ပၢင်ၵႅဝ်ႈဝၼ်းၵိူတ်ႇ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၶွပ်ႈၶူပ်ႇ 52 ပီတဵမ် ၊ မီးၽူႈယႂ်ႇၵူၼ်းလူင် ၵူၼ်းမိူင်း ၵူၼ်းသိုၵ်း ၶဝ်ႈႁူမ်ႈၼပ်ႉႁူဝ်ႁဵင်။ ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉ ၽူႈၶၢၼ်ပၢၵ်ႇ SSPP/SSA ဝႆႉၼင်ႇၼႆ ။

ထၢမ် - ပွႆးၼႆႉ ၸတ်းႁဵတ်းလၢႆဝၼ်းၶႃႈ ၊ မီးၵူၼ်းမႃးၶဝ်ႈႁူမ်ႈမွၵ်ႈၵႃႈႁိုဝ်ၶႃႈ ?။


တွပ်ႇ - ႁဵတ်း 2 ဝၼ်းၵူၺ်း ၊ ဝၼ်းတီႈ 23 တင်း 24 ။ မီးၵူၼ်းမႃးၶဝ်ႈႁူမ်ႈမွၵ်ႈႁႃႈႁဵင် (5,000) ပၢႆ ။ ဢၼ်လႆႈသၢႆမၢႆမၼ်း မီးသီႇႁဵင်ႁႃႈပၢၵ်ႇ (4,500) ၊ ဢၼ်ဢမ်ႇလႆႈသၢႆမၢႆမၼ်း မီးႁဵင်ပၢႆ ၊ တင်းမူတ်းမီးႁႃႈႁဵင်ပၢႆ ။


ထၢမ် - ငိၼ်းၶၢဝ်ႇဝႃႈ ၸဝ်ႈႁူဝ်ပဝ်ႈဢမ်ႇၶိုၼ်ႈႁွတ်ႈၶဝ်ႈႁူမ်ႈပၢင်ပွႆးၼႆ လွင်ႈၼႆႉၵွပ်ႈသင်ၶႃႈ ?။


တွပ်ႇ - ဢိင်ၼိူဝ်လွင်ႈငဝ်းလၢႆးၽွင်ႈ ၊ လွင်ႈပၢႆးယူႇလီၽွင်ႈ ။


ထၢမ် - တီႈပၢင်ၵႅဝ်ႈၼၼ်ႉ လႆႈငိၼ်းဝႃႈၽူႈၼမ်းၼႃႈလူင် ၊ တင်း ၵႅမ်ႁူဝ်ပဝ်ႈ ၶိုၼ်ႈမွၵ်ႇလၢတ်ႈၶေႃႈၵႂၢမ်း ။ ဢွၼ်တၢင်းသုတ်း ၶႂ်ႈယွၼ်းထၢမ်ဝႃႈ ယူႇတီႈၽူႈၼမ်းၼႃႈ ၸဝ်ႈသိူဝ်ထႅၼ်ႈ မွၵ်ႇလၢတ်ႈၶေႃႈၵႂၢမ်း ၸိူင်ႉႁိုဝ်ၽွင်ႈၶႃႈ ?။


တွပ်ႇ - မွၵ်ႇလၢတ်ႈလွင်ႈ လႆႈႁဵတ်းပၢင်ပွႆးမႃး ၊ မိူၼ်ၼင်ႇႁဵတ်းပွႆး ဝၼ်းၵိူတ်ႇတပ်ႉသိုၵ်းၸိုင်ႈတႆး ။ တပ်ႉသိုၵ်းၸိုင်ႈတႆး ၵေႃႇတင်ႈပဵၼ်မႃးမိူဝ်ႈလႂ် ၊ လၢတ်ႈၼႄပိုၼ်းတပ်ႉသိုၵ်းၸိုင်ႈတႆး ။ လၢတ်ႈၼႄငဝ်းလၢႆးဢၼ်ပူၼ်ႉမႃးလႄႈ ငဝ်းလၢႆးမိူဝ်ႈလဵဝ် ၊ လွင်ႈငမ်းယဵၼ် ၊ လွင်ႈလူင်ပွင်ၸိုင်ႈမႂ်ႇ ၶိုၼ်ႈမႃးၸိူဝ်းၼႆႉ ။


ထၢမ် - ဝၼ်းတီႈ 27 ၼႆႉ ယူႇတီႈၽူႈၵွၼ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ (ယမၶ) လႃႈသဵဝ်ႈသေ ၶႂ်ႈႁႂ်ႈပိဝ်ႇႁႃႇမူး တင်းၽူႈၵွၼ်းတပ်ႉၾၢႆႇ SSPP/SSA ၼႂ်းပိုၼ်ႉတီႈ ႁူမ်ႈမိုဝ်းၵၼ်သေ ႁူမ်ႈၵၼ်လူင်းၵူတ်ႇထတ်း ၼႂ်းပိုၼ်ႉတီႈ ၊ လွင်ႈၼႆႉ ပဵၼ်ၸိူင်ႉႁိုဝ်ၶႃႈ ၊ ၾၢႆႇ SSPP/SSA မီးၵၢင်ၸႂ်ၸိူင်ႉႁိုဝ်ၽွင်ႈၶႃႈ ?။


တွပ်ႇ - ၼၼ်ႉတႄႉပဵၼ်လွင်ႈလီ ။ ယွၼ်ႉဢမ်ႇၶႂ်ႈမီးလွင်ႈပိုတ်းယိုဝ်းၵၼ်သေ ၸင်ႇႁူပ်ႉထူပ်းဢုပ်ႇၵၼ် ။


