ၽူႈၼမ်းၼႂ်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၸဝ်ႈပိုၼ်ၶမ်း လၢတ်ႈဝႆႉမိူဝ်ႈ ဝၼ်းပၢင်ၸႃပၼ လိုၼ်းသုတ်း ၸဝ်ႈၶိူဝ်းသိူဝ် (19/04/2016) ဝႃႈ - ၸဝ်ႈၶိူဝ်းသိူဝ် ပဵၼ်ၵေႃႉတူင်ႉၼိုင် သူၼ်းတုမ် ႁႂ်ႈၵူၼ်းမိူင်းတႆး ႁၵ်ႉၵၼ် ၽွမ်ႉၵၼ် ၊ ႁၵ်ႉလိၵ်ႈလၢႆးၽႃသႃၵႂၢမ်းလၢတ်ႈ ။ တႆးႁဝ်း ထုၵ်ႇလီလႆႈယိူင်ႈၸွမ်းလႄႈ ဢဝ်ၵုၼ်းမုၼ်မၼ်းၸဝ်ႈ - ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ်ဝႆႉၼင်ႇၼႆ ။

ထၢမ် - လႆႈႁဵတ်းၵေႃႉၸဝ်ႈၶိူဝ်းသိူဝ်ၼႆႉ ၸဝ်ႈႁဝ်းၶဝ်လႆႈတူင်ႉၼိုင် ၸိူင်ႉႁိုဝ်မႃးၽွင်ႈၶႃႈ ?။


တွပ်ႇ - မၼ်းၸဝ်ႈၼႆႉ ပေႃးဢဝ်ပၢၼ်လၢႆးလုၵ်ႉၽိုၼ်ႉႁဝ်းမႃးၼႆၵေႃႈ မၼ်းၸဝ်ႈပဵၼ်ႁုၼ်ႈၵွၼ်ႇ ပဵၼ်သႅၼ်း ၵူၼ်းၵႄႇ သႅၼ်း 2 ။ မိူၼ်ၼင်ႇၸဝ်ႈၼွႆႉ ၸေႃးယၼ်ႇတၶဝ်ၸိူဝ်းၼႆႉ ပဵၼ်သႅၼ်း 1 ။ ၸဝ်ႈၶိူဝ်းသိူဝ် တင်းၸဝ်ႈငႃးၶမ်းၶဝ် ပဵၼ်သႅၼ်း 2 ။ ၶဝ်ၸဝ်ႈၼႆႉ တင်ႈတႄႇမိူဝ်ႈပီ 1958 တေႃႇထိုင်ပီ 1964-65 ၼႆႉ ပဵၼ်ပၢၼ်ၶဝ်ၸဝ်ႈတူင်ႉၼိုင် ၼႂ်းထိူၼ်ႇၼႂ်းဝဵင်းၵူႈတီႈတီႈ ။


