ၸွမ်ၽွင်းလူင်မိူင်းတႆး တွၵ်ႊတိူဝ်ႊလိၼ်းထုတ်ႉ ဢႅဝ်ႇယႅမ်ႈသူႇၸႂ်း ႁူပ်ႉထူပ်းပေႃႈမႄႈ ပီႈၼွင်ႉ ၵူၼ်းမိူင်းမူႇၸႄႈ ၸိုင်ႈတႆးပွတ်းႁွင်ႇ ။

ဝၼ်းတီႈ 07/05/2016 ယၢမ်း 14:30 ထိုင် 18:00 မူင်း ၸွမ်ၽွင်းလူင်မိူင်းတႆး တွၵ်ႊတိူဝ်ႊ လိၼ်း ထုတ်ႉလႄႈ ၽွင်းလူင်မိူင်းတႆးလၢႆလၢႆၵေႃႉ ဢႅဝ်ႇယႅမ်ႈ တွင်ႈထၢမ် လွင်ႈယၢပ်ႇၽိုတ်ႇ / လွင်ႈယူႇသဝ်း ၵိၼ်သၢင်ႈ ပေႃႈမႄႈၵူၼ်းမိူင်း မူႇၸႄႈ တီႈႁူင်းႁေႃး (မဵဝ်ႉတေႃႊၶၢၼ်းမ) ၸႄႈဝဵင်းမူႇၸႄႈ ၸိုင်ႈ တႆးပွတ်းႁွင်ႇ ။

တွၵ်ႊတိူဝ်ႊလိၼ်းထုတ်ႉ ၸွမ်ၽွင်းလူင်မိူင်းတႆးလၢတ်ႈဝႃႈ “ ငိၼ်းၸူမ်းၶွပ်ႈၸႂ်ပီႈၼွင်ႉၵူၼ်းမိူင်း ၸိူဝ်းဢၼ်လႆႈမႃးၶဝ်ႈႁူမ်ႈ ဢုပ်ႇဢူဝ်းၸွမ်းလွင်ႈပၼ်ႁႃၼႂ်းပိုၼ်ႉတီႈ လႆႈမႃးတင်ႇလၢတ်ႈၼေ ” ဝႃႈၼႆ ။

ပီႈၼွင်ႉၵူၼ်းမိူင်း ၸုမ်းပႃႊတီႊၵၢၼ်မိူင်း လႄႈ ၸုမ်းတူင်ႉၼိုင်တူင်ႇဝူင်း လၢႆလၢႆၸုမ်း လႆႈတၢင်ႇၼႄ လွင်ႈယၢပ်ႈၽိုတ်ႇ လွင်ႈပၼ်ႁႃၼႂ်းပိုၼ်ႉတီႈလႄႈ လွင်ႈယူႇသဝ်းၵိၼ်သၢင်ႈ ဝႃႈၼႆ ။

ၽူႈတႅၼ်းပႃႊတီႊႁူဝ်သိူဝ် ၵေႃႉၼိုင်ႈ လၢတ်ႈဝႃႈ “ ယူႇတီႈၶႃႈႁဝ်းတႄႉ တေဢၢၼ်းလၢတ်ႈ 9 ၶေႃႈ ။ ၵူၺ်းၵႃႈ တင်းၼႃႈၶႃႈႁဝ်းသမ်ႉ မၢင်ၸုမ်း / မၢင်ၵေႃႉ လၢတ်ႈၵႂႃႇယဝ်ႉလႄႈ ၶေႃႈဢၼ်မိူၼ်ၵၼ် ၸိူဝ်းၼၼ်ႉ ႁဝ်းၶႃႈဢမ်ႇလၢတ်ႈယဝ်ႉ ။ ဢၼ်လႆႈလၢတ်ႈၵႂႃႇတႄႉ ပၼ်ႁႃသဵၼ်ႈတၢင်း ၊ ယုၵ်း ယၢၵ်း ၊ လွင်ႈၶူဝ်းၶွင်ၼိူဝ်လိၼ် တႂ်ႈလိၼ် ၊ လွင်ႈပၵ်းပိူင်မၢႆမီႈသုမ်ႇငမ်းၵူၼ်းမိူင်း၊ လွင်ႈၶူင်ႇႁိူဝ်းမိၼ် ၊ လွင်ႈပီႇတုၸိတ်ႉ (သိုၵ်းၵူၼ်းမိူင်း) ၊ လွင်ႈၵူၼ်းယိပ်းပပ်ႉၶၢမ်ႈလႅၼ်လိၼ် မိူင်းၶႄႇ ၊ ၵၢၼ်တေႃႇလွင်း ၊ ယႃႈမဝ်းၵမ် ၊ လွင်ႈၵႃးတၢင်ႇၵုၼ်ႇမိူင်ၶႄႇ ၶဝ်ႈမႃးမိူင်းတႆး လႄႈ လွင်ႈသဵၼ်ႈတၢင်းလု (လႅဝ်) မူႇၸႄႈ တင်းၼမ်ႉၶမ်း ၸဵမ်ၸိူဝ်းၼႆႉ ” ။

ၵဵဝ်ႇၵပ်းလွင်ႈတုၵ်းယွၼ်းၸိူဝ်းၼၼ်ႉ ယူႇတီႈၽွင်းလူင်ၾၢႆႇၵဵဝ်ႇၶွင်ႈၶဝ် တေၸႅၵ်ႈၼႃႈတီႈပုၼ်ႈ ၽွၼ်းၵၼ် သေၵႄႈလိတ်ႈပၼ်ၵႂႃႇ ဝႃႈၼႆ ။

ၸုမ်းၸိူဝ်းဢၼ်မႃးၶဝ်ႈႁူမ်ႈ ၼႂ်းပၢင်ႁူပ်ႉထူပ်းၸွမ်ၽွင်းလူင်မိူင်းတႆးတႄႉပဵၼ် ပီႈၼွင်ႉၵူၼ်းမိူင်း ပိုၼ်ႉတီႈလႄႈ ပႃႊတီႊ - ႁူဝ်သိူဝ် ၊ သိူဝ်ၽိူၵ်ႇ ၊ ၼူၵ်ႉယုင်း ၊ သၢင်ႇသီႈ ၊ ၸုမ်းလုၵ်ႈႁဵၼ်း 88 ၊ ၵေႃလိၵ်ႈလၢႆးလႄႈၾိင်ႈငႄႈတႆး မူႇၸႄႈ ၊ ၸုမ်းတူင်ႉၼိုင်တူင်ႇဝူင်းလၢႆလၢႆၸုမ်း ႁူမ်ႈပႃးလူၺ်ႈ ၾၢႆႇႁွင်ႈၵၢၼ် လူင်ပွင်ၸိုင်ႈ ၼႂ်းၸႄႈဝဵင်းမူႇၸႄႈ ၸဵမ်ၸိူဝ်းၼႆႉ ။

ဝၼ်းတီႈ 08/05/2016 ၼႆႉၵေႃႈ ၸွမ်ၽွင်းလူင်မိူင်းတႆး တွၵ်ႊတိူဝ်ႊလိၼ်းထုတ်ႉ သိုပ်ႇၶၢဝ်း တၢင်း ႁူပ်ႉထူပ်း ပီႈၼွင်ႉၵူၼ်းမိူင်း ၸႄႈဝဵင်းၵျွၵ်ႉမႄး လႆႈႁူႉၼင်ႇၼႆ ။