သိုၵ်းမၢၼ်ႈတိုၵ်းဢဝ်တပ်ႉတႆး မွပ်ႈပၼ်သိုၵ်းဝႃႉ
သိုၵ်းမၢၼ်ႈတိုၵ်းယိုဝ်းႁုပ်ႈဢဝ်တပ်ႉပၢင်သဝ်း သိုၵ်းတႆး
ဢၼ်မီးၼႂ်းၸႄႈဝဵင်းမိူင်းတူၼ် 2 တပ်ႉ၊ ၽွင်းႁၢင်လိူၼ် မၢတ်ႉၶျ် ပူၼ်ႉမႃးသေ
မွပ်ႈပၼ်သိုၵ်းဝႃႉ၊ သၢင်ႈပၼ်ႁႃၼႂ်းၵႄႈတႆးတင်းဝႃႉ။
တပ်ႉသိုၵ်းၸိုင်ႈတႆး (RCSS/SSA) |
တပ်ႉဢၼ်သိုၵ်းမၢၼ်ႈဢဝ်မွပ်ႈပၼ်သိုၵ်းဝႃႉၼႆႉ
ပဵၼ်တပ်ႉလွႆလဵၵ်းၸီး တင်းလွႆပၢၼ်းတုင်း ဢၼ်ယူႇၼႂ်း ၸႄႈဝဵင်း မိူင်းတူၼ်၊
ၸိုင်ႈတႆးပွတ်းဢွၵ်ႇၶူင်း။ တပ်ႉသိုၵ်းတႆးသွင်တပ်ႉၼႆႉ
သိုၵ်းမၢၼ်ႈမႃးတိုၵ်းဢဝ်ၽွင်းႁၢင်လိူၼ်မၢတ်ႉၶျ် (2014)-
ၽူႈယႂ်ႇၵူၼ်းလူင်ၼႂ်း RCSS/SSA ၸဝ်ႈၼိုင်ႈလၢတ်ႈ။
ဢၼ်သိုၵ်းမၢၼ်ႈဢဝ်လွႆလဵၵ်းၸီး
တင်းလွႆပၢၼ်းတုင်း မွပ်ႈပၼ်သိုၵ်းဝႃႉၼႆႉ ပဵၼ်မႃးဝၢႆးသေ ၶွင်ႇသီႇဢဝ်ၶိုၼ်း
ၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) တင်း
တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ပဵၼ်ပၼ်ႁႃၵၼ်
ၼႂ်းၸိုင်ႈတႆးပွတ်းၸၢၼ်း ၸႄႈဝဵင်းမိူင်းပၼ်ႇ။
ၵဵဝ်ႇၵပ်းလွင်ႈၼႆႉ ၽူႈယႂ်ႇၵူၼ်းလူင်ၼႂ်း
RCSS/SSA ယင်းလၢတ်ႈဝႃႈ- သိုၵ်းမၢၼ်ႈၼႆႉ ယွမ်းတၢႆသေမႃး တိုၵ်းဢဝ် တပ်ႉႁဝ်း၊
ၵူၺ်းၵႃႈ သမ်ႉဢဝ်ၵႂႃႇမွပ်ႈပၼ်တီႈသိုၵ်းဝႃႉ။ လွင်ႈၼႆႉ မၼ်းၼႄၾၢင်ႁၢင်ႈဝႃႈ
တဵၵ်းတႆးသေယွင်ႈဝႃႉ။ မိူၼ်ၼင်ႇ ပၼ်ပႃႇမိတ်ႉၸုမ်းသိုၵ်းဝႃႉ
ႁႂ်ႈမႃးၶုတ်းၶမ်း/ၶိုင်ၶမ်း တႅပ်းမႆႉတႅပ်းတွၵ်ႇ ၼႂ်းၼႃႈလိၼ် RCSS/SSA
