ၽွင်းတႅၼ်းသၽႃးၸႄႈမိူင်း-မိူင်းယွင်း ၸိုင်ႈတႆးပွတ်းဢွၵ်ႇ၊ ပႃႊတီႊသိူဝ်ၽိူၵ်ႇ လုသဵင်ႈမုၼ် ယွၼ်ႉတၢင်းပဵၼ် တပ်းႁႅင်ႈ၊ ပူၼ်ႉၶၢပ်ႈတူဝ်-ႁွပ်ႇႁူဝ်ၶဝ်ႈႁဵဝ်ႈမိူဝ်ႈၼႆႉ။

ပူၼ်ႉမႃးမိူဝ်ႈဝၼ်းထိ 04/02/13 ယၢမ်းမွၵ်ႈ 7 မူင်းၵၢင်ၼႂ် ၸၢႆးဢိၼ်ႇ (ဢႃႇယု 46 ပီ) ၽွင်းတႅၼ်း သၽႃးၸႄႈမိူင်း မိူင်းယွင်း ပႃႊတီႊသိူဝ်ၽိူၵ်ႇ (SNDP) လုသဵင်ႈမုၼ်ၵႂႃႇယွၼ်ႉတၢင်းပဵၼ်တပ်ႉႁႅင်ႈ တီႈၵဵင်းတုင်။ မေးၼၢင်း တၢင်းႁိူၼ်းလႄႈပီႈၼွင်ႉ ၸိူဝ်ႉၶိူဝ်း ဢဝ်ၶၢပ်ႈတူဝ်ပွၵ်ႈမိူဝ်းႁႅၼ်းတၢၼ်း ႁဵတ်းတၢင်းလီပၼ်တီႈႁိူၼ်းမိူင်းယွင်းသေ ပူၼ်ႉၶၢပ်ႈတူဝ်- ႁွပ်ႇႁူဝ်ၶဝ်ႈႁဵဝ်ႈ မိူဝ်ႈၼႆႉ ဝၼ်းထိ 06/02/13 ၼႆယဝ်ႉ။

လုၵ်ႈၸုမ်းပႃႇတီႇသိူဝ်ႇၽိူၵ်ႇ ပွတ်းတူၵ်းၶူင်း  ဢၼ်ႁွတ်ႈထိုင်ၵဵင်းတုင်ၵေႃႉၼိုင်ႈလၢတ်ႈဝႃႈ- ၸၢႆးဢိၼ်ႇၼႆႉ ထိ 1 မႃးၽႅဝ် ၵဵင်းတုင်ယဝ်ႉ ဢၢၼ်းႁူပ်ႉလုၵ်ႈႁဵၼ်းၸုပ်ႈလဵဝ်ၵၼ် ၸိူဝ်းယၢမ်ႈၶဝ်ႈႁဵၼ်းၸွမ်းၵၼ် တီႈၸၵၢႆး/မိူင်းမၢၼ်ႈသေ ဢၢၼ်းၵႂႃႇ လမ်ႁူဝ်ၶူးသွၼ်၊ ထိ 2 သမ်ႉဢၢၼ်းၵူတ်ႇထတ်းပႃးပၢႆးယူႇလီသေ ယူတ်းယႃတူဝ် တီႈၵဵင်းတုင်။

