ၸွမ်သိုၵ်းယွတ်ႈသိုၵ်း ႁူဝ်ပဝ်ႈလူင် ၶွင်ႊသီႊဢဝ်ၶိုၼ်း ၸိုင်ႈတႆး (RCSS) ၶဝ်ႈႁူမ်ႈ ပၢင်ၶုၵ်းထူပ်း ဝၼ်းၵိူတ်ႇ ၸဝ်ႈၼၢင်းႁေႃၶမ်းထႆး၊ ယွၼ်းပွၼ်းထိုင် ႁႂ်ႈဢႃယုၸဝ်ႈယိုၼ်းယၢဝ်း။ ႁူမ်ႈတိုၵ်းသူၼ်း ပီႈၼွင်ႉတႆး ႁွမ်းတၢၼ်းႁူမ်ႈသၢင်ႈ ႁုၼ်ႇႁၢင်ႈ ၸဝ်ႈၼရေးသူၼ် တီႈမၢႆတွင်းၵိုမ်းၵိုၵ်းပိုၼ်း ပီႈၼွင်ႉတႆး- ထႆး။

ဝၼ်းတီႈ 11-12/08/2015 မီးၵၢၼ်ၸတ်း ပၢင်ပွႆးၶုၵ်းထူပ်း ယွၼ်းပွၼ်း ဝၼ်းၵိူတ်ႇၸဝ်ႈၼၢင်းႁေႃၶမ်းထႆး၊ ႁႂ်ႈၽရႃႉၼၢင်းၸဝ်ႈ ဢႃယုၸဝ်ႈယိုၼ်းယၢဝ်း သိုပ်ႇပဵၼ်ႁူမ်ႈႁုင်းႁူမ်ႈႁႆး ပၼ်ပီႈၼွင်ႉထႆး လႄႈတႆးၵႂႃႇထႅင်ႈၶၢဝ်းႁိုင် တီႈဝတ်ႉၻွၼ်းၸၼ်ႇ ဝဵင်းၵဵင်းမႆႇ ၸိုင်ႈထႆး။ မီးၵၢၼ်ၸတ်းပႃး ၶူင်းၵၢၼ်ၵေႃႇသၢင်ႈ ႁုၼ်ႇႁၢင်ႈၸဝ်ႈၽရႃႉၼရေးသူၼ် မႁႃရႃၸႃ ပိူဝ်ႈတႃႇပဵၼ်တီႈမၢႆတွင်းၵိုမ်း ၵိုၵ်းပိုၼ်းသွင်ပီႈၼွင်ႉ တႆး-ထႆး ၼႆယဝ်ႉ။

ၵဵဝ်ႇၵပ်းလွင်ႈၼႆႉ ဝၼ်းတီႈ 11/08/2015 တင်ႈတႄႇၶၢဝ်းယၢမ်း 20:00 မူင်း၊ ၸွမ်သိုၵ်းယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၵၢဝ်ႇလၢတ်ႈၵႂၢမ်း ယွၼ်းပွၼ်း ထိုင်ၸဝ်ႈၼၢင်းႁေႃၶမ်း။ ဝၢႆးၼၼ်ႉ မီးၵၢၼ်ၸုတ်ႇတဵၼ်းၸႆး ပိုတ်ႇၽဵင်းၵႂၢမ်းယွင်ႈယေႃးၵုၼ်းမုၼ် ႁူမ်ႈၵၼ်ၵႃရဝၼပ်ႉယမ်။

