ၸုမ်းတူင်ႉၼိုင်တူင်ႇဝူင်းၵူၼ်း ၼွၵ်ႈမိူင်း/ၼႂ်းမိူင်း ဢွၵ်ႇၼႄၵၢင်ၸႂ် သၢၼ်ၶတ်း ႁႂ်ႈၵိုတ်းပၢင်တိုၵ်း

ၸုမ်းတူင်ႉၼိုင်တူင်ႇဝူင်းၵူၼ်း ၼွၵ်ႇမိူင်း / ၼႂ်းမိူင်း ဢွၼ်ၵၼ်ဢွၵ်ႇၼႄၵၢင်ၸႂ် သၢၼ်ၶတ်း လွင်ႈပဵၼ်ပၢင်တိုၵ်း ၼႂ်းၸိုင်ႈတႆး ပွတ်းႁွင်ႇ ႁႂ်ႈတပ်ႉသိုၵ်းလူင်ၸိုင်ႈမၢၼ်ႈလႄႈ တပ်ႉသိုၵ်းတဢၢင်း ၵိုတ်းတိုၵ်းပၼ်ၽႂ်းၽႂ်း ။

ဝၼ်းတီႈ 29/05/2016 ယၢမ်း 19:00 မူင်း (ၵၢင်ၶမ်ႈ) ယူႇတီႈမုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ဢဵၼ်ႁႅင်းၵူၼ်း 30 ပၢႆဢွၵ်ႇၼႄၵၢင်ၸႂ် လွင်ႈတပ်ႉသိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်း လေႃႇတိုၵ်းတပ်ႉသိုၵ်းၸၢဝ်းၶိူဝ်းလႄႈ တပ်ႉသိုၵ်းတဢၢင်း တင်းတပ်ႉသိုၵ်းၶွင်ႊသီႊ ဢဝ်ၶိုၼ်းၸိုင်ႈတႆး / တႆးသိုၵ်းၸိုင်ႈတႆး လႆႈပဵၼ်ပၢင်တိုၵ်းၵၼ်ၸဵမ်ၸိူဝ်းၼၼ်ႉ ႁႂ်ႈၵိုတ်းၵၢၼ်တိုၵ်းတေႃးၵၼ်ၼႆသေ ၸတ်းႁဵတ်းပၢင်ပိုၼ်ၽၢဝ်ႇၵၢင်ၸႂ် တီႈလုမ်း မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ၸိုင်ႈထႆး ၼႆယဝ်ႉ ။


ၸၢႆးၼၼ်ႇတေႃး ၵႅမ်ႁူဝ်ပဝ်ႈ မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ လၢတ်ႈဝႃႈ “ ၸွမ်းလူၺ်ႈငဝ်းလၢႆး ပဵၼ်ပူၼ်ႉမႃးၸိူဝ်းၼၼ်ႉသေ ယူႇတီႈတပ်ႉသိုၵ်းတဢၢင်းၵေႃႈ သမ်ႉပေႉၵိၼ်ပေႃႈမႄႈၵူၼ်းမိူင်း ဢမ်ႇယဝ်ႉဢမ်ႇဝၢႆး ထိုင်မႃး ဝၼ်းတီႈ 16 ၼၼ်ႉသမ်ႉ သိုၵ်းမၢၼ်ႈၽဝ်ဝၢၼ်ႈ ပီႈၼွင်ႉဝူဝ်းလူင် ၊ ၽဝ်ပႃးၵူၼ်း 8 ၵေႃႉ ၊ ၼႂ်းဝၼ်းတီႈ 28 ၼၼ်ႉ ႁၼ်ပီႈၼွင်ႉၵူၼ်းမိူင်းႁဝ်း ဢွၼ်ၵၼ်သၢၼ်ၶတ်း ဢွၵ်ႇၼႄၵၢင်ၸႂ် ထိုင်မႃး ဝၼ်းတီႈ 29 ၼႆႉ ႁဝ်းၸင်ႇဢွၼ်ၵၼ်ႁၢင်ႈႁႅၼ်းသေ ဢွၵ်ႇၼႄၵၢင်ၸႂ်ထႅင်ႈၵမ်ႉၼိုင်ႈ ” ဝႃႈၼႆ ။


