ၵူၼ်းမိူင်း 19 ဝၢၼ်ႈ ဢၼ်ယူႇၼႂ်း ထုင်ႉမိူင်းမၢဝ်း ႁူမ်ႈၵၼ် ၸတ်းႁဵတ်းပၢင်ႁေႃး ထမ်းယွၼ်းသူးလႄႈ သႂ်ႇငိုၼ်း ၸွႆႈထႅမ်တႃႇ ၵူၼ်းထူပ်းၽေး ၼမ်ႉထူမ်ႈၼႂ်းမိူင်း တႆးပတ်းပိုၼ်ႉ။

မိူဝ်ႈဝၼ်းတီႈ 16/08/2015 ၸုမ်းထမ်ႇမၸၵ်ႈၵျႃႇ မိူင်းမၢဝ်းလႄႈ ၽၢၵ်ႈၼမ်ႉမၢဝ်း ဢွၼ်ႁူဝ် ၸတ်းႁဵတ်း ပၢင်ႁေႃးထမ်း ယွၼ်းသူး လႄႈ ႁူမ်ႈၵၼ်လူႇငိုၼ်း ၸွႆႈထႅမ် ပီႈၼွင်ႉၵူၼ်းမိူင်း ၸိူဝ်းထူပ်းၽေးၼမ်ႉ ထူမ်ႈၼႂ်းမိူင်းတႆး တီႈဝတ်ႉၼွင် ၶမ်းၾၢႆႇၸၢၼ်းမိူင်းမၢဝ်း ၸိုင်ႈမိူင်းၶႄႇ။


ပၢင်ႁေႃးထမ်းၼႆႉ မီးပီႈၼွင်ႉ ၵူၼ်းဝၢၼ်ႈ ၵူၼ်းမိူင်း ႁူမ်ႈပႃးသင်ႇၶၸဝ်ႈ လႄႈလုၵ်ႈၸုမ်း ထမ်ႇမၸၵ်ႈၵျႃႇ မိူင်းမၢဝ်း ၶဝ်ႈႁူမ်ႈ 800ၵေႃႉပၢႆ။


ၸဝ်ႈတိုၼ်းတႆး ႁူဝ်ႈပဝ်ႈ လုမ်းပုတ်ႉထ သႃသၼႃ မိူင်းမၢဝ်း လၢတ်ႈဝႃႈ - “ပၢင်ႁေႃးထမ်းၼႆႉ ယွၼ်ႉပိူဝ်ႈ ဝူင်ႈ 2 ဝူင်ႈမႃးၼႆႉ မီးပီႈၼွင်ႉ ၵူၼ်းမိူင်းတႆး လႆႈႁူပ်ႉထူပ်း ၽေးသၽႃႇဝ တင်းၼမ် တင်းလၢႆလႄႈ ၼင်ႇႁိုဝ်ပေႃးတေ ပဵၼ်ဢဵၼ်ႁႅင်း ၼမ်ႉၸႂ် ၸွႆႈထႅမ်ၵၼ်ၼႆသေ ၽူႈပွင်ၵၢၼ် ၊ ႁူဝ်ၼႃႈ မူႇၸုမ်းထမ်ႇမၸၵ်ႈၵျႃႇ တင်းသဵင်ႈ ၸင်ႇလႆႈၸႂ်ၵၼ်သေ ၸတ်းႁဵတ်း ပၢင်ႁေႃးထမ်း လႄႈ တုင်းငိုၼ်းၸွႆႈ ထႅမ်ၼႆယဝ်ႉ”။


မၼ်းၸဝ်ႈ သိုပ်ႇလၢတ်ႈဝႃႈ - ပွၵ်ႈၼႆႉ ပဵၼ်ပွၵ်ႈ ဢွၼ်တၢင်းသုတ်း ၊ ၵူၺ်းၵႃႈ တေၸတ်းႁဵတ်းထႅင်ႈ ၵမ်းၼိုင်ႈ တီႈတွၼ်ႊ တႂ်ႈဝတ်ႉတိုင်းသႅင် ပေႃးဝၼ်းတီႈ 19 လိူၼ်ၼႆႉ။


ၸုမ်းထမ်ႇမၸၵ်ႈၵျႃႇ မိူင်းမၢဝ်းလႄႈ ၽၢၵ်ႈၼမ်ႉ မိူင်းမၢဝ်းၼႆႉ ၶွတ်ႇၽွတ်ႈ မႃးမိူဝ်ႈပီ 2007 မီးၽူႈၶဝ်ႈၸုမ်း 4000ၵေႃႉ။


တႄႇႁၢင်လိူၼ်ၵျူႊလၢႆႊ 2015 မႃးၼႆႉ ၾူၼ်းတူၵ်း ႁၢဝ်ႈႁႅင်းသေ ႁဵတ်းႁႂ်ႈ ၼမ်ႉထူမ်ႈ ၵူႈပွတ်း ၵူႈတွၼ်ႈ ၼႂ်းမိူင်းတႆး ၊ သဵၼ်ႈတႃႈ သၢႆတၢင်း လိၼ်သူၼ် ႁႆႈၼႃးလႄႈ ႁိူၼ်းယေးၵူၼ်းဝၢၼ်ႈ ၵူၼ်းမိူင်း လူႉလႅဝ်တၢင်းၼမ်။ တေႃႇထိုင်မိူဝ်ႈလဵဝ် ၵူၼ်းမိူင်း ၼပ်ႉႁူဝ်မိုၼ်ႇ ထူပ်းၺႃး တင်းယၢပ်ႇၽိုတ်ႇလႄႈ တိုၵ်ႉလူဝ်ႇတၢင်းၸွႆႈထႅမ် တၢင်းၼမ်။