ၵုမ်းၵမ် ၼႂ်းၸႄႈဝဵင်းမိူင်းပၼ်ႇၸိူဝ်းၼႆႉ
ပဵၼ်လူင်ပွင်ၸိုင်ႈမၢၼ်ႈ/သိုၵ်းမၢၼ်ႈ ၶႂ်ႈသၢင်ႈလိူင်ႈႁဵတ်းႁႂ်ႈဝႃႉတင်းတႆး
ပဵၼ်ပၼ်ႁႃ ၵၼ်- ဝႃႈၼႆ။
ၵဵဝ်ႇၵပ်းလွင်ႈၼႆႉ
ၽူႈယႂ်ႇၵူၼ်းလူင်ၼႂ်းပိုၼ်ႉတီႈ
ဢၼ်မိုတ်ႈၵိုဝ်းၸမ်ၸႂ်ၽူႈၵွၼ်းသိုၵ်းတင်းသွင်ၸုမ်း/ ဝႃႉတင်းတႆး လၢတ်ႈဝႃႈ-
ၽူႈၼမ်းဝႃႉပဝ်းယဵဝ်ႇၶျႅင် တႄႉဢမ်ႇၶႂ်ႈႁႂ်ႈတႆးတင်းဝႃႉပဵၼ်ပၼ်ႁႃၵၼ်၊
ပေႃးႁူႉဝႃႈမီးပၼ်ႁႃမိူဝ်ႈလႂ်ၵေႃႈ ၶတ်းၸႂ်ၵႄႈလိတ်ႈဝႆးဝႆးၵမ်းလဵဝ်။ ၵူၺ်းၵႃႈ
ၽူႈမီးဢမ်းၼၢၸ်ႈ(ဢႃႇၼႃႇ)ၼိူဝ်ဝႃႉပွတ်းၸၢၼ်း မိူၼ်ၼင်ႇဝိူၺ်ႉသႅဝ်ႇၵင်း ၼႆႉ
မၼ်းသမ်ႉဢမ်ႇထုၵ်ႇၸႂ်ၼိူဝ်တႆး။ ၵွပ်ႈၼၼ် လွင်ႈဢၼ်မၼ်းဢမ်ႇမႅၼ်ႈတႆးၼၼ်ႉ
မၢၼ်ႈၵေႃႈဝၵ်ႉဢဝ် တိုဝ်ႉတၢင်းၼႆႉသေ တႄႇသၢင်ႈလိူင်ႈၼႂ်းၵႄႈမၼ်းမႃး - ဝႃႈၼႆ။
လွင်ႈပၼ်ႁႃဢၼ်ၵိူတ်ႇပဵၼ်ၼႂ်းၸႄႈဝဵင်းမိူင်းပၼ်ႇၼၼ်ႉ
ၾၢႆႇသိုၵ်းဝႃႉတင်း သိုၵ်းတႆး (RCSS/SSA) ၵႄႈလိတ်ႈ ပၼ်ႁႃၵၼ်ယဝ်ႉ
ပူၼ်ႉမႃးမိူဝ်ႈဝၼ်းတီႈ 09/04/2014 ဝႃႈၼႆသေတႃႉ
ယင်းတိုၵ်ႉမီးလွင်ႈၶဵင်ႈၶႅင်ၵၼ်ယူႇ။ ၵွပ်ႈဝႃႈသိုၵ်းဝႃႉထွၼ်ဢွၵ်ႇပၼ်ၼႆၵေႃႈ
ဢမ်ႇထွၼ်ဢွၵ်ႇတင်းမူတ်း၊ တီႈဢၼ်ထွၼ်ဢွၵ်ႇပၼ်ၵေႃႈ သမ်ႉၵၢင်မၢၵ်ႇဝႆႉ
ၸိူဝ်းၼႆႉ ႁဵတ်းႁႂ်ႈၾၢႆႇသိုၵ်းတႆး (RCSS/SSA) ဢၼ်ၵႂႃႇပုတ်ႈပၵ်းၼၼ်ႉ
တိူဝ်ႉဝၢတ်ႇၸဵပ်းၽွင်ႈ။ ၵဵဝ်ႇၵပ်းလွင်ႈ တိူဝ်ႉဝၢတ်ႇၸဵပ်း/လုသုမ်းၼၼ်ႉ
ၸုမ်းၶၢဝ်ႇၽူႈတွႆႇႁွၵ်ႈပႆႇယိုၼ်ယၼ်လႆႈ။
Tags: News, War