ပၢင်တၢၼ်ႈၶႆႈ “ ၵၢၼ်ႁဵၼ်း သွၼ် လႄႈသႅၼ်းႁုၼ်ႈမႂ်ႇ ” ၸတ်းႁဵတ်းလၢႆတီႈ ၼႂ်းဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း မေႃတႅမ်ႈလိၵ်ႈ ႁိုၼ်း (ၵႃယၢင်း) လႄႈၶုၼ်ယုင်းၶဵဝ် မႃးဢုပ်ႇဢူဝ်းတၢၼ်ၶႆႈ တီႈဝဵင်းမိူင်းၵိုင် ။

ဝၼ်းတီႈ 25-26/04/2016 ၼႆႉ ၸုမ်းၵူၼ်းၼုမ်ႇ ၊ ထဝ်ႈဝၢၼ်ႈ ၊ ထဝ်ႈၼႃႈလႄႈပီႈၼွင်ႉ ၵူၼ်းမိူင်းၵိုင် ႁူမ်ႈၵၼ်ၸတ်းႁဵတ်းပၢင်တၢၼ်ႈၶႆႈ 2 တီႈ တီႈဢိူင်ႇႁမ်းငၢႆးလႄႈဢိူင်ႇတူင်ႇလၢဝ်း ဝဵင်းမိူင်းၵိုင် ။


မေႃတႅမ်ႈလိၵ်ႈလႄႈၽူႈလဵပ်ႈႁဵၼ်းပိုၼ်းတႆး မိူၼ်ၼင်ႇ ၶူးႁိုၼ်း (ၵႃယၢင်း) ၊ ၶုၼ်ယုင်းၶဵဝ် မႃးမွၵ်ႇ လၢတ်ႈတၢၼ်ႈၶႆႈပၼ် လွင်ႈ “ၵၢၼ်ႁဵၼ်း သွၼ်လႄႈသႅၼ်းႁုၼ်ႈမႂ်ႇ ”။ ၼင်ႇႁိုဝ်ၵူၼ်းၼုမ်ႇၼႂ်းမိူင်း တႆး တေမီးပိုၼ်းႁူႉလႄႈမေႃဝႆႉၵႃႈၶၼ် ၵၢၼ်ႁဵၼ်းၵၢၼ်သွၼ်  ႁႂ်ႈပေႃးၶိုတ်းၸၼ်ႉပဵင်းပိူၼ်ႈ။  ၼႂ်းပၢင်တၢၼ်ႈၶႆႈၼႆႉၼိုင်ႈတီႈလႂ်ၵေႃႈမီးၵူၼ်းမႃးႁပ်ႉထွမ်ႇ 700 -800 ၵေႃႉဝႃႈၼႆ ။


ၶုၼ်ယုင်းၶဵဝ်  ၽူႈလဵပ်ႈႁဵၼ်းၶူၼ်ႉၶႂႃႉပိုၼ်းတႆး လၢတ်ႈဝႃႈ - “ ၵူၼ်းမိူင်းတႆးႁဝ်းၵူႈၵေႃႉ ထုၵ်ႇလီ ဢဝ်ၵၢၼ်ႁဵၼ်း ၊ ပၢႆးပၺ်ၺႃပဵၼ်ယႂ်ႇ ပေႃးႁဝ်းဢမ်ႇသႂ်ႇၸႂ်လွင်ႈပၢႆးပၺ်ၺႃၸိုင် ႁႂ်ႈႁဝ်းၶိုၼ်းဝၢႆႇ တူၺ်းၶိုၼ်း ပိုၼ်းဝၼ်းလင်ႁဝ်း ။ ယွၼ်ႉႁဝ်း ဢမ်ႇဢွၼ်ၵၼ်ပၼ်ႁႅင်း ၵၼ်ႁဵၼ်းႁူႉပၢႆးပၺ်ႇၺႃႇ လႄႈႁဝ်းၸင်ႇတူၵ်း လိုၼ်းပိူၼ်ႈမႃးထိုင်ဝၼ်းမိူဝ်ႈၼႆႉ ”။


