ပၢင်ၵုမ်ၵၢၼ်မိူင်းၼႆႉ ယူႇတီႈၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ဢွၼ်ႁူဝ်သေ ၸတ်းႁဵတ်းဝၼ်းတီႈ 1-2/06/2016 ၶၢဝ်းတၢင်း 2 ဝၼ်း၊ တီႈႁူင်းႁႅမ်း တွင်ႇၵျီးႁေႃႊတႄႊလ် ။ လႆႈမွၵ်ႇထိုင်ပႃႊတီႊၵၢၼ်မိူင်းၶဝ်ႈႁူမ်ႈ တင်းမူတ်း 25 ၸုမ်း ။ ပၢင်ၵုမ်ဝၼ်းႁႅၵ်ႈမိူဝ်ႈၼႆႉ (1/6/2016) တႄႇၶၢဝ်းယၢမ်းၵၢင်ၼႂ် 9 မူင်း တေႃႇထိုင် ဝၢႆးဝၼ်းႁူဝ်ၶမ်ႈ 5 မူင်း ၊ မီးပႃႊတီႊၵၢၼ်မိူင်းၶဝ်ႈႁူမ်ႈ 21 ၸုမ်း။ ပိူင်လူင်မၼ်း ဢုပ်ႇဢူဝ်းၵၢၼ်မိူင်း ႁၢင်ႈႁႅၼ်းဝႆႉပိူဝ်ႈတႃႇ ၶဝ်ႈႁူမ်ႈပၢင်ၵုမ်လူင်ပၢင်လူင် ႁိုဝ် ပၢင်ၵုမ်လူင် 21 ႁူဝ်ပၢၵ်ႇပီ၊ ဢၼ်ၼၢင်းဢွင်ႇသၢၼ်းၸုၵျီႇ ၽူႈၵိူဝ်းၵုမ်ၸိုင်ႈမိူင်း တေဢွၼ်ႁူဝ်ၸတ်းႁဵတ်း - ၼႆယဝ်ႉ ။
ၽူႈၶၢၼ်ပၢၵ်ႇပႃႊတီႊႁူဝ်သိူဝ် (SNLD) ၸၢႆးလဵၵ်ႉ လၢတ်ႈဝႃႈ - ၼၢင်းဢွင်ႇသၢၼ်းၸုၵျီႇ ၽူႈၵိူဝ်းၵုမ်ၸိုင်ႈမိူင်း တေဢွၼ်ႁူဝ်ၸတ်းႁဵတ်း ပၢင်ၵုမ်လွင်ႈငမ်းယဵၼ် ၊ ပၢင်ၵုမ်လူင်ၵၢၼ်မိူင်း ။ ဝၢႆးလင်ပၢင်ၵုမ်လွင်ႈငမ်းယဵၼ်ယဝ်ႉ တေၸတ်းႁဵတ်းပၢင်ၵုမ်လူင် ၸၼ်ႉမိူင်းႁူမ်ႈတုမ် ။ ဝၢႆးသေၼၼ်ႉ တေၸတ်းႁဵတ်းပၢင်ၵုမ်ၵၢၼ်မိူင်း ။ ပေႃးထိုင်ပၢင်ၵုမ်ၵၢၼ်မိူင်းမႃးၼႆ ၼင်ႇႁိုဝ်တေတုၵ်းယွၼ်းလႆႈ သုၼ်ႇလႆႈသုၼ်ႇပဵၼ်ၵူၼ်းမိူင်းတႆး ၊ ဢဵၼ်းဢၢၼ်းၸိူင်ႉၼႆသေ ယၢမ်းလဵဝ် ၸင်ႇလႆႈမႃးႁဵတ်းပၢင်ၵုမ်ႁၢင်ႈႁႅၼ်းဝႆႉ၊ ၶွတ်ႇၽွတ်ႈဝႆႉလွင်ႈၽွမ်ႉႁူမ်ႈ - ဝႃႈၼႆ ။
သိုပ်ႇလၢတ်ႈထႅင်ႈဝႃႈ - ၼႂ်းၶၢဝ်းတၢင်း 70 ပီၼႆႉ ပၢင်ၵုမ်ၵၢၼ်မိူင်းၼႆႉ ပွၵ်ႈၼႆႉတေပဵၼ်ၵမ်းဢွၼ်တၢင်းသုတ်း ။ ဢၼ်ၼၢင်းဢွင်ႇသၢၼ်းၸုၵျီႇ ၽူႈၼမ်းပႃႊတီႊ NLD တေဢွၼ်ႁူဝ်ၸတ်းႁဵတ်း ပၢင်ၵုမ်ၵၢၼ်မိူင်း ၵမ်းဢွၼ်တၢင်းသုတ်းၼႆႉ မၼ်းလမ်ႇလွင်ႈတွၼ်ႈတႃႇၸၢဝ်းၶိူဝ်းတႄႉတႄႉ ဝႃႈဝႃႈ ။ ပိူဝ်ႈတႃႇၸၢဝ်းၶိူဝ်း တေလႆႈသုၼ်ႇလႆႈၽဵင်ႇပဵင်းလႄႈသင် ၊ သုၼ်ႇလႆႈၽွင်းငမ်းတူဝ်ၵဝ်ႇလႄႈသင် ၊ တႃႇတေမူၼ်ႉမႄး ပိူင်ငဝ်ႈပိုင်းမိူင်း ၸိူဝ်းၼႆႉလႄႈသင် ။ ပိူင်ငဝ်ႈပိုင်းမိူင်းၵေႃႈ ၼင်ႇႁိုဝ်တေမူၼ်ႉမႄးလႆႈ ႁႂ်ႈမၼ်းၵိုင်ႇငၢမ်ႇၵၼ် ၸွမ်းၼင်ႇဢၼ်ၸၢဝ်းၶိူဝ်းၶႂ်ႈလႆႈၶႂ်ႈပဵၼ်ၼၼ်ႉ လႄႈသင် ၊ ထုၵ်ႇလႆႈႁူပ်ႉထူပ်းဢုပ်ႇဢူဝ်းၵိူဝ်းၵုမ်ၵၼ်သေ ၸွႆႈပၼ်ႁႅင်းဢီးၵႂႃႇ ၊ ႁႂ်ႈပဵၼ်ဢဵၼ်ႁႅင်းၽွမ်ႉႁူမ်ႈၵၼ်သေ ဝၵ်ႉဢဝ်တိုဝ်ႉတၢင်းလႆႈ တီႈပၢင်ၵုမ်ၵၢၼ်မိူင်းၼႆႉ - ဝႃႈၼႆ ။
“ တႃႇတေလႆႈသုၼ်ႇလႆႈၸၢဝ်းၶိူဝ်း၊ သုၼ်ႇလႆႈၽဵင်ႇပဵင်းၸိူဝ်းၼႆႉ မၼ်းဢိင်ၼိူဝ်ၾႅတ်ႊၻရႄႊလ်သေ တေတုၵ်းယွၼ်းၵႂႃႇ ။ ၾႅတ်ႊၻရႄႊလ် ဢၼ်ႁဝ်းၶႃႈဝႃႈယူႇၼႆႉ ၼင်ႇႁိုဝ်ၵူၼ်းမိူင်းတႆး တေႁူႉၸၵ်းတေပွင်ႇၸႂ်မႃးၼၼ်ႉၼႆၵေႃႈ ႁဝ်းၶႃႈတေၶတ်းၸႂ်သပ်းလႅင်းၼႄၵူၼ်းမိူင်း မိူဝ်ႈပႆႇထိုင် ပၢင်ၵုမ်ၵၢၼ်မိူင်းၼႆႉ ၊ ႁႂ်ႈၵူၼ်းမိူင်းလႆႈႁူႉလီလီ ”- ၸၢႆးလဵၵ်ႉ လၢတ်ႈ ။
ၾၢႆႇၼိုင်ႈတၢင်းၼိုင်ႈ ၊ ပူၼ်ႉမႃးမိူဝ်ႈဝၼ်းတီႈ 29/05/2016 ၼၼ်ႉၵေႃႈ ၻီႊမူဝ်ႊၶရႅတ်ႊတိၵ်ႊပႃႊတီႊ ၸၢဝ်းၶိူဝ်းတႆး ႁိုဝ် ပႃႊတီႊသိူဝ်ၽိူၵ်ႇ (SNDP) ဢွၼ်ႁူဝ်သေ ၸတ်းႁဵတ်းပၢင်ၵုမ်ဢုပ်ႇဢူဝ်းၵၼ် တႃႇတေၶွတ်ႇၽွတ်ႈ ၸုမ်းပႃႊတီႊၼႂ်းမိူင်းတႆး (League for Shan State Ethnic Political Parties- LSSEP) တီႈဝဵင်းလူင်တႃႈၵုင်ႈ ။ ပၢင်ၵုမ်ပွၵ်ႈၼၼ်ႉ ႁွင်ႉမွၵ်ႇထိုင်ပႃႊတီႊၵၢၼ်မိူင်း ၼႂ်းမိူင်းတႆး 18 ၸုမ်းၶဝ်ႈႁူမ်ႈ၊ ၵူၺ်းၵႃႈ မိူဝ်ႈၼၼ်ႉ ပႃႊတီႊႁူဝ်သိူဝ် (SNLD) ဢမ်ႇလႆႈၶဝ်ႈႁူမ်ႈ ၊ ဢိင်ဢၢင်ႈဝႃႈ ဢမ်ႇၶိုတ်းၶၢဝ်းယၢမ်းပၢင်ၵုမ် ။ မိူဝ်ႈၼၼ်ႉ ၽူႈၶဝ်ႈႁူမ်ႈပၢင်ၵုမ် မီးပႃႊတီႊၵၢၼ်မိူင်းတင်းမူတ်း 13 ၸုမ်း ၊ ဝၢႆးပၢင်ၵုမ်ယဝ်ႉ ႁူမ်ႈၵၼ်လူင်းလၢႆးမိုဝ်းသေ ဢွၵ်ႇၶေႃႈပိုၼ်ၽၢဝ်ႇဝႃႈ 13 ၸုမ်းၼႆႉ လႆႈၸႂ်တူၵ်းလူင်း တႃႇတေၶွတ်ႇၽွတ်ႈ LSSEP ။
ၼႂ်းၶေႃႈပိုၼ်ၽၢဝ်ႇ LSSEP ၼၼ်ႉ ယင်းတႅမ်ႈဝႆႉပႃးဝႃႈ - ယူႇတီႈ 13 ၸုမ်းၼႆႉသေ တိုၵ်းသူၼ်းထိုင် ပၢင်ၵုမ်လူင်ပၢင်လူင် 21 ႁူဝ်ပၢၵ်ႇပီၼႆႉ ၶႂ်ႈႁႂ်ႈသႂ်ႇပၼ်ၶၵ်ႉတွၼ်ႈပႃႊတီႊၸၢဝ်းၶိူဝ်း ပိူဝ်ႈတႃႇႁဵတ်းၵၢၼ်ၸွမ်းၵၼ်ၵႂႃႇ - ၼႆယဝ်ႉ ။