ၵေႃလိၵ်ႈလၢႆးလႄႈၾိင်ႈငႄႈတႆးဝဵင်းၼမ်ႉၶမ်း ၸတ်းႁဵတ်းပွႆးလူင်းပၢင်သွၼ်လိၵ်ႈတႆးႁူမ်ႈၵၼ် 5 ဝၢၼ်ႈ ပိူဝ်ႈႁႂ်ႈမေႃသွၼ်လႄႈလုၵ်ႈႁဵၼ်းမီးလွင်ႈၸမ်ၸႂ်ၵၼ် ။

ဝၼ်းတီႈ 20/05/2016 ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၼမ်ႉၶမ်း ၸတ်းႁဵတ်းပွႆးလူင်းပၢင် သွၼ်လိၵ်ႈတႆးၶၢဝ်းမႆႈ မိူၼ်ၼင်ႇ 1. ဝၢၼ်ႈၼမ်ႉမႃႉ ၊ 2. ဝၢၼ်ႈဝဵင်းၵၢင်း ၊ 3. ဝၢၼ်ႈႁူဝ်ပုင်ႇ ၊ 4. ဝၢၼ်ႈလွႆလိၼ်ၵၢင် ၊ 5. ႁူင်းႁဵၼ်းပၢၼ်းသီႁူင်ႊဢၢႆႈၾႃႉ ၸိူဝ်းၼႆႉ မီးမေႃသွၼ် 20 ၵေႃႉ လုၵ်ႈႁဵၼ်း 300 ၵေႃႉပၢႆၶဝ်ႈႁူမ်ႈၸတ်းႁဵတ်းတီႈႁူင်းႁဵၼ်းၸိူဝ်ႉၸၢတ်ႈဝၢၼ်ႈၼမ်ႉမႃႉ ဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇ ။


မီးယိူင်းဢၢၼ်းလူင်ၼင်ႇႁိုဝ်လိၵ်ႈတႆးပေႃးတေၶိုၼ်ႈယႂ်ႇမႂ်ႇသုင်ႁိူဝ်ႈႁိူင်း ဝၢၼ်ႈၼိုင်ႈလႄႈ ဝၢၼ်ႈၼိုင်ႈ ပေႃးတေၶဝ်ႈဢွၵ်ႇႁူႉၸၵ်းမိုတ်ႈၵိုဝ်းၸမ်ၸႂ်ၵၼ် ။  2. ၼင်ႇႁိုဝ်ႁဝ်းပီႈၼွင်ႉလၢႆတီႈပေႃးတေႁူမ်ႈမိုဝ်း ၵၼ်လႆႈ ။ 3. ၼင်ႇႁိုဝ်တေလူတ်းယွမ်းလႆႈၵႃႈၸႂ်ႉၸၢႆႇၸဵမ်ၸိူဝ်းၼႆႉ ။


ၸၢႆးမၢဝ်းႁၢၼ် ႁူဝ်ပဝ်ႈၼႂ်းဢိူင်ႇၼမ်ႉမႃႉ လၢတ်ႈဝႃႈ - “ ၵူၼ်းၼုမ်ႇဢၼ်တူင်ႉၼိုင်ယူႇၼႂ်းဝၼ်းမိူဝ်ႈ ၼႆႉယိူင်းဢၢၼ်းတႄႉၵေႃႈပဵၼ်တွၼ်ႈတႃႇတႆးမိူၼ်ၵၼ်ၵူၺ်း ၊ ပေႃးႁဝ်းၽွမ်ႉၵၼ် ႁဵတ်းသၢင်ႈၸွမ်း ၵၼ်ၸိုင်တေႁဵတ်းႁႂ်ႈႁဝ်းႁႃးမိုတ်ႈၵိုဝ်းၸမ်ၸႂ်ၵၼ် ၊ ၶဝ်ႈဢွၵ်ႇႁႃၵၼ် ၊ ႁၵ်ႉႁူမ်ၸူမ်းပႅင်းၵၼ် ၊ ၸွႆႈထႅမ် ၊ ၵွင်ႉသၢၼ်ၵၼ်ၵႂႃႇမိူဝ်းၼႃႈ ” ဝႃႈၼႆ ။


ပၢင်သွၼ်လိၵ်ႈတႆးၶၢဝ်းမႆႈၼႆႉၸတ်းႁဵတ်းတီႈဝၢၼ်ႈၽႂ်မၼ်း ဢိူင်ႇၽႂ်မၼ်းၵူႈပီ ပီၼႆႉၸတ်း ႁဵတ်းပွႆးလူင်းပၢင်သွၼ်ႁူမ်ႈၵၼ် 5 ဝၢၼ်ႈ ပွၵ်ႈဢွၼ်တၢင်းသုတ်းလႆႈဝႃႈဢွင်ႇမၢၼ်ယူႇဝႃႈၼႆ ။