ဝၼ်းတီႈ 01/09/2017 ၸၼ်ႉၸွမ်တူင်ႇၵူၼ်းတႆး Shan Community College ၸတ်းပၢင်ၵႅဝ်ႈႁပ်ႉလုၵ်ႈ ႁဵၼ်းမႂ်ႇ ၸၢႆး 25 ၵေႃႉ ယိင်း 25 ၵေႃႉ ႁူမ်ႈတင်းမူတ်းမီး 50 ၵေႃႉ သေဝၼ်းတီႈ 04/09/2017 တႄႇၶဝ်ႈႁွင်ႈ ႁဵၼ်းပူင်သွၼ်ၵႂႃႇယဝ်ႉဝႃႈၼႆ။
ၸၼ်ႉၸွမ်တူင်ႇၵူၼ်းတႆးၼႆႉ တႄႇပိုၼ်ၽၢဝ်ႇႁပ်ႉလုၵ်ႈႁဵၼ်းမိူဝ်ႈလိူၼ်ၵျုၼ်ႊ 2017 တေႃႇဝၼ်းတီႈ 5 ဢေႃႊ ၵတ်သ်ႊ 2017 သေ မီးလုၵ်ႈႁဵၼ်းၼႂ်းၸိုင်ႈတႆးပွတ်းၸၢၼ်း၊ ပွတ်းႁွင်ႇ၊ တိူင်းၸႄႈၵႅင်း၊ တိူင်းပႃႇၵိူဝ်၊ တိူင်းတႃႈ လိူဝ်ႇ ၸိူဝ်းၼႆႉ မႃးတၢင်ႇလဝ်ႈတႃႇၶိုၼ်ႈႁဵၼ်း 100 ပၢႆ ဢိင်ၼိူဝ်ၼမ်ႉၵတ်ႉသေ ဢၼ်ထုၵ်ႇၶတ်း လိူၵ်ႈၶဝ်ႈ ႁဵၼ်းမီး 50 ၵေႃႉၵူၺ်းဝႃႈၼႆ။
ၼၢင်းႁဵဝ်းသႅင် ၶူးသွၼ်ၸၼ်ႉၸွမ် လၢတ်ႈဝႃႈ - “ ဢိင်ၼိူဝ်ၼမ်ႉၵတ်ႉလိၵ်ႈဢိင်းၵလဵတ်ႈ၊ လိၵ်ႈတႆးသေႁဝ်း ၶႃႈ ၶတ်းလိူၵ်ႈဢဝ် 50 ၵေႃႉ၊ ပေႃးမႃးတူၺ်းၼႂ်းတႆးႁဝ်းဢၼ်မီးၸႂ်ၶႂ်းႁဵတ်း ၵၢၼ်တႃႇၵူၼ်းတင်းၼမ်ၵေႃႈ ယင်းတိုၵ်ႉဢေႇယူႇ ၵူၼ်းဢၼ်မီးပိုၼ်ႉထၢၼ်ပၢႆးပၺ်ၺႃ ဢၼ်ပွင်ႇၸႂ်ငဝ်းလၢႆးၵၢပ်ႈပၢၼ် ဝၢၼ်ႈမိူင်းၵေႃႈ ဢေႇႁႅင်းၼႃႇ ၵွပ်ႈၼၼ်လႄႈ ၸၼ်ႉၸွမ်ႁဝ်းၶႃႈၼႆႉ ပဵၼ်တၢင်းလိူၵ်ႈ ဢၼ်ၼိုင်ႈတွၼ်ႈတႃႇၵူၼ်းၼုမ်ႇမိူင်း တႆး လႆႈႁဵၼ်းပိုၼ်ႉႁူႉ ပၢႆးႁၼ်တႃႇပူၵ်းပွင်ပိုၼ်ႉတီႈ ၽႂ်မၼ်း၊ မီးၼမ်ႉၵတ်ႉၶိုတ်းတၼ်းပိူၼ်ႈလႄႈ ပဵၼ်ငဝ်း လၢႆးၸိူင်ႉႁိုဝ်မႃးၵေႃႈႁႂ်ႈႁပ်ႉမိုဝ်းလႆႈ ” ဝႃႈၼႆ။
တီႈၸၼ်ႉၸွမ်တူင်ႇၵူၼ်းတႆး (College ) ၼႆႉပီဢွၼ်တၢင်းသုတ်းတေတႄႇသွၼ် 2 ပၢႆး မိူၼ် ၼင်ႇ 1. ပၢႆးသၢႆႈတူင်ႇဝူင်းၵူၼ်း Social Science လႄႈပၢႆးၸတ်းပွင်ၵၢၼ်မၢၵ်ႈမီး Business Admi nistration မိူဝ်းၼႃႈ မႃးတေၽိူမ်ႉၼမ်မႃးလိူဝ်ၼႆႉ။
ၶူးပူင်သွၼ်ပဵၼ်ၵူၼ်းၼႂ်းၸုမ်းၵေႃတႆး ဢၼ်ၵႂႃႇယဝ်ႉ ၸၼ်ႉၸွမ် ၼွၵ်ႈမိူင်းမႃး မိူၼ်ၼင်ႇ ၸၢႆးၶမ်းမိူင်း၊ ၸၢႆးလႃႉတွင်း၊ ၸၢႆးထုၼ်းသႃႇ၊ ၸၢႆးဢိတ်း၊ ၸၢႆးလႅင်းၸိုၼ်ႈ၊ ၼၢင်းလိူၼ်သႂ်၊ ၼၢင်းၶႅမ်ဝၼ်း၊ ၼၢင်းႁဵဝ်းသႅင်၊ ၸၢႆးထုၼ်းသႃႇ ၊ ၼၢင်းမူၺ်သႅင်၊ ၼၢင်းဝၼ်းလီ ၸိူဝ်းၼႆႉ တင်းမူတ်း မီးမွၵ်ႈ 16 ၵေႃႉ ၊ မိူဝ်းၼႃႈမႃးတေမီး ၶူးၼွၵ်ႈမႃးပူင်သွၼ် Part time ၸူဝ်ႈၶၢဝ်းၵေႃႈတေမီး လိူဝ်ၼၼ်ႉယင်းတေမီးၶူးပူင်သွၼ် လူင်လုင်းၸၢႆးၾႃႈ လူးၵွၼ်ႇဝႃႈၼႆ။