ဝၼ်းတီႈ 14-18/09/2017 လိူၼ်သိပ်းလွင်ႈ 9 ၶမ်ႈ ထိုင် 13 ၶမ်ႈ လုမ်းၵေႃပွင်ၵၢၼ်ႁူင်းႁဵၼ်းထမ်မ ၸိုင်ႈတႆး ဝဵင်းလူင်တူၼ်ႈတီး ဢွၼ်ႁူဝ်ၼမ်းၼႃႈသေ တေပိုတ်ႇပၢင်ၾိုၵ်းၽွၼ်ႉ ပၼ်ၶူးသွၼ်/မေႃသွၼ် တီႈၵျွင်းသၢႆ လႅင်းထမ်း ဝၢၼ်ႈပၢင်ႇလႅင်းသႂ် ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၸဝ်ႈၶူးသီႇရိထမ်မ ၽိပႃလ ၽူႈမၢႆငဝ်ႈငုၼ်းႁူင်းႁဵၼ်းထမ်မ ၸိုင်ႈတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ဢၼ် ႁဝ်းၸဝ်ႈၶဝ် ၸတ်းႁဵတ်းပၢင်ၾိုၵ်းၽွၼ်ႉ မေႃသွၼ်ႁူင်းႁဵၼ်းထမ်မၼႆႉမိူဝ်ႈတႄႇမၼ်း ႁဝ်းတေဢၢၼ်းၸတ်း ႁဵတ်းယႂ်ႇလူင် ၵူၺ်းၵႃႈ မၢင်ပွၵ်ႈမၢင်လႂ်ၼႆႉ ႁဝ်းတေလႆႈတူၺ်းသၢႆငၢႆမၼ်း တီႈယူႇတီႈသဝ်းထႅင်ႈ၊ လွင်ႈၵိၼ် လွင်ႈ ယႅမ်ႉ တႃႇၽူႈႁဵၼ်း။ ၵွပ်ႈၼၼ်လႄႈ ၸင်ႇလႆႈၵႂႃႇၸတ်းႁဵတ်း ၼ်ႂ်းၸႄႈဝဵင်းလႂ် ၸႄႈဝဵင်းၼၼ်ႉ” ဝႃႈၼႆ။
ၶူးသွၼ် ဢၼ်တေပူင်သွၼ် ပၼ်ပဵၼ်ၶူးပူင်သွၼ် တီႈတၢင်ႉယၢၼ်း၊ သႅၼ်ဝီ၊ သီႇပေႃႉလႄႈ ဢိၵ်ႇထႅင်ႈလၢႆလၢႆၸဝ်ႈ ၸဵမ်ၸိူဝ်းၼႆႉ တေႁူမ်ႈၵၼ်သေ ၾိုၵ်းၽွၼ်ႉပၼ် မေႃသွၼ်ၵႂႃႇ ၶၢဝ်းတၢင်း 5 ဝၼ်း ဝႃႈၼႆ။
တေႃႈလဵဝ် ႁူင်းႁဵၼ်းထမ်မၼႆႉ ပိုတ်ႇၸွတ်ႇတူဝ်ႈမိူင်းတႆးပတ်းပိုၼ်ႉယဝ်ႉ။ ပၢင်ၾိုၵ်းၽွၼ်ႉမေႃသွၼ်ႁူင်း ႁဵၼ်း ထမ်မၼႆႉ ၸွမ်းၸႄႈဝဵင်းၽႂ်မၼ်း ဢွၼ်ၸတ်းႁဵတ်းမႃး ၾိုၵ်းၽွၼ်ႉပၼ်မေႃသွၼ် တင်းမူတ်း မီးၵႂႃႇ 53 ပွၵ်ႈ ဝႃႈၼႆ။
ၸဝ်ႈၶူးသီႇရိထမ်မ လၢတ်ႈဝႃႈ တေႃႈလဵဝ် ပပ်ႉသွၼ်ႁဵၼ်း တႃႇလုၵ်ႈဢွၼ်ႇ ၼႂ်းႁူင်းႁဵၼ်းထမ်မၼႆႉ ဢိတ်ႇဢွၵ်ႇမႃး ၸၼ်ႉငဝ်ႈထိုင်ၸၼ်ႉသီႇယဝ်ႉ ယၢမ်းလဵဝ် တိုၵ်ႉႁၢင်ႈႁႅၼ်း ၸၼ်ႉႁႃႈဝႆႉထႅင်ႈယူႇ။ လိူဝ်ၼၼ်ႉ ပပ်ႉၵႅမ်မိုဝ်း ၶူး သွၼ်/မေႃသွၼ် ၶဝ်ၵေႃႈ ဢိတ်ႇဢွၵ်ႇႁဵတ်းဝႆႉ တႃႇၶူးသွၼ်ၶဝ် ပေႃးတေလႆႈယိပ်းတိုဝ်းၵႂႃႇ။ ထႅင်ႈၾၢႆႇၼိုင်ႈၵေႃႈ ဢၼ်ႁဝ်းတေပိုတ်ႇပၢင်ၾိုၵ်းၽွၼ်ႉ တီႈၼမ်ႉၸၢင်ၼႆႉ ယွၼ်ႉဝႃႈ ပဵၼ်တွၼ်ႈပွတ်းၸၢၼ်းလႄႈ ၸဝ်ႈတူၼ် ၶူးႁဝ်းၶဝ် မေႃသွၼ်ႁဝ်းၶဝ် ဢၼ်ယူႇသဝ်းတွၼ်ႈပွတ်းၸၢၼ်းၼၼ်ႉ ၶႅၼ်းတေႃႈ ဢဝ်ၸႂ်သႂ်ႇသေ ၶဝ်ႈပႃးၸွမ်းယႂ်ႇၼမ်သေၵမ်း” ဝႃႈၼႆ။
ၵေႃပွင်ပဵၼ်ႁူင်းႁဵၼ်းထမ်မၼႆႉ မီးယိူင်းဢၢၼ်းလူင် 5 ၶေႃႈ – 1. ႁႂ်ႈမေႃၶဝ်ႈဢွၵ်ႇဝတ်ႉဝႃး ႁႂ်ႈမေႃၼပ်ႉ ယမ်ၽြႃး ၊ တြႃး ၊ သင်ၶ ။ 2. ႁႂ်ႈမီး တၢင်းႁူႉလွင်ႈထမ်မလႄႈ ႁႂ်ႈမီးတၢင်းယၢမ်ႈလီ ။ 3. ႁႂ်ႈဢဝ်ထမ်မ သေပူၵ်းပွင်ၽဝ ၸဝ်ႈၵဝ်ႇ ။ 4. ႁႂ်ႈမီးလွင်ႈ ၽွမ်ႉႁူမ်ႈ ။ 5. ႁႂ်ႈမေႃႁၵ်ႉပႅင်းၽႃသႃ သႃသၼႃပုတ်ႉ တိုဝ်းၵမ်ၸွမ်းၵႂၢမ်းသင်ႇ သွၼ်ပုတ်ႉထၸဝ်ႈ– ၸိူဝ်းၼႆႉ ။