ဝၼ်းတီႈ 21/09/2014 ၼႆႉ ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ လႆႈၸတ်းႁဵတ်းပၢင်ဢုပ်ႇၵုမ်လွင်ႈ IT တီႈႁွင်ႈၵၢၼ် ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ၊ လႆႈဢုပ်ႇ ထိုင်ၵၢၼ်တႃႇသိုပ်ႇယုၵ်ႉမုၼ်းႁႂ်ႈၸႂ်ႉတိုဝ်းငၢႆႈလူမ်ၸႂ်လႄႈ ႁႂ်ႈပီႈၼွင်ႉတႆး ႁဝ်းပေႃးတေဝၢႆႇမႃးၸႂ်ႉတိုဝ်း ပွင်ႇၶေႃႈပွင်ႇၶူတ်းၵၼ် ၼမ်တိူဝ်းၽႄႈၵႂၢင်ႈၵႂႃႇၼၼ်ႉ လႆႈၸႂ်ၵၼ်တေသိုပ်ႇၶူၼ်ႉၶႆႈႁႃ လွၼ်ႉၵႅၼ် IT  လႄႈလၵ်းၸဵင်လိၵ်ႈတႆးၸိူင်ႉၼင်ႇ -

1. ၵၢၼ်ၶဵၼ်ႇတႅမ်ႈၾွၼ်ႉဢၼ်မီး ပိူင်ထတ်းၸိူင်ႉႁိုဝ် ႁႂ်ႈပေႃးထုၵ်ႇမႅၼ်ႈၸွမ်း ပိူင်လၢႆးသွၼ်လိၵ်ႈတႆးႁဝ်း ဢၼ်မီးတူဝ် ၼမ်းၼႃႈ တိုတ်ႉ တၢင်ႇ ၽႅတ်း လႄႈတူၼ်းသဵင်။

2. တေသိုပ်ႇလဵပ်ႈႁဵၼ်းႁူႉပွင်ႇလွတ်ႉၵႅၼ် ၵီႊမဵၵ်ႉၸိၶ်ႉ (KeyMagic) ႁႂ်ႈၼၵ်းၼႅၼ်ႈသေ ထုၵ်ႇလီသိုဝ်ႉဢဝ် ပဵၼ် ၶွင်ၶိၼ်ႈၵေႃႈတေသိုဝ်ႉ။

3. ဝၼ်းဢွၵ်ႇဝႃႇသႃၼႆႉ တၢင်းၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ ၵမ်ႉၸွႆႈပၼ်လွင်ႈငၢႆႈလူမ်ၸႂ် တႃႇၸုမ်းၽူႈၶူင်သၢင်ႈ ၾွၼ်ႉ(Unicode)တႆးႁဝ်း တေမႃးလူင်းၾွၼ်ႉ(Unicode)တႆး ပၼ်ၼႂ်းၶိူင်ႈၶွမ်ႊပိဝ်ႊတိူဝ်ႊ ႁိုဝ် မိုဝ်းထိုဝ် ဢႅၼ်ႊၻရွႆႊ (Androi) ဢမ်ႇၼၼ် I-phone, iPad (တွၼ်ႈတႃႇပီႈၼွင်ႉတႆးႁဝ်း ၸိူဝ်းဢမ်ႇမေႃလူင်း၊ ဢမ်ႇႁူႉလၢႆးလူင်း) ႁႂ်ႈဢဝ် Notebook (Laptop) ႁိုဝ် ၾူၼ်ႊမိုဝ်းထိုဝ် မႃးလူင်းလႆႈ။

ၶိူင်ႈမိုဝ်းလႄႈၵႃႈၸႂ်ႉၸၢႆႇၵူႈလွင်ႈ တၢင်းၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ ပဵၼ်ၾၢႆႇၵမ်ႉၸွႆႈ၊ ပိူဝ်ႈတႃႇပီႈၼွင်ႉႁဝ်းၶဝ် ၸိူဝ်းဢဝ်ၶွမ်ႊ(Notebook) ႁိုဝ် ၾူၼ်ႊမိုဝ်းထိုဝ် မႃးလူင်းၼၼ်ႉ ယူႇတီႈၼမ်ႉၸႂ် မီးၸေႇတၼႃး ၶႂ်ႈႁွမ်းၸွႆႈပၼ် တႃႇငိုၼ်းၵွင်ၵၢင် ႁႂ်ႈပဵၼ်တိုၼ်းၶူဝ်းၶွင်သိုဝ်ႉၶိူင်ႈမႆႉၶိူင်ႈမိုဝ်းၵႂႃႇမိူဝ်းၼႃႈ တႃႇ IT တႆး ၵႃႈႁိုဝ်ၵေႃႈဢမ်ႇပဵၼ်သင်။ တွၼ်ႈတႃႇၸုမ်း IT တႆးႁဝ်းၶဝ် ဢိၵ်ႇတင်းၵေႃလိၵ်ႈလၢႆးၾိင်ႈငႄႈတႆး တေဢမ်ႇၵဵပ်းၵႃႈၸႂ်ႉၸၢႆႇသင်။

ပိူဝ်ႈတႃႇၵၢၼ်ယုၵ်ႉမုၼ်း လွင်ႈၵၢၼ် IT တႆးႁဝ်းၼႆလႄႈ ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ လႆႈတင်ႈၸႂ်တင်ႈၶေႃး တုမ်ၶွၼ်ႈႁွၼ်ႈႁႅင်းၽူႈမီးပၢႆးႁူႉလွင်ႈ IT  တႆးမႃးၼႆႉ လႆႈၸတ်းႁဵတ်းပၢင်ဢုပ်ႇၵုမ် (သႅမ်ႊမီႊၼႃႊ) ၽႃသႃ လိၵ်ႈလၢႆး ၵႂၢမ်းလၢတ်ႈ လႄႈၵဵဝ်ႇလွင်ႈ IT ပိူင်လူင်မၼ်းလွင်ႈ Unicode ၾွၼ်ႉတႆး တင်ႈတႄႇဝၼ်းတီႈ 18-19 လိူၼ် ၵျႅၼ်ႊၼိဝ်ႊရီႊ ႁူဝ်ပီ 2014 သေ လိုၼ်းဝၢႆးၼၼ်ႉ 4 လိူၼ်ၵေႃႈ သိုပ်ႇသိုပ်ႇႁဵတ်းပၢင်ဢုပ်ႇၵုမ်ၵၼ်မႃးၵူႈလိူၼ် တေႃႇႁၢၼ်ႉၼႆႉ ပိူဝ်ႈႁႂ်ႈလိၵ်ႈတႆးႁဝ်းပေႃးမီးၸၼ်ႉ မီးလၵ်းၸဵင် ၵၢဝ်ႉယၢင်ႈၶိုတ်းတၼ်းၵၢပ်ႈပၢၼ် IT ၵႂႃႇမိူၼ်ပိူၼ်ႈ ၼႆယဝ်ႉ။