ဝၼ်းတီႈ 21/05/2016 ယၢမ်း 09:00-11:00 မူင်း ငဝ်ႈၸိုင်ႈလွႆတႆးလႅင်း ဢွၼ်ႁူဝ်ၸတ်းႁဵတ်း ဝၼ်းလုၵ်ႉၽိုၼ်ႉ ၶွပ်ႈတဵမ် 58 ပီ ၵူၼ်းသိုၵ်း ၵူၼ်းမိူင်း ၶဝ်ႈႁူမ်ႈႁဵင်ပၢႆ ။


ၼႂ်းဝၼ်းလုၵ်ႉၽိုၼ်ႉၼႆႉ တေမီးၸဝ်ႈၸၢႆးယီႈ ၵႅမ်ႁူဝ်ပဝ်ႈ (1) မွၵ်ႇလၢတ်ႈၶေႃႈၵႂၢမ်း လွင်ႈပဵၼ်မႃးဝၼ်းလုၵ်ႉၽိုၼ်ႉသေ ၽူႈၼင်ႈၸိုင်ႈသမ်ႉ ပဵၼ်ၸဝ်ႈၶူးပၢႆးမိူင်း ႁူမ်ႈပႃးလူၺ်ႈ ၽူႈမီးၸၼ်ႉ ၼႂ်းတပ်ႉသိုၵ်းၶဝ်ႈႁူမ်ႈ တင်းၼမ်ယူႇ ဝႃႈၼႆ ။

ၸၢႆးၶမ်းလူင်ၾႃႉ ၾၢႆႇၵပ်းသၢၼ်ၼွၵ်ႈမိူင်း လၢတ်ႈဝႃႈ “ ပီၼႆႉ ၾႃႉၾူၼ်ၵေႃႈ ဢမ်ႇပေႃးၶႅမ်ႉလီ မီးပီႈၼွင်ႉၸွမ်းႁိမ်းႁွမ်းၸိူဝ်းၼႆႉလႄႈ ပီႈၼွင်ႉ ၵဵင်းမႆႇ ၵမ်ႈၽွင်ႈၵူၺ်းမႃး ။ ပီၼႆႉလႄႈ ပီပူၼ်ႉ တေလႆႈဝႃႈ ပီပူၼ်ႉ ၵိုၼ်းလိူဝ်ပီၼႆႉ ။ ၵွပ်ႈပိူဝ်ႈဝႃႈ ပီႈၼွင်ႉၶႅၵ်ႇ ၵမ်ႉၼမ်သမ်ႉ ၵႂႃႇၸွမ်းၸဝ်ႈႁူဝ်ပဝ်ႈလူင်ၵႂႃႇတင်ႇထီးထၢတ်ႈ ၵၢတ်ႇၵူႇ / တူၼ်ႈတီး ” ဝႃႈၼႆ ။


ၶွပ်ႈတဵမ် 58 ပီ တီႈလွႆတႆးလႅင်းၼႆႉ တေမီးပၢင်ၵႅဝ်ႈ ၼႄၽၢင်ႇႁၢင်ႈသိုၵ်းလႄႈ ဝၢင်းၶူဝ်ႉမွၵ်ႇမွင်ၸႂ် ၸိူဝ်းၽူႈႁၵ်ႉၸိူဝ်ႉၸၢတ်ႈ လႆႈတူၵ်းသုမ်း ၸဵမ်ၸိူဝ်းၼႆႉ ၼႆယဝ်ႉ ။


ၸၢႆးၶိူဝ်း ၽူႈၵႂႃႇၶဝ်ႈႁူမ်ႈ ပၢင်ပွႆးဝၼ်းလုၵ်ႉၽိုၼ်ႉ တီႈလွႆတႆးလႅင်း လၢတ်ႈဝႃႈ “ ယွၼ်ႉၾူၼ်တူၵ်းႁႅင်းၼႃႇ ၵတ်းၵေႃႈၵတ်း မွၵ်ႇၵုမ်ႇၵေႃႈသုမ်ႇၼႃလူင်ဝႆႉ သင်ဝႃႈ ၽူႈၶပ်းရူတ်ႉၵႃး ဢမ်ႇလႅၼ်ႇသဵၼ်ႈတၢင်းၸိုင် တေၵႂႃႇယၢပ်ႇမႃးယၢပ်ႇတႄႉတႄႉ ယွၼ်ႉပိူဝ်ႈဝႃႈ မၢင်တီႈသဵၼ်ႈတၢင်းတိုၵ်ႉပဵၼ်လိၼ်ယူႇ ” ဝႃႈၼႆ ။


ဝၼ်းလုၵ်ႉၽိုၼ်ႉ လိူၼ်မေႊ 21 ဝၼ်းၼႆႉ ၸဝ်ႈၼွႆႉ သေႃးယၼ်ႇတ လႆႈဢွၼ်ႁူဝ်ၵူၼ်းၼုမ်ႇ 30 ၵေႃႉ ၵိၼ်ၼမ်ႉသၸ်ႉၸႃႇ မိူဝ်ႈ 1958 လိူၼ်မေႊ 21 ဝၼ်း တီႈသူပ်းၼမ်ႉၵွတ်ႈ ႁိမ်းၾၢႆႇဢွၵ်ႇၶူင်းတီႈၼိုင်ႈသေ ပူၵ်ႈတင်ႈတပ်ႉ ၼုမ်ႇသိုၵ်းႁၢၼ်လုၵ်ႉၽိုၼ်ႉ တႃႇပူတ်းပွႆႇဢဝ်ၶိုၼ်းမိူင်းၸိုင်ႈတႆး ။