ပပ်ႉတင်ႈၸိုဝ်ႈတႆး ပိူဝ်ႈတႃႇၵူၼ်းၶိူဝ်းတႆး မီးၸိုဝ်ႈလီၸိုဝ်ႈၶႅမ်ႉ၊ မီးမင်းၵလ (မင်ႇၵလႃႇ) တႃႇတူဝ်ၵဝ်ႇလႄႈ လုၵ်ႈလၢင်း ဢိတ်ႇဢွၵ်ႇပိုၼ်ၽႄႈ၊ မီးၸိုဝ်ႈတႆး ႁႂ်ႈလိူၵ်ႈတင်ႈၸိုဝ်ႈႁဵင် ၸိုဝ်ႈပၢႆ။

ဢိင်ၼိူဝ်ၵူၼ်းမိူင်းၸိုင်ႈတႆး ဢၼ်ပဵၼ်ၵူၼ်းၶိူဝ်းတႆး ၸွမ်းဝၢၼ်ႈၼွၵ်ႈၼႃးပၢင်ႇၵမ်ႈၼမ်ၸိူဝ်းၼႆႉ ယင်းတိုၵ်ႉၸႂ်ႉၸိုဝ်ႈ ဢၼ်တင်ႈငၢႆႈ၊ ၸပ်းငၢႆႈ၊ ဢမ်ႇပေႃးမီးၵႂၢမ်းမၢႆတီႈပွင်ႇသေ ၶမ်းၸၢမ်ႇႁိူင်း (ၶူးမိူင်းလီ) ၶတ်းၸႂ်ၶိုင်ပွင်ဢိတ်ႇဢွၵ်ႇ ပိုၼ်ၽႄႈပပ်ႉတင်ႈၸိုဝ်ႈတႆး၊ ပိူဝ်ႈတႃႇၵူၼ်းၶိူဝ်းတႆး လႆႈလိူၵ်ႈတင်ႈၸိုဝ်ႈလီ ၸိုဝ်ႈၶႅမ်ႉ၊ မီး မင်းၵလ(မင်ႇၵလႃႇ)  ႁႂ်ႈတူဝ်ၵဝ်ႇလႄႈ လုၵ်ႈလၢင်း။ ၼႂ်းပပ်ႉၼႆႉ တင်းမူတ်းမီးႁဵင်ၸိုဝ်ႈပၢႆ၊ ၵႃႈၶၼ်တမ်း ဝၢင်းဝႆႉတီႈ 60 ဝၢတ်ႇ (ငိုၼ်းထႆး)။ ယၢမ်းလဵဝ် မီးၶၢႆတီႈႁၢၼ်ႉ ၶမ်းၸၢမ်ႇႁိူင်း တၢင်းလင် ဝတ်ႉပႃႇပဝ်ႈ ၵဵင်းမႆႇ၊ ဢိၵ်ႇႁၢၼ်ႉၶၢႆပပ်ႉလိၵ်ႈတႆးလၢႆလၢႆတီႈ၊  ၸဵမ်ၼႂ်းၵဵင်းမႆႇ၊ မိူင်းၵွၵ်ႇ (ၵုင်းထဵပ်ႈ)၊ ပဵင်းလူင်၊ သဵင်ၵွင်တႆး တႃႈၶီႈလဵၵ်း၊ ၸဵမ်ၼႂ်းမိူင်း ဝဵင်းပၢင်လူင် ၸိူဝ်းၼႆႉ။

ၼႂ်းပပ်ႉၼႆႉ တူဝ်ယၢင်ႇမၼ်း ၸိုဝ်ႈၼၢင်းယိင်း ၸဵတ်ႈလုၵ်ႈဝၼ်း၊ ၼၢင်းငိုၼ်းဢူ ဝၼ်းဢႃးတိတ်ႉ၊ ၼၢင်းသႅင်ၶမ်း ဝၼ်းၸၼ်။ ၼၢင်းသႅင်ၸိင်ႇ ဝၼ်းဢင်းၵၢၼ်း၊ ၼၢင်းၶမ်းလၢဝ် ဝၼ်ႉပုတ်ႉ၊ ၼၢင်းၶမ်းမူဝ် ဝၼ်းၽတ်း၊ ၼၢင်းပဝ်းႁွမ် ဝၼ်းသုၵ်း လႄႈ ၼၢင်းၶမ်းၼူၼ်း ဝၼ်းသဝ် ၸိူဝ်းၼႆႉ။

