သင်ၶၸဝ်ႈလႄႈမေႃသွၼ်လိၵ်ႈတႆးဝဵင်းၵျွၵ်ႉမႄးၸတ်းပၢင်ပွႆးလူင်ပၢင်သွၼ်လိၵ်ႈတႆးၶၢဝ်းမႆႈ မေႃ သွၼ် ၊ လုၵ်ႈႁဵၼ်းလႄႈၵူၼ်းမိူင်းၶဝ်ႈႁူမ်ႈၼမ် ယိူင်းဢၢၼ်းႁႂ်ႈလိၵ်ႈတႆးႁိူဝ်ႈႁိူင်း လုၵ်ႈလၢၼ်တႆးႁႂ်ႈ မေႃလိၵ်ႈတႆးၵူႈၵေႃႉ ။

ဝၼ်းတီႈ 03/05/2016 သင်ၶၸဝ်ႈလႄႈမေႃသွၼ်ၸတ်းႁဵတ်းပွႆးလူင်းပၢင်သွၼ်လိၵ်ႈတႆးၶၢဝ်းမႆႈ လႄႈၾိင်ႈငႄႈပုတ်ႉထ မီးၽူႈယႂ်ႇၵူၼ်းလူင် ၊ ၵူၼ်းဝၢၼ်ႈ ၊ မေႃသွၼ်လႄႈလုၵ်ႈႁဵၼ်းၶဝ်ႈႁူမ်ႈၼပ်ႉပၢၵ်ႇ ၸတ်းႁဵတ်းၵႂႃႇတီႈဝတ်ႉ (ၵျွင်း) ၸေႃးတီႉၵႃႇရူင်ႇ ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။

မီးယိူင်းဢၢၼ်းလူင်ၼင်ႇႁိုဝ်လုၵ်ႈဢွၼ်ႇၶဝ်ပေႃးတေလႆႈႁဵၼ်းဢဝ်လိၵ်ႈတႆး၊ၾိင်ႈငႄႈပုတ်ႇထၽွင်း ႁူင်းႁဵၼ်းလူင်ပွင်ၸိုင်ႈဢိုတ်း ။ ၼင်ႇႁိုဝ်တေဢမ်ႇလူင်လိုမ်းလိၵ်ႈလၢႆးတူဝ်ၸဝ်ႈၵဝ်ႇလႄႈႁႂ်ႈလုၵ်ႈ ဢွၼ်ႇသႅၼ်းႁုၼ်ႈမႂ်ႇပေႃးတေမေႃလိၵ်ႈတႆး လႄႈသိုပ်ႇသၢႆၸႂ်လိၵ်ႈလၢႆးတႆးႁဝ်းႁႂ်ႈပေႃးႁိူဝ်ႈႁိူင်း ဝႃႈၼႆ ။ 

မေႃသွၼ်ယိင်း - လၢတ်ႈဝႃႈ - “ လိၵ်ႈလၢႆးပဵၼ်သၢႆၸႂ်ၸိူဝ်ႉၶိူဝ်း ၵွပ်ႈၼၼ်လႄႈၼင်ႇႁိုဝ်လိၵ်ႈတႆးႁဝ်း ပေႃးတေၶိုၼ်ႈယႂ်ႇႁဝ်းထုၵ်ႇလီဢွၼ်ၵၼ်ႁဵၼ်းဢဝ်လိၵ်ႈတႆးႁဝ်းၼမ်ၼမ်ၼင်ႇႁိုဝ်လိၵ်ႈႁဝ်းပေႃးတေႁိူဝ်ႈႁိူင်း ” ။ 

ၶူးပူင်သွၼ်လူင် လုင်းၸၢႆးၾႃႈ ယၢမ်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ-

“ ဢၼ်ၶႂ်ႈသင်ႇထိုင်ၵူၼ်းမိူင်းႁဝ်းၼႆႉႁဝ်းၶႃႈတၵ်ႉလႆႈႁၼ်ထိုင် တၢင်းယူပ်ႈယွမ်းႁဝ်း ။ ပီႈၼွင်ႉတႆး ႁဝ်းၶႃႈၼႆႉမေႃယူႇမဝ်ၵိၼ်မၢင်ဢမ်ႇဝႆႉၼၵ်းၼႂ်းၵၢၼ်ႁဵၼ်းႁူႉပၺ်ၺႃ ။ ၵၢၼ်ႁဵၼ်း ပၺ်ၺႃၼႆႉ လႃႈလီႈသွၼ် ၊ တေႃႉတႄႉသွၼ် ၊ ဢမ်ႇသွၼ်တႄႉတႄႉဝႃႈဝႃႈ ၊ ဢမ်ႇသွၼ်ၶၢဝ်းယၢဝ်း ၊ ဢမ်ႇႁဵၼ်း သွၼ်ႁႂ်ႈထိုင်တီႈ ။ ယွၼ်ႉၼၼ်လႄႈတႆးၸင်ႇလႆႈတူၵ်းတႅမ်ႇ ။ ၵွပ်ႈပိူဝ်ႈၼႆ ၼင်ႇႁိုဝ်ၶိူဝ်းၵူၼ်းႁဝ်း တေဢမ်ႇတူၵ်းတႅမ်ႇၼႆႉ ၵူႈၵေႃႉၵူႈၵူၼ်းမီးပုၼ်ႈၽွၼ်းတႃႇတေ ၶတ်းၸႂ်ႁဵတ်းႁႂ်ႈၸိူဝ်ႉၶိူဝ်းတူဝ်ၵဝ်ႇ ၶိုၼ်ႈယႂ်ႇ ။ သႂ်ႇၸႂ်ႁဵၼ်းလိၵ်ႈႁဵတ်းႁႂ်ႈပေႃးထိုင်တီႈ ၊ ဢၼ်ၼႆႉပဵၼ် ပိူင်လူင် ၶႂ်ႈသင်ႇထိုင်ၸိူင်ႉၼႆ ”။ 

ပၢင်သွၼ်ၼႆႉတႄႇမႃးမိူဝ်ႈဝၼ်းတီႈ 23/03 ထိုင် 22/04/2016 ပူင်သွၼ်ပၼ်ၵူႈဝၼ်းၼိုင်ႈဝၼ်း လႂ်မီး 3 ၶၢဝ်း 1. ၵၢင်ၼႂ် 09:00-11:00မူင်း ၊ 2. ဝၢႆးဝၼ်း 01:00-03:00 မူင်းလႄႈၵၢင်ၶမ်ႈ 07:00 -09:00 မူင်း ။ မီးလုၵ်ႈႁဵၼ်းလၢႆၸၢဝ်းၶိူဝ်းမိူၼ်ၼင်ႇတႆး ၊ မၢၼ်ႈ ၊ ၶႄႇ ၊ တဢၢင်းၸိူဝ်းၼႆႉမႃးၶိုၼ်းႁဵၼ်းဢဝ် တင်းမူတ်း 120 ၵေႃႉပၢႆသင်ၶၸဝ်ႈမီး 9 တူၼ် ။ မီးၶူးသွၼ်တင်းမူတ်း14 ၵေႃႉမေႃသွၼ်ၸၢႆး 3 ၵေႃႉ ယိင်း11 ၵေႃႉ ပူင်သွၼ်ပၼ်လိၵ်ႈတႆးလႄႈ ၾိင်ႈငႄႈပုတ်ႉထ ၸတ်းပၢင်တွပ်ႇလိၵ်ႈၵႂႃႇမိူဝ်ႈဝၼ်းတီႈ 22/04/2016 ။