵ်ႈၶိုၼ်းႁိူၼ်း ၊ မီးသိုၵ်းၶၢင် မႃးပႂ်ႉတီႉၺွပ်းတီႈႁူဝ်ဝၢၼ်ႈၵုင်းသႃႇလႄႈ ႁၢင်ဝၢၼ်ႈတီႈၶဝ်ႈမိူင်းၶႄႇ ။ ၼိုင်ႈတီႈပႂ်ႉဝႆႉ 7-8 ၵေႃႉ ၊ ႁဵတ်းႁႂ်ႈၵူၼ်းဝၢၼ်ႈ ၸိူဝ်းပွၵ်ႈၵၢၼ်ဢမ်ႇၸၢင်ႈပွၵ်ႈႁိူၼ်း ၊ မၢင်ၸိူဝ်းလႆႈပၢႆႈမႅပ်းယူႇဝႆႉၼႂ်းသူၼ်ၼႂ်းႁိူၵ်ႈ ၊ မၢင်ၸိူဝ်းလႆႈမူၵ်းယူႇဝႆႉၼႂ်းလူင်မႆႉ (ၼႂ်းထိူၼ်ႇ) ၊ ၵူၼ်းဝၢၼ်ႈၶဝ်တွင်ႉမႆႈၶဝ်ႈၵေႃႈ ဢမ်ႇၸၢင်ႈႁဵတ်းႁိုဝ် ၊ ပၢႆလိူဝ်တွင်ႉမႆႈၶဝ်ႈ သမ်ႉလႆႈပၢႆႈထႅင်ႈ - ၼႆယဝ်ႉ ။