ၸဝ်ႈယွတ်ႈသိုၵ်းဢွၼ်ႁူဝ် ႁူပ်ႉထူပ်းဢုပ်ႇဢူဝ်း ဢူးဢွင်ႇမိၼ်း ၼႂ်းၵဵင်းမႆႇ ၼႂ်းတိုဝ်ႉတၢင်းႁွတ်ႈ မိူင်းထႆး ပိူဝ်ႈတႃႇႁူပ်ႉထူပ်းဢုပ်ႇဢူဝ်းၵၼ်တင်း ၸုမ်းၸၢဝ်းၶိူဝ်း UNFC ၼႂ်းမိူင်းထႆး။ သွင်ၾၢႆႇလႆႈၸႂ် ၵၼ်လၢႆၶေႃႈ။

ဝၼ်းထိ 19/02/13 (မိူဝ်ႈဝႃး) တင်ႈတႄႇၶၢဝ်းယၢမ်း 13:00- 14:00 မူင်းပၢႆ၊ ၶွင်ႊသီႊဢဝ်ၶိုၼ်းၸိုင်ႈ တႆး/တပ်ႉသိုၵ်း ၸိုင်ႈတႆး (RCSS/SSA) ဢၼ်ၸဝ်ႈယွတ်ႈသိုၵ်းဢွၼ်ႁူဝ်ၸုမ်းၸိူဝ်း ႁူပ်ႉထူပ်းဢုပ်ႇ ဢူဝ်းၵၼ်တင်း ၸုမ်းၸိူဝ်းဢူးဢွင်ႇ မိၼ်း [ၵႅမ်ႁူဝ်ပဝ်ႈ (မၢႆ 2) ၶွမ်ႊမတီႊၶိုင်ပွင်လွင်ႈငမ်းယဵၼ် ၸိုင်ႈမိူင်းႁူမ်ႈတုမ် (UPWC)] တီႈႁူင်းႁႅမ်းသျဵၵ်ႊ ဢိသ်ႊတႃႊၼႃႊ (Sheik Istana) ၼႂ်းၵဵင်းမႆႇ။ သွင်ၾၢႆႇဢုပ်ႇဢူဝ်းလႆႈၸႂ်ၵၼ် ၵဵဝ်ႇၵပ်း 1.လွင်ႈဢုပ်ႇဢူဝ်းၵၼ်တၢင်း ၵၢၼ်မိူင်း၊ 2.လွင်ႈပႂ်ႉတူၺ်း ၵၢၼ်ၵိုတ်းယိုဝ်း၊ 3.လွင်ႈယႃႈမဝ်းၵမ်၊ 4.လွင်ႈတၢင်း တိုၵ်ႉမီးၵၢၼ်တိုၵ်းယိုဝ်းၵၼ်ယူႇ တေႃႇထိုင် မိူဝ်ႈလဵဝ်- ၸိူဝ်းၼႆႉ။

ၵဵဝ်ႇၵပ်းလွင်ႈဢုပ်ႇဢူဝ်းၵၼ်တၢင်းၵၢၼ်မိူင်းၼၼ်ႉ ၸဝ်ႈယွတ်ႈသိုၵ်း တၢင်ႇလၢတ်ႈဝႃႈ ပိူဝ်ႈတႃႇႁႂ်ႈ လွင်ႈငမ်းယဵၼ်မၼ်ႈၵိုမ်း ၶၢဝ်းယၢမ်းၼၼ်ႉ ၵူၼ်းမိူင်းထုၵ်ႇလႆႈၶဝ်ႈပႃး မီးလွၵ်းတွၼ်ႈၼႂ်းၶၵ်ႉၵၢၼ် ငမ်းယဵၼ်။ လွင်ႈၼႆႉ ဢူးဢွင်ႇမိၼ်းၵေႃႈႁၼ်လီ လႄႈ တင်းသွင်ၾၢႆႇလႆႈၸႂ်ၵၼ်ၵႂႃႇ- ၼႆယဝ်ႉ။

ၸဝ်ႈယွတ်ႈသိုၵ်း ယင်းလၢတ်ႈဝႃႈ- ၶေႃႈတူၵ်းလူင်းဝူင်ႈၵၢင်သွင်ၾၢႆႇ မိူၼ်ၼင်ႇၵၢၼ်ပၵ်းတႃပႂ်ႉတူၺ်း ၸွမ်းလွင်ႈငမ်းယဵၼ်/ လွင်ႈၵိုတ်းယိုဝ်း ဢၼ်တူၵ်းလူင်းၵၼ်ဝႆႉမိူဝ်ႈဝၼ်းထိ 19/05/12 လႄႈသင်၊ ၵဵဝ်ႇၵပ်းလွင်ႈ ႁူမ်ႈမိုဝ်းၽဵဝ်ႈမူၺ်ႉယႃႈမဝ်းၵမ် ဢၼ်လႆႈလူင်းလၢႆးမိုဝ်းၵၼ်မႃး မိူဝ်ႈဝၼ်းထိ 19/05/12 ၊ သမ်ႉလႆႈတူၵ်းလူင်း ၵၼ်ထႅင်ႈ ပူၼ်ႉမႃးမိူဝ်ႈဝၼ်းထိ 28/10/12 (တီႈတႃႈၶီႈလဵၵ်း) ၸိူဝ်းၼႆႉ ယင်းပႆႇလႆႈႁဵတ်းဢွၵ်ႇၼမ်ႉဢွၵ်ႇတူဝ်။ ဢူးဢွင်ႇမိၼ်း တွပ်ႇလၢတ်ႈဝႃႈ- ၵဵဝ်ႇၵပ်းလွင်ႈ ၸိူဝ်းၼႆႉ မီးတၢင်းယၢပ်ႇၽိုတ်ႇ ၶတ်းၶွင်ႈၼမ်သေ ဢမ်ႇလႆႈ ႁဵတ်းမႃး။ ၵူၺ်းၵႃႈ မိူဝ်ႈလဵဝ်ၵႄႈလိတ်ႈ လႆႈယဝ်ႉတင်းၼမ်၊ ဢမ်ႇႁိုင်ဢမ်ႇ ၼၢၼ်းၼႆႉ ႁဝ်းတေၸၢင်ႈႁဵတ်းဢွၵ်ႇ ၼမ်ႉ ဢွၵ်ႇတူဝ်လႆႈယဝ်ႉ- ဝႃႈၼႆ။