ၶူးမိူင်းလီ ၼႄႉၼမ်းဝႃႈ ၵၢၼ်တင်ႈၸိုဝ်ႈၵူၼ်းၼိုင်ႈၵေႃႉၼၼ်ႉ ႁႂ်ႈယိပ်းတိုဝ်းထိုဝ်ဢဝ်မႁႃႇပုၵ်ႈတႅင်ႇ ပဵၼ်လၵ်း။ ၸိုဝ်ႈလီ တႃႇၵူၼ်းၼိုင်ႈၵေႃႉၼၼ်ႉ ၼႂ်းၸိုဝ်ႈႁဝ်းႁႂ်ႈမီး ဢထိပတိ၊ ဢထုၼ်း၊ ရႃႇၸ၊ ဢသိူၵ်ႈ (ၸႂ်) ၸိူဝ်းၼႆႉ။ ဢထိပတိၼၼ်ႉ ႁဵတ်းႁႂ်ႈႁဝ်းမီးဢူမုၼ်ယႂ်ႇ၊ ၽူႈၵူၼ်းယုမ်ႇယမ်ၼပ်ႉထိုဝ်။ ဢထုၼ်း လီၵူႈပိူင်ပိူင်၊ လီၵူႈလၢႆးလၢႆး။ ဢသိူၵ်ႈ ၾၢႆႇပၢႆးမၢၵ်ႈမီးလီ၊ မီးၸႂ်ယဵၼ်ၸႂ်ယၢဝ်း၊ တူဝ်ၸႂ်သိူဝ်းမူၼ်ႈလီ။ ရႃႇၸၼၼ်ႉ ပေႃးႁၢပ်ႉၵိုတ်ႉၵၢၼ်ၶုၼ် ၵၢၼ်သိုၵ်းၵေႃႈ ၸၢင်ႈမီးၸၼ်ႉ၊ ၸၢင်ႈပဵၼ်ၸဝ်ႈပဵၼ်ၶုၼ်၊ ၼႃႈၵၢၼ်ၶိုၵ်ႉတွၼ်း။ ႁႂ်ႈငိူင်ႉဝႄႈ ပႅင်ႇၵ၊ ပုတိ၊ မရၼ- ဝႃႈၼႆ။

ၶမ်းၸၢမ်ႇႁိူင်း ယင်းလၢတ်ႈၼႄဝႃႈ- မိူဝ်ႈပွၵ်ႈမိူဝ်းဢႅဝ်ႇတီႈမိူင်းတႆးပွၵ်ႈၼိုင်ႈ လႆႈမိူဝ်းငိၼ်းၸိုဝ်ႈသဵင် ဢွၼ်ႇယိင်းဢွၼ်ႇၸၢႆးၼႂ်း ဝၢၼ်ႈၼႂ်းသူၼ် တင်ႈၸိုဝ်ႈၵၼ်ဝႃႈ ဢၢႆႈၼု၊ ဢၢႆႈသူၺ်ႇ၊ ဢၢႆႈပၢၼ်း၊ ဢၢႆႈလိင်ႇ၊ ဢၢႆႈမွင်ႇ၊ ဢီႇၺုၼ်ႉ၊ ဢီႇၵျႃႇ၊ ဢေးပု ၸိူဝ်းၼႆႉၵႂၢမ်းတႆး ဢမ်ႇမီးတီႈပွင်ႇသင်။ ထၢမ်တီႈပေႃႈမႄႈၶဝ်ဝႃႈ ၵွပ်ႈသင်လႆႈတင်ႈၸိုဝ်ႈပၼ် လုၵ်ႈလၢင်းဝႃႈၸိူင်ႉၼႆ၊ ပေႃႈမႄႈၶိုၼ်းတွပ်ႇဝႃႈ ဢမ်ႇႁူႉတေတင်ႈၸိုဝ်ႈပၼ်ဝႃႈ ႁိုဝ်။ ၵွပ်ႈၼၼ် ၸင်ႇလႆႈၶတ်းၸႂ်ဝူၼ်ႉ သၢင်ႈၶိုင်ပွင် ဢွၵ်ႇမႃးပဵၼ်ပပ်ႉလိၵ်ႈ တင်ႈၸိုဝ်ႈဢၼ်ၼႆႉ- ဝႃႈၼႆ။