ဝၼ်းတီႈ 31/05/2016 ယၢမ်း 08:30-12:00 မူင်း ႁူင်းႁဵၼ်းၸိူဝ်ႉၸၢတ်ႈၸိုင်ႈတႆး ဝဵင်းၵဵင်းတုင် ၸတ်းႁဵတ်းပွႆးလူင်းပၢင်သွၼ် လိၵ်ႈတႆး တီႈႁူင်းႁေႃး သမူဝ်းသွၼ် တႆးလိုဝ်ႉ ပွၵ်ႉ 3 ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ။
ၶူးၸၢႆးသၢင်ႇၸၼ် ၽူႈၵွၼ်းႁူင်းႁဵၼ်း ၸိူဝ်ႉၸၢတ်ႈၸိုင်ႈတႆး လၢတ်ႈဝႃႈ “ ယိူင်းဢၢၼ်း ဢၼ်ႁဝ်းၶႃႈ ၸတ်းႁဵတ်းပွႆးလူင်းပၢင်သွၼ်ၼႆႉ လုၵ်ႈဢွၼ်ႇႁဵၼ်းၵေႃႈ ၼင်ႇႁိုဝ် ၶဝ်ပေႃးတေလႆႈမီးတၢင်း ၸူမ်းသိူဝ်း ယဝ်ႉၵေႃႈ ၸုမ်းတူင်ႇဝူင်းၵူႈၸုမ်းၸုမ်း ၊ ပႃႊတီႊၵူႈၾၢႆႇၾၢႆႇ လႄႈ ၵူၼ်းၵူႈမိူင်းမိူင်း ပေႃးတေလႆႈႁၼ်လီ ႁူမ်ၸူမ်းၸွမ်း ၼင်ႇႁိုဝ် ၵူၼ်းမိူင်းႁဝ်း ပေႃးတေပွင်ၸႂ်ဝႃႈ ႁူင်းႁဵၼ်းၸိူဝ်ႉ ၸၢတ်ႈတႆးႁဝ်းၵေႃႈ မီးယူႇ ” ဝႃႈၼႆ ။
ပွႆးလူင်းပၢင်သွၼ်ၼႆႉ လႆႈမွၵ်ႇထိုင် ၸုမ်းၾိင်ႈငႄႈ 5 ၸုမ်း တႆးလူင် ၊ တႆးၼိူဝ် ၊ တႆးၶိုၼ် ၊ တႆးလိုဝ်ႉလႄႈ တႆးလွႆ ၊ ပႃႊတီႊၵၢၼ်မိူင်း ၵူႈပႃႊတီႊ ၊ လုမ်းၵၢပ်းသၢၼ် ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆးလႄႈ သင်ၶၸဝ်ႈ ၼႂ်းၸႄႈဝဵင်းၵဵင်းတုင် တင်းမူတ်း ၽူႈမႃးၶဝ်ႈႁူမ်ႈပၼ်ႁႅင်း ႁိမ်း 800 ပၢႆ ဝႃႈၼႆ ။
ႁူင်းႁဵၼ်းၸိူဝ်ႉၸၢတ်ႈၸိုင်ႈတႆး ဝဵင်းၵဵင်းတုင်ၼႆႉ မီးသွင်တွၼ်ႈ ၶၢဝ်းပွတ်း တင်း ၶၢဝ်းယၢဝ်း။ ပၢင်သွၼ်လိၵ်ႈတႆး ၶၢဝ်းပွတ်း တႄႇလိူၼ်ဢေႊပိူဝ်ႊ ထိုင် လိူၼ်မေႊ ပၢင်သွၼ်ၶၢဝ်းယၢဝ်းသမ်ႉ တႄႇလိူၼ်မေႊ ထိုင်လိူၼ်မၢတ်ႊၶျ် ပၢင်သွၼ်ၶၢဝ်းတၢင်းႁိမ်းပီ တေဢိုတ်းႁဵၼ်း တႃႇလိူၼ်ဢေႊပိူဝ်ႊ ။ လုၵ်ႈႁဵၼ်းတင်းမူတ်း မႃးၶိုၼ်ႈႁဵၼ်း 100 ပၢႆႁူမ်ႈတင်းမူတ်း မီး 220 ၵေႃႉ ၼႆယဝ်ႉ ။