သိုပ်ႇလၢတ်ႈဝႃႈ- ၶမ်ႈဝၼ်းထိ 3 ၼၼ်ႉ မႃးၼွၼ်းၵဵင်းတုင်၊ ထိုင်မႃးၵၢင်ၼႂ်ဝၼ်းထိ 4 ၵၢင်ၼႂ် ၵိၼ်ၶဝ်ႈမုၼ်း /ၵေႃႊၽီႊသေ လၢတ်ႈမေးၼၢင်းမၼ်းဝႃႈယိၼ်းႁူဝ်ၶႆႈ၊ ယွၼ်းၼွၼ်းလိုဝ်ႈၵမ်းၼိုင်ႈၼႆသေၶဝ်ႈမိူဝ်းၼွၼ်း။ ၵူၺ်းၵႃႈ ၽိူဝ်ႇထိုင်မႃးမွၵ်ႈယၢမ်း 7 မူင်း မေးၼၢင်းမၼ်းၶဝ်ႈမိူဝ်းတူၺ်း ဢမ်ႇမီးၸႂ်ယဝ်ႉ။ ၶမ်ႈဝၼ်းထိ 4 ၼၼ်ႉ ဢဝ်ၶၢပ်ႈတူဝ်ပွၵ်ႈမိူဝ်းမိူင်းယွင်းတင်းၶိုၼ်း၊ မိူဝ်းထိုင်တီႈႁိူၼ်းမိူင်းယွင်း ၵၢင်ၼႂ်ဝၼ်းထိ  5 ယၢမ်း 2 မူင်း- ဝႃႈၼႆ။

ၶႃပူႇဢွၵ်ႇလုၵ်ႉမိူင်းယွင်း မႃးၵဵင်းတုင် ပိူဝ်ႈတႃႇမႃးယူတ်းယႃတူဝ်၊ ၵူၺ်းၵႃႈ ပႆႇတၼ်းယူတ်းယႃတူဝ်သေ ၵိုင်ႉၵၢင်ႉသဵင်ႈၵႂႃႇ မိူဝ်ႈဝၼ်းထိ 04/02/13 တီႈၵဵင်းတုင်၊ ဢဝ်ၶၢပ်ႈတူဝ်တၢႆၶိုၼ်းမိူဝ်းတီႈမိူင်းယွင်းတင်းၶိုၼ်း- လုင်းၸၢႆးယွတ်ႈ ႁူဝ်ပဝ်ႈသိူဝ်ၽိူၵ်ႇ ၵဵင်းတုင် ၵေႃႈလၢတ်ႈၼႄၼင်ႇၼႆ။

လုင်းၸၢႆးၶမ်းဢိၼ်ႇၼႆႉ ၵိူတ်ႇမိူဝ်ႈဝၼ်းထိ 03/06/1967 ၊ ယူႇပွၵ်ႉ 1 မိူင်းယွင်း၊ ၼပ်ႉထိုဝ်သႃသၼႃ ၶရိယၼ်ႇ။ ယဝ်ႉလိၵ်ႈ ၸၼ်ႉ 10 ႁူင်းႁဵၼ်းပူၵ်းပွင်ၸၢဝ်းၶိူဝ်းၸိုင်ႈမိူင်းႁူမ်ႈတုမ် တီႈယႂႃႇတိတ်ႉၵျီး၊ တိူင်းၸႄႈၵႅင်ႇ (ၸၵၢႆး) မိူင်းမၢၼ်ႈ။ ယၢမ်ႈႁဵတ်း ၶူးသွၼ် တီႈဝၢၼ်ႈယွတ်ႈ၊ ၼႃႈၵၢၼ်ႁဵတ်းၵိၼ်ၵၢၼ်ၼႃး၊ ၸိုဝ်ႈမေးၼၢင်းၶမ်းလူင်၊ ႁဵတ်းၵၢၼ်မႄႈလုမ်းလႃးလုၵ်ႈဢွၼ်ႇ၊ မီးလုၵ်ႈလၢင်းႁူမ်ႈၵၼ် 2 ၵေႃႉ၊ ၸၢႆး 1 ယိင်း 1 ။ ၶဝ်ႈပႃႊတီႊသိူဝ်ၽိူၵ်ႇ (SNDP) သေ ၶဝ်ၶေႉပေႉၵၢၼ်လိူၵ်ႈတင်ႈ 2010 ၶဵတ်ႇမၢႆ 1 မိူင်းယွင်းသေ ပဵၼ်မႃးၽူႈတႅၼ်းၸႄႈမိူင်း၊ ၼႂ်းၽွင်းတႅၼ်းပႃႊတီႊသိူဝ်ၽိူၵ်ႇ 58 ၵေႃႉ ၵေႃႉၼိုင်ႈ။