ရူတ်ႉၵႃး ပႅတ်ႇလေႃး တင်ႇၽုၼ်ႇထၢတ်ႈ လုၵ်ႉတၢင်းမိူင်းမၢဝ်း သူၺ်ႇလီႇ မႃးတၢင်းမူႇၸႄႈ တမ် / ၽႃႇထပ်းၵၼ် 8 လမ်း ၵူၼ်းႁေႃႈရူတ်ႉ မၢတ်ႇၸဵပ်းလိူဝ်ႁႅင်း ။


ဝၼ်းတီႈ 21/04/2016 ယၢမ်း 19:00 မူင်းပၢႆ ရူတ်ႉၵႃးသႅၼ်းမၢၵ်ႇ 8 လေႃႉ တင်ႇၽုၼ်ႇထၢတ်ႈ လုၵ်ႈတၢင်း မိူင်းမၢဝ်း သူၺ်ႇလီႇ မိူင်းၶႄႇ ၶဝ်ႈမႃး တၢင်းမူႇၸႄႈ တမ် / ၽႃႇ ၺႃးၵႃး ဢွၼ်ႇ 8 လမ်း ထပ်းၵၼ် တီႈႁိမ်းဝၢၼ်ႈၸၢၼ်းသႃႇ လွႆၵိဝ်ႇလွၵ်ႇ ယွၼ်ႉမိပ်ႇ (break / ပလိၵ်ႈ) ရူတ်ႉပႅတ်ႇလေႃႉပွင်ႇ ဢမ်ႇၵုမ်းႁႅင်း ရူတ်ႉလႆႈ ၸင်ႇၽႃႇၺႃးၵၼ်ပဵၼ်ယိတ်ႈပဵၼ်ယႆး ဝႃႈၼႆ ။

ၵူၼ်းၼႂ်းပိုၼ်ႉတီႈ ဢမ်ႇဢွၵ်ႇၸိုဝ်ႈၵေႃႉၼိုင်ႈတႄႉလၢတ်ႈဝႃႈ “ ၵူၼ်းႁေႃႈရူတ်ႉပႅတ်ႇလေႃႉၼႆႉ ဢင်ႈဢၢၼ်းၶိုင်ပႆႈ ဢဝ်တူဝ်လွတ်ႈႁၢင်းၵွႆး ၸဝ်ႈရူတ်ႉၵႃးၼင်ႇၵၼ် ၶိုၼ်းတိၺွပ်းလႆႈတူဝ် ၵူၼ်းႁေႃးရူတ်ႉၵႃးၼၼ်ႉသေ သူင်ႇဢဝ်ပၼ်ပလိၵ်ႈ ၸႄႈဝဵင်းမူႇၸႄႈ ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ရူတ်ႉၵႃး ပႅတ်ႇလေႃႉၼႆႉ လုၵ်ႉတၢင်းမိူင်းမၢဝ်း ၊ သူၺ်ႇလီႇ တင်ႇၽုၼ်ႇ ထၢတ်ႈသေ တေမႃးသူင်ႇတီႈမူႇၸႄႈ ဝႃႈၼႆ ။


ၵဵဝ်ႇၵပ်းလွင်ႈၼႆႉသေ ရူတ်ႉၵႃးဢွၼ်ႇ ဢၼ်လႆႈထုၵ်ႇတမ်ၽႃႇၸိူဝ်းၼၼ်ႉ ပဵၼ်ရူတ်ႉပီႈၼွင်ႉ ၼမ်ႉၶမ်း လႄႈ မူႇၸႄႈ။ ဢၼ်တမ်ၽႃႇၺႃးသမ်ႉ ရူတ်ႉ 4 လေႃႉ 7 လမ်း ၊ ရူတ်ႉ 6 လေႃႉ 1 လမ်း ႁူမ်ႈၵၼ်ပဵၼ် 8 လမ်း ၼႆယဝ်ႉ ။


ယွၼ်ႉၵိူတ်ႇလိူင်ႈပဵၼ်မႃး ရူတ်ႉတမ် / ၽႃႇၵၼ်ၼႆႉသေ ရူတ်ႉၵႃး ၸိူဝ်းလႅၼ်သဵၼ်ႈတၢင်းၼၼ်ႉ ဢမ်ႇၸၢင်ႈၵႂႃႇမႃး ၵိုတ်းၶၢမ်ဝႆႉၸွမ်းသဵၼ်ႈတၢင်း တၢင်းၶိုၼ်း တေႃႇထိုင်မႃးလႅင်း ၸၢႆးဢၢႆႈဢွင်ႇ မူႇၸႄႈလၢတ်ႈ ။
ၵူၼ်းႁေႃႈရူတ်ႉဢွၼ်ႇ ဢၼ်မၢတ်ႇၸဵပ်းၼၼ်ႉ သူင်ႇယူတ်းယႃတူဝ် တီႈႁူင်းယႃ မူႇၸႄႈလႄႈ ၸဝ်ႈရူတ်ႉၵႃး ပႅတ်ႇလေႃႉဢၼ်ႁေႃႈၽႃႇပိူၼ်ႈယဝ်ႉၶိုင်လႅၼ်ႈပၢႆႈၼၼ်ႉ လႆႈသူင်ႇတူဝ်ပၼ် ၸဝ်ႈၼႃႈတီႈပလိၵ်ႈမၢၼ်ႈ မူႇၸႄႈယဝ်ႉ ဝႃႈၼႆ ။