ႁူဝ်ပဝ်ႈလူင် ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းယွတ်ႈသိုၵ်း မွၵ်ႇလၢတ်ႈလွင်ႈ ႁူမ်ႈမိုဝ်းၵၼ်တင်း လူင်ပွင်ၸိုင်ႈမၢၼ်ႈ တီႇၽဵဝ်ႈၵႂၢတ်ႇလၢင်ႉယႃႈမဝ်းၵမ် ။ လွင်ႈမၢၼ်ႈပၼ်တီႇၽဵဝ်ႈယႃႈ ၵူၺ်းၵႃႈ ဢမ်ႇပၼ်ပႃးၵွင်ႈ ။ ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆ ။

ႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး ၸဝ်ႈယွတ်ႈသိုၵ်း

ထၢမ် - ယႃႈမဝ်းၵမ်ၼႆႉ ပဵၼ်ပၼ်ႁႃယႂ်ႇလူင်တႄႉၼင်ႇဝႃႈယဝ်ႉ ။ ပေႃးႁဝ်းၶႃႈမႃးတူၺ်း တင်ႈတႄႇ ၶွင်ႊသီႊဢဝ်ၶိုၼ်းၸိုင်ႈတႆး တႄႇလူင်းလၢႆးမိုဝ်းၸၼ်ႉၸႄႈမိူင်းၼႆၵေႃႈ ပႃးလွင်ႈယႃႈမဝ်းၵမ်ၵမ်းလဵဝ် ။ ဢၼ်လူင်းလၢႆးမိုဝ်း တီႈတႃႈၶီႈလဵၵ်းၼႆႉ လွင်ႈယႃႈမဝ်းၵမ်ၵူၺ်း ၼင်ႇႁၢင်ႈႁၼ်မီးပဵၼ် 12 ၶေႃႈ ။ ၵွပ်ႈၼၼ် ၸူဝ်ႈၶၢဝ်းတၢင်းၵွၼ်ႇပႆႇထိုင်မႃး NCA (ၵၢၼ်ၵိုတ်းယိုဝ်းတူဝ်ႈမိူင်း) ၵေႃႈလီ ၊ တေႃႇထိုင်မႃးတေႃႈလဵဝ်ၼႆႉ ဢၼ်လႆႈႁဵတ်းသၢင်ႈမႃး ၵဵဝ်ႇၵပ်းလွင်ႈယႃႈမဝ်းၵမ်ၼႆႉ မီးသင်ၽွင်ႈၶႃႈ ?။


တွပ်ႇ - ၶေႃႈၵႂၢမ်းထၢမ်ဢၼ်ၼႆႉ ပဵၼ်ပၼ်ႁႃယႂ်ႇ ။ လူင်းလၢႆးမိုဝ်းယဝ်ႉ တပ်ႉမၢၼ်ႈၼႆႉ လၵ်းၵၢၼ်မၼ်းႁပ်ႉယူႇ (မူႇဢယလႅတ်ႉၶၢၼ်ႇတႄႇ) မၢၼ်ႈၼႆႉၶဝ်ဝႃႈၼႆတႃႇသေႇ ။ မၢၼ်ႈၼႆႉ ပေႃးၶဝ်လူဝ်ႇလႆႈၶဝ်တေၸွမ်းတိၵ်းတိၵ်း ၊ ၵူၺ်းၵႃႈ ပေႃးၶဝ်ဢမ်ႇလူဝ်ႇလႆႈတႄႉ ၶဝ်သမ်ႉတေဝႄႈတိၵ်းတိၵ်း ၊ ပႆႇထိုင်ၶၢဝ်းယၢမ်း ပႆႇၸၢင်ႈႁဵတ်း ဝႃႈၼႆတိၵ်းတိၵ်း ။ ႁဵတ်းသင်ၶဝ်ဝႃႈၼႆ ၵွပ်ႈပိူဝ်ႈမၼ်းပဵၼ်လွင်ႈလိၼ် ၊ ၵမ်ႇၽႃႇႁပ်ႉလူး ၊ လွင်ႈဝႃႈႁဝ်းတေ ႁူမ်ႈၵၼ်သေၵႂၢတ်ႇလၢင်ႉၼႆႉ ။ ႁဝ်းသမ်ႉတၢင်ႇယိုၼ်ႈၽႅၼ်ၵၢၼ်ႁဝ်း ၊ ၽႅၼ်ၵၢၼ်ႁဝ်းၼႆႉ 6 ပီၵူၺ်း ႁဝ်းႁဵတ်းလႆႈႁႂ်ႈယႃႈမဝ်းၵမ် လူတ်းလူင်းလႆႈ ။


