လုင်းထုၼ်း ၵူၼ်းဝၢၼ်ႈပၢင်မႅင်း ပွၵ်ႉပၢင်သႅင်ႇ ဢၼ်ၽုၵ်ႇၵိၼ်မၢၵ်ႇၵဵင်မႃးၶၢဝ်းတၢင်း 30 ပီပၢႆလၢတ်ႈဝႃႈ- "ၵႃႈၶၼ်မၢၵ်ႇၵဵင်ၼႆႉ ပိူၼ်ႈမႃးၶၢတ်ႈလုမ်းဢဝ် မိူဝ်ႈပီၵၢႆလႆႈၼိုင်ႈၸွႆႉၼိုင်ႈၵူမ်း (200 ၵျၢတ်ႈ)၊ တီႈတႅမ်ႇမၼ်း ၸွႆႉႁႃႈၶၼ်ၸိူဝ်းၼႆႉ။ ပီၼႆႉႁဝ်းၶႃႈလႆႈ ၸွႆႉၸဵတ်းၶၼ်၊ ပီၵၢႆသမ်ႉၸွႆႉပႅတ်ႇၶၼ်၊ တင်းမူတ်းၼႂ်းသူၼ်ၼႆႉမီးမွၵ်ႈ သၢမ်မိုၼ်ႇၸွႆႉ၊ ပီၼႆႉငဝ်းလၢႆးမၼ်းလႆႈဝႃႈသုမ်းၶႃႈဢေႃႈ၊ ဢမ်ႇပေႃးပဵၼ်ၶၼ်၊ မၢၵ်ႇၵဵင်ၼႆႉပေႃးၼဝ်ႈၵႂႃႇမူတ်း"- ဝႃႈၼႆ။
ၵဵဝ်ႇၵပ်းလွင်ႈၵၢၼ်သိုဝ်ႉၶၢႆ ၵၢၼ်ငိုၼ်းတွင်းၼၼ်ႉ လုင်းထုၼ်းၵေႃႈလၢတ်ႈဝႃႈ- "ပီၼႆႉငိုၼ်းၵေႃႈၶႂ်ႈပၼ်ႇယၢပ်ႇဝႆႉ။ ပီႈၼွင်ႉဢၼ်မႃးသိုဝ်ႉမၢၵ်ႇၵဵင် ပဵၼ်ပီႈၼွင်ႉတၢင်းသီႇပေႃႉ၊ ၶဝ်ဢဝ်ၵႂႃႇၶၢႆတၢင်းမူႇၸေႊ၊ ၶဝ်ႈမိူင်းၶႄႇ၊ လူင်းမၼ်းတလေး"-ဝႃႈၼႆ။
သူၼ်မၢၵ်ႇၵဵင်ၼႆႉ ပေႃးၶုတ်းယွင်း ၽုၵ်ႇမၢၵ်ႇၵဵင်ယဝ်ႉ ပေႃးမၢၵ်ႇၵဵင်ၸပ်းမႃး တႃးၼႂ်းပီဢၼ်ၽုၵ်ႇၼၼ်ႉ လႆႈသႂ်ႇပၼ်ၾုၼ်ႇမွၵ်ႈသွင်ထူင်။ ပေႃးလုမ်းလႃးလႆႈယဝ်ႉ (ထႅင်ႈပီၼိုင်ႈ) ပီမႃးပဵၼ်မၢၵ်ႇမၢႆတူၼ်ႈ၊ ၼိုင်ႈတိုင်ႇ (သီႇသိပ်းဝႃး)ၼႆႉ မၢၵ်ႇမၼ်းတေဢွၵ်ႇမွၵ်ႈသွင်ႁဵင်ၸိူဝ်းၼႆႉ။ ပေႃးသူၼ်မႂ်ႇတီႈမႂ်ႇၼႆႉ ပေႃးၽုၵ်ႇၼိုင်ႈပွၵ်ႈ လႆႈၵိၼ်မွၵ်ႈ 5-6 ပီၼႆႉ။ တိုၼ်းလၢင်းမၼ်းၼိုင်ႈတိုင်ႇပႅတ်ႇႁဵင်၊ တူၼ်ႈၵႃႈမၢၵ်ႇၵဵင်ၼိုင်ႈတူၼ်ႈသီႇၶၼ်ၸိူဝ်းၼႆႉ။ ၵႃႈၾုၼ်ႇမၼ်း ပႃးတင်းၵႃႈၸိူဝ်ႉမၼ်း ၼိုင်ႈတိုင်ႇတိုၼ်းလၢင်းမွၵ်ႈ 4 သႅၼ်၊ ၵႃႈယၢပ်ႇႁဝ်းတႄႉပႆႇသွၼ်ႇ- လုင်းၸၢႆးထုၼ်း လၢတ်ႈ။
