ပၢင်ၵုမ်ၶူၼ်ႉၶႂႃႉလွင်ႈတႆး တေၸတ်းႁဵတ်းထႅင်ႈ တီႈဝဵင်းတူၼ်ႈတီး

ၸုမ်းၶူၼ်ႉၶႂႃႉလွင်ႈတႆးလႄႈ ၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး ႁူမ်ႈၵၼ်ၸတ်းႁဵတ်းပၢင်ၵုမ် တႃႇဝၢင်းၽႅၼ် ၸတ်းပၢင်သွၼ်ၵၢၼ်ၶူၼ်ႉၶႂႃႉလွင်ႈတႆး ၼႂ်းလိူၼ်ၼႃႈ ။ ဢွၼ်တၢင်းသုတ်း တေႁပ်ႉၵူၼ်းၼုမ်ႇ ႁိမ်းသၢဝ်းၵေႃႉ ၸိူဝ်းယဝ်ႉၸၼ်ႉသိပ်းၵမ်ႈၼမ် ။


ဝၼ်းတီႈ 17/05/2016 ယၢမ်း13:00-15:00 မူင်း ၊ ၸုမ်းၶူၼ်ႉၶႂႃႉလွင်ႈတႆးလႄႈ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး ၊ ႁူမ်ႈၵၼ်ၸတ်းႁဵတ်းပၢင်ၵုမ် တႃႇၸတ်းႁဵတ်းပၢင်ပူင်သွၼ် ၵၢၼ်ၶူၼ်ႉၶႂႃႉလွင်ႈတႆး တီႈႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး ၊ ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။ မီးၽူႈယႂ်ႇၵူၼ်းလူင် ၽူႈမီးတၢင်းႁူႉတၢင်းမေႃ လၢႆၵေႃႉလၢႆၸဝ်ႈၶဝ်ႈႁူမ်ႈ - ၼႆယဝ်ႉ ။

ၻွၵ်ႊတိူဝ်ႊၸၢႆးၼေႃႇၶိူဝ်း လၢတ်ႈဝႃႈ - “ ပိူင်လူင်မၼ်းတႄႉ တႃႇတေၶူၼ်ႉၶႂႃႉလွင်ႈတႆးႁဝ်း ၊ လွင်ႈၾိင်ႈႁဝ်း ထုင်းႁဝ်း ၵူႈသမ်ႇၵူႈပိူင် ။ ပေႃးယဝ်ႉ ၸိူဝ်းဢၼ်လႆႈမႃးလိၵ်ႈၵူႈသမ်ႇၵူႈပိူင်ၼၼ်ႉ ၼင်ႇႁိုဝ်ႁႂ်ႈတႆးႁဝ်း ပေႃးတေလႆႈႁူႉၼၼ်ႉ တေပိုၼ်ၽႄႈပပ်ႉလိၵ်ႈၵႂႃႇ ။ ယိူင်းဢၢၼ်းဝႆႉ 6 လိူၼ်ၼိုင်ႈပွၵ်ႈ ဢမ်ႇၼၼ်ၵေႃႈ ၼိုင်ႈပီၼိုင်ႈပွၵ်ႈ ႁႂ်ႈလႆႈပိုၼ်ၽႄႈၵႂႃႇ ။ ဢွၼ်တၢင်းသုတ်းတႄႉ ပေႃးလိူၼ်ၻီႊသႅမ်ႊပိူဝ်ႊတေမႃးၼႆႉ တေဢၢၼ်းဢွၵ်ႇပပ်ႉ New Little ”- ဝႃႈၼႆ ။


ၵဵဝ်ႇၵပ်းလူၺ်ႈပၢင်သွၼ် ၵၢၼ်ၶူၼ်ႉၶႂႃႉလွင်ႈတႆးၼႆႉသေ ဢွၼ်တင်းသုတ်း တေဢၢၼ်းႁွင်ႉၵူၼ်းၼုမ်ႇလႄႈ ၵူၼ်းၸိူဝ်းၶႂ်ႈလဵပ်ႈႁဵၼ်း ၼႂ်းၸႄႈဝဵင်းတူၼ်ႈတီး ဢွၼ်တၢင်း ၼႆယဝ်ႉ ။


