ၾႆးမႆႈႁိူၼ်းပီႈၼွင်ႉဝၢၼ်ႈၵဵင်းလဵၵ်း မီးလွင်ႈလူႉသုမ်းၼမ်

ၾႆးမႆႈႁိူၼ်းၵူၼ်းမိူင်း ဝၢၼ်ႈၵဵင်းလဵၵ်း ဝဵင်းၵဵင်းတုင် ၊ ယွၼ်ႉၾႆးၾႃႉသျွတ်ႊ ယၢမ်းႁူဝ်ၼႂ်၊ ၵူၼ်းဝၢၼ်ႈၸွႆႈၵၼ် ၶႄၾႆးလႄႈ မႆႈၵႂႃႇလင်ၼိုင်ႈ ၊ မီးလွင်ႈဝၢတ်ႇၸဵပ်းလႄႈလူႉသုမ်းၼမ် ။


ဝၼ်းတီႈ 18/05/2016 ယၢမ်း 03:00 မူင်းပၢႆ ၊ ၵိူတ်ႇပိူင်ပဵၼ်ၾႆးၾႃႉသျွတ်ႊ တီႈႁိူၼ်းၸၢႆးၵဵင် ဝၢၼ်ႈၵဵင်းလဵၵ်း ပွၵ်ႉ 4 ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ။ ယွၼ်ႉၾႆးၾႃႉသျွတ်ႊၼႆႉသေ ၵူၼ်းႁိူၼ်းဝၢတ်ႇၸဵပ်း 3 ၵေႃႉလႄႈၶူဝ်းႁိူၼ်းလူႉသုမ်းတင်းၼမ်လၢႆ - ၼႆယဝ်ႉ ။

ၸၢႆးဝုၼ်း ၽူႈၵႂႃႇၸွႆႈၶႄၾႆးလၢတ်ႈဝႃႈ - “ ၾႆးမႆႈတင်းႁိူၼ်းမူတ်း၊ ဢမ်ႇတၼ်းလႆႈၶူဝ်းၶွင်းသင်သေပိူင် ။ ၼႂ်းႁိူၼ်းၶဝ်ဢၼ်တၼ်းလႆႈဢဝ်ဢွၵ်ႇပူၼ်ႉၾႆးတႄႉ မီးရူတ်ႉၶိူင်ႈ 3 လမ်းၵူၺ်း ”- ဝႃႈၼႆ ။


ၵဵဝ်ႇၵပ်းလွင်ႈၾႆးမႆႈၼႆႉ ၵူၼ်းဝၢၼ်ႈၵဵင်းလဵၵ်း ဢွၼ်ၵၼ်ၸွႆႈၶႄထိုင်ၾႆး လင်ႁိူၼ်းဢၼ်ၾႆးမႆႈၼႆႉ ပေႃးမွတ်ႇယဝ်ႉ ရူတ်ႉၵႃးၶႄၾႆး 6 လမ်း ၸင်ႇႁွတ်ႈမႃးထိုင် - ၼႆယဝ်ႉ ။


“ ယွၼ်ႉဝႃႈရူတ်ႉၵႃးၶႄၾႆးၶဝ်ႈဝၢၼ်ႈၽိတ်း ၊ ၶဝ်ပွင်ႇဝႃႈပဵၼ်ဝၢၼ်ႈၵဵင်းလဵၵ်းၵဝ်ႇ တၢင်းၶူင်ႇႁိူဝ်းမိၼ် ၊ ၵူၺ်းၵႃႈၾႆးမႆႈသမ်ႉပဵၼ်ဝၢၼ်ႈၵဵင်းလဵၵ်းမႂ်ႇ ပွၵ်ႉ 4 ၊ ၽိူဝ်ႇရူတ်ႉၶႄၾႆးမႃးႁွတ်ႈထိုင်ၵေႃႈ ၾႆးၵမ်ႈၽွင်ႈ ပေႃးမွတ်ႇၵႂႃႇယဝ်ႉ ”- ၸၢႆးဝုၼ်း သိုပ်ႇလၢတ်ႈၼင်ႇၼႆ ။


ႁိူၼ်းၸၢႆးၵဵင်ၼႆႉ ပဵၼ်ႁိူၼ်းသွင်ၸၼ်ႉ ၊ ၸၼ်ႉတႂ်ႈၵေႃႇဢုတ်ႇဝႆႉ ၊ ၸၼ်ႉၼိူဝ်သမ်ႉပဵၼ်ၾႃပႅၼ်ႈ ၊ ၵူၼ်းယူႇသဝ်းၼႂ်းႁိူၼ်းတင်းမူတ်းမီး 5 ၵေႃႉ ။ ၼ်ႂ်းၼၼ်ႉပႃးလုၵ်ႈဢွၼ်ႇလဵၵ်ႉၵေႃႉၼိုင်ႈ ၊ ၵူၼ်းႁိူၼ်း 5 ၵေႃႉၼၼ်ႉ လႆႈဝၢတ်ႇၸဵပ်းယွၼ်ႉၾႆးမႆႈ 3 ၵေႃႉ ၊ တေႃႈလဵဝ်သူင်ႇယူတ်းယႃတူဝ်ဝႆႉတီႈ ႁူင်းယႃၵဵင်းတုင် - ၼႆယဝ်ႉ ။

ၵဵဝ်ႇၵပ်းလွင်ႈၾႆးမႆႈၼႆႉသေ လွင်ႈလူႉသုမ်းတင်းမူတ်းမႅၼ်ႈၵႃႈႁိုဝ်ပႆႇႁူႉ ၊ ၸဝ်ႈၼႃႈတီႈပလိၵ်ႈၶဝ် လႆႈပိုတ်ႇၶၻီး (ဢမု)ဝႆႉယဝ်ႉ - ၼႆယဝ်ႉ ။