ၶဝ်သမ်ႉမႃးၶေႃႈဢၢင်ႈဝႃႈ ၽဵဝ်ႈမူၺ်ႉလႄႈ ၵူၺ်းႁဝ်းယႃႇပေပႃးၵွင်ႈ ။ မၼ်းဢမ်ႇမီးလွင်ႈတၢင်း (ႁဵတ်ႇၽူလ်) ၊ ၽဵဝ်ႈယႃႈမဝ်းၵမ် သမ်ႉဝႃႈဢမ်ႇပႃးၵွင်ႈၼႆႉ တေႁဵတ်းႁိုဝ်ၽဵဝ်ႈ ၊ ၼႆႉပွင်ႇဝႃႈလၢႆးႁႄႉမၼ်း ။ သင်ဝႃႈႁဝ်းႁူမ်ႈၵၼ် ၶိုၼ်ႈမႃးၼႆ တပ်ႉမတေႃႇၼႆႉမႆႈၸႂ် ၸုမ်းႁဝ်း ။ မႆႈၸႂ်ၼႆႉ 1. ၶေႃႈမုလ်းႁဝ်းမီးတဵမ်ထူၼ်ႈ ။ ပေႃးၶေႃႈမုလ်းႁဝ်းမီး တဵမ်ထူၼ်ႈ ၸၢင်ႈၵႂႃႇတုမ်ႉတိူဝ်ႉတပ်ႉၶဝ် ၵေႃႈၸၢင်ႈပဵၼ်လႆႈ ၊ ၸၢင်ႈၵႂႃႇတုမ်ႉတိူဝ်ႉၸုမ်းပီႇတုၸိတ်ႉၶဝ် ၵေႃႈၸၢင်ႈပဵၼ်လႆႈ ၊ ပၢႆးၼႂ်းတပ်ႉၶဝ် ပီႇတုၸိတ်ႉၶဝ်ၸိူဝ်းၼႆႉ ၶဝ်တေလႆႈဢဝ်လိူင်ႈ (ဢယေး) ၵၼ်တင်းၼမ် ။ ဢၼ်ၼႆႉ တပ်ႉမတေႃႇၶဝ်ႁူႉတူဝ်လီ ၊ ဢမ်ႇၸႂ်ႈဢမ်ႇႁူႉ ။ ပေႃးထိုင်ၽဵဝ်ႈမူၺ်ႉမႃးတႄႉတႄႉ ႁဝ်းမီးၶေႃႈမုလ်းဝႆႉလႄႈ ဢၼ်ၼႆႉၶဝ်ၵေႃႈမႆႈၸႂ် ပၢႆးၼႂ်းတပ်ႉၶဝ် ။


2. ၶဝ်မႆႈၸႂ်ဝႃႈ ၵူဝ်ႁဝ်းမီးၸိုဝ်ႈသဵင် ။ ပေႃးႁဝ်းတေႁဵတ်းၼႆ ၵူၼ်းၼွၵ်ႈမိူင်းၼႆႉ တေမႃးႁုမ်ႁဝ်း ၊ တၢင်းၸွႆႈထႅမ် တေမႃးတီႈႁဝ်းၼမ် ၊ ၽႅၼ်ၵၢၼ်ႁဝ်းမီးဝႆႉၼၼ်ႉ ႁဝ်းသမ်ႉတေၸၢင်ႈႁဵတ်းလႆႈၼမ်လိူဝ်ၶဝ် ။ ဢမ်ႇၸႂ်ႈဝႃႈ ၵႂႃႇတီႇသူၼ်ယႃႈလၢႆလၢႆ ၊ ႁဝ်းဢမ်ႇႁဵတ်း ၊ ၼႂ်းပေႃႇလသီႇႁဝ်းဢမ်ႇမီး ။ တေႁဵတ်းႁိုဝ်ႁႂ်ႈသူၼ်ယႃႈပေႃးႁၢႆ ပၢႆးၼႂ်း 3 ပီၼႆႉ ပေႃႇလသီႇႁဝ်းမီး ။ 3 ပီၼႆႉ ပၼ်တင်းတၢင်းႁူႉ ၊ ပၼ်တင်းၸိူဝ်ႉၽၼ်း ၊ ပၼ်တင်းၵၢတ်ႇၶၢႆပၼ်ၶဝ် ။


