ၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA) ၶိုၼ်းမႄးပၵ်း ပိူင်လၵ်းၵၢၼ်/ပေႃႇလသီႇမူႇၸုမ်း မိူဝ်ႈပၢင် ၵုမ်ၶွပ်ႈပီ တီႈငဝ်ႈၸိုင်ႈလွႆတႆးလႅင်း၊ ပေႃးထိုင်ပၢင်ၵုမ် 6 လိူၼ် တၢင်းၼႃႈ တေတႅပ်းတတ်းႁပ်ႉ ႁွင်းယိပ်းတိုဝ်းၵႂႃႇ။

မိူဝ်ႈပၢင်ၵုမ်ၶွပ်ႈပီ ႁိုဝ် ပၢင်ၵုမ်ႁူဝ်ႁုပ်ႈပီ တီႈငဝ်ႈၸိုင်ႈလွႆတႆးလႅင်း ပူၼ်ႉမႃးမိူဝ်ႈဝၼ်းထိ 16-19/01/13 (ၶၢဝ်းတၢင်း 4 ဝၼ်း)ၼၼ်ႉ ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၶိုၼ်းမူၼ်ႉမႄး ပၵ်းပိူင်လၵ်းၵၢၼ်(ပေႃႊလသီႊ) ၶွင်မူႇၸုမ်း ဢၼ် RCSS/SSA ၶဵၼ်ႇတႅမ်ႈယိပ်းတိုဝ်းမႃးၸဵမ်မိူဝ်ႈပီ 2000 ။ လွင်ႈတၢင်းၶိုၼ်းမႄးလႅၵ်ႈလၢႆႈ လၵ်းၵၢၼ်ၼႆႉ ဢိင်ၼိူဝ်ငဝ်းလၢႆးဝၢၼ်ႈမိူင်းလႅၵ်ႈလၢႆႈမႃးသေ RCSS/SSA လႆႈၵိုတ်းယိုဝ်းၵၼ်တင်းမၢၼ်ႈပူၼ်ႉ မႃးမိူဝ်ႈ ဝၼ်းထိ 02/11/11 ၊ ၼင်ႇႁိုဝ်တေထုၵ်ႇမႅၼ်ႈ ၸွမ်းငဝ်းလၢႆးၼၼ်ႉ ၸင်ႇလႆႈၶိုၼ်းမူၼ်ႉမႄး လႅၵ်ႈလၢႆႈလၵ်းၵၢၼ်- ၼႆယဝ်ႉ။

လၵ်းၵၢၼ် (ပေႃႊလသီႊ) 6 ၶေႃႈၶွင် RCSS/SSA ဢၼ်ၶဵၼ်ႇတႅမ်ႈတိုဝ်းၵမ်မႃးၸဵမ်မိူဝ်ႈပီ 2000 ၼၼ်ႉ - 1.လွင်ႈၽွမ်ႉ ႁူမ်ႈၸိူဝ်ႉၸၢတ်ႈ။ 2.လွတ်ႈလႅဝ်းၵွၼ်းၶေႃ။ 3.ၻီႊမွၵ်းၶရေႊသီႊ။ 4.ပူၵ်းပွင်ၽဝၵူၼ်းမိူင်း။ 5.သၢၼ်ၶတ်းယႃႈမဝ်းၵမ်။ 6.လွင်ႈၵတ်းယဵၼ်။

