ပၼ်ႁႃၼႂ်းၸႄႈမိူင်းရၶႅင်ႇၵူၼ်းတၢႆၼပ်ႉပၢၵ်ႇ ၵူၼ်းပၢႆႈၼပ်ႉမိုၼ်ႇ

သိုၵ်းလူင်ပွင်ၸိုင်ႈမၢၼ်ႈလႄႈ ၸုမ်းယိပ်းၵွင်ႈရူဝ်ႊႁိၼ်ႊၵျႃႇ  မီးလွင်ႈပိုတ်းယိုဝ်းၵၼ် တီႈၼႂ်းမိူင်း ရၶႅင်ႇသေ ႁဵတ်းႁႂ်ႈၸၢဝ်းပုတ်ႉ၊ ၸၢဝ်းရူဝ်ႊႁိၼ်ႊၵျႃႇ ဢွၵ်ႇပၢႆႈယၢၼ်ႁိူၼ်းယေးၼပ်ႉမိုၼ်ႇ။


ဝၼ်းတီႈ 30/08/2017 ႁွင်ႈၵၢၼ်ၶၢဝ်ႇ AP ပိုၼ်ၽၢဝ်ႇဝႃႈ ၸုမ်း ARSA ဢၼ်လႆႈၸိုဝ်ႈဝႃႈၸုမ်း ၵေႃႇၵၢၼ်ႁၢႆႉ ၸၢဝ်းရူဝ်ႊႁိၼ်ႊၵျႃႇ မီးလွင်ႈပိုတ်းယိုဝ်းၵၼ်တင်းသိုၵ်းလူင်ပွင်ၸိုင်ႈမၢၼ်ႈ တီႈမိူင်း မွင်ႇၻေႃး ၸႄႈမိူင်းရၶႅင်ႇသေ ႁဵတ်းႁႂ်ႈမီးၵူၼ်းလူႉတၢႆၼပ်ႉပၢၵ်ႇ မၢတ်ႇၸဵပ်းတင်းၼမ်လႄႈ ဢွၼ်ၵၼ်ပၢႆႈဢွၵ်ႇႁိူၼ်းယေးတီႈယူႇၼပ်ႉမိုၼ်ႇဝႃႈၼႆ။

ၾၢႆႇၼိုင်ႈၵေႃႈသင်ၶၸဝ်ႈၸၢဝ်းပုတ်ႉ ဢဵၼ်ႁႅင်းၼပ်ႉပၢၵ်ႇ ဢွၼ်ၵၼ်ၼႄၵၢင်ၸႂ်တုၵ်ႉယွၼ်းႁႂ်ႈ တပ်ႉသိုၵ်းလူင်ပွင်ၸိုင်ႈ ၵႂၢတ်ႇလၢင်ႉတိုၵ်းတေႃးၸုမ်းၵေႃႇၵၢၼ်ႁၢႆႉတီႈၼႂ်းမိူင်းရၶႅင်ႇ ဝႃႈၼႆ။


ဢၼ်ႊတူဝ်ႊၼိဢူဝ်ႊ ၵူႊတေရႊရဵတ်ႊ ၽူႈၼမ်းၼႂ်း UN လၢတ်ႈတီႈသိုဝ်ႇ AFP ဝႃႈ - “ ငဝ်းလၢႆး ဢၼ်ပဵၼ်ယူႇၼႂ်းမိူင်းရၶႅင်ႇယၢမ်းလဵဝ်ပဵၼ်ဢၼ်လီမႆႈၸႂ်တႄႉ ၵွပ်ႈၼၼ်လႄႈႁႂ်ႈၿင်ႊၵလႃႊ တဵတ်ႊ ၸွႆႈထႅမ်ပၼ်ၵူၼ်းပၢႆႈၽေးၸိူဝ်းၼႆႉ ” ဝႃႈၼႆ။


ၾၢႆႇလူင်ပွင်ၸိုင်ႈၿင်ႊၵလႃႊတဵတ်ႊတႄႉ တုၵ်းယွၼ်းႁႂ်ႈလူင်ပွင်ၸိုင်ႈမၢၼ်ႈ ႁပ်ႉၵူၼ်းၸိူဝ်းၼႆႉ ႁႂ်ႈၶဝ်လႆႈပွၵ်ႈၶိုၼ်းႁိူၼ်းယေးသေ ပၼ်ႁႃဢၼ်ပဵၼ်ၼၼ်ႉၵေႃႈ ႁႂ်ႈၵႄႈလိတ်ႈ တီႈတူၼ်ႈတေႃမၼ်း ဝႃႈၼႆ။


ႁွင်ႈၵၢၼ်ၶၢဝ်ႇရွႆႊၻိူဝ်ႊ ပိုၼ်ၽၢဝ်ႇ 01/09/2017 ဝႃႈ ဢိင်ၼိူဝ် ၸုမ်း ARSA မီးလွင်ႈပိုတ်းယိုဝ်းၵၼ် တင်းသိုၵ်းလူင်ပွင်ၸိုင်ႈမၢၼ်ႈသေ ႁဵတ်းႁႂ်ႈၵူၼ်းလႆႈ လူႉတၢႆ 400 ပၢႆ၊ ၸၢဝ်းရူဝ်ႊႁိၼ်ႊၵျႃႇ 38, 000 ဢွၼ်ၵၼ်ပၢႆၵႂႃႇတၢင်းမိူင်းၿင်ႊၵလႃႊတဵတ်ႊ ၊ ၵူၼ်းဝၢၼ်ႈဢၼ်ဢမ်ႇၸႂ်ႈရူဝ်ႊႁိၼ်ႊၵျႃႇၵေႃႈ လႆႈဢွၼ်ၵၼ်ပၢႆၵႂႃႇယူႇတီႈလွတ်ႈၽေး 11,700 ပၢႆ။


Photo by MGR Online