သိုၵ်းမၢၼ်ႈၸႂ်ႉႁိူဝ်းဝိၼ် လေႃႇတိုၵ်း တပ်ႉသိုၵ်းၸိုင်ႈတႆး SSPP/SSA

သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ၼႂ်းၼႃႈတီႈၸႄႈဝဵင်းမၢႆ 10 တီႈလွႆႁူဝ်ဝၢၼ်ႈပဵင်းသၢႆး ၊ ဢၼ်မီးၾၢႆႇၸၢၼ်းၼမ်ႉမႃႉ ဢိူင်ႇၼမ်ႉမႃႉ ၸႄႈဝဵင်းသီႇပေႃႉ ။ ၾၢႆႇသိုၵ်းမၢၼ်ႈၸႂ်ႉႁိူဝ်းဝိၼ်သိုၵ်း 2 လမ်း တိုၵ်းၸွႆႈ ။

ႁိူဝ်းဝိၼ်မႅင်းမီႈသိုၵ်းမၢၼ်ႈ မႃးၼိူဝ်ဝၢၼ်ႈႁႆး မိူဝ်ႈပဵၼ်ပၢင်တိုၵ်းၼႂ်းပီ 2015

ဝၼ်းတီႈ 18/05/2016 (မိူဝ်ႈၼႆႉ) တပ်ႉသိုၵ်းမၢၼ်ႈႁႅၼ်းသိုၵ်းတင်းၼမ် လေႃႇတိုၵ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၊ ဢၼ်ပၵ်းသဝ်းဝႆႉ ၼႂ်းၼႃႈတီႈၸႄႈဝဵင်းမၢႆ 10 တီႈလွႆႁူဝ်ဝၢၼ်ႈပဵင်းသၢႆး ၊ ဢၼ်မီးၾၢႆႇၸၢၼ်းၼမ်ႉမႃႉ ဝၢၼ်ႈလူင် လႄႈဝၢၼ်ႈသၢႆး ၊ ဢိူင်ႇၼမ်ႉမႃႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။ သွင်ၾၢႆႇပဵၼ်ပၢင်တိုၵ်းၵၼ် တင်ႈတႄႇၵၢင်ၼႂ်ယၢမ်း 8 မူင်း ႁၢၼ်ႉတေႃႇဝၢႆးဝၼ်းယၢမ်း 2 မူင်းၵေႃႈ သဵင်ၵွင်ႈယင်းပႆႇယဵၼ် - ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ ။


သိုပ်ႇလၢတ်ႈဝႃႈ - ၾၢႆႇသိုၵ်းမၢၼ်ႈဢၼ်မႃးတိုၵ်းၼႆႉ ပဵၼ်သၢႆသိုၵ်းၼႂ်း တိူင်းသိုၵ်းၸဵင်ႇႁွင်ႇဝၼ်းဢွၵ်ႇ (ယမၶ) လႃႈသဵဝ်ႈ ၵုမ်းၵမ်ၸတ်းၵၢၼ်ၵမ်းသိုဝ်ႈ။ တပ်ႉဢၼ်မႃးၼႆႉ ၶဝ်ႈပႃးတပ်ႉၵွင် ၶလယ 68 ၊ ၶလယ 69 ၊ ၶလယ 291 ၼမ်ႉပွင်ႈ။ ပီႇတုၸိတ်ႉလႃးႁူႇ ၼမ်ႉမႃႉ ၊ ပီႇတုၸိတ်ႉဝၢၼ်ႈပၢင်ႇ ၊ ၸုမ်းပူဝ်ႇမူၼ်း ။ သိုၵ်းမၢၼ်ႈတပ်ႉ ၶမယ 523 ၸိူဝ်းၼႆႉ ႁူမ်ႈႁႅင်းၵၼ် 700 ပၢႆ ။ ပၢင်တိုၵ်းပွၵ်ႈၼႆႉ တူဝ်ပိဝ်ႇႁႃႇလႃႈသဵဝ်ႈ မႃးၼင်ႈတီႈၼမ်ႉပွင်ႈသေ ၸတ်းၵၢၼ်ၼႃႈသိုၵ်းၵမ်းသိုဝ်ႈ ၊ ၶဝ်ႈတိုၵ်းတူင်ႇၼမ်ႉမႃႉ ၸႄႈဝဵင်းမၢႆ 10 ၼႃႈတီႈ SSPP/SSA ၵုမ်းၵမ် - ၼႆယဝ်ႉ ။


မိူဝ်ႈယၢမ်းတဵင်ႈဝၼ်း 12 မူင်းၼၼ်ႉ သိုၵ်းမၢၼ်ႈဢဝ်ႁိူဝ်းဝိၼ် Mi-35 သွင်လမ်း မႃးၶဝ်ႈပိုတ်းယိုဝ်းၸွႆႈ ၵူၺ်းဢမ်ႇၵႃး တီႈတပ်ႉၼမ်ႉပွင်ႈၵေႃႈ ယိုဝ်းၵွင်ႈလူင် / မၢၵ်ႇလူင်ၸွႆႈ ၊ တင်ႈတႄႇၵၢင်ၼႂ်ထိုင်ယၢမ်းႁိမ်း 3 မူင်းဝၢႆးဝၼ်းၼႆႉ ယိုဝ်းမွၵ်ႈ 10 ၵမ်း - ၼႆယဝ်ႉ ။