လၵ်းၵၢၼ် 6 ၶေႃႈၼႆႉ ၶေႃႈထိ 2 ဢၼ်ဝႃႈ “လွတ်ႈလႅဝ်းၵွၼ်းၶေႃ” ၶိုၼ်းမႄးလႅၵ်ႈလၢႆႈပဵၼ်သုၼ်ႇလႆႈ တႅပ်းတတ်းႁင်းၶေႃ။ ၼွၵ်ႈသေၼၼ်ႉ ၽိူမ်ႉထႅမ်လွၵ်းတွၼ်ႈပိူဝ်ႈတႃႇၵူၼ်းမိူင်းၸိူဝ်းဢမ်ႇယိပ်း ၵွင်ႈၵၢင်ႇ လႆႈၶဝ်ႈပႃးမႃးၼႂ်းၶွင်ႊသီႊဢဝ်ၶိုၼ်း ၸိုင်ႈတႆး (RCSS) ။ (ဢွၼ်တၢင်းၼႆႉ ၽူႈၶဝ်ႈပႃးပဵၼ် လုၵ်ႈၸုမ်း RCSS တၵ်းလႆႈပဵၼ်သိုၵ်းၵူၺ်း။ ၽူႈၶဝ်ႈ RCSS လႄႈ SSA ပဵၼ်ၵေႃႉလဵဝ်ၵၼ်၊ ၵူၺ်းၵႃႈၵမ်းၼႆႉ ၽိူမ်ႉထႅမ်ထႅင်ႈ ၵူၼ်းမိူင်းလႆႈၶဝ်ႈပႃးၸွမ်း လူၺ်ႈဢမ်ႇပဵၼ်သိုၵ်းၵေႃႈလႆႈ)။

ဢွၼ်ၼႃႈၼႆႉ မူႇၸုမ်းဢၼ်လႆႈႁပ်ႉပုၼ်ႈၽွၼ်းမူၼ်ႉမႄးလႅၵ်ႈလၢႆႈလၵ်းၵၢၼ်  ပဵၼ်ၸဝ်ႈၸၢႆးယီႈ ဢွၼ်ႁူဝ်။ ထိုင်မႃးပၢင် ၵုမ်ၶွပ်ႈပီၵမ်းၼႆႉ မၼ်းၸဝ်ႈမႃးလူဢၢၼ်ႇ/ၸီႉၸႅင်ႈၼႄဝႃႈ - သုၼ်ႇလႆႈ တႅပ်းတတ်းႁင်းၶေႃ ဢၼ်ဝႃႈၼႆႉ ပွင်ႇဝႃႈၵူၼ်း မိူင်းၸိုင်ႈတႆး ပဵၼ်ၽူႈၵေႃႉတေလႆႈတႅပ်းတတ်းဝႃႈ ႁဝ်းတေသိုပ်ႇယူႇႁိုဝ် ဢမ်ႇသိုပ်ႇယူႇၼႂ်းၸိုင်ႈမိူင်းႁူမ်ႈတုမ်၊ ႁဝ်းတေႁူမ်ႈ ႁွမ်းၸွမ်းမၢၼ်ႈၼႄႇ ႁဝ်းတေၽၢတ်ႇဢွၵ်ႇၸိုင်ႈမိူင်း ႁူမ်ႈတုမ်ၼၼ်ႉ ယူႇတီႈၵူၼ်းမိူင်း- ဝႃႈၼႆ။

ၸဝ်ႈယွတ်ႈသိုၵ်း ၸီႉၸႅင်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- လၵ်းၵၢၼ်ၼႆႉ ပႆႇလႆႈတႅပ်းတတ်း/ ႁပ်ႉႁွင်း၊ တိုၵ်ႉၶဵၼ်ႇတႅမ်ႈ ယုၵ်းယၢင်ႇမၼ်းသေ ဢဝ်တၢင်ႇၼႄၼႂ်းပၢင်ၵုမ်လူင်ႁူဝ်ႁုပ်ႈပီၼႆႉၵူၺ်း။ ပေႃးထိုင်မႃးပၢင်ၵုမ် 6 လိူၼ်တၢင်းၼႃႈတေမီး ၵၢၼ်လူဢၢၼ်ႇၼႄပွၵ်ႈၵမ်းထိ 2 ထႅင်ႈသေ ႁႂ်ႈပေႃး လႆႈတႅပ်းတတ်းႁပ်ႉႁွင်း/ မၵ်းမၼ်ႈၵႂႃႇ။ ၼႂ်းၵႄႈၼႆႉ ႁဝ်းၶႃႈတိုၵ်ႉ ပႂ်ႉတၢင်းႁၼ်ထိုင် (Feedback) တီႈၽူႈၶဝ်ႈၶွမ်ႊမတီႊငဝ်ႈၸိုင်ႈ (ၽူႈမီးၸၼ်ႉတင်ႈတႄႇၶုၼ်ႁၢၼ်ၶိုၼ်ႈၼိူဝ်) လႄႈၽူႈၸိူဝ်းၵမ်ႉ ထႅမ်ႁၼ်လီၼိူဝ် RCSS ႁဝ်းယူႇ။ ပေႃးလႆႈမႃးယဝ်ႉ တေဢဝ်မႃးႁူမ်ႈလေႃးၵၼ်သႂ်ႇၼႂ်းပၵ်းပိူင်ယုၵ်း ယၢင်ႇသေ တေလူဢၢၼ်ႇၼႄ- ဝႃႈၼႆ။