ၸွမ်သိုၵ်းယွတ်ႈသိုၵ်း ႁူဝ်ပဝ်ႈ RCSS

ၸဝ်ႈယွတ်ႈသိုၵ်း ၵၢဝ်ႇလၢတ်ႈၵႂၢမ်းဝႃႈ- “ၶႃႈႁဝ်း ၸွမ်သိုၵ်းယွတ်ႈသိုၵ်း ႁူဝ်ပဝ်ႈလူင် ၶွင်ႊသီႊဢဝ်ၶိုၼ်း ၸိုင်ႈတႆး ႁူမ်ႈလူၺ်ႈပီႈၼွင်ႉ ၸၢဝ်းၶိူဝ်းတႆးႁဝ်းၶႃႈတင်းသဵင်ႈ၊ ဢၼ်မႃးႁူမ်ႈတူဝ်ႁွတ်ႈၽႅဝ်ယူႇ ၼႃႈဢွင်ႈတီႈၼႆႉတင်းသဵင်ႈ၊ ဢိၵ်ႇပႃးပီႈၼွင်ႉၵူၼ်းမိူင်း ၸၢဝ်းတႆးႁဝ်းၶႃႈၵူႈတီႈၵူႈလႅၼ်၊ ပႃးၸဵမ်ၼႂ်းၽႅၼ်ႇလိၼ်ၸိုင်ႈတႆးႁဝ်းၶႃႈ လႆႈမီးတင်းပီတိ ၸူမ်းသိူဝ်းတဵမ်လူၼ်ႉ တီႈဢၼ်ႁဝ်းၶႃႈ လႆႈမႃးႁူမ်ႈတူဝ် ၼႄႁႅင်းၸႂ်သတ်ႉထႃႇ ယုမ်ႇယမ်ၼပ်ႉထိုဝ် ပႅင်းၵိုမ်း ဢမ်ႇလိုမ်းၵုၼ်းမုၼ်ငဝ်း ၽရႃႉမႁႃရႃးၶျိၼီးၼၢတ်ႉၸဝ်ႈ၊ ဢၼ်ႁဝ်းၶႃႈလႆႈသေႃႉပိုင်ႈႁူမ်ႈၽူၺ်း ၽရႃႉပႃႇရမီႇ တႂ်ႈႁူမ်ႈငဝ်းၽရႃႉမႁႃရၢၸ်ႉလူင်ၼႆႉ၊ လႆႈမႃးယွင်ႈယေႃးၼႂ်းတိုဝ်ႉတၢင်း ဝၼ်းမႁႃမင်ၵလႃ ဝၼ်းၵိူတ်ႇၸဝ်ႈၼၢင်းႁေႃၶမ်းႁဝ်းၶႃႈ တဝ်ႈသူႇႁွတ်ႈမႃးထႅင်ႈႁွပ်ႈၼိုင်ႈ ၼႂ်းတိုဝ်ႉတၢင်းဝၼ်းမိူဝ်ႈၼႆႉၶႃႈဢေႃႈ”။
“ၸိူဝ်းၶႃႈႁဝ်းတင်းလၢႆ ယွၼ်းၽိတ်ႈပၢင်းဢဝ် ရတၼႃသၢမ်ၸဝ်ႈလႄႈ ဢူမုၼ်ဢမ်းၼၢၸ်ႈ တီႈထွတ်ႈတီႈမျၢတ်ႈတင်းလၢႆ၊ မုၼ်ငဝ်းတေဝတႃ ဢၼ်တူၺ်းႁူမ်ႇငမ်းၼိူဝ်ၶိူဝ်းမႁႃရႃၸႃ သယၢမ်ၸဝ်ႈၵူႈတူၼ် ၵူႈသီႇၼႃႈမိူင်း ယွၼ်းႁႂ်ႈႁူမ်ႇငမ်းႁၵ်ႉသႃ ၼၢင်းႁေႃၶမ်းၸဝ်ႈ ႁႂ်ႈဢႃယုၸဝ်ႈယိုၼ်းယၢဝ်း၊ ႁႂ်ႈလႆႈသဝ်းယူႇလူၺ်ႈတၢင်းသိူဝ်းတူဝ်ၸႂ်၊ ႁႂ်ႈပၢႆးယူႇလီၸဝ်ႈၶႅင်ႁႅင်း ယိုၼ်းမၼ်ႈ၊ ႁႂ်ႈၽရႃႉပႃႇရမီႇၸဝ်ႈႁူမ်ႇငမ်း ၵူႈသီႇၼႃႈၾႃႉပႅတ်ႇၼႃႈမိူင်းလႄႈ ပဵၼ်မိင်ႈၶႂၼ်ငဝ်း ႁူမ်ႇတူဝ်မုင်းၶိင်း ႁူမ်ႇငမ်းတူၺ်းထိုင်ၼိူဝ်ၶႃႈႁဝ်းလႄႈ ဢိၵ်ႇတင်းၵူၼ်းမိူင်းၸၢဝ်းတႆးႁဝ်းၶႃႈတင်းသဵင်ႈ၊ ထႃရဝယင်ႉယိုၼ်းၼၢၼ်းလူၺ်ႈသေၵမ်းၶႃႈဢေႃ။ ၵႃရဝယွင်ႈယေႃး ၼပ်ႉထိုဝ်ၵုၼ်းမုၼ်ငဝ်း ၸဝ်ႈၼၢင်းႁေႃၶမ်းႁဝ်းၶႃႈသေ ၶႃႈႁဝ်းၸွမ်သိုၵ်းယွတ်ႈသိုၵ်း ႁူဝ်ပဝ်ႈလူင်ၶွင်ႊသီႊဢဝ်ၶိုၼ်းၸိုင်ႈတႆး” - ဝႃႈၼႆ။

