သိုၵ်းမၢၼ်ႈၶလယ 248 ဢၼ်ႁၢင်ႈႁႅၼ်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ၼႂ်းဢိူင်ႇႁႃႈဝၢၼ်ႈ ၸႄႈဝဵင်းၵေးသီး တင်ႈတႄႇဝၼ်းတီႈ 20/07/2014 ၊ ဝႅတ်ႉလွမ်ႉသိုၵ်းတႆး SSPP/SSA ဝႆႉသေ ၵမ်းၵမ်းၶိုၼ်ႈလေႃႇ တိုၵ်း တီႈတပ်ႉပၢင်သဝ်းသိုၵ်းတႆး ၵွင်းၸဝ်ႈမိူင်းၼၼ်ႉ ထိုင်မႃးဝၼ်းတီႈ 21 မိူဝ်ႈဝႃးၼႆႉ ထုၵ်ႇသိုၵ်းတႆးလိုပ်ႈတိုၵ်း၊ ထႅမ်ႁႅင်းသိုၵ်းလေႃႇၶိုၼ်းတၢင်းလင်၊ မိူဝ်ႈဝႃးယၢမ်းဝၢႆးဝၼ်း ႁဵတ်းႁႂ်ႈသိုၵ်းမၢၼ်ႈၸုမ်းၼႆႉ လႆႈထွၼ်ဢွၵ်ႇၵႂႃႇတၢင်း ဝၢၼ်ႈပၢင်ႇၸေႈ၊ သဵင်ၵွင်ႈၵေႃႈယဵၼ်ၵႂႃႇမိူဝ်ႈဝႃး။

ၵဵဝ်ႇၵပ်းလွင်ႈၼႆႉ ၽူႈၵွၼ်းသိုၵ်း ဢၼ်ယူႇၼႃႈသိုၵ်းၸဝ်ႈၼိုင်ႈလၢတ်ႈဝႃႈ- မိူဝ်ႈၼႆႉတႄႉ ဢမ်ႇမီးသဵင်ႈၵွင်ႈတႅၵ်ႇ။ သိုၵ်းမၢၼ်ႈၼႆႉ ၵွပ်ႈသင်လႄႈ ၶဝ်မႃးတိုၵ်းႁဝ်းၵေႃႈဢမ်ႇႁူႉ၊ ၶၢဝ်းၼႆႉ ၵွပ်ႈပဵၼ်ၶၢဝ်းႁိုဝ်ႉ ၶၢဝ်းၾူၼ်လႄႈ ႁဵတ်းႁႂ်ႈ ၵူၼ်းဝၢၼ်ႈၵူၼ်းမိူင်းတုၵ်ႉယၢၵ်ႈၶၢၼ်ၸႂ်။ ၾၢႆႇၼိုင်ႈၵေႃႈ သိုၵ်းမၢၼ်ႈၸိူဝ်းၼႆႉ ၶဝ်ဢမ်ႇလႅၼ်ႇပိုၼ်ႉတီႈ။ ၶဝ်ပဵၼ် သိုၵ်းဢၼ်ပၵ်းၼႂ်းမိူင်းတႆး ဝႃႈၼႆသေတႃႉၵေႃႈ ပဵၼ်ၸိူဝ်းဢၼ်လုၵ်ႉတၢင်းတႂ်ႈမႃး။ ၾၢႆႇႁဝ်းၶႃႈတႄႉ ဢမ်ႇပဵၼ်သင်၊ ဢၼ်တိူဝ်ႉဝၢတ်ႇဢိတ်းဢွတ်းတႄႉမီးယူႇ၊ ၾၢႆႇမၢၼ်ႈတႄႉ လႅပ်ႈတၢႆၼမ်ဝႆႉ။ မိူဝ်ႈၼႆႉတႄႉ ႁဝ်းၶႃႈလူင်းပိုၼ်ႉတီႈသေ ၵူတ်ႇထတ်းတူၺ်းယူႇ- ဝႃႈၼႆ။