ၵူၺ်းၵႃႈ ပေႃးဢဝ်ႁဝ်းႁူႉဝႃႈတႄႉ တူဝ်မၼ်းၸဝ်ႈၼႆႉ တင်ႈတႄႇပီ 1942 မႃး မၼ်းၸဝ်ႈတူင်ႉၼိုင် သူၼ်းတုမ်ႁႂ်ႈၵူၼ်းဝၢၼ်ႈၵူၼ်းမိူင်းတႆးႁဝ်း ႁႂ်ႈပေႃးပဵၼ်ၼမ်ႉၼိုင်ႈၸႂ်လဵဝ်ၵၼ် ၊ ႁၵ်ႉလိၵ်ႈလၢႆး ၊ ႁၵ်ႉၽႃႇသႃႇၵႂၢမ်းလၢတ်ႈ ၊ ႁၵ်ႉၾိင်ႈငႄႈ ၊ ႁၵ်ႉၸိူဝ်ႉႁၵ်ႉၶိူဝ်း ႁၵ်ႉဝၢၼ်ႈမိူင်းၵူႈပိူင်ပိူင်ၸိူဝ်းၼႆႉ ။ ၵွပ်ႈပိူဝ်ႈမၼ်းၸဝ်ႈ ၶတ်းၸႂ်သူၼ်းတုမ်ၸိူင်ႉၼၼ်လႄႈ ၵူၼ်းမၢၼ်ႈၶဝ် ၾၢႆႇသိုၵ်းၶဝ်ၵေႃႈ ဢမ်ႇႁၼ်လီ မၼ်းၸဝ်ႈသေ မႃးႁႃၵဝ်းမၼ်းၸဝ်ႈ ၊ မၼ်းၸဝ်ႈၵေႃႈၶဝ်ႈထိူၼ်ႇပႅတ်ႈ။ ဢၼ်ႁဝ်းလႆႈမႃးႁဵတ်းၵေႃႉၵၼ်တႄႉ ပဵၼ်ပၢၼ်မၼ်းၸဝ်ႈၵိုတ်းလိုဝ်ႈၵၢၼ် ၊ မႃးလိုဝ်ႈမႃးယင်ႉၸွမ်းမႄႈသၢႆ မိူင်းထႆး ၸိူင်ႉၼၼ်ၵူၺ်း ၊ မွၵ်ႈ 20 ပီၸိူဝ်းၼႆႉယဝ်ႉ ။


ထၢမ် - လွင်ႈႁဵတ်းတၢင်းသၢင်ႈ (ဢၵျၢင်ႉတၢင်းယၢမ်ႈ) ၸဝ်ႈၶိူဝ်းသိူဝ်ၼႆႉ ပဵၼ်ၸိူင်ႉႁိုဝ်ၽွင်ႈၶႃႈ ?။


တွပ်ႇ - ဢၵျၢင်ႉတၢင်းယၢမ်ႈမၼ်းၸဝ်ႈတႄႉ မၼ်းၸဝ်ႈပဵၼ်ၵူၼ်း ဢမ်ႇပေႃးတၵ်းသဵင်တၵ်းပၢၵ်ႇ ၊ ၵူၺ်းၵႃႈ ပေႃးလွင်ႈႁေႃးလွင်ႈလၢတ်ႈတႄႉ မၼ်းၸဝ်ႈပဵၼ်ၵူၼ်းၶႅၼ်ႇၵေႃႉၼိုင်ႈ ။


ထၢမ် - ၵဵဝ်ႇလူၺ်းလွင်ႈၼႆႉ လိုၼ်းသုတ်း ၸဝ်ႈႁဝ်းၶႂ်ႈမီးၶေႃႈၵႂၢမ်းတွၼ်ႈထိုင် ပီႈၼွင်ႉၵူၼ်းၼုမ်ႇ ၵူၼ်းမိူင်းတႆးႁဝ်းၶႃႈ ၸိူင်ႉႁိုဝ်ၽွင်ႈၶႃႈ ?။