တႃႇဢွၵ်ႇၼႄၵၢင်ၸႂ် ၼႂ်းမိူင်းထႆးၼႆႉ ယွၼ်ႉငဝ်းလၢႆးဢမ်ႇပေႃးပဵၼ် ၼင်ႇႁိုဝ် ပေႃးတေပဵၼ်လႆႈတိုဝ်ႉတၢင်း တႃႇတေၽႄႈတိူၼ်းၵႂႃႇ ၼႂ်းသိုဝ်ႇၶၢဝ်ႇ ၊ ပီႈၼွင်ႉႁႅင်းၵၢၼ်ယၢၼ်မိူင်း တင်းၼႆႉ ပဵၼ်ဢၼ်မႆႈၸႂ်ၸွမ်းပီႈၼွင်ႉ ၵူၼ်းပၢႆးၽေးသိုၵ်းၼႂ်းမိူင်းတႆးယူႇ ၸင်ႇလႆႈဢွၵ်ႇၼႄ ၵၢင်ၸႂ် တီႈလုမ်းမုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇၵႂႃႇ ။


သိုပ်ႇလၢတ်ႈထႅင်ႈဝႃႈ လွင်ႈဢၼ်ႁဝ်းၶႃႈ လႆႈဢွၵ်ႇၼႄၵၢင်ၸႂ်ၵမ်းၼႆႉ ႁဝ်းၶႃႈၵေႃႈ ဢမ်ႇလႆႈၽိတ်ႈမွၵ်ႈပီႈၼွင်ႉမႃးၶဝ်ႈႁူမ်ႈၼမ် ႁၼ်ထိုင်ဝႃႈ မွၵ်ႈႁူဝ်ၵူၼ်းသၢဝ်း-သၢမ်သိပ်း ၵေႃႉ လႅပ်ႈတေပဵင်းပေႃးယူႇ တႃႇတေၼႄၽၢင်ႁၢင်ႈ ဝႃႈၼႆ ။


ၼႂ်းပၢႆႉပီႈၼွင်ႉႁႅင်းၵၢၼ်ယၢၼ်မိူင်း ၸိူဝ်းဢွၼ်ၵၼ်ယိပ်းသေ ဢွၵ်ႇၼႄၵၢင်ၸႂ်ၼၼ်ႉတႄႉ တႅမ်ႈဝႃႈ ႁႂ်ႈတပ်ႉသိုၵ်းလူင်ပွင်ၸိုင်ႈမၢၼ်ႈ ၵိုတ်းတိုၵ်းပၼ် ၊ တပ်ႉသိုၵ်းတဢၢင်းၵေႃႈ ႁႂ်ႈၵိုတ်းတိုၵ်းပၼ် ပၢင်တိုၵ်း လွင်ႈပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းၼႂ်းမိူင်း ႁႂ်ႈသၢႆႈတႅၼ်းပၼ် လွင်ႈၽဝ်ဝၢၼ်ႈ / ႁိူၼ်းယေး လိူဝ်သေၼၼ်ႉၵေႃႈ တိုၵ်းသူၼ်းထိုင် တပ်ႉသိုၵ်းၸိုင်ႈတႆး တင်းသွင်မူႇသွင်ၸုမ်း RCSS/SSA လႄႈ SSPP/SSA  ႁႂ်ႈႁူမ်ႈႁႅင်းၵၼ် ၊ ႁၼ်လီၵမ်ႉထႅမ်ၸွမ်း တပ်ႉသိုၵ်း RCSS/SSA  တင်း SSPP / SSA ႁႂ်ႈသိုပ်ႇၵႅတ်ႇၶႄ ပီႈၼွင်ႉၵူၼ်းမိူင်းႁဝ်း ၸဵမ်ၸိူဝ်းၼႆႉ ဝႃႈၼႆ ။


ပူၼ်ႉမႃး ဝၼ်းတီႈ 30 ၼၼ်ႉၵေႃႈ ၵူၼ်းပၢႆႈၽေးသိုၵ်း ၼႂ်းၸႄႈဝဵင်းသီႇပေႃႉ ဢဵၼ်ႁႅင်း 300 ပၢႆ ဢွၵ်ႇၼႄၵၢင်ၸႂ် ႁႂ်ႈၵိုတ်းတိုၵ်း ပၢင်တိုၵ်းၽႂ်းၽႂ်း ၊ ၼႂ်းဝၼ်းတီႈ 28 သမ်ႉ ယူႇတီႈပေႃႈမႄႈပီႈၼွင်ႉ ၵူၼ်းပၢႆႈၽေးသိုၵ်းလႄႈ သင်ၶၸဝ်ႈ 3000 ပၢႆသေ ဢွၼ်ၵၼ်ဢွၵ်ႇၼႄၵၢင်ၸႂ် တုၵ်းယွၼ်းႁႂ်ႈသိုၵ်းမၢၼ်ႈ ၊ သိုၵ်းတဢၢင်း ၵိုတ်းၵၢၼ်တိုၵ်းတေႃးပၼ် ၼႆယဝ်ႉ ။