ၵူၼ်းထဝ်ႈလႄႈ လုၵ်ႈဢွၼ်ႇၸိူဝ်းပၢႆႈၽေးၼၼ်ႉ ႁွတ်ႈယူႇတီႈဝၢၼ်ႈဝႃႉ ၸႄႈဝဵင်းၵေးသီး ၵမ်ႈၼမ်ၸပ်းတၢင်းပဵၼ် တွင်ႉၼွင်ႇ / တွင်ႉၸဵပ်း ယွၼ်ႉၼမ်ႉၵိၼ်လႄႈ ထၢင်ဢွၵ်ႇၼွၵ်ႈ ဢမ်ႇၵုမ်ႇထူၼ်ႈ တင်းလွင်ႈမူတ်းသႂ်ၼႆ ၽူႈၸတ်းၵၢၼ်တီႈ ၶႅမ်ႉၵူၼ်းပၢႆႈၽေးလၢတ်ႈ ။

တႄႇဢဝ် ဝၼ်းတီႈ 09-27/11/2015 မႃးၼႆႉ တီႈသုၼ်ၵူၼ်းပၢႆႈၽေးသိုၵ်း ဝၢၼ်ႈဝႃႉ ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း ႁူမ်ႈတင်းၵူၼ်းထဝ်ႈလႄႈလုၵ်ႈဢွၼ်ႇ ၸပ်းတၢင်းပဵၼ် တွင်ႉၼွင်ႇ / တွင်ႉၸဵပ်း တွင်ႉၵႂႃႇ ၊ ဢႆ ၊ တၢင်းပဵၼ်ပွတ်ႇ ၊ ပဵၼ်ၶႆႈပဵၼ်ၼၢဝ် ၊ ပဵၼ်ၶူမ်း တင်းမူတ်း 419 ၵေႃႉ ၼႆယဝ်ႉ ။


ၸၢႆးႁိၼ်သႅင် ၽူႈၸတ်းၵၢၼ်ပၢင်သဝ်းၵူၼ်းပၢႆႈၽေးလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႇဝႃႈ ယွၼ်ႉၼမ်ႉၵိၼ်ဢမ်ႇမူတ်းသႂ် ၊ ထၢင်ဢွၵ်ႇၼွၵ်ႈ ဢမ်ႇၵုမ်ႇထူၼ်ႈ ၸဵမ်ၸိူဝ်ႉၼႆႉ ထႅင်ႈၾၢႆႇၼိုင်ႈၵေႃႈ လွင်ႈၼမ်ႉၵိၼ်ၼႆႉ ႁဝ်းၶႃႈဢွၼ်ၵၼ်ၵိၼ်ၼမ်ႉႁွင်ႈဝႃႉ တၢၵ်းၵိၼ်ၼမ်ႉၾၢႆႇတၢင်းၼိူဝ် တၢင်းတႂ်ႈသမ်ႉ ႁဝ်းၶႃႈဢွၼ်ၵၼ်ဢၢပ်ႇ ႁဵတ်းၼႆၶႃႈဢေႃႈ  တေႃႈလဵဝ် ဢၼ်ႁဝ်းၶႃႈၶႂ်ႈလႆႈလိူဝ်ပိူၼ်ႈတႄႉ မေႃယႃလူင်ၶႃႈဢေႃႈ ယွၼ်ႉဝႃႈ တီႈၼႆႈၼႆႉ မီးမေႃယႃဢွၼ်ႇၵူၺ်း ဢမ်ႇမီးမေႃယႃလူင် တႃႇယူတ်းယႃ ၵူတ်ႇထတ်းတၢင်းပဵၼ်ပၼ် - ဝႃႈၼႆ ။


လုၵ်ႈဢွၼ် ဢႃယု 12 ၶူပ်ႇလူင်းတႂ်ႈ ၸပ်းတၢင်းပဵၼ်ဢႆ ၊ ပွတ်ႇ ၊ ၶႆႈၼၢဝ် မီး 293 ၵေႃႉ ၊ ပဵၼ်ၶူမ်း 27 ၵေႃႉ ၊ တၢင်းပဵၼ်တွင်ႉၼွင်ႇ / တွင်ႉၸဵပ်း တွင်ႉၵႂႃႇ သမ်ႉမီး 99 ၵေႃႉ ၼႆယဝ်ႉ ။


ၸၢႆးႁိၼ်သႅင် သိုပ်ႇလၢတ်ႈထႅင်ႈဝႃႈ ၵူၼ်းပၢႆႈၽေးမိူဝ်ႈၼႆႉ ဝၼ်းတီႈ 27 တင်းမူတ်းမီး 1023 ၵေႃႉ ၊ ႁူမ်ႈပႃးလူၺ်ႈ သင်ၶၸဝ်ႈ 41 တူၼ် ၊ မိူဝ်ႈပူၼ်ႉမႃး 2 ဝၼ်းသမ်ႉ ၵူၼ်းပၢႆႈၽေးမီး 1103 ၵေႃႉ ဝႃႈၼႆ ။


သုၼ်ၵူၼ်းပၢႆႈၽေးၼၼ်ႉ ၽူႈႁူႉပုၼ်ႈၽွၼ်းၶဝ်ၸဝ်ႈ တင်ႈႁွင်ႈယႃ တီႈၶႅမ်ႉသုၼ်ၵူၼ်းထူပ်းၽေးဝႆႉယူႇ မီးမေႃယႃဝႆႉ 6 ၵေႃႉ ။ ၵူၺ်းၵႃႈ မေႃယႃလူင်ၻွၵ်ႉတိူဝ်ႊတႄႉ ဢမ်ႇမီး ၼႆယဝ်ႉ ။ ၵူၼ်းပၢႆႈၽေးဢၼ်မႃးမီးဝႆႉတီႈဝၢၼ်ႈဝႃႉ ၸႄႈဝဵင်းၵေးသီးၼႆႉ ၵူၼ်းဝၢၼ်ႈတၢင်းပွတ်း ဝၢၼ်ႈသေႃႉ ၊ ၵုၼ်ၵႅင်း ၊ ၼမ်ႉလၼ်ႈ၊ ႁၢႆးႁွမ်ႈ ၊ ၽၵ်းၵီး ၊ ဝၢၼ်ႈလုၺ် ၊ မိူင်းဢၢၵ်ႇ ၸဵမ်ၸိူဝ်ႉၼႆႉ ။