ဝၼ်းတီႈ 17-19 /05/2016 ၸဝ်ႈၼႃႈတီႈၾၢႆႇတူၺ်းလွမ်သဵၼ်ႈတႃႈသၢႆတၢင်းလႄႈၾၢႆႇၵဵဝ်ႇၶွင်ႈ ႁူမ်ႈၵၼ်ၸတ်းပၢင်ပၼ်တၢင်းႁူႉလွင်ႈႁေႃႈရူတ်ႉၵႃး / ရူတ်ႉၶိူင်ႈ လႄႈပၵ်းပိူင်မၢႆမီႈၼိူဝ်သဵၼ်ႈ တႃႈသၢႆတၢင်း ။ ၸတ်းႁဵတ်းၵႂႃႇတီႈပွၵ်ႉ4 ဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ မီးပီႈၼွင်ႉ တႆး ၊ ဝ ၊ ၶႄႇ ၶဝ်ႈႁူမ်ႈလဵပ်ႈႁဵၼ်းၸမ် 50 ၵေႃႉ ။
ၸၢႆးလၢဝ်ဝၼ်း ၽူႈလဵပ်ႈႁဵၼ်းၵေႃႉၼိုင်ႈလၢတ်ႈဝႃႈ -“ ယိၼ်းၸူမ်းထိုင်ၸဝ်ႈၼႃႈတီႈၾၢႆႇပလိၵ်ႈ ၶဝ်ဢၼ်မႃးပၼ်တၢင်းႁူႉၸိူင်ႉၼႆ ၵူၼ်းမိူင်းၵေႃႈတေႁူႉပွင်ႇလွင်ႈၶပ်းရူတ်ႉပေႃးယဝ်ႉၵေႃႈတေလူတ်း ယွမ်းလႆႈၽေးၵိုင်ႉၵၢင်ႉၼိူဝ်သဵၼ်ႈတႃႈသၢႆတၢင်းၶႃႈဢေႃႈ ” ။
ၵူၼ်းၼႂ်းပိုၼ်ႉတီႈ ၵေႃႉၼိုင်ႈၵေႃႈ လၢတ်ႈဝႃႈ - “ မီးပၢင်သွၼ်ၸိူင်ႉၼႆၼႆႉမီးၽွၼ်းလီတႄႉတႄႉၶႃႈ ပေႃးပဵၼ်လႆႈၶႂ်ႈႁႂ်ႈၵူၼ်းမိူင်းဢွၼ်ၵၼ်မႃးထွမ်ႇၼမ်ၼမ် ၼင်ႇႁိုဝ်ပေႃးတေႁူႉပၵ်းပိူင်လႄႈလွၵ်း လၢႆးႁေႃးရူတ်ႉၵႃး ” ဝႃႈၼႆ ။
တၢင်းၾၢႆႇၸဝ်ႈၼႃႈတီႈၽူႈမီးပုၼ်ႈၽွၼ်းၶဝ်တေႁဵတ်းပၼ်ဝႂ်ၶပ်းၶီႇ (ဝႂ်ၶႂၢင်ႉႁေႃႈရူတ်ႉၵႃး ) ၼႂ်းဝၼ်းတီႈ 21-22 /05/2016 ၼႆႉတီႈလုမ်းပၢၼ်းသေး ပွၵ်ႈ 1 ဝဵင်းတၢင်ႉယၢၼ်း ၸိုင်ႈတႆး ပွတ်းႁွင်ႇ ။
ၼႂ်းပၵ်းပိူင်ၵၢၼ်ႁေႃႈရူတ်ႉၵႃးယၢမ်းလဵဝ်ၼႆႉပေႃးႁေႃႈရူတ်ႉၶိူင်ႈၸိုင်တေလႆႈမီးဝႂ်ၶပ်းၶီႇ (ဝႂ်ၶႂၢင်ႉႁေႃႈရူတ်ႉၵႃး) သႂ်ႇမၢၵ်ႇႁူဝ်ႁေႉၽေးလိူဝ်ၼၼ်ႉလုၵ်ႈဢွၼ်ႇဢႃယုတႅမ်ႇလိူဝ်18 ပီတေဢမ်ႇလႆႈႁေႃႈရူတ်ႉၶိူင်ႈ ၊ ရူတ်ႉၵႃးဝႃႈၼႆႈ ။
တႄႇဝၼ်းတီႈ 01/06/2016 ၼႆႉၵႂႃႇတၢင်းၾၢႆႇၸဝ်ႈၼႃႈတီႈတေၵူတ်ႇထတ်းႁၢဝ်ႈႁႅင်း သင်ဢမ်ႇ ႁဵတ်းၸွမ်းၼင်ႇပၵ်းပိူင်မၢႆမီႈၸိုင် တေၺႃးတၢမ်ႇငိုၼ်း 30,000 ၵျၢတ်ႉဝႃႈၼႆ ။