ၶုၼ်ဢူၵ်ႉၵႃႇ ၽူႈဢွၼ်ႁူဝ်ပဢူဝ်း လႄႈပဵၼ်ၽူႈလူင်ႉလႅၼ်ႇ ပိူင်ငဝ်ႈပိုင်းမိူင်း လၢတ်ႈဝႃႈ- သုၼ်ႇတႅပ်းတတ်းတူဝ်ၵဝ်ႇ၊ ဢမ်ႇၼၼ်ၵမ်ႈၽွင်ႈဝႃႈသုၼ်ႇတႅပ်းတတ်းတူဝ်ၵဝ်ႇတၢင်းၼႂ်း (တၢင်းၼႂ်း ပွင်ႇဝႃႈဢမ်ႇၽၢတ်ႇဢွၵ်ႇ) ဢၼ်ဝႃႈၼႆႉ ပႃးဝႆႉ ဢမ်းၼၢၸ်ႈလူင် 3 ပိူင်- 1. ဢမ်းၼၢၸ်ႈၶဵၼ်ႇတႅမ်ႈ/ ပွင်မၢႆမီႈ။ 2.ဢမ်းၼၢၸ်ႈၽွင်းငမ်း။ 3.ဢမ်းၼၢၸ်ႈတႅပ်းတတ်းတြႃး၊ လူၺ်ႈလူင်ပွင်ၸိုင်ႈငဝ်ႈငုၼ်း ဢမ်ႇၵုမ်းၵႅဝ်ယုင်ႈၵဵဝ်ႇၸွမ်းသင်- ဝႃႈၼႆ။

ဢွၼ်ၼႃႈၼႆႉ ၸဝ်ႈယွတ်ႈသိုၵ်းယၢမ်ႈၸီႉၸႅင်ႈၼႄဝႃႈ- ၵူႈပွၵ်ႈႁဝ်းယိပ်းမၼ်ႈဝႆႉ လွတ်ႈလႅဝ်းၵွၼ်း ၶေႃ ပိူဝ်ႈတႃႇၶႅင်ႇၶိုၼ်း လူင်ပွင်ၸိုင်ႈ ဢၼ်ဢမ်ႇယွမ်းဢဝ်လၢႆး ၵၢၼ်မိူင်းၵႄႈလိတ်ႈပၼ်ႁႃၵၢၼ်မိူင်း၊ ၵုမ်ႇဢဝ် လၢႆးၵၢၼ်သိုၵ်းသေၵႄႈလိတ်ႈ ၵူၺ်း၊ ယွၼ်ႉၼၼ် ၸင်ႇလႆႈၶႅင်ႇတႃႉမႃး။ ၵူၺ်းၵႃႈမိူဝ်ႈလဵဝ် ၼႆႉ ဝၢႆးသေ ၸွမ်ၸိုင်ႈတဵင်းၸဵင်ႇၶိုၼ်ႈမႃးယဝ်ႉ တိုဝ်ႉတၢင်း ပိူဝ်ႈတႃႇၵႄႈလိတ်ႈပၼ်ႁႃၵၢၼ်မိူင်း လူၺ်ႈလၢႆးၵၢၼ်မိူင်းၵေႃႈ ပိုတ်ႇပၼ်မႃး၊ ႁဝ်းၵေႃႈယုမ်ႇယမ်ဝႃႈ ပေႃးၾၢႆႇႁဝ်းမီးလွင်ႈ ယိၼ်းယွမ်း ပၼ်ၽွင်ႈၼႆ တေၵမ်ႉၸွႆႈပၼ် ၶၵ်ႉၵၢၼ်လွင်ႈငမ်းယဵၼ် ႁႂ်ႈၵႂႃႇလႆႈဝႆးဝႆး- ဝႃႈၼႆ။

