ၸုမ်းဝႃႉၽဝ်ပႅတ်ႈတူႈၵဵမ်ႊသ် ၶိူင်ႈတေႃႇလွင်း တီႈမိူင်းပွၵ်ႉ
ၸုမ်းဝႃႉ (UWSA) ၽဝ်ပႅတ်ႈတူႈၵဵမ်ႊသ် ၶိူင်ႈတေႃႇလွင်း တီႈမိူင်းပွၵ်ႉ
ဢၼ်တီႉၺွပ်းလႆႈပူၼ်ႉမႃး မိူဝ်ႈ 2-3 လိူၼ်၊ တီႈၼႂ်းၼႃႈလိၼ်
တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၵုမ်းၵမ်။ ၵူၺ်းၵႃႈ ဢမ်ႇၽဝ်ပႃးယႃႈ။
ႁၢင်ႈၵႂၼ်းၾႆး ဢၼ်ၽဝ်တူႈၵဵမ်ႊသ် တီႈမိူင်းပွၵ်ႉ |
မိူင်းပွၵ်ႉၼႆႉ ပဵၼ်ငဝ်ႈငုၼ်းတပ်ႉၸုမ်း
468 ပၵ်းသဝ်းၵုမ်းၵမ်ဝႆႉ။ ပေႃးဢဝ်ပိူင်ၽွင်းငမ်းဝႃႉဝႃႈ ပဵၼ်ၸႄႈတွၼ်ႈ။
ပေႃးဢဝ်ၵၢၼ်ၽွင်းငမ်းလူင်ပွင်ၸိုင်ႈမၢၼ်ႈဝႃႈ ပဵၼ်ဢိူင်ႇမိူင်းပွၵ်ႉ
ယူႇပႃႈတႂ်ႈၸႄႈဝဵင်းမိူင်းယၢင်း ၸႄႈတွၼ်ႈၵဵင်းတုင်
ၸိုင်ႈတႆးပွတ်းဢွၵ်ႇၶူင်း။ ဢိင်ၼိူဝ်ၸုမ်းဝႃႉ ၽႅၼ်ၵၢၼ်ၽဵဝ်ႈမူၺ်ႉယႃႈမဝ်းၵမ်
မႃးၶၢဝ်းတၢင်း 2-3 လိူၼ် တင်ႈတႄႇ လိူၼ် မေႊ/ၵျုၼ်ႊ/ ၵျူႊလၢႆႊမႃးသေ
ၽႅၼ်ၵၢၼ်ယဝ်ႉတူဝ်ႈၵႂႃႇ မိူဝ်ႈဝၼ်းတီႈ 30/07/2014 ၼႆႉ။ ၵူၺ်းၵႃႈ ဝၼ်းတီႈ
30/07/2014 ၼႆႉ ၸုမ်းဝႃႉ လႆႈၸတ်းပၢင်ၽဝ်ပႅတ်ႈၶိူင်ႈတေႃႇၶိူင်ႈလွင်း
တူႈၵဵမ်ႊသ် ဢၼ်တီႉၺွပ်းလႆႈမႃး ၼႂ်းၶၢဝ်းတၢင်း လၢႆလိူၼ်ၼၼ်ႉ။
ဢမ်ႇၽဝ်ပႅတ်ႈပႃးယႃႈမဝ်းၵမ်။
ဢၼ်ၸုမ်းဝႃႉၽႅၼ်ၵၢၼ်ၽဵဝ်ႈမူၺ်ႉယႃႈမဝ်းၵမ်သေ
ၵူတ်ႇထတ်းတီႉၺွပ်းမႃးၼၼ်ႉ တီႈမိူင်းပွၵ်ႉၵူၺ်း တီႉလႆႈယႃႈမႃႉ 90,000 မဵတ်ႉ၊
ယႃႈဢႆႊသ် 3 ၵီႊလူဝ်ႊ၊ ၵွင်ႈပွတ်းၵွင်ႈယၢဝ်း 50 လဝ်း၊ ယႃႈလမ် 3 ၸွႆႉ၊
တူႈလဵၼ်ႈၵဵမ်ႊသ် 30 ၶိူင်ႈ။ ဢၼ်ၸတ်းပၢင်ၽဝ်ပွၵ်ႈၵမ်းၼႆႉ ၵမ်ႈၼမ်ထၢင်ႇဝႃႈ
ပဵၼ်ပၢင်ၽဝ်ယႃႈမဝ်းၵမ်ၵူၺ်းၵႃႈဢမ်ႇၸႂ်ႈ၊ ပဵၼ်ပၢင်ၽဝ်ပႅတ်ႈ တူႈၵဵမ်ႊသ်
ဢၼ်မီးမွၵ်ႈ 30 ၶိူင်ႈၼၼ်ႉၵူၺ်း၊ လွင်ႈၼႆႉ
ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းပေႃးၵႂင် ငမ်းငဝ်းၸွမ်း- ၼႆယဝ်ႉ။
ၵဵဝ်ႇၵပ်းလွင်ႈၼႆႉ
ၵူၼ်းၼႂ်းပိုၼ်ႉတီႈမိူင်းပွၵ်ႉ ၵေႃႉၼိုင်ႈလၢတ်ႈဝႃႈ- ၶၢဝ်းတၢင်း 2-3
