မူႇၸုမ်းတႆးၵူႈၸုမ်းၸုမ်း မိူင်းမၢဝ်း တေႁူမ်ႈၵၼ်ၸတ်းႁဵတ်း ပၢင်ပွႆးယွင်ႈၵုၼ်းမုၼ် Dr. ၸဝ်ႈတိုၼ်းတႆး လႆႈႁပ်ႉၸုမ်ႈၶူး တီႈမိူင်းဢိၼ်ႊၻီႊယိူဝ်ႊ လႄႈ သင်ၶၸဝ်ႈ ၸိူဝ်းလႆႈႁပ်ႉၸုမ်ႈၶူး B.A, M.A မိူင်းသီရိလင်းၵႃ လႄႈမိူင်းထႆး ။

ပေႃးထိုင်မႃး ဝၼ်းတီႈ 20/05/2016 ၊ ယၢမ်းဝၢႆးဝၼ်းႁူဝ်ၶမ်ႈ ၊ ယူႇတီႈလုမ်းပုတ်ႉထၽႃသႃ တီႈမိူင်းမၢဝ်း တင်း မူႇၸုမ်းၸိူဝ်ႉၶိူဝ်းတႆး မိူင်းမၢဝ်းလူင် တေႁူမ်ႈၵၼ်ဢွၼ်ႁူဝ်ၸတ်းႁဵတ်း ပၢင်ပွႆးယုၵ်ႉယွင်ႈၵုၼ်းမုၼ် Dr. ၸဝ်ႈတိုၼ်းတႆး (သတ်ႉထမ်မ ၸေႃးတိၵထၸ) ၵႅမ်ႁူဝ်ပဝ်ႈၾၢႆႇသင်ၶ ၸိုင်ႈမိူင်းၶႄႇ လႆႈႁပ်ႉၸုမ်ႈၶူး တီႈမိူင်းဢိၼ်ႊၻီႊယိူဝ်ႊ ၊ တီႈႁူင်းၼမ်ႉမၢဝ်းသႂ် မိူင်းမၢဝ်း - ၼႆယဝ်ႉ ။


ၼွၵ်ႈသေၼၼ်ႉ ယုၵ်ႉယွင်ႈၵုၼ်းမုၼ်ပႃး သင်ၶၸဝ်ႈၸိူဝ်းလႆႈႁပ်ႉၸုမ်ႈၶူး B.A, M.A မိူင်းသီရိလင်းၵႃ (ဢိၼ်ႊၻီႊယိူဝ်ႊ) လႄႈမိူင်းထႆးမႃး 4 ၸဝ်ႈ - 1. ၸဝ်ႈၶူးၵေႃးဝိတ (မိူင်းလႃး) ။ 2. ၸဝ်ႈၶူးရႃႇႁုလႃႇ (ၵွၼ်းၶမ်း) ။ 3. ၸဝ်ႈၶူးထႃႇဝ (ထွၼ်းသိုဝ်ႉ) ။ 4. ၸဝ်ႈၶူးၵိတ်ႉတိဝၼ်ႇၼ (ထုၼ်းလႃႉ) ၸိူဝ်းၼႆႉ - ၼႆယဝ်ႉ ။


ပၢင်ပွႆးယုၵ်ႉယွင်ႈၵုၼ်းမုၼ်ပွၵ်ႈၼႆႉ ႁဵတ်းၵိုၵ်းၵပ်းၸပ်းၵၼ်တင်း ပၢင်ပွႆးၼုင်ႈသၢင်ႇ ၶၢမ်ႇသၢင်ႇလွင်း 55 တူၼ် ၊ ထၢပ်ႈၵၢမ်ႇသင်ၶၸဝ်ႈ 6 တုၼ် ။ ပၢင်ပွႆးသၢင်ႇလွင်း ၼုင်ႈသၢင်ႇၼႆႉ ၸတ်းတီႈဝတ်ႉလူင်ႁေႃၶမ်း မိူင်းမၢဝ်း ၊ ပီၼႆႉ ပဵၼ်ပွၵ်ႈၵမ်းထူၼ်ႈ 4 ။


ၸဝ်ႈတိုၼ်းတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ - ဝၼ်းတီႈ 16 ပဵၼ်ဝၼ်းပေႃႈမႄႈသၢင်ႇလွင်းၸၢင်းလွင်း ၶွၼ်ႈတုမ်ၵၼ် ။ ဝၼ်းတီႈ 17 ပဵၼ်ဝၼ်းတႄႇပၢင်ပွႆး ၊ ၼုင်ႈလွင်း ။ ဝၼ်းတီႈ 18 ပဵၼ်ဝၼ်းပွႆးယႂ်ႇပွႆးလူင် ႁပ်ႉတွၼ်ႈပီႈၼွင်ႉၶႅၵ်ႇ ။ ဝၼ်းတီႈ 19 ပဵၼ်ဝၼ်းၼုင်ႈၽႃႈလိူင် သၢင်ႇၵၢၼ်း ။ ဝၼ်းတီႈ 20 ပဵၼ်ဝၼ်းလူႇတၢၼ်းယၢတ်ႇၼမ်ႉလႄႈ ယွင်ႈၵုၼ်းယေႃးမုၼ် ။


