ဝၼ်းတီႈ 29/05/2016 ၶၢဝ်းယၢမ်း 08:00-12:00 မူင်း ၵေႃလိၵ်ႈလၢႆးလႄႈၾိင်ႈငႄႈတႆး မိူင်းပၼ်ႇ ၸတ်းႁဵတ်းပွႆးလူင်းပၢင်သွၼ်လိၵ်ႈတႆးၶၢဝ်းမႆႈပွၵ်ႈၵမ်းတီႈ 11 ၸတ်းႁဵတ်းတီႈ ဝတ်ႉမူၺ်ႇတေႃႇ မိူင်းပၼ်ႇ ၸိုင်ႈတႆးပွတ်းၸၢၼ်း ။

ၼႂ်းပၢင်ၼႆႉသင်ၶၸဝ်ႈ ၊ ၸဝ်ႈႁၢၼ်ဢွင်ႇၵျႅၼ်ႇမိူင်း ၽူႈၼင်ႈလုမ်းၵပ်းသၢၼ် RCSS/SSA မိူင်းပၼ်ႇ ၊ ၽူႈၵွၼ်း ၸႄႈဝဵင်းမိူင်းပၼ်ႇဢူးၸၢႆးဝေႇလႅၼ်း ၊ ၵႅမ်ၽူႈၵွၼ်းၸႄႈဝဵင်း ၸၢႆးမဵဝ်းႁၢၼ်ႇ ၊ ႁူဝ်ပဝ်ႈပွၵ်ႉ ဝၢၼ်ႈ ၊ ၵူၼ်းဝၢၼ်ႈ၊မေႃသွၼ်လႄႈလုၵ်ႈႁဵၼ်းၶဝ်ႈႁူမ်ႈ500ပၢႆ ။


ၸၢႆးၶိူဝ်းတႆး လၢတ်ႈဝႃႈ - “ ယိူင်းဢၢၼ်းဢၼ်ႁဝ်းၶႃႈလႆႈၸတ်းႁဵတ်းၼႆႉၼင်ႇႁိုဝ်ၵူၼ်းမိူင်းတႆးၵူႈ ၵေႃႉႁႂ်ႈမေႃလိၵ်ႈလၢႆးတႆး ၊ ၾိင်ႈငႄႈႁိတ်ႈႁွႆးတႆး ၼင်ႇႁိုဝ်လုမ်ႈၾႃႉပေႃးတေႁူႉၸၵ်းတႆး ၊ တႆးႁဝ်း ၵေႃႈယၢမ်ႈမီးၸဝ်ႈမီးၶုၼ်းမႃး ” ဝႃႈၼႆ ။


ပၢင်သွၼ်လိၵ်ႈတႆးၶၢဝ်းမႆႈၼႆႉၼႂ်းၸႄႈဝဵင်းမိူင်းပၼ်ႇမီး 17 ပၢင်တႄႇၸတ်းမႃးမိူဝ်ႈဝၼ်းတီႈ 26/04 – 25/05/ 2016 ၶၢဝ်းတၢင်းၼိုင်ႈလိူၼ်မီးမေႃသွၼ် 73 ၵေႃႉ လုၵ်ႈႁဵၼ်းမီး 300 ပၢႆ ။