ဢိင်ၼိူဝ်သိုၵ်းမၢၼ်ႈ ထွၼ်ဢွၵ်ႇၵႂႃႇၼႂ်းဢိူင်ႇႁႃႈဝၢၼ်ႈ ပၢင်တိုၵ်းယဝ်ႉၵႂႃႇသေ ၵူၼ်းဝၢၼ်ႈၵမ်ႈၽွင်ႈၵေႃႈ ႁူမ်ၸူမ်းသေ ၶိုၼ်းပွၵ်ႈမိူဝ်းႁိူၼ်း၊ ၵူၺ်းၵႃႈ ၵမ်ႈၽွင်ႈတႄႉပႆႇဝၢင်းၸႂ်၊ ဢမ်ႇႁူႉဝႃႈသိုၵ်းမၢၼ်ႈ တေမႃးၶိုၼ်းမိူဝ်ႈလႂ်လႄႈ တိုၵ်ႉမူၵ်း ယူႇၼႂ်းထိူၼ်ႇၸိူဝ်းၼႆႉၵေႃႈမီး၊ ႁဝ်းၶႃႈတိုၵ်ႉလူင်းပိုၼ်ႉတီႈသေ ႁူၺ်းသူၼ်းၶဝ်ယူႇ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းၸမ်ၸႂ်သိုၵ်းမၢၼ်ႈ တီႈၵေးသီးၵေႃႉၼိုင်ႈလၢတ်ႈဝႃႈ- တီႈၵေးသီးၼႆႉ ငိၼ်းၶၢဝ်ႇဝႃႈ သိုၵ်းမၢၼ်ႈ ၶဝ်ႁၢင်ႈႁႅင်းသိုၵ်း ပိူဝ်ႈတႃႇၵႂႃႇလေႃႇတိုၵ်းသိုၵ်းတႆးထႅင်ႈ၊ ပေႃးထွမ်ႇၶဝ်လၢတ်ႈတႄႉဝႃႈ ၶဝ်ၵေႃႈဢမ်ႇလိူဝ်လႆႈ ၸၼ်ႉပႃႈ ၼိူဝ်၊ ပေႃးၵႂႃႇတိုၵ်းသိုၵ်းတႆးၼႆ ၶႃၶဝ်ၼႆႉ မိူၼ်ၼင်ႇယဵပ်ႇပႃႇႁဵဝ်ႈဝႆႉ ၶွၼ်ၼိုင်ႈယဝ်ႉ၊ တေတၢႆႁိုဝ်တေလိပ်းႁိုဝ်ဢမ်ႇႁူႉ၊ ၵူၺ်းၵႃႈ ၶေႃႈၸီႉသင်ႇတၢင်းၼိူဝ်ၼႆႉ ပေႃးဝႃႈတိုၵ်းလႆႈတပ်ႉသိုၵ်းတႆး တီႈႁိမ်းႁႃႈဝၢၼ်ႈၼႆၸိုင် တေၵုမ်းလႆႈပႃး တႃႈၽႃသွင်ႇ ၵဵင်းလိူၼ် ၸိူဝ်းၼႆႉ။ ၵဵဝ်ႇၵပ်းလွင်ႈၽႅၼ်ၵၢၼ်သိုၵ်းသေ တႃႇတေၵႂႃႇတိုၵ်းတပ်ႉသိုၵ်းတႆးထႅင်ႈၼၼ်ႉ လႆႈငိၼ်းဝႃႈ သိုၵ်းမၢၼ်ႈ ႁၢင်ႈႁႅၼ်း ပႃးတပ်ႉၶွမ်ႊမၢၼ်ႊတူဝ်ႊၸွႆႈထႅမ် - ဝႃႈၼႆ။

တႃႈၽႃသွင်ႇၼႆႉ မီးၸဵင်ႇႁွင်ႇဝၼ်းဢွၵ်ႇၵေးသီး ယၢၼ်မွၵ်ႈ 15 လၵ်း၊ သိုၵ်းမၢၼ်ႈၸႂ်ႉသိုၵ်းတႆး SSPP/SSA  ထွၼ် ဢွၵ်ႇ၊ သိုၵ်းတႆးဢမ်ႇယွမ်းထွၼ်လႄႈ သိုၵ်းမၢၼ်ႈႁၢင်ႈႁႅၼ်းသိုၵ်းမႃးလေႃႇတိုၵ်းၽွင်းႁၢင်လိူၼ်ၵျုၼ်ႊ (2014)ၼႆႉ။

ၾၢႆႇၼိုင်ႈၵေႃႈ ပူၼ်ႉမႃးမိူဝ်ႈဝၼ်းတီႈ 08/072014 တူဝ်တႅၼ်းတပ်ႉသိုၵ်းၸိုင်ႈတႆး (SSPP/SSA) ၵႂႃႇႁွတ်ႈၽႅဝ် ၼေႇပျီႇတေႃႇ သေ ႁူပ်ႉထူပ်းဢူးဢွင်ႇမိၼ်း ဢူးတဵင်းၸေႃႇ၊ ၾၢႆႇမၢၼ်ႈတုၵ်းယွၼ်း  ႁႂ်ႈတပ်ႉသိုၵ်းၸိုင်ႈတႆး (SSPP/SSA) ငိူင်ႉထွၼ်ဢွၵ်ႇပၼ်တီႈ တႃႈၽႃသွင်ႇၼင်ႇၵဝ်ႇ။