ၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈ ၸဵင်ႇၸၢၼ်းဝၼ်းဢွၵ်ႇ ဝဵင်းသီႇပေႃႉ ၊ ဢၼ်ပၢႆႈၽေးသိုၵ်းဝႆႉ ယွၼ်ႉသိုၵ်းမၢၼ်ႈလေႃႇတိုၵ်း တပ်ႉပၢင်သဝ်း တပ်ႉသိုၵ်းၸိုင်ႈတႆး SSPP/SSA ၼၼ်ႉ ၶၢင်ႉၶမ်ဝႆႉယူႇ တီႈဝတ်ႉမုၼ်ၸဝ်ႈ ဢိူင်ႇၼမ်ႉမႃႉ ႁူဝ်ၵူၼ်း 200 ပၢႆ ။

ၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈၼႃႈလိၼ်ပၢင်တိုၵ်း  ဢၼ်ပၢႆႈၽေးသိုၵ်း ႁွတ်ႈၽႅဝ်ဝႆႉတီႈ ဝဵင်းလႃႈသဵဝ်ႈၵမ်ႈၽွင်ႈ

ဝၼ်းတီႈ 19/05/2016 (မိူဝ်ႈၼႆႉ) ယၢမ်းၵၢင်ၼႂ် ယွၼ်ႉပိူဝ်ႈသိုၵ်းမၢၼ်ႈ သိုပ်ႇလေႃႇတိုၵ်းတပ်ႉပၢင်သဝ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ဢၼ်မီးတွၼ်ႈၾၢႆႇၸၢၼ်း ဝဵင်းသီႇပေႃႉထႅင်ႈသေ ၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈ ဢိူင်ႇၼမ်ႉမႃႉ ဝၢၼ်ႈၼႃးတေႃ ၊ ၶူဝ်ၼၢင်းၾႃႉ ၊ ဝၢၼ်ႈၵျွင်းမႂ်ႇၸိူဝ်းၼႆႉ ႁူဝ်ၵူၼ်း 200 ပၢႆ ၊ ပၢႆႈၽေးသိုၵ်းသေ ၵႂႃႇၶၢင်ႉၵိုတ်းၶမ်ဝႆႉယူႇတီႈဝတ်ႉ / ၵျွင်း ဝၢၼ်ႈၵျွင်းမႂ်ႇ ဢိူင်ႇၼမ်ႉမႃႉ ၸႄႈဝဵင်းၼမ်ႉပွင်ႈ - ၼႆယဝ်ႉ ။


ၼၢင်းငိုၼ်း ဢႃယု 35 ၵေႃႉဢၼ်ၽႅဝ်ႁွတ်ႈတီႈၼမ်ႉပွင်ႈ လၢတ်ႈဝႃႈ - သိုၵ်းမၢၼ်ႈ 4-5 သၢႆ ၶဝ်ႈဝၢၼ်ႈၼိုင်ႈ ဢွၵ်ႇဝၢၼ်ႈၼိုင်ႈသေ ၽိူဝ်ႇမႃးၸမ်ႁိမ်းဝၢၼ်ႈႁဝ်းၶႃႈၵေႃႈ ဢဝ်ၵွင်ႈလူင်ယိုဝ်းသႂ်ႇ ။ လွင်ႈပၢင်တိုၵ်းတႄႉ လႆႈငိၼ်းသဵင်ႈၵွင်ႈၵၢင်ႇ တင်ႈတႄႇမိူဝ်ႈဝႃးမႃး တေႃႇထိုင်မိူဝ်ႈၼႆႉၵၢင်ၼႂ် ။ ဢၼ်ႁဝ်းၶႃႈမႃးႁွတ်ႈထိုင်တီႈ ၵျွင်းဝၢၼ်ႈမႂ်ႇၼႆႉ မီးၵူၼ်း 200 ပၢႆ ။ သိုၵ်းမၢၼ်ႈၵေႃႈတူင်ႉၼိုင်ယူႇႁိမ်းႁွမ်းၼႆႉသေ ႁႂ်ႈႁဝ်းၶႃႈယူႇဝႆႉၼႂ်း ဝတ်ႉၵျွင်းၼႆႉ ၊ ဢမ်ႇပၼ်ႁဝ်းၶႃႈဢွၵ်ႇၵႂႃႇတၢင်းလႂ် - ဝႃႈၼႆ ။