သိုပ်ႇလၢတ်ႈထႅင်ႈဝႃႈ -“ ၵၢၼ်ႁဵၼ်းၵၢၼ်သွၼ်ၼႆႉ ႁဵၼ်းဢဝ်ၵမ်းလဵဝ်ၵူၺ်းဢမ်ႇလႆႈ။ တေလႆႈၸႂ်ႉ ၶၢဝ်းယၢမ်းသေႁဵၼ်းႁူႉ ။  ပေႃးႁဝ်းတင်ႈၸႂ် တင်ႈၶေႃႈသေ ၶတ်းၸႂ်ႁဵၼ်းၵႂႃႇတိၵ်းတိၵ်းၸိုင်ႈ တေလႅၵ်ႈမႃးပဵၼ်းၵူၼ်းမီးပၺ်ၺႃတၢင်းမေႃယူႇ - ယုမ်ႇယမ်ၸိူင်ႉၼႆၶႃႈ ” ၼႆယဝ်ႉ ။


ၸၢႆးလၢဝ်ၶိူဝ်း ၵူၼ်းၼုမ်ႇဢၼ်လႆႈၶဝ်ႈႁူမ်ႈပၢင်တၢၼ်ႈၶႆႈလၢတ်ႈဝႃႈ - “ ႁၼ်ဝႃႈ မၼ်းပဵၼ်ၽွၼ်း လီတႃႇႁဝ်းယူႇပေႃးမေႃဢဝ် ။ တႅၼ်းတီႈႁဝ်းတေလႆႈလူလိၵ်ႈ ၼမ်ၼမ်သေၸင်ႇတေ ႁူႉမႃး တၢင်းႁူႉၸိူဝ်းၼႆႉမိူၼ်ၼင်ႇၶဝ်ၸဝ်ႈဢဝ်လွၼ်ႉမွၼ်းမၼ်းမႃးလၢတ်ႈၼႄလႄႈမၼ်းငၢႆႈငႅမ်ႈတႃႇႁဝ်း တေလႆႈတၢင်းႁူႉတၢင်းႁၼ် ။ ဢၼလမ်ႇလွင်ႈမၼ်းတႄႉသင်ပဵၼ်လႆႈ ၶႂ်ႈႁႂ်ႈပီႈၼွင်ႉ ၵူၼ်းမိူင်းတႆး သူင်တႅမ်ႈသူင်ဢၢၼ်ႇလိၵ်ႈတႆး ။ ၶႂ်ႈတိုၵ်းသူၼ်း ၸဝ်ႈပၢႆးႁူႉတႆးႁဝ်းၶဝ်မႃး တၢၼ်ႈၶႆႈပၼ် တၢင်းႁူႉႁဝ်းၶႃႈ ။  သင်ပဵၼ်လႆႈၶႂ်ႈႁႂ်ႈမီးၵူႈလိူၼ် ၶႃႈဢေႃႈ ” ၼႆယဝ်ႉ ။


ၵဵဝ်ႇလူၺ်ႈလွင်ႈပၢင်တၢၼ်ႈၶႆႈတၢင်းႁူႉတၢင်းႁၼ်ၼႆႉသေပူၼ်ႉမႃးမိူဝ်ႈဝၼ်းတီႈ 20-22/03/2016  ၼၼ်ႉၵေႃႈ  တီႈပၢင်ႇၵွင်းမူးႁူဝ်မင်းၼၼ်ႉ မီး ပၢင်တၢၼ်ႈၶႆႈ (ဢုပ်ႇၶႆႈ) လိၵ်ႈလၢႆးပၢႆးႁၼ် ၊ မီးၸိုဝ်ႈႁူဝ်ၶေႃႈဝႃႈ “ လုၵ်ႈလီလၢင်းၵႃႈ ပုၼ်ႈမိူဝ်း ၼႃႈ တႆး ”  ။ မီးမေႃတႅမ်ႈလိၵ်ႈ ဢိၵ်ႇ မေႃတႅမ်ႈႁၢင်ႈလူၼ်ႉ ၸိူဝ်းပဵၼ်ၸဝ်ႈပၢႆးမွၼ်းတႆး ၸိုဝ်ႈ သဵင်ယႂ်ႇ ၶဝ်ၸဝ်ႈ မိူၼ်ၼင်ႇ  ၸၢႆးပၢၼ်းႁႅင်း (လၢႆးသႂ်တႆး) ၊ ႁိုၼ်း ၵႃယၢင်း ၊ ၸၢႆးၵေႃႇမိူင်း ၊ ၶုၼ်ယုင်းၶဵဝ် ၊ ၶိူဝ်းလၢဝ်ဢွၼ်ႇ ၸိူဝ်းၼႆႉ မႃးမွၵ်ႇလၢတ်ႈတၢၼ်ႈၶႆႈ ပၼ် ။