ဝၼ်းတီႈ 19/08/2014 ယၢမ်းဝၢႆးဝၼ်း ဢွၼ်ႇယိင်းဢွၼ်ႇ ႁွမ်သႅင် ၵေႃႉၵိူတ်ႇမႃးမီးတူဝ်ၶိင်း ႁူဝ်ယႂ်ႇ၊ ၶဝ်ႈယူတ်းယႃၽႃႇတတ်း တီႈႁူင်းယႃပႃႇငႄႉ (ၼၶွၼ်းၽိင်း) ဝဵင်းၵဵင်းမႆႇ ယဝ်ႉတူဝ်ႈၵႂႃႇလီငၢမ်း။ မိူဝ်ႈဝႃးၼႆႉ ၶဝ်ႈႁွင်ႈၽႃႇတတ်း တင်ႈတႄႇယၢမ်း ဝၢႆးဝၼ်း 1 မူင်း ဢွၵ်ႇမႃးၶိုၼ်းမွၵ်ႈ 4 မူင်းၶိုင်ႈ- ၼႆယဝ်ႉ။

ႁူဝ်မၼ်းၼၢင်းၵေႃႈ လႆႈဝႃႈသီႇပုၼ်ႈ ဝႅပ်ႈၵႂႃႇၼိုင်ႈပုၼ်ႈ၊ မိူဝ်ႈလဵဝ် တီႈႁူဝ်မၼ်းၼၢင်းၼႆႉ တေႃႇလွတ်ႇဝႆႉသေ ပွႆႇၼမ်ႉယွတ်ႇတူၵ်းဝႆႉ။ မိူဝ်ႈလဵဝ် ၶၵ်ႉတွၼ်ႈၽႃႇတတ်းတႄႉ ၶႅမ်ႉလႅပ်ႈယဝ်ႉတူဝ်ႈၵႂႃႇယဝ်ႉ၊ တိုၵ်ႉယူႇၼႂ်း ၶၵ်ႉတွၼ်ႈ ဢၼ်မေႃယႃၶဝ်တိုၵ်ႉလုမ်းလႃးတူၺ်းလူလွမ်ဝႆႉၼၼ်ႉယူႇ- ပီႈၼွင်ႉတႆး ၵေႃႉလႅၼ်ႈသူႇယဵမ်ႈၸႂ်း ၽွင်းၼွင်ႉဢွၼ်ႇႁွမ်သႅင် တိုၵ်ႉမီးတီႈႁူင်းယႃ ၵေႃႉၼိုင်ႈလၢတ်ႈၼင်ႇၼႆ။

ၼွင်ႉႁွမ်သႅင်ၼႆႉ ယၢမ်းလဵဝ်ဢႃႇယု 2 လိူၼ်ပၢႆ၊ လုၵ်ႉၼႂ်းၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းသေ ႁွတ်ႈမႃးထိုင်မိူင်းထႆး တီႈၵဵင်းမႆႇ။ ၼွင်ႉဢွၼ်ႇၼႆႉ ၵိူတ်ႇတီႈႁူင်းယႃသိုၵ်း ယလၶ ၶူဝ်လမ် (ၶူဝ်ၶမ်း) ၸိုင်ႈတႆးပွတ်းၸၢၼ်း။

ပိူဝ်ႈတႃႇယူတ်းယႃတူဝ် ၼွင်ႉဢွၼ်ႇႁွမ်သႅင်ၼႆႉ ၸုမ်းၾၢႆႇၸွႆႈထႅမ် ၽေးသၽႃႇဝ ၼႂ်းမိူင်းတႆး ဢၼ်ပၵ်းတီႈ ၵဵင်းမႆႇ ႁပ်ႉငိုၼ်းလူႇတၢၼ်းသေ ၸွႆႈထႅမ်ပၼ်။ ၾၢႆႇၼိုင်ႈ ၸုမ်းၵပ်းသၢၼ်လွင်ႈၼၢင်းယိင်းတႆး (SWAN) ၵေႃႈ ၸွႆႈပၼ်လွင်ႈယူႇသဝ်း လွင်ႈငၢႆႈလူမ်။ ၼွၵ်ႈသေၼၼ်ႉ လႆႈႁူႉဝႃႈ ၸုမ်းတူင်ႉၼိုင်ၾၢႆႇၸွႆႈထႅမ်မိူင်းမၢၼ်ႈ (BRC) ၵေႃႈၸွႆႈထႅမ်ဢဵၼ်ႁႅင်းငိုၼ်းတွင်း၊ ပႃးၸဵမ် ပႃႇတီႇၵၢၼ်မိူင်း ၼႂ်းမိူင်းတႆးၸိူဝ်းၼႆႉ။

ၼၢင်းၶွင်ႇ မႄႈၼွင်ႉႁွမ်သႅင် ၵေႃႈလၢတ်ႈဝႃႈ- ပိူဝ်ႈတႃႇလုၵ်ႈဢွၼ်ႇ လႆႈႁွတ်ႈမႃးထိုင်တီႈၵဵင်းမႆႇလႄႈသင်။ ဢၼ်ၸွႆႈထႅမ်ပၼ်ႁဝ်းၶႃႈ၊ ပၼ်ႁႅင်းတူဝ်ႁႅင်းၸႂ် ႁႅင်းငိုၼ်းတွင်း ပိူဝ်ႈတႃႇလႆႈဢွၵ်ႇၶၢဝ်းတၢင်းမႃး ႁွတ်ႈထိုင်ၵဵင်းမႆႇ လႄႈ ၵူႈလွင်ႈလွင်ႈၸိူဝ်းၼႆႉ ယိၼ်းၸူမ်းၶွပ်ႈၸႂ်ယႂ်ႇၼမ်တႄႉတႄႉၶႃႈ- ဝႃႈၼႆ။

