ပႃႊတီႊၵွင်ၸႆး ပိုတ်ႇလုမ်း တီႈၵဵင်းတုင်



ပႃႊတီႊမႂ်ႇသုင် ၻီႊမူဝ်ႊၶရေႊတိတ်ႉၶ် မိူင်းတႆး ပွတ်းဢွၵ်ႇ (ၵွင်ၸႆး) ပိုတ်ႇလုမ်းတီႈ ဝၢၼ်ႈၵဵင်းၸၢမ် ပွၵ်ႉ 3 ဝဵင်းၵဵင်းတုင် ဝွၵ်ႇၸိူၼ်းသင်ၶၸဝ်ႈ မႃးၻေးသၼႃး ထမ်း (မင်းၵလ)လႄႈ တၢၼ်းမိုဝ်ႉၶဝ်ႈဝၼ်း “လဵင်ႉၽဵလ်း” (သွမ်းဝၼ်း) မီးပီႈၼွင်ႉတီႈၸမ်ၵႆ မႃးၶဝ်ႈႁူမ်ႈဝၼ်းပိုတ်ႇလုမ်း တင်းၼမ်။


ဝၼ်းတီႈ 27/07/2015 မိူဝ်ႈၼႆႉ ပႃႊတီႊၵွင်ၸႆး ပိုတ်ႇလုမ်းတီႈဝၢၼ်ႈၵဵင်းၸၢမ်ပွၵ်ႉ 3 ၊ ဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ႁူဝ်ပဝ်ႈလုင်းၸၢႆးႁွင်ၶမ်း ဢွၼ်ႁူဝ်ၼမ်းၼႃႈ ၸုမ်းပွင်ၵၢၼ်ၼႂ်းပႃႊတီႊၵွင်ၸႆးသေ ဝွၵ်ႇၸိူၼ်းသင်ၶၸဝ်ႈ မႃးၻေးသၼႃးထမ်း(မင်းၵလ)လႄႈ လႄႈတၢၼ်းမိုဝ်ႉၶဝ်ႈဝၼ်း “လဵင်ႉၽဵလ်း” (သွမ်းဝၼ်း)။

တင်ႈတႄႇၶၢဝ်းယၢမ်း 05.00 မူင်းထိုင် 8.00 မူင်း ပိုတ်ႇလုမ်းပႃႊတီႊၵွင်ၸႆးပူၵ်းပၢႆးတုင်းပႃႊတီႊ လႄႈတုင်းၸိူဝ်ႉၸၢတ်ႈၸိုင်ႈတႆးတင်းတုင်းမိူင်းႁူမ်ႈတုမ်။ လုင်းၸၢႆးႁွင်ၶမ်းၵၢဝ်ႇလၢတ်ႈၶေႃႈၵႂၢမ်း ပိုတ်ႇပၢင်ဝႃႈ  ယွၼ်ႉသင်လႆႈတင်ႈပႃႊတီႊၵွင်ၸႆးၼႆႉမႃး၊ ပႃႊတီႊၵွင်ၸႆး တႄႇတင်ႈမႃးၸိူင်ႉႁိုဝ်၊ လိူဝ်ၼၼ်ႉယင်းလၢတ်ႈဝႃႈ တေၶတ်းၸႂ်ပုၼ်ႈတႃႇၸိူဝ်ႉၶိူဝ်း ဝၢၼ်ႈမိူင်း ႁႂ်ႈၶိုၼ်ႈယႂ်ႇမႂ်ႇသုင် ၵႂႃႇၼႆယဝ်ႉ။


