ဝၼ်းတီႈ 28/05/2016 ယၢမ်း 08:00-16:00 မူင်း ၸုမ်းပွင်ၵၢၼ် ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၼွင်ႉၶဵဝ် ဢွၼ်ႁူဝ်ၼမ်းၼႃႈ ၸတ်းႁဵတ်းပၢင်ႁူပ်ႉထူပ်း ၶူးသွၼ် တႃႇႁၢင်ႈႁႅၼ်းပူင်သွၼ် လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈမၢၼ်ႈ တီႈလုမ်းၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၼွင်ၶဵဝ် ၸိုင်ႈတႆး ပွတ်းႁွင်ႇ ။
ၸၢႆးဢွင်ႇမိူင်း ႁူဝ်ပဝ်ႈပႃႊတီႊႁူဝ်သိူဝ် SNLD လၢတ်ႈဝႃႈ “ မိူဝ်ႈပီ ပူၼ်ႉမႃး ၶူးသွၼ်ႁဝ်း ဢမ်ႇ လႆႈငိုၼ်းလိူၼ်ၵၼ်၊ ပီၼႆႉ ႁဝ်းၶႃႈၸုမ်းပွင် ၵေႃလိၵ်ႈလၢႆးလၢႆလၢႆၵေႃႉ တင်ႇလိၵ်ႈထိုင် တီႈလူင် ပွင်ၸိုင်ႈ၊ ၵမ်းၼႆႉ လူင်ပွင်ၸိုင်ႈ ၸင်ႇလႆႈတမ်းဝၢင်းလူင်းမႃး ငိုၼ်းလိူၼ် တႃႇၶူးသွၼ် ၼိုင်ႈၵေႃႉ လႂ် 30000 ပျႃး တေႃႇလိူၼ် ။
ပီၼႆႉ ႁဝ်းၶႃႈတေၶတ်းၸႂ် သႂ်ႇႁႅင်းႁႂ်ႈ တိူဝ်းတွၼ်းမႃး လိူဝ်ၵဝ်ႇထႅင်ႈ ၵွပ်ႈၼႆႉ ၸင်ႇလႆႈႁွင်ႉၶူးသွၼ်ၶဝ် ၶိုၼ်းၶဝ်ႈမႃးတင်းၼမ် ” - ဝႃႈၼႆ ။ ပီ 2016 ၼႆႉပၢင်သွၼ်လိၵ်ႈတႆး တႃႇပူင်သွၼ်ၼႂ်းႁူင်းႁဵၼ်းလူင်ပွင်ၸိုင်ႈမၢၼ်ႈ တင်းမူတ်း 60 ပၢႆ ၊ ၶူးသွၼ် တေပူင်သွၼ်သမ်ႉတင်းမူတ်းမီး 120 ပၢႆ ၼႆယဝ်ႉ ။
ၶူးသွၼ်ယိင်းၵေႃႉၼိုင်ႈလၢတ်ႈဝႃႈ “ လွင်ႈၼိုင်ဝႂ် ၼႂ်းႁူင်းႁဵၼ်းလူင်ပွင်ၸိုင်ႈ မီးၸိူင်ႉႁိုဝ်၊ တႃႇတႆးႁဝ်းၵေႃႈ ယႃႇႁႂ်ႈတူၵ်းတႅမ်ႇၼၼ်ႉ ၸင်ႇလႆႈႁဵတ်းပၢင်ၵုမ်သေ ၶူးသွၼ်ႁဝ်း ၸိူဝ်းတေၵႂႃႇသွၼ်ၼၼ်ႉ ႁဝ်းတေလႆႈၼုင်ႈၶူဝ်း ၸိူင်ႉႁိုဝ်၊ ႁဝ်းၶႃႈ ႁၢမ်ႈၵၼ် ယႃႇပေၼုင်ႈၶူဝ်းၵူၼ်းႁိူၼ်းသေၵႂႃႇသွၼ် ႁႂ်ႈလႆႈၼုင်ႈသိၼ်ႈတႆး ႁဝ်းၶႃႈၵႂႃႇ တေႃႈလဵဝ် တႃႇၶူးသွၼ်ယိင်းတႄႉ ႁဝ်းၶႃႈလိူၵ်ႈဝႆႉသိၼ်ႈတႆးသီၶဵဝ် လႄႈ သိူဝ်ႈၶၢဝ်ဝႆႉယဝ်ႉ ” ဝႃႈၼႆ ။
ႁူင်းႁဵၼ်းလူင်ပွင်ၸိုင်ႈမၢၼ်ႈ တႄႇပိုတ်မႂ်ႇ ဝၼ်းတီႈ 01/06/2016 ၊ ၶၢဝ်းယၢမ်း သွၼ်ႁဵၼ်းလိၵ်ႈတႆး တေတႄႇ ဝၼ်သုၵ်း 07:30-08:30 မူင်း ဝၼ်းၸၼ်ထိုင် ဝၼ်းသုၵ်း ၊ ၼိုင်ႈႁူင်းႁဵၼ်းလႂ် တေဝႆႉ ၶူးသွၼ် 2-3 ၵေႃႉ ၊ ပပ်ႉႁဵၼ်းသွၼ်သမ်ႉ တေၸႂ်ႉတိုဝ်း ပပ်ႉႁဵၼ်းၶူးပူင်သွၼ် ၸၢႆးၾႃႉ ႁဵတ်းဢွၵ်ႇ တေသွၼ်ပၼ်လုၵ်ႈဢွၼ်ႇ ၸၼ်ႉငဝ်ႈ ၸၼ်ႉလဵဝ် ဝႃႈၼႆ ။ မိူဝ်ႈ ပီ 2015 ၼၼ်ႉ လႆႈ ၶႂၢင်ႉပိုတ်ႇသွၼ်လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈ တင်းမူတ်း 23 လင် / ၵျွင်း ၊ ၶူးသွၼ်ၸၢႆး / ယိင်း မီး 54 ၵေႃႉ ၼႆယဝ်ႉ ။