ဝၼ်းတီႈ 18/05/2016 (မိူဝ်ႈဝႃး) သိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း တပ်ႉႁူမ်ႇလူမ်ႈငဝ်ႈငုၼ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၊ ဢၼ်မီးၾၢႆႇၸဵင်ႇႁွင်ႇဝၼ်းတူၵ်း ဝၢၼ်ႈႁႆး ။ ပၢင်တိုၵ်းတင်ႈတႄႇမွၵ်ႈယၢမ်း 8 မူင်းၵၢင်ၼႂ် တေႃႇထိုင်ယၢမ်း 9 မူင်းၵၢင်ၶမ်ႈ ။


ဝၼ်းတီႈ 19/05/2016 (မိူဝ်ႈၼႆႉ) မွၵ်ႈၵၢင်ၼႂ်ယၢမ်း 7 မူင်းပၢႆ သိုၵ်းမၢၼ်ႈတႄႇၶိုၼ်ႈလေႃႇတိုၵ်း တပ်ႉပၢင်သဝ်း SSPP/SSA ထႅင်ႈ ။ တေႃႇထိုင်ယၢမ်းၵၢင်ဝၼ်းတဵင်ႈမိူဝ်ႈၼႆႉ ၾၢႆႇတပ်ႉသိုၵ်းမၢၼ်ႈ တိုၵ်ႉဢဝ်ႁိူဝ်းဝိၼ်သိုၵ်း 3 လမ်း ယူႇယူႇၵႆႉမႃးယိုဝ်း တပ်ႉပၢင်သဝ်း SSPP/SSA ယူႇ - ၽူႈမီးၸၼ်ႉၼႂ်း SSPP/SSA ၸဝ်ႈၼိုင်ႈလၢတ်ႈ ။


သိုၵ်းမၢၼ်ႈ (တပ်ႉမတေႃႇ) ဢၼ်ႁၢင်ႈႁႅၼ်းသိုၵ်း မႃးလေႃႇတိုၵ်းတပ်ႉသိုၵ်းၸိုင်ႈတႆး SSPP/SSA တီႈထုင်ႉဝၢၼ်ႈလူင် ၼမ်ႉမႃႉ တွၼ်ႈၾၢႆႇၸၢၼ်းဝဵင်းသီႇပေႃႉ ၸႄႈဝဵင်းသီႇပေႃႉၸိူဝ်းၼႆႉ ပဵၼ်တပ်ႉၶလယ 41 , 68 , 69 , 291 ၊ ၶမယ 523 ပႃႈတႂ်ႈ တိူင်းသိုၵ်းၸဵင်ႇႁွင်ႇဝၼ်းဢွၵ်ႇ (ယမၶ) လႃႈသဵဝ်ႈ - ၼႆယဝ်ႉ ။


ၶၢဝ်ႇငၢဝ်းဢၼ်ပႆႇယိုၼ်ယၼ်လႆႈ လၢတ်ႈဝႃႈ - ယၢမ်းလဵဝ်  ပႃႊတီႊၵၢၼ်မိူင်း ၊ ၸုမ်းတူင်ႇဝူင်းၵူၼ်း တီႈၼႂ်းဝဵင်းသီႇပေႃႉၶဝ် တိုၵ်ႉၶတ်းၸႂ်တႃႇတေၶဝ်ႈၵႂႃႇၸွႆႈထႅမ် ဢဝ်ၵူၼ်းပၢႆႈၽေး ၸိူဝ်းဢၼ်မီးယူႇ တီႈၵျွင်းမႂ်ႇၼၼ်ႉ ဢွၵ်ႇမႃးယူႇ ၊ ယၢမ်းလဵဝ်ၼႆႉ တိုၵ်ႉၶတ်းၸႂ်ယူႇ - ဝႃႈၼႆ ။