ၵဵဝ်ႇၵပ်းလွင်ႈတိုၵ်ႉမီးၵၢၼ်တိုၵ်းယိုဝ်းၵၼ်ယူႇတေႃႇထိုင်မိူဝ်ႈလဵဝ်ၼႆႉၵေႃႈၸဝ်ႈယွတ်ႈသိုၵ်းလတ်ႈဝႃႈ - ဢွၼ်တၢင်းၼႆႉ ႁဝ်းထၢင်ႇဝႃႈ ၽူႈၵွၼ်းသိုၵ်းၾၢႆႇတႂ်ႈၶဝ်ဢမ်ႇၶဝ်ႈၸႂ်သေႁဵတ်းပဵၼ်၊ ၵူၺ်းၵႃႈ ဝၢႆးၼႆႉထတ်းသၢင်ႁၼ်ဝႃႈ ၵူၼ်းၾၢႆႇတႂ်ႈဢမ်ႇ ၶႂ်ႈတိုၵ်းယိုဝ်း၊ ၵူၼ်းလူင်ၾၢႆႇၼိူဝ်ၸိသင်ႇတဵၵ်းၸႂ်ႉ ယိုဝ်းလႄႈၵႃႈလႆႈယိုဝ်း၊ လွင်ႈၸိူဝ်းၼႆႉ ဢမ်ႇၶႂ်ႈႁႂ်ႈသိုပ်ႇပဵၼ်ထႅင်ႈ။ ဢူးဢွင်ႇမိၼ်းတွပ်ႇဝႃႈ တၢင်းၾၢႆႇ သိုၵ်း လႄႈတင်း (လူင်ပွင်ၸိုင်ႈ) ႁဝ်းၵေႃႈ မီးလွင်ႈလႆႈၵႄႈလိတ်ႈၵၼ်တင်းၼမ်၊ လွင်ႈၸိူဝ်းၼႆႉ မိူဝ်းၼႃးမႃးတေလူတ်းယွမ်းလူင်းၵႂႃႇယူႇ၊ လွင်ႈၼႆႉ ႁႂ်ႈမီးလွင်ႈယုမ်ႇယမ်ၼိူဝ်လူင်ပွင်ၸိုင်ႈ၊ ၵူၺ်းၵႃႈ ယုမ်ႇယမ်ႁိုဝ် ဢမ်ႇယုမ်ႇယမ်ၼႆႉ ဢမ်ႇမီးတီႈ ႁဝ်း၊ မီးတီႈသူၸဝ်ႈၵူၺ်း- ဝႃႈၼႆ။

ၼွၵ်ႈသေၼၼ်ႉ သွင်ၾၢႆႇလႆႈဢုပ်ႇဢူဝ်း လွင်ႈႁူမ်ႈမိုဝ်းၵၼ်ပူၵ်းပွင်ၵၢၼ်မၢၵ်ႈမီး၊ လွင်ႈၸွမ်ၸိုင်ႈ တဵင်းၸဵင်ႇ တေမႄးၵေႃႇ တင်ႈၶိုၼ်းတပ်ႉၸိူဝ်ႉၸၢတ်ႈၵူၼ်းၵိုၵ်းမိူင်း မိူၼ်ပၢၼ်ၵူႈပွၵ်ႈ။ (ဢွၼ်တၢင်း တူဝ်ၸွမ်ၸိုင်ႈ တဵင်းၸဵင်ႇၵေႃႈ ယၢမ်ႈႁၢပ်ႇၵၢၼ် ၼႂ်းတပ်ႉၵွင်တႆး မၢႆ 1) - ၼႆယဝ်ႉ။

လိူဝ်ၼၼ်ႉယင်းလႆႈႁူႉပႃးဝႃႈ ဢူးဢွင်ႇမိၼ်း ႁွင်ႉၸူဝ်းၸဝ်ႈယွတ်ႈသိုၵ်းၵႂႃႇၶဝ်ႈႁူမ်ႈပၢင်ၵုမ်ၶွင်ႊသီႊ ႁူမ်ႈတုမ်ၵူႈၸၢဝ်းၶိူဝ်း UNFC ဢၼ်တေၸတ်းမိူဝ်ႈၼႆႉ (20/02/13) တီႈၼႂ်းၵဵင်းမႆႇ။ လွင်ႈၼႆႉ ၸဝ်ႈယွတ်ႈသိုၵ်း တွပ်ႇလၢတ်ႈဝႃႈ ၶွင်ႊသီႊ ဢဝ်ၶိုၼ်းၸိုင်ႈတႆး (RCSS/SSA) ဢမ်ႇလႆႈပဵၼ်လုၵ်ႈ ၸုမ်း UNFC ၊ ပေႃးၵႂႃႇၶဝ်ႈႁူမ်ႈ ဝူၼ်ႉဝႃႈတေဢမ်ႇဢမ်ႇသၢင်ႇထုၵ်ႇ- ၼႆယဝ်ႉ။