ထၢမ် - ဢၼ်ဝႃႈၶဝ်တေမႃးၵူတ်ႇထတ်းၼႂ်းပိုၼ်ႉတီႈ ဢၼ်ဝႃႈၼၼ်ႉ ၶႃႈလူး ?။


တွပ်ႇ - လွင်ႈၼႆႉ ႁဝ်းတေဢုပ်ႇၵၼ်ၵွၼ်ႇ ။


ထၢမ် - ဢၼ်ပွင်ႇၶၢဝ်ႇပဵၼ်တၢင်းၵၢၼ် ၊ လွင်ႈ SSPP/SSA ၽွမ်ႉ ဢမ်ႇၽွမ်ႉၼႆႉ မီးၸိူင်ႉႁိုဝ်ၽွင်ႈၶႃႈ ?။


တွပ်ႇ - လွင်ႈၼႆႉ ၵွပ်ႈပိူဝ်ႈပဵၼ်ပွႆး (ဝၼ်းၵိူတ်ႇတပ်ႉသိုၵ်း ၶွပ်ႈၶူပ်ႇ 52 ပီ) ၊ ႁဝ်းပႆႇလႆႈၶိုၼ်ႈလုမ်း ၊ ၵူၼ်းလူင်တင်းသဵင်ႈၵေႃႈ ပႆႇလႆႈထူပ်းၵၼ် ။


ထၢမ် - လွင်ႈဢၼ်တေထွၼ်တပ်ႉၼႆႉ ယူႇတီႈ SSPP/SSA ၶႂ်ႈလၢတ်ႈ မီးသင်ၽွင်ႈၶႃႈ ?။


တွပ်ႇ- တႃႇတေထွၼ်တပ်ႉၼႆႉ ၵွပ်ႈပိူဝ်ႈဝႃႈ ႁဝ်းၵေႃႈထွၼ်မႃးၼမ်ယဝ်ႉ ။ တႃႇတေထွၼ်တႄႉ ဢမ်ႇၸၢင်ႈ ၊ ပေႃးထွၼ်ယူႇတိၵ်းတိၵ်းၵေႃႈ ႁဝ်းတေဢမ်ႇမီးတီႈယူႇယဝ်ႉ ၊ ၼင်ႇႁိုဝ်ပေႃးတေဢမ်ႇလႆႈထွၼ်ၼၼ်ႉ ဢၼ်လီတီႈသုတ်း ႁဝ်းၵေႃႈတေဢဝ်လၢႆးဢုပ်ႇဢူဝ်းသေ ဢုပ်ႇတူၺ်း ။


ထၢမ် - ဢၼ်ၶဝ်ႁႂ်ႈထွၼ်တပ်ႉၼႆႉ ၵွပ်ႈယွၼ်ႉလွင်ႈသင် ၊ ဢၼ်ၶဝ်လၢတ်ႈမႃးၼၼ်ႉ မီးၸိူင်ႉႁိုဝ်ၽွင်ႈၶႃႈ ?။


တွပ်ႇ - လွင်ႈၸႂ်ႉထွၼ်တီႈၼိုင်ႈ ယဝ်ႉတီႈၼိုင်ႈၼႆႉ ပဵၼ်ၾိင်ႈၶဝ်။ ပိူင်လူင်မၼ်းတႄႉ ၶႂ်ႈႁႂ်ႈ SSPP/SSA မႃးယူႇတီႈဝၢၼ်ႈႁႆး တင်းမူတ်း ။


ထၢမ် - ဢိင်ၼိူဝ်တိုဝ်ႉတၢင်း ဝၼ်းၵေႃႇတင်ႈတပ်ႉသိုၵ်း ၶွပ်ႈတဵမ် 52 ပီၼႆႉသေ ၾၢႆႇၼိုင်ႈၵေႃႈငဝ်းလၢႆး ၵၢၼ်သိုၵ်း ဢၼ်သိုၵ်းမၢၼ်ႈၸႂ်ႉထွၼ်တပ်ႉ ။ လွင်ႈၶဵင်ႈၶႅင်ၵၢၼ်သိုၵ်းတေႃႇၵၼ် ။ ငဝ်းလၢႆးၵၢၼ်ဝၢၼ်ႈၵၢၼ်မိူင်း ဢၼ်လူင်ပွင်ၸိုင်ႈ ပိၼ်ႇပႅင်လႅၵ်ႈလၢႆႈ ပဵၼ်မႃးလူင်ပွင်ၸိုင်ႈ ဢၼ်ၵူၼ်းမိူင်းလိူၵ်ႈတင်ႈၸိူဝ်းၼႆႉ ။ ၵွပ်ႈၼႆ ငဝ်းလၢႆးယၢမ်းလဵဝ်ၼႆႉ ယူႇတီႈပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၶႂ်ႈမွၵ်ႇလၢတ်ႈ ပေႃႈမႄႈၵူၼ်းမိူင်း ၸိူင်ႉႁိုဝ်ၽွင်ႈၶႃႈ ?။


တွပ်ႇ - ၸွမ်းၼင်ႇမူႇပိူင် ပႃႊတီႊမႂ်ႇသုင်ၸိုင်ႈတႆး မီးဝႆႉၼၼ်ႉ တေသိုပ်ႇႁဵတ်းသၢင်ႈၵႂႃႇ တေႃႇပေႃးထိုင်တီႈ ယိူင်းမၢႆယူႇ ။ ငဝ်းလၢႆးမၼ်း ၶႂ်ႈပဵၼ်ၸိူင်ႉႁိုဝ်ပဵၼ် ၸွမ်းၼင်ႇလွင်ႈယိူင်းဢၢၼ်းႁဝ်း ၶႂ်ႈမီးၶႂ်ႈပဵၼ်ၼၼ်ႉ တေသိုပ်ႇႁဵတ်းသၢင်ႈၵႂႃႇယူႇ ။