ၵႅမ်ႁူဝ်ပဝ်ႈ ၸၢႆးသၢမ်တိပ်ႉသိူဝ် လၢတ်ႈဝႃႈ မိူဝ်ႈလဵဝ်ၼႆႉပီႈၼွင်ႉၵူၼ်းမိူင်းၽႅၵ်ႈ၊ မိူင်းယွင်းၵေႃႈ ၶႂ်ႈပိုတ်ႇလုမ်းပႃႊတီႊၵွင်ၸႆး။ ၵူၺ်းၵႃႈၶၢဝ်းယၢမ်းမၼ်း ဢမ်ႇမီးယဝ်ႉလႄႈ ဢမ်ႇလႆႈပိုတ်ႇ ပေႃးပီၼႃႈမႃးတေၸၢင်ႈၵႂႃႇပိုတ်ႇပၼ်ယူႇ၊ လွင်ႈၵပ်းသိုပ်ႇၵၼ်တႄႉ လႆႈၵပ်းသိုပ်ႇၵၼ်ယူႇသေႇသေႇ။ ၵွပ်ႈဝႃႈပႃႊတီႊၵွင်ၸႆးၼႆႉ ပဵၼ်ပႃႊတီႊပိုၼ်ႉမိူင်း တႃႇပီႈၼွင်ႉတႆးႁဝ်းတၢင်းပွတ်းဢွၵ်ႇလႄႈၵူၼ်းမိူင်း ပၼ်ႁႅင်းပႃႊတီႊၼႆႉတႄႉတႄႉ။ ၵွပ်ႈဝႃႈၵူၼ်းၽူႈၼမ်းလႄႈၽူႈၶဝ်ႈပႃႊတီႊ ပဵၼ်ၵူၼ်းမီးၸႂ်ႁၵ်ႉၸၢတ်ႈဝႃႈၼႆ။

သိုပ်လၢတ်ႈထႅင်ႈဝႃႈ ပႃႊတီႊၵွင်ၸႆးၼႆႉ တေႁဵတ်းႁႂ်ႈတႆးႁဝ်းႁူမ်ႈတုမ်ၵၼ်၊ ဢမ်ႇၸႂ်ႈတေႁဵတ်းႁႂ်ႈတႆးႁဝ်းတႅၵ်ႇယၢႆႈၵၼ်၊ ႁဝ်းၶႃႈမီးၶေႃႈယိူင်းဢၢၼ်းၼႂ်းပႃႊတီႊ 1. တႃႇတေၵႅတ်ႇၶႄႁေႉၵၢင်ဝၢၼ်ႈမိူင်း၊ 2. တႃႇတေပူၵ်းပွင် လႄႈႁႂ်ႈၽူႈတႅၼ်းႁဝ်း ပေႃးလႆႈပဵၼ်ၶိုၼ်းပဵၼ်ၸဝ်ႈပဵၼ်ၸွမ်မိူင်းတႆးႁဝ်း- ၸဵမ်ၸိူဝ်ႉၼႆႉ ထႅင်ႈဢၼ်ၼိုင်ႈၵေႃႈ မိူင်းတႆးႁဝ်း ႁဝ်းတိုၼ်းတေလႆႈၽွင်းငမ်းၼၼ်ႉယဝ်ႉ-ဝႃႈၼႆ။


ပႃႊတီႊၵွင်ၸႆးၼႆႉ တေၶဝ်ႈလိူၵ်ႈတင်ႈ 4 တီႈၼင်ႈ မိူၼ်ၽူႈတႅၼ်းၸိူဝ်ႉၶိူဝ်း၊ ၽူႈတႅၼ်းၵူၼ်းမိူင်း၊ လႄႈၽူႈတႅၼ်းၸႄႈမိူင်း 2 တီႈ၊  မိူဝ်ႈလဵဝ်ၽူႈတႅၼ်းဢၼ်တေၶဝ်ႈၶႄႉၼႂ်းပၢင်လိူၵ်ႈတင်ႈ 1 မီး လုင်းၸၢႆးႁွင်ၶမ်း၊ 2 ၸၢႆးသၢမ်တိပ်ႉ(ၶေမရတ်ႉ)၊ ပီႈၼွင်ႉတႆးၼိူဝ်လႄႈထႅင်ႈၵေႃႉၼိုင်ႈ တိုၵ်ႉၶတ်းလိူၵ်ႈယူႇ။ မိူဝ်ႈလဵဝ်မီးလုၵ်ႈၸုမ်းပႃႊတီႊၵွင်ၸႆး မီးဝႆႉမွၵ်ႈ 1000 ၵေႃႉပၢႆယဝ်ႉ။