ၵပ်းၵၢႆႇလွင်ႈၼႆႉ ၵူၼ်းၼႂ်း RCSS/SSA ၵမ်ႈၽွင်ႈဝႃႈ- သင်ၸိူဝ်ႉဝႃႈလူင်ပွင်ၸိုင်ႈဢဝ်လၢႆးၵၢၼ်သိုၵ်း မႃးၵႄႈလိတ်ႈပၼ်ႁႃ ၵၢၼ်မိူင်းၶိုၼ်းထႅင်ႈ၊ ၸႂ်ႉတိုဝ်းၵၢၼ်သိုၵ်းထႅင်ႈ ၊ မၼ်းၸၢင်ႈပၼ်ႁႅင်းႁဵတ်းႁႂ်ႈ ၸုမ်းၸိူဝ်း ႁူဝ်ၶႅင်ၼႂ်းႁဝ်းၸၢင်ႈၵႂႃႇၸူးၶိုၼ်း တီႈလၵ်းၵၢၼ် လွတ်းလႅဝ်းၵွၼ်းၶေႃၼၼ်ႉယူႇ- ဝႃႈၼႆ။

ၽိုၼ်ပပ်ႉလိၵ်ႈလၵ်းၵၢၼ်/ပေႃႇလသီႇ ဢၼ်ၶိုၼ်းမႄးၶဵၼ်ႇတႅမ်ႈယုၵ်းယၢင်ႇ ပွၵ်ႈၵမ်းမႂ်ႇၼႆႉ တင်းမူတ်းမီး 20 ၼႃႈ၊ 13 ၵၼ်၊ 51 မတ်ႉတႃ (ပူၵ်ႉမ)။

ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၼႆႉ တင်ႈတႄႇပီ 2011 မႃး ပဵၼ်ၸုမ်း ၼိုင်ႈ ၼႂ်း 13 ၸုမ်း ဢၼ်ဢုပ်ႇဢူဝ်းတူၵ်းလူင်းၵိုတ်းယိုဝ်း ႁဵတ်းလွင်ႈငမ်းယဵၼ် ၵၼ်တင်းလူင် ပွင်ၸိုင်ႈ။ မိူဝ်ႈလဵဝ် တင်းၸုမ်းၵိုတ်းယိုဝ်း လႄႈ ပႆႇၵိုတ်းယိုဝ်း ႁူမ်ႈၵၼ်ၵေႃႇတင်ႈဝႆႉၸုမ်းႁဵတ်း ၵၢၼ်ပိူဝ်ႈတႃႇၵပ်းသၢၼ်ၼႂ်း ၵႄႈၵၢင်ၸၢဝ်းၶိူဝ်း (WGEC) သေ ၶဵၼ်ႇတႅမ်ႈ ဝႆႉယူင်ႉၶၢပ်ႈပိူဝ်ႈတႃႇပိုတ်ႇ ၵၢၼ်ဢုပ်ႇဢူဝ်း တၢင်းၵၢၼ်မိူင်း တင်းလူင်ပွင်ၸိုင်ႈတဵင်းၸဵင်ႇယူႇ။