တၢင်းႁူႉၼႆႉ တေႁဵတ်းႁိုဝ်ႁႂ်ႈၶဝ် ယႃႇပေၸႂ်ႉတိုဝ်းယႃႈၾိၼ်ႇ ၊ တေႁဵတ်းႁိုဝ် ယႃႇႁႂ်ႈၶဝ်ပေႃးၶႂ်ႈၽုၵ်ႇယႃႈ ၊ တေႁဵတ်းႁိုဝ်လၢႆးၵႃႉၶၢႆ လၢႆးၽုၵ်ႇသွမ်ႈၸိူဝ်းၼႆႉ ႁဝ်းလူဝ်ႇတၢင်းႁူႉၶဝ်ၸိူဝ်းၼႆႉ ။ ထႅင်ႈၾၢႆႇၼိုင်ႈ ႁဝ်းလူဝ်ႇ ဢဝ်မၢႆမီႈႁႄႉၵင်ႈ ၊ မၢႆမီႈႁႄႉၵင်ႈၼႆႉ ဢမ်ႇပႃးၵွင်ႈမၼ်းတေႁဵတ်းႁိုဝ် ၊ မၼ်းဢမ်ႇလႆႈ ။ ဢဝ်မၢႆမီႈႁႄႉၵင်ႈၼႆႉ တေလႆႈမီးၵဵတ်ႉမီးလၢၼ်ႇ ၊ မၼ်းလူဝ်ႇတီႉလူဝ်ႇၺွပ်း ။


ထႅင်ႈၾၢႆႇၼိုင်ႈၼႆႉ တေလႆႈမီးႁူင်းႁဵၼ်းမၼ်းသေ တိုတ်းပၼ် ၊ ႁူင်းႁဵၼ်းတိုတ်းၼႆႉ ႁႂ်ႈၶဝ်မီးၵၢၼ် ၊ မိူၼ်ၼင်ႇမိူင်းထႆးၶဝ်ႁဵတ်း ႁႂ်ႈၶဝ်မီးၵၢၼ် ။ ပေႃးဢွၵ်ႇၶွၵ်ႈ တိုတ်းယႃႈမိူဝ်းယဝ်ႉ ႁႂ်ႈၶဝ်ႁႃႁဵတ်းၵိၼ်ၵၢၼ် လဵင်ႉတွင်ႉလႆႈ ၊ ႁႂ်ႈၶဝ်မီးတၢင်းႁူႉၸွမ်း ။ ပေႃးဝႃႈမႃးဢဝ်သႂ်ႇၶွၵ်ႈသေ တိုတ်းလႆႈယဝ်ႉပွႆႇမိူဝ်းၶိုၼ်း မၼ်းၵေႃႈၵိၼ်ၶိုၼ်း ၊ ၵွပ်ႈပိူဝ်ႈဢမ်ႇမီးတၢင်းဝူၼ်ႉ ၊ ဢမ်ႇမီးတၢင်းႁူႉႁႃႁဵတ်းၵိၼ်ၵၢၼ်လဵင်ႉတွင်ႉ ။


(ၶႅၼ်းတေႃႈပႂ်ႉသိုပ်ႇဢၢၼ်ႇ ၸဝ်ႈယွတ်ႈသိုၵ်း လၢတ်ႈလွင်ႈမိူင်းတေႃႉမိူင်းထႃး ၊ ႁူဝ်မိူင်း ၊ ဢၼ်ဝႃႈတူၵ်းလူင်းၵၼ်တင်း လူင်ပွင်ၸိုင်ႈမၢၼ်ႈ တေဢဝ်ႁဵတ်းငဝ်ႈငုၼ်း RCSS/SSA)