ဝၢႆးၼၼ်ႉ ၸဝ်ႈၼႃႈတီႈ ၼႂ်းၶွင်ႊသီႊဢဝ်ၶိုၼ်းၸိုင်ႈတႆး ဢိၵ်ႇ ၸဝ်ႈၼႃႈတီႈထႆး ၸိူဝ်းၵဵဝ်ႇၶွင်ႈၶိုၼ်ႈၼိူဝ် ၶူင်ႇဝေႊထီးသေ ႁူမ်ႈထၢႆႇႁၢင်ႈ တီႈမၢႆတွင်းၵိုၵ်းၵၼ်။ ႁူဝ်ပဝ်ႈလူင် ၸဝ်ႈယွတ်ႈသိုၵ်း ၵေႃႈၵၢဝ်ႇလၢတ်ႈၵႂၢမ်း မွၵ်ႇၶႆႈၼႄလွင်ႈၸဝ်ႈၽရႃႉၼရေးသူၼ်။

ၸဝ်ႈယွတ်ႈသိုၵ်း လၢတ်ႈဝႃႈ- မႂ်ႇသုင်ၶႃႈ ပီႈၼွင်ႉၸၢဝ်းတႆးႁဝ်းၶႃႈလႄႈ ပီႈၼွင်ႉၸၢဝ်းထႆး။ ဝၼ်းမိူဝ်ႈၼႆႉ ပဵၼ်ဝၼ်းႁဝ်းၶႃႈၼပ်ႉယမ် ဢဝ်ၵုၼ်းမုၼ်ဝၼ်းၵိူတ်ႇ ၸဝ်ႈၼၢင်းႁေႃၶမ်း လႄႈ ႁဝ်းၶႃႈမီးၵၢၼ်ယူႇ 2 လွင်ႈ။ လွင်ႈၼိုင်ႈၼႆႉ ႁဝ်းၶႃႈမႃးၼပ်ႉယမ် ၸဝ်ႈၼၢင်းႁေႃၶမ်း ၼႂ်းဝၼ်းၵိူတ်ႇၸဝ်ႈၼၢင်းႁေႃၶမ်း။ ယဝ်ႉၵေႃႈဢူၺ်းၽွၼ်း (ယွၼ်းသူး)ပၼ် ႁႂ်ႈမၼ်းၸဝ်ႈ ယူႇလီၵိၼ်ဝၢၼ်၊ ဢႃယုယိုၼ်းယၢဝ်း ယူႇႁူမ်ႈလူၺ်ႈၸၢဝ်းထႆးလႄႈၸၢဝ်းတႆး။ တီႈသွင်ၵေႃႈ တၢင်းၸဝ်ႈၼႃႈတီႈထႆးလႄႈ ၶွင်ႊသီႊဢဝ်ၶိုၼ်းၸိုင်ႈတႆး ႁဝ်းၶႃႈ တေႁူမ်ႈၵၼ်သၢင်ႈႁုၼ်ႇႁၢင်ႈ ၽရႃႉၼရေးသူၼ်။ ၽရႃႉၼရေးသူၼ်ၼႆႉ ႁဝ်းၶႃႈၼပ်ႉထိုဝ် ယုမ်ႇယမ်မၼ်းၸဝ်ႈ၊ တီႈၼိူဝ်လွႆတႆးလႅင်းၼၼ်ႉၵေႃႈ ႁဝ်းၶႃႈတင်ႈဝႆႉ ၼပ်ႉယမ်ၼပ်ႉထိုဝ်ဝႆႉ။ ၵွပ်ႈပိူဝ်ႈၶႂ်ႈႁႂ်ႈပီႈၼွင်ႉတႆးႁဝ်းၶႃႈ ႁူႉထိုင်ဢိတ်းၼိုင်ႈ။