ယွၼ်ႉပၢင်တိုၵ်းသေ ၵူၼ်းဝၢၼ်ႈ ထုၵ်ႇသိုၵ်းမၢၼ်ႈတီႉၺွပ်းၵႂႃႇတင်းမူတ်း 8 ၵေႃႉ ၊ တႃႇ 7 ၵေႃႉတႄႉ ပွႆႇပၼ်ၶိုၼ်းယဝ်ႉ ၊ တႃႇၵေႃႉၼိုင်ႈ ၸိုဝ်ႈလုင်းဢေႃးဢွင်ႇ ပႆႇပွႆႇၶိုၼ်း - ၼႆယဝ်ႉ ။


လိူဝ်သေၼၼ်ႉ ၵူၼ်းဝၢၼ်ႈၼမ်ႉမႃႉၵေႃႈ ပေႃးဝႃႈလႆႈငိၼ်းသဵင်ၵွင်ႈသဵင်မၢၵ်ႇၵေႃႈ ၵမ်ႈၽွင်ႈပၢႆႈၵႂႃႇ တၢင်းလႃႈသဵဝ်ႈ ၊ ၵႂႃႇပိုင်ႈဢိင်သေႃႉႁူမ်ႈတီႈဝတ်ႉ / ၵျွင်းမုၼ်ၸဝ်ႈ ဝတ်ႉမၢၼ်ႈသူႈ ။ ၵမ်ႈၽွင်ႈၵေႃႈ ပၢႆႈၵႂႃႇၸူးပီႈၸူးၼွင်ႉၽႂ်မၼ်း ၊ ၵမ်ႈၽွင်ႈပၢႆႈၶဝ်ႈထိူၼ်ႇ ၊ ၵမ်ႈၽွင်ႈၵေႃႈ ပၢႆႈၵႂႃႇတၢင်းဝၢၼ်ႈႁူဝ်ပိုၵ်ႉ ။ ၵူၼ်းဝၢၼ်ႈၼမ်ႉပွင်ႈၵေႃႈ ဢွၼ်ၵၼ်ပၢႆႈ ၊ ၵူၼ်းပႆၸွမ်းတၢင်းသမ်ႉပေႃးဢမ်ႇမီး ၊ ဢွၼ်ၵၼ်ၶတ်းသေႃး ၽၵ်းတူႁိူၼ်းသေပၢႆႈ - ၵူၼ်းၼုမ်ႇၼမ်ႉပွင်ႈ ဢမ်ႇၶႂ်ႈဢွၵ်ႇၸိုဝ်ႈ ၵေႃႉၼိုင်ႈလၢတ်ႈ ။


သိုၵ်းမၢၼ်ႈ (တပ်ႉမတေႃႇ) တင်း တပ်ႉသိုၵ်းၸိုင်ႈတႆး (SSPP/SSA) ၼႆႉ ၶိုၼ်းတႄႇပဵၼ်ပၢင်တိုၵ်းၵၼ်မႃး ၽွင်းႁူဝ်လိူၼ်မေႊၼႆႉ ၼႂ်းၸႄႈဝဵင်းၵျွၵ်ႉမႄး ပွတ်းတွၼ်ႈၼွင်ပိင် ၊ တေႃႉသၢင်ႇ ၸိူဝ်းၼႆႉ ။ ၾၢႆႇသိုၵ်းမၢၼ်ႈ ၸႂ်ႉပႃးႁိူဝ်းဝိၼ်သိုၵ်းတိုၵ်းၸွႆႈ ။ ယွၼ်ႉပၢင်တိုၵ်းသေ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ပၢႆႈၽေးၼမ်လိူဝ်တိူဝ်းမႃး ၼပ်ႉႁူဝ်ႁဵင် ။ တၢင်းၼမ်ႉမႃႉ ၼမ်ႉပွင်ႈၵေႃႈ ၵူၼ်းဝၢၼ်ႈဢွၼ်ၵၼ်ပၢႆႈ ဝၢၼ်ႈသမ်ႉပေႃးယဵၼ် - ၵူၼ်းၼုမ်ႇၼမ်ႉပွင်ႈ သိုပ်ႇလၢတ်ႈၼင်ႇၼႆ ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်ၸုမ်းဢၼ်ပႆႇတူဝ်ႈတၼ်း တႃႇတေလူင်းလၢႆးမိုဝ်း ၵိုတ်းယိုဝ်းတူဝ်ႈမိူင်း (NCA) ၼႆသေတႃႉ ပဵၼ်ၸုမ်းဢၼ်ၵေႃႇသၢင်ႈလွင်ႈငမ်းယဵၼ် လူင်းလၢႆးမိုဝ်းၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ်ဝႆႉ တင်း လူင်ပွင်ၸိုင်ႈတဵင်းၸဵင်ႇ ပူၼ်ႉမႃးမိူဝ်ႈႁူဝ်ပီ 2012 ။