ဝၼ်းတီႈ 29/05/2016 ယၢမ်း 10:00-16:00 မူင်း ၸွမ်သိုၵ်းယွတ်ႈသိုၵ်း ဢွၼ်ႁူဝ်ၼမ်းၼႃး ၵႂႃႇဢႅဝ်ႇယိမ်ႈသူႇၸႂ်း ပၼ်ႁႅင်း ပီႈၼွင်ႉပေႃႈမႄႈၵူၼ်းမိူင်း ၸိူဝ်းပဵၼ်ၸၢဝ်းတႆး ၊ ပဢူဝ်း လႄႈ ဢၢင်းသႃး တီႈဝၢၼ်ႈလိၼ်လမ် တင်း ဝတ်ႉဝၢၼ်ႈလွႆသၵ်း ၸႄႈဝဵင်းယွင်ႈႁူၺ်ႈ ၸိုင်ႈတႆး ပွတ်းၸၢၼ်း ယိူင်းဢၢၼ်း တႃႇၵၢၼ်ၽွမ်ႉႁူမ်ႈ ၸၢဝ်းၶိူဝ်းၼႂ်းမိူင်းတႆး (Shan State National Unity) ႁႂ်ႈယူႇၸွမ်းၵၼ်ၵတ်းၵတ်းယဵၼ်ယဵၼ် မိူၼ်မိူဝ်ႈပၢၼ်ဢွၼ်တၢင်း သိုၵ်းလုမ်ႈၾႃႉ ၵမ်းသွင်ၼၼ်ႉ ႁႂ်ႈလႆႈ ၼႆယဝ်ႉ ။
ၸွမ်သိုၵ်းယွတ်ႈသိုၵ်း တိုၵ်းသူၼ်းပၼ်ႁႅင်းဝႃႈ “ ပီႈၼွင်ႉတႆး ပဢူဝ်း ဢၢင်းသႃး ၼႂ်းထုင်ႉၼႆႉ ယၢမ်ႈယူႉၸွမ်းၵၼ်မႃးၵတ်းၵတ်း ယဵၼ်ယဵၼ် ပဵၼ်ပီယၢဝ်းၶၢဝ်းႁိုင် ။ မိူဝ်းၼႃႈၵေႃႈ ႁႂ်ႈလႆႈယူႇၸွမ်းၵၼ်ၵႂႃႇၵတ်းၵတ်း ယဵၼ်ယဵၼ် ။ မီးပၼ်ႁႃသင်ၵေႃႈ တၢင်း RCSS လႄႈ PNO တေႁူမ်ႈၵၼ် ဢဝ်ပုၼ်ႈၽွၼ်းၸွႆႈ ” ဝႃႈၼႆ ။
ၸဝ်ႈပိုၼ်ၶမ်း တီႈၵိူဝ်းၵုမ် RCSS/SSA သပ်းလႅင်းလၢတ်ႈၼႄ “ ၶေႃႈယိူင်းဢၢၼ်း CSSU သွင်ၶေႃႈ - 1. ၵမ်ၸႃႈတႃႈမိူင်းတႆး ႁႂ်ႈမီးၼႂ်း မိုဝ်းၵူၼ်းမိူင်းတႆး ။ 2. ၵူၼ်းမိူင်းတႆး တေလႆႈႁူမ်ႈၵၼ်တႅမ်ႈပိုၼ်ႉထၢၼ် လၵ်းပိူင်ၵၢၼ်မိူင်း မိူင်းတႆး ” ဝႃႈၼႆ ။
ၵဵဝ်ႇၵပ်းလူၺ်ႈ ၶၢဝ်းတၢင်းလွင်ငမ်းယဵၼ် ၸွမ်သိုၵ်းယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး RCSS/SSA လႆႈဢႅဝ်ႇယိမ်ႉသူႇၸႂ်း ပီႈၼွင်ႉပေႃႈမႄးၵူၼ်းမိူင်း ၼႂ်းၸိုင်ႈတႆး ပွတ်းၸၢၼ်း လၢႆလၢႆၸႄႈဝဵင်း ဝႃႈၼႆ ။
ပူၼ်ႉမႃး ဝၼ်းတီႈ 24/05/2016 ယၢမ်းၵၢင်ၼႂ် ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်း ၸိုင်ႈတႆး ၸွမ်သိုၵ်းယွတ်ႈသိုၵ်း ဢွၼ်ႁူဝ်ၼမ်းၼႃႈ လုၵ်ႈၸုမ်း 10 ပၢႆ ၵႂႃႇဢႅဝ်ႇယိမ်ႉသူႇၸႂ်း Dr. လိၼ်းထုတ်ႉ ၸွမ်ၽွင်းလူင် မိူင်းတႆး တီႈႁွင်ႈပၢင်ၵုမ်လူင်ပွင်ၸိုင်ႈ မိူင်းတႆး ဢၼ်မီးတီႈ ဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်း ၼႆယဝ်ႉ ။