ပိုၼ်းၽရႃႉၸဝ်ႈၼရေးသူၼ်ၼႆႉ မၼ်းၸဝ်ႈသဵင်ႈၵမ်သုတ်းမုၼ်မႃးလႆႈ 152 ပီ၊ ၼႂ်းၶၢဝ်းတၢင်း ၸီဝိတ်ႉသၢႆၸႂ်မၼ်းၸဝ်ႈၼၼ်ႉ မၼ်းၸဝ်ႈၼႆႉ မိူဝ်ႈယၢမ်းၼၼ်ႉ ပယိၼ်ႇၼွင်ႇ ၶုၼ်ႁေႃၶမ်းမၢၼ်ႈ မႃးတိုၵ်းမိူင်းထႆး၊ မႃးဢဝ်မၼ်းၸဝ်ႈ ၵႂႃႇပဵၼ်တူဝ်ပၵၼ်ႊ (တူဝ်တႅၼ်း) ၼင်ႇႁိုဝ်ပေႃးတေမီးလွင်ႈ ယုမ်ႇယမ်ၵၼ်။ မိူဝ်ႈၵႂႃႇပဵၼ်တူဝ်ပၵၼ်ႊယူႇတီႈ မိူင်းႁူင်သႃဝတီႇၼၼ်ႉ မိူင်းတႆးၵေႃႈ မီးလုၵ်ႈၸဝ်ႈၾႃႉသႅၼ်ဝီ ၸဝ်ႈၶမ်းၵၢႆႇၼွႆႉ ၵႂႃႇပဵၼ်တူဝ်ပၵၼ်ႊမိူၼ်ၵၼ်သေ လႆႈယူႇၸွမ်းၵၼ်၊ လႆႈႁူႉၸၵ်းၵၼ်၊ ပဵၼ်သႅၼ်းႁုၼ်ႈလဵဝ်ၵၼ် ယႂ်ႇၸွမ်းၵၼ် ႁဵၼ်းလိၵ်ႈၸွမ်းၵၼ်တီႈၼၼ်ႈ။ ၽိူဝ်ႇထိုင်ယႂ်ႇမႃးယဝ်ႉ မႃးမိူင်းထႆးၵေႃႈမႃးၸွမ်းၵၼ်၊ ပွၵ်ႈတီႈ 1 မႃးသေပွၵ်ႈမိူဝ်း၊ ၽိူဝ်ႇထိုင်မႃးပွၵ်ႈတီႈ 2 တႄႉ ဢမ်ႇပွၵ်ႈမိူဝ်းယဝ်ႉ၊ ၶၢမ်ႈၼမ်ႉသတုၼ်း ဢၼ်ဝႃႈၼၼ်ႉသေ ပိုၼ်ၽၢဝ်ႇဝႃႈ တေတေႃႇသူႈၶိုၼ်း၊ ယဝ်ႉၵေႃႈမႃးတေႃႇသူႈၵႅတ်ႇၶႄ ဢဝ်ၽႅၼ်ႇလိၼ်ထႆး လႆႈၶိုၼ်ႈယႂ်ႇမႂ်ႇသုင် တေႃႇထိုင်ဝၼ်းမိူဝ်ႈၼႆႉ။

