ဝၼ်းတီႈ 13/05/2016 ယၢမ်း 16:00 မူင်း ၸၢႆးဢၢႆႈသႅင်ထွၼ်း ဢွၼ်ႁူဝ် မူႇၸုမ်းၶိူဝ်းတႆး မိူင်းၶွၼ် ၸိုင်ႈမိူင်းၶႄႇ ႁူမ်ႈၵၼ်မႃးၵမ်ႉၸွႆႈ ၵူၼ်းပၢႆႈၽေးသိုၵ်း ဝၢၼ်ႈႁူဝ်ပၢင်ႇ ဢိူင်းမိူင်းဝုၺ်း ၸႄႈဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇ ဢၢပ်ႈမွပ်ႈယိုၼ်ႈပၼ် တီႈၸုမ်းပႃႊတီႊႁူဝ်သိူဝ် ဝဵင်းၼမ်ႉၶမ်း ၶဝ်ႈသၢၼ် 201 ထူင်ပၢႆ ၊ ငိုၼ်းၶႄႇ 4793 ယႅၼ်ႉ ႁူမ်ႈလူၺ်ႈ ၶွင်ၵိၼ်ယမ်ႉလႄႈ ၶူဝ်းၼိုင်ႈတင်းဝႆ ၸဵမ်ၸိူဝ်းၼႆႉ ။
ၸၢႆးဢၢႆႈသႅင်ထွၼ်း ႁူဝ်ပဝ်ႈ မူႇၸုမ်းၶိူဝ်းတႆး မိူင်းၶွၼ် လၢတ်ႈဝႃႈ “ ႁဝ်းၶႃႈ လႆႈငိၼ်းၶၢဝ်ႇ ပီႈၼွင်ႉတႆးႁဝ်း ဝၢၼ်ႈႁူဝ်ပၢင်ႇ ထုၵ်ႇၾႆးမႆႈ ပႅတ်ႈတင်းဝၢၼ်ႈသေ ပဵၼ်ဢၼ်လီမွင်ၸႂ်ၸွမ်းတႄႉၶႃႈ ။ ယွၼ်ႉၼၼ် ၸုမ်းႁဝ်းၶႃႈ ပွင်ပဵၼ်လႆႈၵႃႈႁိုဝ် ၸွႆႈလႆႈၵႃႈၼၼ်ႉ ၼင်ႇႁိုဝ် တေလႆႈႁဵတ်းႁိူၼ်း / ယေး ၊ သိုဝ်ႉၶူဝ်းၶွင် လႄႈ ႁႂ်ႈလႆႈသၢင်ႈၶိုၼ်းဝၢၼ်ႈမႂ်ႇၵႂႃႇ ၸုမ်းႁဝ်းၶႃႈ ၸင်ႇလႆႈၵမ်ႉၸွႆႈထႅမ်မႃးၶႃႈ ။
သိုပ်ႇလၢတ်ႈထႅင်ႈဝႃႈ တႆးႁဝ်းယူႇတီႈလႂ်ၵေႃႈ လူဝ်ႇၽွမ်ႉသဵင်ပဵင်းပၢၵ်ႇၵၼ် ၸွႆႈထႅမ်ၵၼ် တိုၵ်းသူၼ်းလၢတ်ႈၵႂႃႇထႅင်ႈၼင်ႇၼႆ ။
ၸိူင်ႉၼၼ်ၼင်ႇၵဝ်ႇ ဝၼ်းတီႈ 06/06/2016 ပူၼ်ႉမႃးၼႆႉ ၸဝ်ႈတူၼ်ၶူး တွၵ်ႊတိူဝ်ႊ မိလိၼ်တ ဝတ်ႉတႆးပုတ်ႉထသႃသၼႃ မိူင်း(USA) ဢွၼ်ႁူဝ်ၼမ်းၼႃႈ တၵႃသတ်ထ လုင်းၶုၼ်ၾႃး ၊ လုင်းပၼ်ႇၸိၵ်ႉတလႄႈပႃႈၼၢင်းၽွင်း ၶဝ်ၸိူဝ်းၼႆႉၵေႃႈ ၵပ်းသိုပ်ႇၸဝ်ႈတူၼ်ၶူးၼႂ်းပိုၼ်ႉတီႈသေ ၵမ်ႉၸွႆႈငိုၼ်းတွင်းၶူဝ်းၶွင်ပၼ်ၵူၼ်းၺႃးၽေးသိုၵ်း ပွတ်းထုင်ႉပုင်ႇဝူဝ်း ၼွင်ၵႂၢင် ၸႄႈဝဵင်းၵျွၵ်ႉမႄး ။
ၼႂ်းၸိုင်ႈပွတ်းႁွင်ႇၸႄႈဝဵင်းၼမ်ႉၶမ်း ၵျွၵ်ႉမႄး သီႇပေႃႉ ၸိူဝ်းၼႆႉ ဢိင်ၼိူဝ် သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း သိုၵ်း TNLA (တဢၢင်း) ၊ သိုၵ်းတႆး SSPP/SSA ။ ဢိင်ၼိူဝ် သိုၵ်း TNLA တင်း သိုၵ်း RCSS/SSA (လွႆတႆးလႅင်း) ပဵၼ်ပၢင်တိုၵ်းၵၼ်သေ ၵူၼ်းၼႂ်းပိုၼ်ႉတီႈ ၼပ်ႉႁူဝ်ႁဵင်လႆႈပၢႆႈယၢၼ်ႁိူၼ်းယေး တီႈယူႇ ။