ပၢင်ပွႆးၶၢမ်ႇသၢင်ႇ ၶၢမ်ႇမုၼ်ပွၵ်ႈၵမ်းၼႆႉ ပဵၼ် Dr. ၸဝ်ႈတိုၼ်းတႆး (ဝိသုတ်ႉထိၺႃၼ) ဢွၼ်ႁူဝ်ၼမ်းၼႃႈ တၵ်ႉၵႃႇသတ်ႉထႃးတင်းသဵင်ႈ ၸတ်းႁဵတ်း ။ ဝၼ်းတီႈ 19 တေဢဝ်သၢင်ႇလွင်း ၵႂႃႇလမ်ႁူဝ် (ၵၼ်ႇတေႃး) တီႈႁေႃလူင် ၸဝ်ႈသိူဝ်ၶၢၼ်ႇၾႃႉ ။ ဝၼ်းတီႈ 20 ပွတ်းၼႂ် လူႇတၢၼ်းယၢတ်ႇၼမ်ႉ ၊ ဝၢႆးဝၼ်း 3 မူင်းတေႃႇထိုင် 6 မူင်း ပွႆးယွင်ႈၵုၼ်းမုၼ် ။


ပွႆးၵမ်းၼႆႉ လွင်ႈလၢၵ်ႇလၢႆးမၼ်းမီး 2-3 ပိူင် မိူၼ်ၼင်ႇ ၸဝ်ႈသၢင်ႇၶဝ်ထႃႁူဝ်ႁူမ်ႈၵၼ် ၊ ယၢမ်းၽွင်းထႃႁူဝ်ၵေႃႈ ပေႃႈမႄႈသွင်ၸဝ်ႈ ဢဝ်တင်းဝႂ်မွၵ်ႇမူဝ်သေ ႁပ်ႉတုင်းဢဝ်ၶူၼ်ႁူဝ် ။ ယၢမ်းၽွင်းတေၼုင်ႈၽႃႈလိူင်သၢင်ႇၵၢၼ်း ၼႆၵေႃႈ သၢင်ႇလွင်းၶဝ်လႆႈယွၼ်း ဢၼုၺၢတ်ႈတီႈပေႃႈမႄႈ ၊ ၵၼ်ႇတေႃးပေႃႈမႄႈသေ ဢဝ်ၼမ်ႉၵတ်းယဵၼ် သွၼ်းမိုဝ်းပေႃႈမႄႈ ၸိူဝ်းၼႆႉ - ၸဝ်ႈတိုၼ်းတႆး လၢတ်ႈ ။


မၼ်းၸဝ်ႈသိုပ်ႇလၢတ်ႈထႅင်ႈဝႃႈ - ဢၼ်ၸတ်းႁဵတ်းပၢင်ပွႆးၼႆႉ ၵွပ်ႈပဵၼ်ပွႆးၾိင်ႈၵဝ်ႇထုင်းမွၼ်ႇတႆးႁဝ်းဢမ်ႇၵႃး ၼင်ႇႁိုဝ်ၵူၼ်းၵတ်ႉၶႅၼ်ႇ တႆးႁဝ်းတေတိူဝ်းမႃးၼၼ်ႉ ႁူင်းႁဵၼ်းပေႃးထိ ဝတ်ႉလူင်ႁေႃၶမ်းမိူင်းမၢဝ်း လႆႈတင်ႈႁူင်းႁဵၼ်းသေ ၶွၼ်ႈတုမ်ဢဝ်လုၵ်ႈဢွၼ်ႇၼုမ်ႇႁဝ်းၶဝ် မႃးယူႇၵျွင်းယူႇဝတ်ႉသေ ႁဵတ်းလိၵ်ႈလၢႆးတႆး ၊ လွင်ႈတၢင်းၵႃႈ ၵူႈၾၢႆႇၾၢႆႇ ။


ယိူင်းဢၢၼ်းပၢင်ပွႆးၼႆႉ ပိူဝ်ႈတႃႇႁႂ်ႈမီးၵူၼ်းၵတ်ႉၶႅၼ်ႇ ၵူၺ်းဢမ်ႇၵႃး ၊ ယုၵ်ႉယွင်ႈ ၾိင်ႈၵဝ်ႇထုင်းမွၼ်ႇ ၊ ႁႂ်ႈတႆးၼႂ်းမိူင်းၼွၵ်ႈမိူင်း ယုၵ်ႉယွင်ႈၾိင်ႈထုင်းလႄႈ ႁူႉၸၵ်းၾိင်ႈထုင်း။ တီႈမိူင်းမၢဝ်းၼႆႉ မိူၼ်ၼင်ႇသင်ၶၸဝ်ႈ ၸိူဝ်းလႆႈၸုမ်ႈၶူး / ၻွၵ်ႊတိူဝ်ႊလႄႈသင် ၊ ယဝ်ႉၸၼ်ႉ M.A. လႄႈသင် ၊ ၵႃႈပူၼ်ႉမႃး ဢမ်ႇယၢမ်ႈမီး ပၢင်ယုၵ်ႉယွင်ႈၵုၼ်းမုၼ်မႃးသေပွၵ်ႈ ၊ ထိုင်ပီၼႆႉ ၸင်ႇမီးမႃး ။ တႃႇၶၢမ်ႇသၢင်ႇၶၢမ်ႇမုၼ်ပွၵ်ႈလဵဝ် ႁႂ်ႈမီး 57 တူၼ်ၼၼ်ႉၼႆၵေႃႈ ဢမ်ႇတွၼ်ႉမီး ၊ ပွၵ်ႈၼႆႉပဵၼ်ပွႆးဢၼ်မီးၵႃႈၶၼ် တႃႇပီႈၼွင်ႉမိူင်းမၢဝ်းၵူၺ်းဢမ်ႇၵႃး ပဵၼ်ပွႆးဢၼ်မီးၵႃႈၶၼ် တႃႇပီႈၼွင်ႉတႆးႁဝ်းတင်းသဵင်ႈ - ၸဝ်ႈတိုၼ်းတႆး သိုပ်ႇလၢတ်ႈထႅင်ႈၼင်ႇၼႆ ။