ၸိုင်ႈတႆးပွတ်းဢွၵ်ႇၶူင်းတေၸတ်းပၢင်ၶႄႉၶႅင်ႇၸၢႆးမႃႇၶႅင်ႁႅင်းၵိုမ်းလႄႈၼၢင်းႁၢင်ႈလီလဝ်းဝိုၼ်း

ၸိုင်ႈတႆးပွတ်းဢွၵ်ႇၶူင်း ဝဵင်းတႃႈၶီႈလဵၵ်း တေၸတ်းႁဵတ်းပၢင်ၶႄႉၶႅင်ႇၸၢႆးမႃႇၶႅင်ႁႅင်းၵိုမ်းၼၢင်း ႁၢင်ႈလီလဝ်းဝိုၼ်းၼႂ်းဝူင်ႈႁႅၵ်ႈလိူၼ်ၵျူၼ်ႊတေမႃးၼႆႉ ။

ဝၼ်းတီႈ04/06/2016 တီႈၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ တေၸတ်းႁဵတ်းပၢင်ၶႄႉၶႅင်ႇ ၸၢႆးမႃႇၶႅင်ႁႅင်းၵိုမ်းၼၢင်းႁၢင်ႈလီလဝ်းဝိုၼ်း ။ ၼႂ်းပၢင်ပွႆးၼႆႉတေမီးပၢင်ၶႄႉၶႅင်ႇ 5 သႅၼ်း (ယၢင်ႇ) မိူၼ်ၼင်ႇ 1. ၸၢႆးၵၢမ်ႈၼိူဝ်ႉလူင် ၊ 2. ၸၢႆးတူဝ်ၶိင်းမင်ႈၶိူင်ႈ ၊ 3. ၸၢႆးၾႅတ်ႇသျိၼ်ႇ (Fastion) ၊ 4. ယိင်းတူဝ်ၶိင်းမင်ႈၶိူင်ႇ ၊ တၢင်းသုင်တႂ်ႈ 160 သႅၼ်းတီႊမဵတ်ႉ - ယိင်းတူဝ်ၶိင်းမင်ႈၶိူင်ႇ တၢင်း သုင်160 သႅၼ်းတီႊမဵတ်ႇၶိုၼ်ႈ + ၸိူဝ်းၼႆႉ ၸတ်းႁဵတ်းတီႈႁူင်းႁေႃးဢွင်ႇမျႅတ်ႉ ဝဵင်းတႃႈၶီႈ လဵၵ်း ၸိုင်ႈတႆးပွတ်းဢွၵ်ႇ ။


ၸၢႆးႁိၼ်ပဝ်း (ၶျိတ်ႉငူၺ်ႇ) ၸၢႆးမႃႇၶႅင်ႁႅင်းၵိုမ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ - “ ၵၢၼ်လဵၼ်ႈ ႁႅင်းဢၼ်ဝႃႈၼႆႉ မၼ်းဢမ်ႇၸႂ်ႈတႃႇၶဝ်ႈၶႄႉၶႅင်ႇၵူၺ်း ၵူၼ်းမိူင်းၵူႈၵေႃႉ ထုၵ်ႇလီဢွၼ်ၵၼ်လဵၼ်ႈ ပၼ်ႁႅင်း ။ၵၢၼ်လဵၼ်ႈႁႅင်းၼႆႉမၼ်းၵမ်ႉၸွႆႈပၼ်လွင်ႈပၢႆးယူႇလီႁဝ်းႁဵတ်းႁႂ်ႈပၢႆးယူႇလီႁဝ်းၶႅမ်ႉဢႃယု ၵေႃႈယိုၼ်းယၢဝ်းဝႃႈၼႆ ။ လိူဝ်ၼၼ်ႉယင်းၸွႆႈႁႄႉၵင်ႈတၢင်းပဵၼ်မိူၼ်ၼင်ႇလိူတ်ႈၶိုၼ်ႈ ၊ လိူတ်ႈဝၢၼ် ၊ လိူတ်ႈၸဵမ်း၊တၢင်းပဵၼ်ႁူဝ်ၸႂ်ၵပ်ႉၸိူဝ်းၼႆႉၵူၺ်းဢမ်ႇၵႃးၵူၼ်းၼုမ်ႇတီႈလႆႈၸႂ်လဵၼ်ႈႁႅင်းယင်းတေ ယၢၼ်ၵႆယႃႈမဝ်းၵမ်လူးၵွၼ်ႇ။ပေႃးပဵၼ်လႆႈထုၵ်ႇလီလဵၼ်ႈႁႅင်းပၼ်ၼိုင်ႈဝၼ်းလႂ် 30 မိၼိတ်ႉ ၽူႈၸၢႆးပႆတၢင်းပၼ် 7,000 ယၢင်ႈ ၼၢင်းယိင်းသမ်ႉပႆတၢင်းပၼ်ၼိုင်ႈဝၼ်းလႂ် 6,000 ယၢင်ႈ  တေႃႇၼိုင်ႈဝၼ်း ” ဝႃႈၼႆ ။


ပၢင်ၶႄႉၶႅင်ႇၼႆႉပိုတ်ႇႁပ်ႉၽူႈသူၼ်ၸႂ်လူင်းသဵၼ်ႈသၢႆမၢႆတႄႇဢဝ်မိူဝ်ႈၼႆႉ တေႃႇထိုင် ဝၼ်းတီႈ 25 /05/2016 ၼႆႉ - ဝႃႈၼႆ ။


လိူဝ်ၼၼ်ႉတီႈဝဵင်းလိူဝ်ႇၵေႃႈတေၸတ်း ဝၼ်းတီႈ 5/06/2016 ဝၼ်းတီႈ 18/06/2016 ၼႆႉသမ်ႉ တေၸတ်းပဵၼ်ၸၼ်ႉမိူင်းႁူမ်ႈတုမ်ပတ်းပိုၼ်ႉ တီႈတႃႈၵုင်ႈ - ဝႃႈၼႆ ။