ၼၢင်းၼူၼ်းမူဝ် ၽူႈပွင်ၵၢၼ် ၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး လၢတ်ႈဝႃႈ - “ ၵမ်းဢွၼ်တၢင်းသုတ်း ႁဝ်းၶႃႈဢဵၼ်းဢၢၼ်းဝႆႉ ၵူၼ်း 15-20 ၵေႃႉ ၊ တေႁပ်ႉလုၵ်ႈဢွၼ်ႇၼုမ်ႇႁဝ်း ၸိူဝ်းယဝ်ႉၸၼ်ႉသိပ်းၵမ်ႈၼမ်။ ၵူၼ်းမႃးၶိုၼ်ႈႁဵၼ်းသမ်ႉ ၵမ်ႈၼမ်တေႁွင်ႉမွၵ်ႇ (ၽိတ်ႈမွၵ်ႇ) ၸိူဝ်းယူႇသဝ်း ၼႂ်း ၸႄႈဝဵင်းတူၼ်ႈတီး ဢွၼ်တၢင်းၵွၼ်ႇ ။ ႁႂ်ႈလႆႈပေႉတူဝ်ၽႂ်မႃးသေ မႃးၶိုၼ်ႈ ၊ မိူၼ်ၼင်ႇဝႃႈ ယူႇတီႈႁိူၼ်းၽႂ်မၼ်းသေမႃးၶိုၼ်ႈ လဵပ်ႈႁဵၼ်း ။ လွင်ႈၵႃႈၸႂ်ႉၸၢႆႇတႄႉ ႁႂ်ႈလႆႈပဵၼ်ၶွင်တူဝ်ၸဝ်ႈၵဝ်ႇ ။ လိူဝ်ၼၼ်ႉသမ်ႉ တေဢၢၼ်းမွၵ်ႇထိုင်ပႃး ၸုမ်းတူင်ႉၼိုင်တူင်ႇဝူင်းတႆး ၼႂ်းၸႄႈဝဵင်းတူၼ်ႈတီး ၸိူဝ်းၼႆႉပႃးထႅင်ႈယူႇ ”- ဝႃႈၼႆ ။


ၶူးဢၼ်တေမႃးပူင်သွၼ်ပၼ်ပဵၼ် တွၵ်ႊတိူဝ်ႊၸၢႆးၶမ်းမိူင်း ၊ မၼ်းၸၢႆးတေဢွၼ်ႁူဝ်ၼမ်းၼႃႈသေ ၾိုၵ်းပၼ်ပူင်သွၼ်ပၼ် လၢႆးတႅမ်ႈတၢင်ႇၽိုၼ်လိၵ်ႈ လၢႆးၶူၼ်ႉၶႂႃႉ လၢႆးသွၵ်ႈႁႃ - ၸဵမ်ၸိူဝ်းၼႆႉ ။


ပၢင်သွၼ်ၶူၼ်ႉၶႂႃႉလွင်ႈတႆး ပွၵ်ႈၵမ်းႁႅၵ်ႈၼႆႉ တေပိုတ်ႇပူင်သွၼ်ပၼ် ၼႂ်းဝၼ်းတီႈ 09/06/2016 တီႈႁူင်းႁေႃ ၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး ၶၢဝ်းတၢင်း 3 လိူၼ် ၊ ၼိုင်ႈဝူင်ႈလႂ် တေပူင်သွၼ်ပၼ် 3 ဝၼ်း ၊ ၼိုင်းဝၼ်းလႂ် တေပူင်သွၼ်ပၼ်ၶၢဝ်းယၢမ်း 1 ၸူဝ်ႈမူင်း - ၼႆယဝ်ႉ ။


ပူၼ်ႉမႃးဝၼ်းတီႈ 26-27/04/2016 ၸတ်းႁဵတ်းပၢင်ၵုမ် တီႈဝဵင်းတႃႈၵုင်ႈ ၊ ၸင်ႇၶွတ်ႇၽွတ်ႈတင်ႈၶိုၼ်ႈမႃး ၸုမ်းၶူၼ်ႉၶႂႃႉလွင်ႈတႆး ။ ၽူႈဢွၼ်ႁူဝ်ၼမ်းၼႃႈ ပဵၼ်ၸဝ်ႈတူၼ်ႈၶူး ထၢတ်ႈတေႃႇလွႆလႅမ် ၊ ၻွၵ်ႊတိူဝ်ႊ ပၺ်ၺႃၼၼ်တ ၊ ၻွၵ်ႊတိူဝ်ႊ ၸၢႆးဢွင်ႇထုၼ်း ၊ ၶူးသွၼ်လူင် လုင်းတၢင်းၵႄး ၊ ၻွၵ်ႊတိူဝ်ႊ  ၸၢႆးလူင်းၵႅဝ်ႈသၢမ် ။ ၽူႈႁပ်ႉပုၼ်ႈၽွၼ်းပဵၼ်ႁူဝ်ပဝ်ႈ ပဵၼ်ၸဝ်ႈတူၼ်ၶူး ၻွၵ်ႊတိူဝ်ႊ ထမ်မသႃမိ ၶမ်းမၢႆ ႁူမ်ႈပႃးလူၺ်ႈ ၽူႈပွင်ၵၢၼ်သင်ၶၸဝ်ႈလႄႈ ၵူၼ်းႁိူၼ်း 15 ၵေႃႉ - ၼႆယဝ်ႉ ။