လိူၼ်မႃးၼႆႉ ၾၢႆႇၸဝ်ႈၼႃႈတီႈဝႃႉ ၽဵဝ်ႈယႃႈမဝ်းၵမ်မႃးႁၢဝ်ႈႁႅင်း၊
ၵူတ်ႇထတ်းၵူႈၸွၵ်ႉၵူႈၸဵင်ႇ၊ ႁူဝ်ဝဵင်းထိုင်ႁၢင်ဝဵင်း
လႆႈႁူႉဝႃႈတီႉၺွပ်းလႆႈယႃႈ တင်းၼမ် တင်းလၢႆ။ ၵူၼ်းဢၼ်တီႉလႆႈၸိူဝ်းၼၼ်ႉၵေႃႈ
ထုၵ်ႇတူတ်ႈ(တၢမ်ႇ)ၶွၵ်ႈ ႁဵတ်းၵၢၼ်ၼၵ်း ၸိူဝ်းၼႆႉ။ ၵူၺ်းၵႃႈ ၵူၼ်းၸိူဝ်း
ၵႃႉယႂ်ႇၶၢႆလူင် ၵႄႇယႃႈလူင်ၶဝ်တႄႉ ဢမ်ႇငိၼ်းဝႃႈတီႉလႆႈၽႂ်၊
တီႉၺွပ်းၵူၼ်းၸိူဝ်းၶၢႆယွႆႈယႅမ်း ႁူဝ်သိပ်း ႁူဝ်ပၢၵ်ႇမဵတ်ႉ မၼ်းၵူၺ်း။
တၢင်ႇတီႈတၢင်ႇဝဵင်းတႄႉ တေၽဝ်ယႃႈယူႇႁိုဝ်ၵေႃႈဢမ်ႇႁူႉ၊ ၵူၺ်းၵႃႈ
ဢၼ်ၽဝ်တီႈမိူင်းပွၵ်ႉၼႆႉတႄႉ ဢမ်ႇပႃး ယႃႈဢၼ်တီႉလႆႈ၊ ဢၼ်ၽဝ်ၼႆႉ
လႆႈႁူႉဝႃႈပဵၼ်တူႈၵဵမ်ႊသ်ၵူၺ်းၵူၺ်း။ မိူဝ်ႈဝၼ်းသၢၼ်ၶတ်းယႃႈမဝ်းၵမ်လုမ်ႈၾႃႉ
ဝၼ်းတီႈ 26/06/2014 ၼၼ်ႉၵေႃႈဢမ်ႇၽဝ်ၼင်ႇၵဝ်ႇ- ဝႃႈၼႆ။
ၵူၼ်းၼႂ်းပိုၼ်ႉတီႈထႅင်ႈၵေႃႉၼိုင်ႈ
ၵေႃႈလၢတ်ႈဝႃႈ- ၼႂ်းၼႃႈလိၼ်ဝႃႉၵုမ်းၵမ် တီႈဢၼ်ႁဝ်းၶႃႈယူႇသဝ်းၼႆႉ
ပဵၼ်ပိုၼ်ႉတီႈ မူတ်းၸၢင်ႇ/ႁၢမ်းႁႅၵ်းယႃႈၾိၼ်ႇ ဝႃႈၼႆသေတႃႉၵေႃႈ
ယႃႈမဝ်းၵမ်ယင်းတိုၵ်ႉလိူင်ႇၼမ်ယူႇ၊ ဢၼ်လုၵ်ႉတၢင်ႇတီႈသီႇလႅၼ်
ၶဝ်ႈမႃးၵေႃႈၼမ်၊ ၵူၼ်းဢၼ်ႁဵတ်းယႃႈမဝ်းၵမ်ၵေႃႈ တေၸၢင်ႈမီးတင်းၼမ်၊
မိူၼ်ပဵၼ်ၵၢတ်ႇလူင် ဢၼ်သိုဝ်ႉၶၢႆယႃႈမဝ်းၵမ် ၵၼ်ယဝ်ႉ- ဝႃႈၼႆ။
ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ UWSA
ဢူးဢွင်ႇမျိၼ်ႉ လၢတ်ႈဝႃႈ- ၼႂ်းၼႃႈလိၼ်ဝႃႉၵုမ်းၵမ်ၼႆႉ လွင်ႈဢၼ်ၽုၵ်ႇယႃႈ
ႁဵတ်း ယႃႈၸိူဝ်းၼႆႉ ဢမ်ႇမီးယဝ်ႉ၊ မီးဢၼ်လုၵ်ႉတၢင်းၼွၵ်ႈၶဝ်ႈမႃးၵူၺ်း။
ဢၼ်မီးယႃႈယူႇၸိူဝ်းၼႆႉ ပဵၼ်ၵူၼ်းတၢင်းၼွၵ်ႈ တင်း ၵူၼ်းတၢင်းၼႂ်း
ၵွင်ႉၵၼ်သေႁဵတ်းၵူၺ်း။ ၵဵဝ်ႇၵပ်းလွင်ႈၽဵဝ်ႈယႃႈမဝ်းၵမ်ၼႆႉ
ႁဝ်းၶႃႈသႂ်ႇၸႂ်သႂ်ႇၶေႃးသေ ႁဵတ်းတႄႉတႄႉ၊
ပိူဝ်ႈတႃႇၸုမ်းဝႃႉတေလႆႈငိုၼ်းၵွင်ၵၢင်ၼၼ်ႉၵေႃႈ ႁဵတ်းၵၢၼ်ၽုၵ်ႇမၢၵ်ႇဝၢၵ်ႈ
ၶဝ်ႈၼမ်ႉတၢင်းၵိၼ်၊ ယၢင်တင် (Rubber) ၸိူဝ်းၼႆႉသေ တႅၼ်းတၢင်ယႃႈၾိၼ်ႇမႃး-
ဝႃႈၼႆ။
Tags: General, News