တွပ်ႇ - ၵွပ်ႈပိူဝ်ႈမၼ်းၸဝ်ႈၵေႃႈ ပဵၼ်ၵူၼ်းၵေႃႉဢၼ်ႁၵ်ႉၸိူဝ်ႉႁၵ်ႉၸၢတ်ႈ မႃးၵေႃႉၼိုင်ႈ ။ ႁၵ်ႉၸိူဝ်ႉႁၵ်ႉၸၢတ်ႈ ၵူၺ်းဢမ်ႇၵႃး သူၼ်းတုမ်ႁႂ်ႈတႆးႁဝ်း ပဵၼ်ၼမ်ႉၼိုင်ႈၸႂ်လဵဝ်ၵၼ် ၊ ႁႂ်ႈပဵၼ်ဢၼ်ၼိုင်ႈဢၼ်လဵဝ်ၵၼ် ၵေႃႉၼိုင်ႈ ။ ယဝ်ႉၵေႃႈ ၵႃႈပဵၼ်ၸုမ်းလုၵ်ႉၽိုၼ်ႉမိူင်းတႆးႁဝ်း ၵူႈတီႈတီႈၼႆႉ ဢမ်ႇဝႃႈၸၢဝ်းၶိူဝ်းတႆးႁဝ်းၵူၺ်း ၊ ၸၢဝ်းဢႃးၶႃႇ ၸၢဝ်းလႃးႁူႉ…ဢၼ်ပဵၼ်ၸုမ်းလုၵ်ႉၽိုၼ်ႉၼႆၵေႃႈ ဢဝ်ပၢႆးဝူၼ်ႉ ဢဝ်တၢင်းႁၼ်ထိုင် မၼ်းၸဝ်ႈၵမ်ႈၼမ် ။ ဢဝ်မၼ်းၸဝ်ႈ ပဵၼ်တီႈၵိူဝ်းၵုမ်ၵမ်ႈၼမ်။ လၢႆးလုၵ်ႉၽိုၼ်ႉတႆးႁဝ်းၵူႈၸုမ်း မိူၼ်ၸိူင်ႉ SSA, SURA, TRC, MTA, SUA ၸဵမ်ၸိူဝ်းၼႆႉၵေႃႈ ဢဝ်တၢင်းႁၼ်ထိုင်မၼ်းၸဝ်ႈၵမ်ႈၼမ် ၊ ဢဝ်မၼ်းၸဝ်ႈပဵၼ်တီႈၵိူဝ်းၵုမ်ၵမ်ႈၼမ် ။


မၼ်းၸဝ်ႈၵေႃႈ ပဵၼ်ၵေႃႉဢၼ်ပူၵ်းတႆးႁဝ်းတူင်ႉတိုၼ်ႇမႃး ႁၵ်ႉၸိူဝ်ႉၸၢတ်ႈမႃး ၊ ႁဵတ်းလၢႆးလုၵ်ႉၽိုၼ်ႉ မႃးၵေႃႉၼိုင်ႈလႄႈ ပဵၼ်ႁိုဝ်ၵေႃႈ ႁဝ်းၶႃႈဢမ်ႇလီလိုမ်းမၼ်းၸဝ်ႈ ။ တင်ႈဢဝ်ၵူၼ်းၼုမ်ႇၵူၼ်းၵမ် ၵူၼ်းထဝ်ႈၵူၼ်းၵႄႇ ၵူၼ်းလုၵ်ႉၽိုၼ်ႉယူႇမိူဝ်ႈလဵဝ် ၵူႈၸုမ်းၸုမ်း ဢမ်ႇလီလိုမ်းၵုၼ်းမုၼ်မၼ်းၸဝ်ႈ ၊ လီယုၵ်ႉယွင်ႈၵုၼ်းမုၼ်မၼ်းၸဝ်ႈ ၊ လၢႆးမၼ်းၸဝ်ႈၼႆႉ တိုၼ်းဢမ်ႇၼွမ်းတေႃႇၽူႈၶဵၼ်သေပွၵ်ႈ ။


ၵွပ်ႈၼႆ ႁဝ်းထုၵ်ႇလႆႈယုၵ်ႉယွင်ႈၼမ်ႉၸႂ်မၼ်းၸဝ်ႈဝႃႈ မၼ်းၸဝ်ႈဢမ်ႇယွမ်းတေႃႇၽူႈၶဵၼ် ။ ဢၼ်ပဵၼ်ၸိူဝ်ႉၶိူဝ်းတႆးႁဝ်းတင်းမူတ်း ၸုမ်းလုၵ်ႉၽိုၼ်ႉႁဝ်းတင်းမူတ်းၵေႃႈ ထုၵ်ႇလႆႈယိူင်းမၼ်းၸဝ်ႈ ၊ တိုၼ်းဢမ်ႇလူဝ်ႇၼွမ်းတေႃႇၽူႈၶဵၼ် တေႃႇပေႃးႁွတ်ႈယိူင်းမၢႆၼၼ်ႉၼႆ ၶႂ်ႈတိုၵ်းသူၼ်းတႆးႁဝ်းၶႃႈ တင်းၵူၼ်းထဝ်ႈၵူၼ်းၼုမ်ႇ ၸိူင်ႉၼင်ႇၼႆ ။