ၸဝ်ႈၶမ်းၵၢႆႇၼွႆႉၵေႃႈ ၸွႆႈၸဝ်ႈၽရႃႉၼရေးသူၼ် တိုၵ်းတီႈမိူင်းထႆးၼႆႉ။ တိုၵ်းတီႈမိူင်းထႆးယဝ်ႉ ၸဝ်ႈၽရႃႉၼရေးသူၼ် မွၵ်ႇဝႃႈ မိူဝ်းႁၢင်ႈႁႅၼ်းသိုၵ်းဝႆႉလႄႈ၊ ပေႃးႁၢင်ႈႁႅၼ်းသိုၵ်းတူဝ်ႈတၼ်းယဝ်ႉ ႁႂ်ႈမွၵ်ႇမႃးမၼ်းၸဝ်ႈ၊ မၼ်းၸဝ်ႈတေႁၢင်ႈႁႅၼ်းသိုၵ်း မိူဝ်းႁူမ်ႈၵၼ်တီႈမိူင်းတႆးသေ ၶဝ်ႈတိုၵ်းတီႈတွင်ႇဢူႇ၊ ၸဝ်ႈၶမ်းၵၢႆႇၼွႆႉၵေႃႈ မႃးႁၢင်ႈႁႅၼ်းသိုၵ်းသေ ပွင်ႇမႃး၊ မၼ်းၸဝ်ႈၵေႃႈ ႁၢင်ႈႁႅၼ်းသိုၵ်းၶိုၼ်ႈမိူဝ်း၊ မိူဝ်းၵႂႃႇတၢင်းၵဵင်းလၢဝ် မိူင်းၼႃႉ မိူဝ်းၵႂႃႇတီႈမိူင်းႁၢင်၊ မၼ်းၸဝ်ႈမိူဝ်းၸပ်းရေႃးၵႃႇတၢင်းပဵၼ် တွင်ႇၵႃႇ တီႈမိူင်းႁၢင်သေ သဵင်ႈၵမ်သုတ်းမုၼ်တီႈၼၼ်ႈ။


မၼ်းၸဝ်ႈၼႆႉ မိူဝ်းသဵင်ႈၵမ်သုတ်းမုၼ် ၼႂ်းၽႅၼ်ႇလိၼ်တႆးႁဝ်း၊ ယိူင်းဢၢၼ်းမၼ်းၸဝ်ႈၼႆႉ တေမိူဝ်းႁူမ်ႈၵၼ်တင်းၸဝ်ႈၶမ်းၵၢႆႇၼွႆႉသေ မိူဝ်းတိုၵ်းတီႈတွင်ႇဢူႇ၊ ပေႃးတိုၵ်းတွင်ႇဢူႇယဝ်ႉ ၶဵတ်ႇလႅၼ်မိူင်းသယၢမ်ၼႆၼႆႉ မီးယိူင်းဢၢၼ်းဢဝ်ၼမ်ႉဢီႇရႃႇဝတီႇ (ၼမ်ႉၵဵဝ်) ပဵၼ်ၶဵတ်ႇလႅၼ်လႅၼ်။ ၵွပ်ႈၼၼ် သင်ဝႃႈၸဝ်ႈၽရႃႉၼရေးသူၼ် ဢမ်ႇသဵင်ႈၵမ်သုတ်းမုၼ် လႆႈႁူမ်ႈၵၼ်တင်းၸဝ်ႈၶမ်းၵၢႆႇၼွႆႉသေ တိုၵ်းပေႃးၼႆ ၸိူဝ်ႉၸၢတ်ႈတႆးႁဝ်းၶႃႈ တေဢမ်ႇတုၵ်ႉၶၸိူင်ႉၼႆႁိုဝ်ၼႆၼၼ်ႉ ယင်းလီဝူၼ်ႉယူႇ။

