ဝၼ်းတီႈ 21/05/2016 ဝၼ်းလိူၼ်ႁူၵ်းမူၼ်းၼႆႉ ၸုမ်းၵူၼ်းၼုမ်ႇလၢႆးၶႃႈ ၊ မိူင်းၵိုင်ႁူမ်ႈလူၺ်ႈပီႈ ၼွင်ႉၵူၼ်းၼႂ်းပိုၼ်ႉတီႈ ဢဵၼ်ႁႅင်းၵူၼ်း 400 ပၢႆ ဢွၼ်ၵၼ်ၽုၵ်ႇတူၼ်ႈမွၵ်ႇၵွၼ် 666 တူၼ်ႈ တီႈဝတ်ႉ (ၵျွင်း) မူၺ်ႇတေႃႇမိူင်းၵိုင် ၸိုင်ႈတႆးပွတ်းၸၢၼ်း ။

ဝၼ်းတီႈ 21/05/2016 ၸၢႆးလႅင်းႁိူင်း ဢွၼ်ႁူဝ်ၵူၼ်းၼုမ်ႇလၢႆးၶႃႈ 120 ၵေႃႉ ၶွၼ်ႈတုမ်ၵၼ်သေ ၵႂႃႇမိူင်းၵိုင် ၵူၼ်းၼႂ်းပိုၼ်ႉတီႈ 300 ပၢႆ ႁပ်ႉတွၼ်ႈႁူမ်ႈၵၼ်ၵႂႃႇတီႈပၢင်ႇၵွင်းမူးမူၺ်ႇတေႃႇလူင်မိူင်းၵိုင် သေၽုၵ်ႇတူၼ်ႈမွၵ်ႇၵွၼ် ။


ၸၢႆးလႅင်းႁိူင်း ႁူဝ်ၼႃႈၵူၼ်းၼုမ်ႇလၢႆးၶႃႈလၢတ်ႈဝႃႈ - “ ဢွၼ်တၢင်းသုတ်းယိၼ်းၸူမ်းယႂ်ႇၼမ်ထိုင် ၸဝ်ႈတူၼ်ၶူးရေဝတ မိူင်းၵိုင် တီႈပၼ်တိုဝ်ႉတၢင်းႁဝ်းၶႃႈလႆႈၵႂႃႇၽုၵ်ႇတူၼ်ႈမႆႉပီၼႆႉတႄႉၵေႃႈမီး တၢင်းသိူဝ်းၸႂ်ၶႃႈတီႈလႆႈႁၼ်ပီႈၼွင်ႉမိူင်းၵိုင်မႃးႁူမ်ႈၸွမ်း ၊ ႁဵတ်းႁႂ်ႈႁဝ်းမီးလွင်ႈၸမ်ၸႂ်ၵၼ် ၊ ႁၵ်ႉႁူမ် ၸူမ်းပႅင်းၵၼ် ၊ ၸွႆႈထႅမ်ၵၼ်ၵႂႃႇၶႃႈဢေႃႈ လိူဝ်ၼၼ်ႉၶႂ်ႈတိုၵ်းသူၼ်းထိုင်ၵူၼ်းၼုမ်ႇ ၵူႈဝဵင်းဝဵင်းဢွၼ် ၵၼ်ၽုၵ်ႇတူၼ်ႈမႆႉၼမ်ၼမ် ၼင်ႇႁိုဝ်သိင်ႇဝႅတ်ႉႁဝ်းပေႃးတေၶဵဝ်ၸမ်ႉတူဝ်ႈၸိုင်ႈတႆး - ဝႃႈၼႆ ။


ၸုမ်းၵူၼ်းၼုမ်ႇလၢႆးၶႃႈႁူမ်ႈပႃးၸုမ်းၵူၼ်းၼုမ်ႇလၢႆတီႈၼႆႉ ႁူမ်ႈၵၼ်ၽုၵ်ႇတူၼ်ႈမွၵ်ႇၵွၼ်ပွၵ်ႈၼႆႉ ပဵၼ်ပွၵ်ႈၵမ်း 3 ယဝ်ႉ ၊ မိူဝ်ႈပွၵ်ႈၵမ်း 1 ပီ 2013 ၽုၵ်ႇတီႈဝဵင်းလၢႆးၶႃႈ (470) တူၼ်ႈ ၊ ပွၵ်ႈၵမ်း 2 ပီ 2014 ၽုၵ်ႇတီႈပၢင်ႇလႅင်းသႂ် ဝဵင်းၼမ်ႉၸၢင် (300) တူၼ်ႈ ပီၼႆႉ ပီ 2016 သမ်ႉၽုၵ်ႇတီႈ မူၺ်ႇ တေႃႇမိူင်းၵိုင်တႃႇ (666) တူၼ်ႈ ၊ ပီၼႃႈမႃးၵေႃႈတေဢၢၼ်းၽုၵ်ႇၵႂႃႇထႅင်ႈဝႃႈၼႆ ။