ၼၢင်းၵဵင်ၶမ်း ဢၼ်ယူႇတီႈၸုမ်းၼၢင်းယိင်းတႆးသေ ၸွမ်းသူင်ႇပၼ်ၼွင်ႉႁွမ်သႅင် ၶဝ်ႈႁူင်းယႃ လၢတ်ႈဝႃႈ- ၵၢၼ်ဢၼ်သူင်ႇၵူၼ်းမိူင်းတႆး ၶဝ်ႈႁူင်းယႃၼႆႉ ပဵၼ်ပုၼ်ႈၽွၼ်းႁဝ်းၶႃႈယူႇ၊ ၵူၺ်းၵႃႈ လုၵ်ႈဢွၼ်ႇၵေႃႉၼႆႉ လီဢေးလူတႄႉတႄႉ ႁူဝ်ၵေႃႈယႂ်ႇႁႅင်း။ မိူၼ်ၸိူင်ႉၼင်ႇမိူဝ်ႈဝႃး (18/08/2014) ပိူဝ်ႈတႃႇလႆႈႁူပ်ႉမေႃယႃၶဝ်ၼႆႉ လႆႈၶဝ်ႈထႅဝ်သေ ပႂ်ႉတင်းဝၼ်း၊ ႁူဝ်မၼ်းသမ်ႉၼၵ်းလႄႈ လႆႈၸွႆႈၵမ်ဢုမ်ႈ၊ ပေႃးဢမ်ႇၼၼ် မၼ်းတေသၢင်ႈၵၢၼ်ႈၶေႃးမၼ်း။ ထႅင်ႈလွင်ႈၼိုင်ႈ မိူဝ်ႈဢၼ်ၼွင်ႉသႅင်လၢဝ် ဢၼ်လုၵ်ႉတၢင်းမိူင်းတႆးပွတ်းၵၢင် မႃးယႃတူဝ်ၼၼ်ႉတႄႉ ဢိင်ၼိူဝ်မီး SSPP/SSA ပဵၼ်ၸဝ်ႈတႃႇၼလူင်သေ ၾၢႆႇၼိုင်ႈ တၢင်းႁူင်းယႃၵေႃႈ ဢမ်ႇဢဝ်ၵႃႈယူတ်းယႃသေ ႁပ်ႉယူတ်းယႃပဵၼ်ၵူၼ်းၶိုၵ်ႉတွၼ်းလႄႈ လုၵ်ႈဢွၼ်ႇၵေႃႉၼၼ်ႉ ဢမ်ႇလႆႈမႆႈၸႂ်။ ၵူၺ်းၵႃႈ လုၵ်ႈဢွၼ်ႇၵေႃႉၼႆႉ သမ်ႉဢမ်ႇမီးၸဝ်ႈတႃႇၼလူင် ပိူဝ်ႈတႃႇယူတ်းယႃလႄႈ ဢမ်ႇလႆႈယူႇၼႂ်း ႁွင်ႉၶိုၵ်ႉတွၼ်း၊ ၵွပ်ႈၼၼ် ပီႈၼွင်ႉတီႈၸမ်တီႈၵႆ ၶႂ်ႈမႃးဢႅဝ်ႇယဵမ်ႈသူႇၸႂ်းၵေႃႈ ပေႃးဢမ်ႇၸႂ်ႈၶၢဝ်းမၼ်း ဢမ်ႇလႆႈႁူပ်ႉ- ဝႃႈၼႆ။

ႁူဝ်ၼႃႈၾၢႆႇၵဵပ်းငိုၼ်း ၸွႆႈထႅမ်လုၵ်ႈဢွၼ်ႇ ၼၢင်းၶမ်းဢိင်ႇ ၵေႃႈလၢတ်ႈဝႃႈ- ပိူဝ်ႈတႃႇၸွႆႈထႅမ်လုၵ်ႈဢွၼ်ႇၼႆႉ မိူဝ်ႈလဵဝ်ၵေႃႈ တိုၵ်ႉပိုတ်ႇႁပ်ႉငိုၼ်းၵမ်ႉၸွႆႈယူႇ၊ မိူဝ်ႈလဵဝ် (19/08/2014) မီးငိုၼ်းထႆးမွၵ်ႈႁိမ်း 3 မိုၼ်ႇယဝ်ႉ၊ ငိုၼ်းၸိူဝ်းၼႆႉ တေဢဝ်မွပ်ႈပၼ်တီႈမႄႈလုၵ်ႈဢွၼ်ႇ ဢၼ်မႃးမီးတီႈႁူင်းယႃပႃႇငႄႉ၊ သင်ဝႃႈပီႈၼွင်ႉ ႁဝ်းၶဝ်ၶႂ်ႈႁွမ်းတၢၼ်းမႃးၵေႃႈ တိတ်းတေႃႇၵပ်းသိုပ်ႇမႃး ၸွမ်းၼင်ႇမၢႆယေးငိုၼ်း (Bank account) မိူၼ်ၼင်ႇပႃႈတႂ်ႈၼႆႉ။-

Account names: 
Saengmurng Mungon,
Mr. Dachpon Walingta & Mrs. Saengrawee Thiel

Account number: 390 – 4 – 48628 – 3 


Bank: Bangkok Bank


Branch: Pratu Chang Phuek, Chiang Mai

ชื่อบัญชี
 นายแสงเมือง มังกร นายเดโชพล หว่าหลิ่งต๊ะ นางแสงระวี เทียล 

เลขที่บัญชี 390 – 4 – 48628 – 3


ธนาคารกรุงเทพ สาขาช้างเผือก เชียงใหม่