ပဵၵ်ႉသမ်ႉဝႃႈ ပီၼႆႉၶၼ်မၢၵ်ႇၵဵင်ဢမ်ႇပဵၼ်ၵၢၼ် မၢၵ်ႇၵဵင်ၼဝ်ႈၼမ် ၸဝ်ႈသူၼ်မၢၵ်ႇၵဵင်ၶဝ်လူႉသုမ်းၼမ်ၵေႃႈ လုင်းၸၢႆးထုၼ်း ယင်းလၢတ်ႈဝႃႈ- "ပီမႃးၵေႃႈတေသိုပ်ႇႁဵတ်းၵႂႃႇယူႇတိၵ်းတိၵ်း၊ ဢီႈသင်ၵေႃႈ မၼ်းဢမ်ႇပဵၼ်ၼၼ်ယူႇတႃႇသေႇ၊ မိူဝ်ႈလူင်းမီးမိူဝ်ႈၶိုၼ်ႈမီး"-ဝႃႈၼႆ။
ၸၢႆးယႃႇမ ဝၢၼ်ႈပၢင်မႅင်း ၸဝ်ႈသူၼ်မၢၵ်ႇၵဵင်ထႅင်ႈၵေႃႉၼိုင်ႈ ၵေႃႈလၢတ်ႈဝႃႈ- "မၢၵ်ႇၵဵင်ထုင်ႉပၢင်မႅင်း ပဵၼ်သႅၼ်းၵၢင်။ ပွတ်းၵုင်းသႃႇ ပဵၼ်သႅၼ်းလုၵ်ႈယႂ်ႇ။ မၢၵ်ႇၵဵင်ၼႆႉ ပေႃးၽုၵ်ႇၼိုင်ႈပွၵ်ႈလႆႈမွၵ်ႈ 4-5 ပီ၊ မီးၵူၼ်းမႃးသိုဝ်ႉၶၢတ်ႈလုမ်းထိုင်တီႈသူၼ်၊ ပေႃးၶၢႆယွႆႈပဵၼ်ထႅင်ႈလၢႆးၼိုင်ႈ။ ပီၼႆႉၶၼ်မၢၵ်ႇၵဵင်ဢမ်ႇမိူၼ်ၸႂ်၊ ပီၼႆႉၵူၼ်းသိုဝ်ႉ (ပွႆးၸႃး)ၶဝ်ၵေႃႈတဵၵ်းၶၼ်၊ ဢၼ်ၼဝ်ႈၼႂ်းသူၼ်ၵေႃႈၼမ်၊ ၵူႈပီၼႆႉၼိုင်ႈၵူမ်းၸိူဝ်းၼႆႉ။ ပီၼႆႉၼိုင်ႈၸွႆႉ ၸွႆႉၸဵတ်းၶၼ်၊ ၼိုင်ႈၵူမ်းဢမ်ႇႁၼ်၊ လွင်ႈမၢၵ်ႇၵဵင်ဢွၵ်ႇတႄႉၵမ်ႈၸိူဝ်ႉမၼ်း၊ ပေႃးၸိူဝ်ႉမၼ်းသီႇမိုၼ်ႇၵေႃႈ ဢွၵ်ႇသီႇမိုၼ်ႇ"-ဝႃႈၼႆ။
ၼႂ်းသူၼ်မၢၵ်ႇၵဵင်ၼႆႉ လိူဝ်သေၽုၵ်ႇမၢၵ်ႇၵဵင်ယဝ်ႉ ၼႂ်းၵႄႈမၼ်းၽုၵ်ႇလႆႈထႅင်ႈမၢၵ်ႇၽိတ်ႉ၊ ႁဵတ်းပဵၼ်တႅဝ်းပဵၼ်ယွင်း၊ ၶႅၼ်ႈမွၵ်ႈဝႃးသွင်ဝႃး ၼႂ်းၵႄႈယွင်းမၼ်းၽုၵ်ႇလႆႈထႅင်ႈထူဝ်ႇလိၼ်ၸိူဝ်းၼႆႉ- ၸၢႆးယႃႇမ ၵေႃႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။