ပႃႊတီႊၵွင်ၸႆး ၶွတ်ႈၽွတ်ႈလိူၵ်ႈ လုင်းၸၢႆးႁွင်ၶမ်း (ယၢမ်ႈပဵၼ်ၽူႈၵွၼ်းၸႄႈတွၼ်ႈၵဵင်းတုင် ၵေႃႉၵဝ်ႇ မိူဝ်ႈပၢၼ် မသလ) ပဵၼ်ႁူဝ်ပဝ်ႈ၊ ၵႅမ်ႁူဝ်ပဝ်ႈ 1 ၸၢႆးသၢမ်တိပ်ႉသိူဝ်၊ ၵႅမ်ႁူဝ်ပဝ်ႈ 2   ၸၢႆးသႅင်တိပ်ႉ၊ ၽူႈၼမ်းၼႂ်း ၸၢႆးထုၼ်းတိပ်ႉ၊ ၵႅမ်ၽူႈၼမ်းၼႂ်းၸၢႆးၵျေႃႇၵျေႃႇ၊ ၵႅမ်ၽူႈၼမ်းၼႂ်းၸၢႆးလူင်ဝၼ်း (ႁူဝ်ၼႃႈတႆးၶိုၼ်)၊ ၾၢႆႇၵၢၼ်ငိုၼ်း လုင်းၸၢႆးယွတ်ႈ(ႁူဝ်ၼႃႈတႆးလိုဝ်ႉ)၊ ၽူႈၶၢၼ်ပၢၵ်ႇ ၼၢင်းၼေႃႇ (ႁူဝ်ၼႃႈတႆးလွႆ) ဢိၵ်ႇပႃးၵေႃၵမ်ၵၢၼ်လႄႈ လုၵ်ႈၸုမ်းၼႂ်းပႃႊတီႊ ပီႈၼွင်ႉတႆးၶိုၼ်၊ တႆးလိုဝ်ႉ၊ တႆးၼိူဝ်၊ တႆးလွႆ၊ တႆးလူင် ႁူမ်ႈပႃးၵေႃးပၵ လႄႈဢႃးၸၢၼ်ၼႂ်းဝၢၼ်ႈၼႂ်းၶူင်ႇ- ၼႆယဝ်ႉ။


ဝၼ်းပိုတ်ႇလုမ်းမိူဝ်ႈၼႆႉ မီးပႃႊတီႊၵၢၼ်မိူင်းလႄႈပီႈၼွင်ႉ တီႈၸမ်/ၵႆ မႃးၶဝ်ႈႁူမ်ႈ မိူၼ်ၼင်ႇ ပႃႊတီႊၼူၵ်ႉယူင်း၊ ပႃႊတီႊၽွမ်ႉႁွမ်ႈၸၢဝ်းၶိူဝ်း၊ ပႃႊတီႊဝ၊ ပႃႊတီႊလႃးႁူႇလႄႈပီႈၼွင်ႉတႆးလိုဝ်ႉ၊ တႆးလွႆ၊ တႆးၼိူဝ်၊ တႆးၶိုၼ်၊ တႆးလူင်၊ တႆးလႅမ်း ႁူမ်ႈပႃးပီႈၼွင်ႉၸၢဝ်းၶိူဝ်းလႄႈပီႈၼွင်ႉမိူင်းၽျၢၵ်ႈ၊ တႃႈၶီႈလဵၵ်း ၸိူဝ်းၼႆႉ ။






 
© 2012 All Rights Reserved | Asean Celebrity | Fonts @ AtFonts | Free Templates