ထႅင်ႈလွင်ႈၼိုင်ႈ ၸဝ်ႈၽရႃႉၼရေးသူၼ်ၼႆႉ မၼ်းၸဝ်ႈၼႆႉ မီးပႃႇရမီႇ၊ မၼ်းၸဝ်ႈသဵင်ႈၵမ်သုတ်းမုၼ် ယဝ်ႉၵေႃႈ ဝိၺၢၼ်ႇၶႂၼ်ငဝ်းမၼ်းၸဝ်ႈၼၼ်ႉ ယင်းၵႅတ်ႇၶႄၽႅၼ်ႇလိၼ်ထႆး လႄႈ ႁူမ်ႇငမ်းပီႈၼွင်ႉတႆး ႁဝ်းယူႇ။ ၵွပ်ႈၼၼ် ႁဝ်းၶႃႈတေသၢင်ႈ ႁုၼ်ႇႁၢင်ႈၸဝ်ႈၽရႃႉၼရေးသူၼ် တီႈမႄႈရိမ်း၊ တီႈၵွင်ၽူလ်း 7 ၊ ၵွပ်ႈၼႆ ၶႂ်ႈႁႂ်ႈပီႈၼွင်ႉတႆးႁဝ်းၶႃႈၵူႈၵေႃႉၵေႃႉ မီးသုၼ်ႇႁူမ်ႈတႃႇၸွႆႈထႅမ်။ ၵွပ်ႈၼႆ ဝၼ်းမိူဝ်ႈၼႆႉ ၶႃႈႁဝ်းမႃးယူႇတီႈၼႆႈသေလႄႈ ပိုၼ်ၽၢဝ်ႇပၼ်ပီႈၼွင်ႉတႆးႁဝ်း ႁႂ်ႈမီးၸႂ်သတ်ႉထႃႇ ၸေႇတၼႃႇၵၼ်ၵူႈၵေႃႉ- ၸဝ်ႈႁူဝ်ပဝ်ႈလူင် ၸွမ်သိုၵ်းယွတ်ႈသိုၵ်း တိုၵ်းသူၼ်းၵႂႃႇၼင်ႇၼႆ။


ယိူင်းဢၢၼ်း ဢၼ်တေသၢင်ႈႁုၼ်ႇႁၢင်ႈ ၸဝ်ႈၼရေးသူၼ်ၼႆႉ မီး 2 လွင်ႈ-

1.ပိူဝ်ႈတႃႇ ႁႂ်ႈပဵၼ်တၢင်းလီႁူမ်ႈသၢင်ႈႁုၼ်ႇႁၢင်ႈ (သူမ်ၻဵတ်ႇ) ၸဝ်ႈၽရႃႉၼရေးသူၼ်မႁႃရႃၸႃ တီႈတပ်ႉပႆလိၼ် တပ်ႉၸုမ်းလူင်မၢႆ 7 (ၵွင်းၽူလ်းထႁၢၼ်ရၢပ်ႉထီႉ 7)၊ ထုင်ႉယင်ႉထပ်ႉ ၸႄႈဝဵင်းမႄႈရိမ်း ၸႄႈတွၼ်ႈၵဵင်းမႆႇ ၸိုင်ႈထႆးပွတ်းႁွင်ႇ။ ႁႂ်ႈပဵၼ်တီႈၼပ်ႉယမ်ၵႃရဝဝႆႈသႃ ယွၼ်းသူးတိူင်ႇၵၢဝ်ႇ ႁႂ်ႈဢူမုၼ်ငဝ်းၸဝ်ႈႁိူဝ်ႈႁိူင်းပိူင်းသႂ်လႄႈ သိုပ်ႇႁူမ်ႈငမ်းပၼ်။

2.ပိူဝ်ႈတႃႇ ႁႂ်ႈပဵၼ်တႃႇၼတၢင်းလီႁႅၼ်းတၢၼ်းပၼ် ၸဝ်ႈၼၢင်းႁေႃၶမ်း သူမ်ၻဵတ်ႇၽရႃႉၼၢင်းၸဝ်ႈသီရိၵိ ၽရႃႉပရူမ်ႊရႃးၶျိၼီးၼၢတ်ႉ ၼႂ်းတိုဝ်ႉတၢင်းဝၼ်းၵိူတ်ႇၸဝ်ႈ တဝ်ႈသူႇႁွတ်ႈ 82 ဝႃႇသႃလႄႈ ၼေႃႇၶမ်းၸဝ်ႈ သူမ်ၻဵတ်ႇၽရႃႉၽရႃႉပရူမ်ႊဢူဝ်ႊသႃထိရၢတ်ႉ သယၢမ်မၵုတ်ႇရၢတ်ႉၶျၵုမၢလ်း ၼႂ်းတိုဝ်ႉတၢင်းဢႃယုၸဝ်ႈ တဝ်ႈသူႇႁွတ်ႈ 63 ဝႃႇသႃ။